1 Corintios 3
3
Qachi'il qib' che i chak re i Dios
1Wachalal chwach i Cristo, are xinupon wi iwu', xinb'ij ti chiwe pacha xinb'ij chke i winaq chi je kojonnaq chik che i Dios. Xixintijoj taj pacha kin-an chke i winaq chi je uk'am chik rumal i Lo'laj Utewal i Dios. O ni uchak xinlapan iwu' pacha xa ix ch'utiq, pacha k'ate xijeq taq b'inik chwach i Cristo. 2Kok'il uk'utik xin-an chiwe. Xin-an chiwe pacha jun ak'al are k'a kutij tz'um ru' unan puk'exel uwa; man yix, pacha k'amaja kixtiki chutijawik i wa. Xwiri, kwil yin, chi wo'or xaq k'amaja kixtiki chutijawik. 3Keje ile kinb'ij, man yix k'a ki'ano pacha kki'an i winaq chi ne te kojonnaq che i Dios: Ktitat ipam che iwachi'il, to' ki'an ch'oj chiwach, xaq kirayij kijachersaj b'i iwib' chiwach. I kixtijin chu'anik, alaj uri chi qas ti kich'ob' i Dios; kixtijin chu'anik pacha kki'an i je ajmak. 4Man we o jun chiwe kub'ij: “Yin in re i ma Pablo”; xaq we o jun chik kub'ij: “Yin in re i ma Apolos”. We keje ile kib'ij, alaj uri chi kixtijin chu'anik pacha kki'an i winaq chi je ajmak.
5¿Wach in-ij yin in ma Pablo? Xaq i ma Apolos, ¿Wach u'ij ire? Yoj nti qa'ij; xa oj rajchak i Dios. Rumal i qachak le, yix xikub'a ik'ux che i Ajwal; yoj chqajujunal xa xqa'an i uchak i Ajwal chi uya'om chqe qa'ano. 6I utzij i Dios keje pacha jun tikon, yin xintiko are xinb'ij utzij i Dios chiwe. Te'uri are i ma Apolos xuja'aj are xixunawsaj wach usuk' ikojonik che i Dios, xwiri are i Dios kuya che chi kk'iy utzij piwanima. 7I jun chi xtikawik, xaq i jun xja'awik, ike le nti ki'ij; xwi i Dios o u'ij, man lik are ire kk'iysawik. 8Pachin i xtikawik xaq pachin i x-anaw i chak che, xaqjun ki'ij, Xwiri i Dios kutoj chke chkijujunal, chrij pacha i kmajaw chke. 9Are i Dios are i rajaw i chak; i yix pacha ix utikon; i yoj xa qachi'il qib' chu'anik uchak chixol yix. Xaq ix keje pacha jun ja chi uyakom i Dios. 10Are ire uya'om inpatan chi are aj-anol ja. Are xinpaxsaj utzij i Dios chiwe, yin are xinkoj ukub'ib'al i ja; xwiri, jub'an chik kkikoj puwi. Xwiri, pachin kkikoj i xan puwi le, chki'ana kwent, lik utz ukojik chki'ana, 11lik chiwila ub'e, man i ukub'ib'al i ja le chi kojtal chik, are i Jesucristo; lik nti chik jun chik. 12Puwi i ukub'ib'al i ja ri o i utz keyakaw ja, lik anpwaq kkikoj che, saqpwaq kkikoj che, xaq chomiq laj taq ab'aj lik paqal rajil kkikoj che. Xwiri o i xaq xa qej kkikojo, xa patz'an, xaq xa k'im. 13Xwiri, k-aljin uri wach i kikojom che are kk'un i k'isb'al ij are ku'an i atb'al tzij i Dios, man i ij le ru' jun a' nim kpetik. I kichak le k-iltaj ni pa a' we kuch'ijo o we kuch'ij taj. 14Ni'pa i chak ki'anom, we xuch'ij i a' le, we xk'at taj, ike kkich'ak uri i kajil tojb'al re i kichak. 15Xwiri we jun, i uchak u'anom we xa xk'atik, nim uri kusacho; xwiri ire ktotaj na pacha taq jun chi xaqpachalo ktotaj pa a' are kk'at i rachoch.
16¿Xatab'a iweta'am taj chi yix ix rachoch i Dios, xaq i Lo'laj Utewal i Dios le jeqel pik'ux? 17Jun, we kusach uwach i rachoch i Dios, xaq ksachsax uri uwach ire rumal i Dios. Man i rachoch i Dios, lik o u'ij xaq elsam re i lo'laj uchak i Dios; i rachoch i Dios le ix are yix.
18Mijun chiwe mut'or rib'. Moq o jun kub'ij chi ire mas nim uno'oj, man is reta'am i no'oj re uwach i jyub' ta'aj; Xwiri chu'ana che rib' chi nti uno'oj chkiwach i to' winaq, man keje ile kuriq uri unojb'al saqil. 19I nojb'al re uwach i jyub' ta'aj chi o u'ij chke i winaq, ile xa ch'uj laj nojb'al chwach i Dios; chupam uwuj i Dios chi tz'ib'tal ujer keje iri kub'ij: “I Dios keuchap i saqlej laj taq winaq ru' kisaqlejal, ku'an chke chi xa ketzaq ni rumal i kinojb'al.”#3.19 Keje ile tz'ib'talik: Job 5.13. 20Xaq kub'ij: “I Ajwal reta'am wach i kkich'ob' i winaq chi mas o kino'oj chwach i jyub' ta'aj; lik reta'am chi nti uchak i kino'oj le.”#3.20 Keje ile tz'ib'tal kanoq: Salmos 94.11. 21Rumali utz taj we jun ku'an taq nim che rib', rumal i ku'ano chi xa ke i winaq chwach ulew. Man ronojel i b'iroxiki lik iwe yix. 22I ma Apolos, i ma Pedro, xaq i ma Cefas, xaq i yin chi in ma Pablo, qonojel oj ajchak chiwe yix. Xaq ronojel ni'pa i olik, is iwe yix; i jyub' ta'aj, i k'aslemal, i kamik, i ij re wo'or, xaq ronojel i ij chi kpetik, is iwe yix, 23man yix ix re i Cristo; xaq i Cristo re i Dios.
اکنون انتخاب شده:
1 Corintios 3: ACHICUB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Biblia Achí de Cubulco, Derechos reservados de Sociedad Bíblica de Guatemala