Matius 16
16
Tu Parisi pang tu Saduki mampalau tanda kalle-kalleang
(Mrk. 8:11-13, Luk. 11:16, 29, 12:54-56)
1Ara pira-pira tu Parisi pang tu Saduki bùruꞌ mangkakaꞌi Yesu. Na palau‑i se mangking Yesu mampupiita tanda kalle-kalleang ung nai suruga. 2Hampoꞌ na sùmui Yesu teꞌ, “[Tòna lìlia‑mo ti kùlaꞌ, u moa se teꞌ, ‘Kùlaꞌa, sàbaꞌ kùlaꞌ kodo:.’ 3Pang i miluhengi, u moa se ho teꞌ, ‘Urànga, sàbaꞌ makarinning ti langiꞌ.’ Manghele tanda-tanda i langiꞌ, ìnang u paìsang se mantassereꞌ, hampoꞌ ha u ìsang‑ko se ti mantassereꞌ tanda-tanda i latenna mampatu: aka ti ung Ku pukauꞌ!] 4Tau ung kadetu pinanaha pang ung dang minumpu‑da ti ung mampalau tanda kalle-kalleang. Hampoꞌ hang nihengiing se, sangadi tanda nabi Yunus.”*#16:4 tanda nabi Yunus. Hele i 12:39-40. Kapodiꞌna, na pupidolung Yesu moa teꞌ tuhoa‑Da pole nai kamateang àlo ung kaitàlu, mène: Yunus. Na paliina‑mi se Yesu to tau to‑i se millanto i lemmang.
Pipaturona tu Parisi pang tu Saduki nipasikantereang‑ing ragi
(Mrk. 8:14-21)
5Tòna deaꞌa‑mi se i heteꞌna tasiki ti Yesu, màli: na pasàdaꞌ ti pasikolaNa teꞌ mampuhuta‑i se mambaha roti. 6Sileo: musua:‑da ho ti Yesu mao i dei: se teꞌ, “Hele-hele‑ko se ti raginna tu Parisi pang tu Saduki.”
7Silàha:-làhana‑mi se ti pasikolaNa moa teꞌ, “Na pusua: mène: to, sàbaꞌ ta puhuta se ti mambaha roti.”
8Hampoꞌ na ìsang Yesu aka ti ung na silàha:-làhai:‑i se, pùna musua: moa teꞌ, “Aka pu u massilàhai: se roti ung dang ara? Hang kànaꞌ‑i ti kapatongangangmu se! 9Ha u pahang‑mo: se naꞌ? U puhuta‑mo se naꞌ to lima roti ung Ku tòpe-tòpeke mao i lima sàbunna tau? Pira rota: pùno: ti tàranna ung nianne: ung nu kobu: se? 10Pang mangaka ho ti pitu roti mao i ùpaꞌ sàbunna tau? Pira baki: pùno: ti tàranna ung nianne: ung nu kobu: se? 11Mangaka pu dang nu pahang‑ko se moa teꞌ handei:‑Ko roti ti ung Ku patu:? Hampoꞌ u Ku pakainaꞌ se pole teꞌ, Hele-hele‑ko se ti raginna tu Parisi pang tu Saduki.”
12Nai anto, màli: na makàso: mao i pasikolaNa moa teꞌ Yesu massuo:‑i se mihele-hele handei:‑da mao i ragi ung nipake i roti, sangadinna mao i pipaturo:-turona tu Parisi pang tu Saduki.
Pangakuangna Petrus
(Mrk. 8:27-30, Luk. 9:18-21)
13Ara pimbesa, lumai: se ti Yesu i pangalanna kaparentaangna lipu: Kaisarea Pilipi. Tòna bùruꞌ‑mi se one:, mingkutiki mao i pasikolaNa teꞌ, “Pusuana tau, isai‑Kaꞌ ti te?”*#16:13 isai‑Kaꞌ ti te? Sua: Yunani isai ti Anaka Tulino? Yesu mangkonai: Anaka Tulino manturo: kalaeNa.
14Na sùmui‑i se teꞌ, “Ara ung mangkonai:‑Ke Yohanes Pumpudoiꞌ, ara ho ung mangkonai: nabi Elia, minguluꞌ pole, pang ara ho ung mangkonai: Yermia dea‑raka besanna nai nabi sintàna: ung nai lùlung.”*#16:14 Boso: tu Yahudi tempo to mangkonai: moa teꞌ Datu: Pipasalamaꞌ ung bùruꞌa dea‑mo besanna nai nabi ung na patuho: pole Puang nai kamateang. Nabi to mampidolùnging se i laling kapataloang nai poni:-ponina‑i se pang mangkorai: kamardekaang.
15Mingkutikìna‑mi ho pole ti Yesu teꞌ, “Hampoꞌ dio se deꞌ? U Mi konai: se isai?”
16Na sùmuinNa‑mi Simon Petrus teꞌ, “Kinta: dea‑mo Datu: Pipasalamaꞌ, Anakàna Puang ung tuho:.”
17Musuana‑mi ti Yesu mao i dea teꞌ, “Simon anakàna Yona,*#16:17 anakàna Yona. Kona: Yona dea‑mo sua: Ibrani mao i kona: Yohanes, amanna Simon Petrus. Hele i Yoh. 1:42. u maupaꞌ tungka, sàbaꞌ handei:‑da tulino ti ung mampaìsàngi‑ko, sangadinna AmangKu i suruga. 18Pang Ku pusua: ho matung teꞌ, Dio, Ku konai: Petrus, hatu papang. Pang iaho hatu te‑mo*#16:18 hatu te‑mo. Ara pira-pira pumputassereꞌ ung manturo: pangakuangna Petrus i sua: 16. Hele ho i Ep. 2:20, 1Kor. 3:11. ti Ku mampatèdeꞌa jamaaKu, pang kuasa naraka hang helai: mantalo. 19U Ku hengiing konting babana kadatuang suruga. Aka ti ung nu tiliꞌ i lino, nitiliꞌa‑da ho i suruga. Pang aka ti ung nu àna: malleo: i lino, niàna: malleoa‑da ho i suruga.”
20Na apuꞌna‑mi Yesu ti pasikolaNa moa teꞌ, “Hang mading‑mi tungka u pupiìsang se mao i isai-sai pòteng moa teꞌ Koi: dea‑mo Datu: Pipasalamaꞌ.”
Yesu mampusua: kamateangNaa pang mangaka ti dalang tuho: miluhali pasikolaNa
(Mrk. 8:31~– 9:1, Luk. 9:22-27)
21Nai anto, na rara‑mo Yesu ti mampumakàso: mao i pasikolaNa moa teꞌ Dea parallu mao i Yerusalem pang mangola: boso: kamaparriꞌang nai ung si matua:-tua:, kapala-kapala imang, pang ung si manarangna i aluku. Nipateia, hampoꞌ àlo ung kaitàlu, nipatuhoa pole.
22Na kalàbena‑mi Petrus ti Yesu mao i minanaꞌ pang na ràho teꞌ, “Na pakarao:‑rangmi Puang ti aka to Tuang! Harai:‑da U ola: ti aka to!”
23Hampoꞌ mingkuhaling ti Yesu pang musua: mao i Petrus teꞌ, “Malai‑ko mao i keboꞌ ti dio Iblisiꞌ! U miluhali hatu pintodoang mao i Koi:. Sàbaꞌ pantangaꞌmu ti, pantangaꞌ tulino, handei: pantangaꞌ mui Puang.”
24Musuana‑mi ti Yesu mao i pasikolaNa teꞌ, “Tau ung mio: mangulaꞌ‑Kaꞌ, parallu mampalii: kalinoangna, pang mangkoha: oròngangna, pang tùrung mangulaꞌ‑Kaꞌ. 25Sàbaꞌ isai-sai ti ung mangkeboꞌi‑Kaꞌ mangking mampasalamaꞌ kalaena i lino tee, kahùlìngànga katuhoangna. Hampoꞌ isai-sai ti tau ung marìngang kahùlìngang katuhoangna sàbaꞌ Koi:, tau to mangkoraia katuhoang. 26Aka ti maupaꞌna mao i tau, ìna nasang i lino tee na ampui, hampoꞌ kahùlìngang katuhoangna? Mading naꞌ ti kasukiꞌang nipantukaꞌ‑ing katuhoang? 27Hang masaii: hura: na bùruꞌ ti Anaka Tulino sola: malaikaꞌ-malaikaꞌNa i laling kamalabiꞌangna AmanNa, pang tempo to, mambalaꞌia nasang tau siulaꞌ kauꞌna. 28Matantu te ung Ku pusua: matung e teꞌ Araa i àlaꞌmu se ung dang mangolaa‑kang kamateang i dang mangita‑mi Anaka Tulino bùruꞌ i laling kamakuasaangNa.”
اکنون انتخاب شده:
Matius 16: skx
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
