1 Corintios 2
2
Tzijonik chrij i Jesucristo chi xripik xaq xtz'aw chwach i Krus
1Ix, wachalal chwach i Cristo, are xinupon chila iwu', are xinpaxsaj i saq laj tzij re i Dios chiwe, nti chomiq taq tzij, chomiq taq nojb'al xinb'ij chiwe. 2Ntaj, man lik xinch'ob' yin, nti jun chik nojb'al kink'ut chiwe tz'aqat in o iwu', xwi re i Jesucristo xaq wach ukamik chwach i krus. 3Are xinupon iwu', nti qas incho'ab', lik kinsiksat rumal inxib'rikil. 4Are xixin-ijla, xaq xinb'ij utzij i Dios chiwe, xinb'ij ti to' chomiq laj taq tzij chi xa sujb'al re innojb'al chiwe. Lik xwi xin-ano chi utewal i Dios kuk'ut ni ucho'ab' re kitab'ej re usuk' yix. 5Keje xin-an ile chiwe man utz kikub'a ik'ux che i Ajwal, rumal ucho'ab' i Dios, rumal ti jun nojb'al chi xa ru' winaq petnaq wi.
Rumal i Lo'laj Utewal i Dios kqetamaj wach unojb'al Ire
6Xwiri, qatzij chi kqalap nimaq taq nojb'al chke ni'pa i jikil chik kik'ux che i Dios. Xwiri i nojb'al chi kqalap yoj petnaq ti ku' winaq, xaq petnaq ti ku' i atol tzij je re uwach i jyub' ta'aj, man ike le xa ksach kiwach. 7Are i nojb'al chi kqab'ij yoj, are unojb'al i Dios chi ujer ani'al olik, are i nojb'al chi kkita ti ub'e i winaq. I nojb'al le uch'ob'om i Dios ujer are k'amaja kuyijb'a i jyub' ta'aj; uch'ob'om yab'al qa'ij yoj. 8I je atol tzij, chi to' je re uwach i jyub' ta'aj, mijun chke xuta ub'e wach uch'ob'om i Dios; wetene xkita ub'e, keje tene ri xkiripo xaq xkitz'aw i Jesús chwach i krus, ire chi lik nim u'ij uchomal. 9Xkita ti ub'e man xe'eloq pacha i tziji chi tz'ib'tal kan chupam uwuj i Dios; kub'ij:
Mijun rilom, mijun utom,
xaq mijun uch'ob'om,
wach i utz uyijb'am i Dios chke konojel ni'pa i k'ax kkina Ire.#2.9 Keje ile tz'ib'tal kanoq: Isaías 64.4 xaq Jeremías 3.16.
10Wo'or, ni'pa ile, i Dios uya'om chqe yoj chi kqata ub'e rumal Utewal. I Lo'laj Utewal i Dios is reta'am ronojel, reta'am wach uch'ob'om i Dios chi k'ax uk'amik usuk' kumal i winaq.
11Yoj, chi oj winaq, mijun chqe reta'am wach o puk'ux jun chik, xwi ire reta'am, xwi i qanima yoj reta'am wach i kqach'ob'o. Xaq keje i Dios ile, xwi Utewal Ire reta'am wach i kuch'ob'o. 12I Lo'laj Utewal i Dios k'unnaq qu' yoj, lik ru' i Dios petnaq wi; are ti jun chi to' re uwach i jyub' ta'aj. I Dios xutaq loq man kraj Ire kqetamaj ronojel i utz chi uyijb'am chqe. 13Are wach i u'aljinsam chqe rumal Utewal, are kojtijin yoj chuk'utik. I tzij chi kqalap yoj, are ti ru' nojb'al chi xa re uwach i jyub' ta'aj. I qatzij yoj yatal chqe rumal Lo'laj Utewal i Dios. Keje ile kqalap i Dios chke i je re chik Ire.
14Jun winaq, we nti Lo'laj Utewal i Dios ru', kukoj taj we jun kulap unojb'al i Dios che; man che ire xa ch'uj laj tzij, xaq lik kuta ti ub'e, man nti Lo'laj Utewal i Dios ru'. 15Xwiri i jun chi o Lo'laj Utewal i Dios ru', reta'am wach i qatzij xaq wach i qatzij taj, ronojel is kuta ub'e. Xwiri ni'pa nti Lo'laj Utewal i Dios ku' keta'am taj wach i qatzij xaq wach i qatzij taj, ronojel is kkita ti ub'e. 16Tz'ib'tal kan chupam uwuj i Dios: ¿Xatab'a o jun winaq reta'am wach unojb'al i Ajwal? ¿Xatab'a o jun kyaw uno'oj ire? Ntaj.#2.16 Keje ile tz'ib'tal kanoq: Isaías 40.13. Xwiri yoj qatzij o i unojb'al i Cristo qu'.
اکنون انتخاب شده:
1 Corintios 2: ACHICUB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Biblia Achí de Cubulco, Derechos reservados de Sociedad Bíblica de Guatemala