Matius 14
14
Yohanes Pumpudoiꞌ nipatei
(Mrk. 6:14-29, Luk. 9:7-9)
1Tempo to, Herodes Antipas, ung miluhali ampu parenta i propinsi Galilea, massàding karebanna Yesu. 2Musuana‑mi ti Herodes mao i pegawai-pegawaina teꞌ, “Yohanes Pumpudoiꞌ‑Da ti to, ung tuho: pole! Dea pùna mingkamaꞌ ti kuasa-kuasa i Dea.”
3Sàbaꞌ tempona Yohanes tuho: maang, Herodes‑da ìnang ti ung mampisuo:‑ing nitingkang pang nitarungkuꞌ, ha umma‑i to, kara-kara Herodias bahinena pulengkeꞌna, dea‑mo Pilipus. 4Sàbaꞌ pimmira-mira‑mo na ràho‑i Yohanes ti Herodes teꞌ, “U malahang‑do ti marrampaꞌi adimmu mangala bahinena!” 5Na aku: Herodes ti mampatei Yohanes, hampoꞌ mariaꞌ mao i tau boso: ung mangkonai: teꞌ Yohanes besa nabi.
6Hampoꞌ tòna àlo jadinna Herodes, minariꞌ ti anaka bahinena Herodias i heleꞌna Herodes pang tubùruꞌna. Pinariꞌna mampumasannang pinanahanna Herodes, 7dea pùna musumpa ti Herodes mao i dea manghengiing aka pòteng ti ung na kapelai:.
8Jadiꞌ, to na pusua:‑mo inanna aka ti ung parallu na palau, na padeaꞌ mao i Herodes moa teꞌ, “Ku palau mangking i latenna, u mi hengi‑ing bakàna Yohanes Pumpudoiꞌ i baki.”
9Masussanna‑mi tungka ti pinanahanna Herodes, hampoꞌ tiꞌ sumpanna pang tubùruꞌna, na pisuo:‑ing ti bakàna Yohanes nihengi‑ing anaka bahine to. 10Mampipantuyunna‑ming mallempòki bakàna Yohanes i putarungkuꞌang. 11Nibahanna‑mi ti baka to i baki pang niàdo:‑ing mao i anaka bahine to, pang na baha mao i inanna. 12Bùruꞌna‑mi ti pasikolana Yohanes mangala hatang puntinna pang mangkaburuꞌ, màli: na lumai: se mampatidolu aka to mao i Yesu.
Yesu mampakanne: lima sàbunna tau
(Mrk. 6:30-44, Luk. 9:10-17, Yoh. 6:1-13)
13Tempo Yesu massàding kareba to, millanto i lemmang pang mampalii: kaoneang to, mao i kaoneang ung tunini. Hampoꞌ na sàding tau boso:. Na ulaꞌNa‑mi se mangola: i kàdaꞌ nai lipu:-lipuna‑i se. 14Minguluꞌna‑i ti Yesu nai lemmang, Na ita ti tau ung dang makàdaꞌ bosona. Malemu manghele‑i se. Na pumataletena‑mi ti tau ung si mipanaꞌ i àlaꞌna‑i se.
15I malena, mao ti pasikolaNa mangongi‑ing teꞌ, “Hengia‑mo, pang kaoneang te karao: nai lipu:. Belo:‑da Ta suo:‑mi se sumule:, na lumai: se mambalaꞌ kinanne: pai lipu:.”
16Hampoꞌ na sùmui Yesu teꞌ, “Ha parallu‑ida lumai: se. Dio‑mo se teng ti ung mampakanne:‑i se.”
17Na sùmuinNa‑mi se teꞌ, “Baꞌ lima‑i ti rotingki pang idua‑i ti urung.”
18Na konaina‑mi Yesu teꞌ, “Baha‑ko se mai.” 19Na suona‑mi ti tau boso: mesong i padang. Na alanna‑mi ti lima roti pang idua urung to, tumonga:, pang musumbayang mukurusumangaꞌ. Na tòpe-tòpekèna‑mi to roti pang Na àdo:‑ing pasikolaNa, na kàlaꞌ-kàlaꞌ‑ing tau boso:. 20Mannena‑mi se nasang deaꞌ boro. Ladu manne:, na kobu: pasikolaNa ti tàranna ung nianne:, sampulo: idua rota:. 21Bosona tau ung manne:, muane teng, nikapang ara lima sàbunna, ha tiessaꞌ‑i ti bahine pang anaka.
Yesu mammulao iahona uhai
(Mrk. 6:45-52, Yoh. 6:16-21)
22Ladu nai anto, sàhe: na pantuyu Yesu ti pasikolaNa moa teꞌ, “Millanto‑mo: se i lemmang pang kakarang‑mo: se dolung mao i heteꞌna, Ku massuo:‑kang tau boso: sumule:.” 23Tòna sisaraka‑mi se nasang, làngang‑mo mao i mungku ti Yesu musumbayang. Tòna makarinning‑mo, one: maang i anto ti Yesu na besa‑i.
24Tempo to, lemmangna pasikolaNa karao:‑mo nai kàdaꞌ pang na bebaꞌ-bebaꞌ‑ing balumba sàbaꞌ mantadoꞌi pasaui. 25Kira-kira jaang itàlu i pihengi, bùruꞌ ti Yesu mammulao iahona uhai. 26Hampoꞌ to na ita‑mi se pasikolaNa moa teꞌ ara Tau mammulao iahona uhai, tipadàlaꞌ‑i se tungka. Mikei:-kei:‑i se mariaꞌ teꞌ, “Anitu!”
27Hampoꞌ musua: sahe: ti Yesu moa teꞌ, “Koi:‑ko te. Matana‑ko se! Hau mariaꞌ se!”
28Musuana‑mi ti Petrus teꞌ, “Tuang, ìna U tongang Dio‑do, suo:‑kaꞌ matung mammulao iahona uhai.”
29Na sùmui Yesu teꞌ, “Hàmo:.”
Minguluꞌna‑mi ti Petrus nai lemmang pang mammulao iahona uhai mao i Yesu. 30Hampoꞌ to na sàding ti pasaui baraꞌ, mariaꞌ pang na rara‑mo ti lìli:. Mikakoangna‑mi teꞌ, “Tuang, pulemu‑kaꞌko!”
31Sàhe: na kalàbe: Yesu pang Na ongi‑ing teꞌ, “E tau ung dang mupatongang tungka, aka pu u Mi bata-batai‑do?”
32Millantona‑mi se i lemmang pang mànaꞌ ho ti pasaui. 33Nai anto pasikolaNa ung leta: i lemmang pola: mampinombai‑I. Musua:‑i se moa teꞌ, “Ìnang tongang U Anakàna‑do Puang!”
Yesu mampumatalete: ung si mipanaꞌ i Gennesaret
(Mrk. 6:53-56)
34Tòna deaꞌ‑mi se i heteꞌna, millanto‑i se i Gennesaret. 35Pang tau pai anto mangìsang Yesu, jadiꞌ mampakatu‑i se kareba mao pai lipu:-lipu: i anto. Nibahanna‑mi ti nasang tau ung mipanaꞌ mao i Yesu. 36Na palau‑i se mao i Yesu mangking tau ung si mipanaꞌ nipatinai mangerong, moi ammerona kayaꞌNa pòteng. Pang nasang tau ung mangerong miluhali matalete:.
اکنون انتخاب شده:
Matius 14: skx
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
