Matius 15
15
Parentanna Puang pang adaꞌna ampe-ampena tu Yahudi
(Mrk. 7:1-13)
1Ladu nai anto, bùruꞌ ti pira-pira tu Parisi sola: ung si manarangna i aluku tu Yahudi nai Yerusalem mao i Yesu mingkutiki teꞌ, 2“Aka pùna mantengkai:‑i dasse: adaꞌna ampe-ampeta ti pasikolaMu? Manne:‑mi se dang miase:‑kang.”
3Hampoꞌ na sùmui Yesu teꞌ, “Temmana‑ida ha mantoroꞌi‑ko se parentanna Puang, na tumang atorangmu se. 4Sàbaꞌ na pusua: Puang teꞌ, ‘Sangadi‑i ti amammu pang inammu,’*#15:4a Kel. 20:12. pang, ‘Isai-sai ti ung mampusua: kadetu amanna dea‑raka inanna parallu nipatei.’*#15:4b Kel. 21:17. 5Hampoꞌ u konai: se teꞌ, ‘Ìna tau musua: mao i tudolunna teꞌ, Aka ti àla: ung ku hengi‑ingko se, ku turo:‑mo miluhali pinomba mao i Puang,*#15:5 Tau ung musua: mène: to, hang mabusa:‑i pinanahanna. Sangadinna, miluhali teng dalang mangking hang parallu‑i ti miàdo: aka-aka ung na ampu mao i tudolunna mandului‑i se. Màka: hang tongang‑i moa teꞌ na patùrùnga na pinomba‑ing i hunni. 6baꞌ ha parallu‑i hura: ti tau to miàdo: mao i tudolunna.’ Jadiꞌ, nai atorangmu se teng u hùlìngi‑mo se ti pusuana Puang. 7E tau ung si tangkasi:, mampatu: dio se, malleo: tungka ti ung na pupihuyang nabi Yesaya teꞌ,
8‘TaungKu te, i beuna teng ti Ku na sangadi,
hampoꞌ i laling pinanahanna‑i se Ku na keboꞌi.
9Hari: palleona Ku na pinombai‑i se,
sàbaꞌ atorangna tulino ti ung na pipaturo:‑ing se, na konai: pipaturo: ung nai Koi:.’*#15:8-9 Yes. 29:13.”
Ung mamburerei tau
(Mrk. 7:14-23)
10Na hàngona‑mi Yesu ti tau boso: pang musua: teꞌ, “Pisàdìngi‑ko se mangking u pahang se ti tee! 11Hari:‑da aka ung mintama i takona tau hela mamburerei‑i. Sangadinna, sua:-sua: ung missòhong nai takona tau, dea‑mo to ti ung mamburerei‑i.”
12Ladu nai anto, mao i Yesu ti pasikolaNa mingkutiki teꞌ, “Ta ìsang naꞌ teꞌ suaTa to massinnoko tu Parisi?”
13Hampoꞌ na sùmui Yesu teꞌ, “Nasang linamung ung dang na lamung AmangKu, nibokaꞌa. 14Hau saile: se ti tu Parisi to, ung miluhali nipiama: ung si buta. Pang ìna tau ung buta marrannang tau ung buta, matantu nai iduanna sipolai: marèneꞌ mao i pikung.”
15Musuana‑mi ti Petrus teꞌ, “Pumakàso:‑ingnangka ti dalang sua: to mao i kami.”
16Na sùmui Yesu teꞌ, “Ha u pahang‑mo: se ho naꞌ? 17Ha u ìsang‑mo: se naꞌ teꞌ ung mintama i takona tau mangola: balammang pang tùrung missòhong? 18Hampoꞌ ung missòhong nai takona tau mingaro nai pinanahanna, dea‑mo to ti ung mamburerei‑i. 19Sàbaꞌ nai pinanahanna, sòhong ti tangaꞌ-tangaꞌ ung kadetu ung mambùruꞌ‑ing tau to mampukauꞌ ung dang belo:, dea‑mo mupatei, malahang, kauꞌ ung sikalantùki, mumanau, mampadeaꞌ passabii ung dang tongang, pang mampusua: kadetu tau sintàna:. 20Dea‑mo to ti ung mamburerei tau. Hampoꞌ manne: ung dang miase:‑kang, ha mamburerei‑ida tau.”
Kapatongangangna besa bahine tu Kanaan
(Mrk. 7:24-30)
21Nai anto, kakarang ti Yesu mao i pangalanna kaparentaangna lipu: Tirus pang Sidon. 22Aranna‑mi besa bahine tu Kanaan nai pangalanna lipu: to bùruꞌ sangka: mao i Yesu pang mikei: mikakoang teꞌ, “O Tuang, Hatiꞌna Daud, pulemu‑kaꞌko! Anakàku bahine na katama dihata bulituku pang masantaꞌ tungka.”
23Hampoꞌ na pakaliung teng Yesu. Mindùkuꞌna‑mi ti pasikolaNa mampalau teꞌ, “Suo:‑i sumule: ti bahine to, mitaru pòteng i keboꞌta se.”
24Musuana‑mi ti Yesu teꞌ, “Ku nipantuyu‑ko teng mao i dombanna Puang ung si hùling, dea‑mo tu Israel.”
25Hampoꞌ tùrung teng ti bahine to pang mukalimuntuꞌ tumunnuku i heleꞌna Yesu teꞌ, “Pulemu‑kaꞌko Tuang.”
26Hampoꞌ na sùmui Yesu teꞌ, “Hang sipatu:‑ida mangala kinanne: ung niàna:‑ing ana-anaka pang nitammo‑ing asu.”*#15:26 ana-anaka, palleona tu Israel, pang tau ung dang dea tu Israel nirampe asu. Mangkonai: asu, handei: palleona moa teꞌ Puang Yesu manghele polu tau ung dang dea tu Israel. Sangadinna, sàbaꞌ toroꞌna mantarima pasakke, parallu tu Israel dolung, màli: na tau ung dang dea tu Israel.
27Hampoꞌ na sùmui bahine to teꞌ, “Tongang‑da Tuang. Hampoꞌ tòna manne: ti anaka, asu ung i hoiꞌna mejanna tuangna mading‑da ho manganne: ung sikàda:.”
28Musuana‑mi ti Yesu teꞌ, “O Ina:, lammuꞌ ti kapatongangangmu. Na siulaꞌ‑rangmo aka ti ung nu kapelai:.” Tempo dea ho teng to, matalete: ti anakàna.
Yesu mampumatalete: boso: tau ung mipanaꞌ
29Tòna kakarang‑i se nai anto ti Yesu, sumule: mao i minanaꞌ Tasiki Galilea. Nai anto, millanto i besa mungku pang mesong i anto. 30Boso: tau ung bùruꞌ mao i Yesu mambaha tau ung si kule, ung buta, ung na kosu, ung bebe, pang boso: kang ho ung kisai sintàna:. Na taleꞌ‑i se i heleꞌna Yesu pang Na pumatalete:. 31Tau boso: i anto mimàha tungka tòna mangita‑mi se tau ung bebe hela musua:, ung na kosu pang ung kule mammulao, pang ung buta hela paita, màli: na mampaiaho‑i se Puangna tu Israel.
Yesu mampakanne: ùpaꞌ sàbunna tau
(Mrk. 8:1-10)
32Àlo ung kaitàlu nai anto, na hàngo Yesu ti pasikolaNa pang musua: teꞌ, “PinanahangKu malemu mao i dei: se, sàbaꞌ itàlu‑mi se àlona mangulaꞌ‑Kaꞌ, pang hari: hura: na anne:‑i se. Ha mio:‑Kaꞌko massuo:‑i se sumule: pang burorang, pakala malaso pai dalang.”
33Mingkutikìna‑mi ti pasikolaNa teꞌ, “Iakaa nikaonei: mangala ung nianne:-annena i kaoneang ung tunini mène: tee, nipampakanne:‑ing tau ung sama tee?”
34Na kutikìna‑mi Yesu teꞌ, “Pira ti rotimmu se?”
Na sùmui‑i se teꞌ, “Pitu pang pira-pira urung ung si supi:‑i.”
35Na suona‑mi Yesu ti tau boso: mesong i tampo:. 36Na alanna‑mi ti pitu roti pang urung, musumbayang mukurusumangaꞌ, Na tòpe-tòpeke, pang Na àdo:‑ing pasikolaNa na kàlaꞌ-kàlaꞌ‑i se mao i tau boso:. 37Manne:‑mi se nasang deaꞌ boro. Nikobu: ti tàranna ung nianne:, pùno: pitu baki:. 38Bosona tau ung manne:, muane pòteng, ara ùpaꞌ sàbunna, ha tiessaꞌ‑i ti bahine pang anaka.
39Na suona‑mi sumule: Yesu, màli: na millanto‑i se i lemmang ti Yesu pang heteꞌ mao i pangalanna lipu: Magadan.
اکنون انتخاب شده:
Matius 15: skx
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
