ປະຖົມມະການ 6
6
ຄວາມຊົ່ວຊ້າຢູ່ໃນໂລກ
1ເມື່ອມະນຸດເລີ່ມເພີ່ມຈຳນວນຂຶ້ນເທິງແຜ່ນດິນໂລກ ແລະ ບັນດາລູກຍິງທັງຫລາຍກໍເກີດມາໃຫ້ແກ່ພວກເຂົາ. 2ບັນດາລູກຊາຍຂອງພຣະເຈົ້າໄດ້ເຫັນວ່າບັນດາລູກສາວຂອງມະນຸດນັ້ນສວຍງາມ ແລ້ວພວກເຂົາກໍແຕ່ງງານກັບຄົນທີ່ພວກເຂົາເລືອກ. 3ແລ້ວພຣະເຈົ້າຢາເວໄດ້ກ່າວວ່າ, “ພຣະວິນຍານຂອງເຮົາຈະບໍ່ຕໍ່ສູ້ກັບ#6:3 ຫລື ວິນຍານຂອງເຮົາຈະບໍ່ຢູ່ໃນມະນຸດຕະຫລອດໄປ, ເພາະພວກເຂົາເປັນມະນຸດທີ່ຕ້ອງຕາຍ#6:3 ຫລື ເສື່ອມໂຊມ ພວກເຂົາຈະມີອາຍຸ 120 ປີ”.
4ໃນສະໄໝນັ້ນ ແລະ ໃນສະໄໝຕໍ່ມາມີຄົນເນຟີລິມອາໄສຢູ່ໃນໂລກ ຄືເມື່ອລູກຊາຍຂອງພຣະເຈົ້າໄດ້ໄປຢູ່ກິນກັບບັນດາລູກສາວຂອງມະນຸດ ແລະ ມີລູກກັບພວກເຂົາ. ພວກເຂົາເປັນວິລະບຸລຸດຂອງຄົນໃນຍຸກບູຮານ, ເປັນຄົນທີ່ມີຊື່ສຽງ.
5ພຣະເຈົ້າຢາເວໄດ້ເຫັນວ່າຄວາມຊົ່ວຂອງມະນຸດໃນໂລກນີ້ເພີ່ມຂຶ້ນຫລາຍຂະໜາດໃດ ແລະ ທຸກຄວາມຄິດຈິດໃຈຂອງມະນຸດກໍມີແຕ່ອ່ຽງໄປຫາຄວາມຊົ່ວຢູ່ຕະຫລອດ. 6ພຣະເຈົ້າຢາເວຈຶ່ງເສຍໃຈຫລາຍທີ່ພຣະອົງໄດ້ສ້າງມະນຸດຂຶ້ນມາເທິງແຜ່ນດິນໂລກ ແລະ ຈິດໃຈຂອງພຣະອົງກໍໄດ້ຮັບຄວາມທໍລະມານຢ່າງໜັກໜ່ວງ. 7ດັ່ງນັ້ນ ພຣະເຈົ້າຢາເວຈຶ່ງກ່າວວ່າ, “ເຮົາຈະກວາດລ້າງມະນຸດທີ່ເຮົາໄດ້ສ້າງຂຶ້ນອອກຈາກຜືນແຜ່ນດິນໂລກ ພ້ອມທັງຝູງສັດ, ຝູງນົກ ແລະ ສັດເລືອຄານ, ເພາະເຮົາເສຍໃຈທີ່ໄດ້ສ້າງພວກເຂົາຂຶ້ນມາ”. 8ແຕ່ໂນອາພົບຄວາມພໍໃຈໃນສາຍຕາຂອງພຣະເຈົ້າຢາເວ.
ໂນອາ ແລະ ນ້ຳຖ້ວມ
9ນີ້ແມ່ນເລື່ອງລາວຂອງໂນອາ ແລະ ຄອບຄົວຂອງເພິ່ນ.
ໂນອາເປັນຄົນຊອບທຳ, ບໍ່ມີຕຳໜິໃນທ່າມກາງຄົນໃນສະໄໝຂອງເພິ່ນ ແລະ ເພິ່ນໄດ້ດຳເນີນຊີວິດກັບພຣະເຈົ້າຢ່າງສັດຊື່. 10ໂນອາມີລູກຊາຍສາມຄົນຄື: ເຊມ, ຮາມ ແລະ ຢາເຟດ.
11ຂະນະນັ້ນໂລກໄດ້ເສື່ອມໂຊມລົງໃນສາຍຕາຂອງພຣະເຈົ້າ ແລະ ເຕັມໄປດ້ວຍຄວາມຮຸນແຮງ. 12ພຣະເຈົ້າເຫັນວ່າໂລກໄດ້ເສື່ອມໂຊມ, ເພາະຄົນທັງໝົດເທິງໂລກໄດ້ເຮັດໃຫ້ວິຖີທາງຂອງພວກເຂົາເສື່ອມໂຊມລົງ. 13ດັ່ງນັ້ນ ພຣະເຈົ້າຈຶ່ງກ່າວກັບໂນອາວ່າ, “ເຮົາກຳລັງຈະນຳຈຸດຈົບມາສູ່ຄົນທັງປວງ, ເພາະວ່າແຜ່ນດິນໂລກເຕັມໄປດ້ວຍຄວາມຮຸນແຮງເພາະພວກເຂົາ. ເຮົາກຳລັງຈະທຳລາຍທັງພວກເຂົາ ແລະ ແຜ່ນດິນໂລກຢ່າງແນ່ນອນ. 14ດັ່ງນັ້ນ ເຈົ້າເອງຈົ່ງສ້າງເຮືອໃຫຍ່ລຳໜຶ່ງຂຶ້ນດ້ວຍໄມ້ແປກ#6:14 ຄວາມໝາຍຂອງພາສາເຮັບເຣີໃນຄຳນີ້ແມ່ນບໍ່ຊັດເຈນ, ຈົ່ງເຮັດໃຫ້ມີຫລາຍຫ້ອງພາຍໃນເຮືອນັ້ນ ແລ້ວຢາດ້ວຍຂີ້ຊີທັງທາງໃນ ແລະ ທາງນອກ. 15ນີ້ແມ່ນວິທີທີ່ເຈົ້າຈະສ້າງເຮືອຄື: ເຮືອຕ້ອງຍາວ 300 ສອກ, ກວ້າງ 50 ສອກ ແລະ ສູງ 30 ສອກ.#6:15 ຄື ຍາວ 135 ແມັດ, ກວ້າງ 23 ແມັດ ແລະ ສູງ 14 ແມັດ 16ຈົ່ງເຮັດຫລັງຄາປົກເຮືອ, ຈົ່ງໃຫ້ມີປ່ອງລະຫວ່າງຫລັງຄາ ແລະ ຕົວເຮືອໄວ້ສູງ 1 ສອກ#6:16 ຫລື ປະມານ 45 ຊັງຕີແມັດ ອ້ອມຮອບເຮືອ.#6:16 ຄວາມໝາຍຂອງພາສາເຮັບເຣີສຳລັບປະໂຫຍກນີ້ແມ່ນບໍ່ຊັດເຈນ ຈົ່ງເຮັດປະຕູປ່ອງໜຶ່ງໄວ້ທີ່ຂ້າງຂອງເຮືອ ແລະ ຈົ່ງເຮັດເປັນຊັ້ນລຸ່ມ, ຊັ້ນກາງ ແລະ ຊັ້ນເທິງ. 17ເຮົາກຳລັງຈະນໍາເອົານ້ຳຖ້ວມມາສູ່ໂລກເພື່ອທຳລາຍທຸກຊີວິດທີ່ຢູ່ໃຕ້ຟ້າສະຫວັນ, ທຸກສິ່ງທີ່ມີລົມຫາຍໃຈແຫ່ງຊີວິດທີ່ຢູ່ໃນນັ້ນ. ທຸກສິ່ງເທິງແຜ່ນດິນໂລກຈະຈິບຫາຍໄປ. 18ແຕ່ເຮົາຈະເຮັດພັນທະສັນຍາຂອງເຮົາກັບເຈົ້າ ແລະ ເຈົ້າຈະເຂົ້າໄປໃນເຮືອ ຄືເຈົ້າເອງ, ບັນດາລູກຊາຍຂອງເຈົ້າ, ເມຍຂອງເຈົ້າ ແລະ ບັນດາລູກໃພ້ຂອງເຈົ້າກໍຢູ່ກັບເຈົ້າ. 19ເຈົ້າຈົ່ງນຳເອົາສິ່ງມີຊີວິດທັງໝົດແນວລະຄູ່ ທັງໂຕຜູ້ ແລະ ໂຕແມ່ ເຂົ້າມາໃນເຮືອເພື່ອຮັກສາສັດເຫລົ່ານັ້ນໃຫ້ມີຊີວິດຢູ່ດ້ວຍກັນກັບເຈົ້າ. 20ນົກທຸກຊະນິດ, ສັດທຸກຊະນິດ, ສັດເລືອຄານທຸກຊະນິດແນວລະຄູ່ຈະມາຫາເຈົ້າເພື່ອຮັກສາຊີວິດໄວ້. 21ໃຫ້ເຈົ້າເອົາອາຫານທຸກຊະນິດທີ່ຈະກິນ ແລະ ເກັບໄວ້ເປັນອາຫານສຳລັບເຈົ້າ ແລະ ສັດເຫລົ່ານັ້ນດ້ວຍ”.
22ໂນອາກໍໄດ້ເຮັດທຸກສິ່ງຕາມທີ່ພຣະເຈົ້າໄດ້ສັ່ງເພິ່ນ.
اکنون انتخاب شده:
ປະຖົມມະການ 6: LCV
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Holy Bible, Lao Contemporary Version™| © 2023, 2025 by Biblica, Inc.|
Used with permission. All rights reserved worldwide.© 2023, 2025 by Biblica, Inc.