1 Corintios 1
1
Rutzil wachij
1-2Yin in ma Pablo chi kintz'ib'aj b'i i wuji chiwe. In sik'tal che inpatan chi in apóstol re i Jesucristo man keje ile xraj i Dios chwe. Yin waral, junam ru' i qachalal chwach i Cristo ma Sóstenes, kintaq b'i wuji chiwe yix chi ix jutzob'aj re i Dios chila pa tinimit Corinto. Yix, lik ix re chik i Dios, man ix o chik che i Jesucristo. I Dios ix usik'im ru' man ix u'ulum chik, xaqjun pacha ku'an chke konojel ni'pa i je o chwach i jyub' ta'aj chi kkikoj u'ij i Qajwal Jesucristo; ire are i Kajwal ike xaq are i Qajwal yoj. 3I Qaqajaw Dios xaq i Ajwal Jesucristo chkiya utzil chomal chiwe xaq i chomb'al ib'.
I ma Pablo xutioxij che i Dios
4Lik arewi kintioxij che i Dios iwumal yix, man nim i utz uya'om chiwe rumal i Jesucristo. 5Junam ix o che i Jesucristo, rumali i Dios u'anom chiwe chi lik ix b'eyom pik'ux; uya'om chiwe chi lik nim iweta'am che ire xaq kixtiki chub'ixkil wach iweta'am. 6Iwonojel yix lik ix kojonnaq chik che utzij i Jesucristo. 7Rumali chi lik kramtaj ti utzil chomal re i Dios piwi. Ronojel ile o pi'ab' tz'aqat kiwoy-ej uk'unik tan chik i Qajwal Jesucristo. 8I Dios ku'an ni chiwe chi lik ikub'am ik'ux che k'a pa k'isb'al ij, rumali, ke'eloq chi mijun kkojow imak are kk'un chik i Qajwal Jesucristo. 9I Dios lik ku'an ni pacha ub'im chqe, xaq are ire ix usik'im yix, x-onb'ej chiwe chi junam iwach ru' Uk'ojol, chi Qajwal Jesucristo.
Ujachik kixol i jutaq tzob'aj re i Dios
10Ix, wachalal chwach i Cristo, lik kintz'onoj chiwe pub'i i Qajwal Jesucristo, chi ni'pa i kib'ij chijunamsaj inojb'al che; xaq to' mijachersaj b'i iwib'. Chom chix-ol chiwach, lik chijunamsaj inojb'al ru' wach taq i kich'ob'o. 11Kinb'ij iri chiwe wachalal chwach i Cristo, man o jun chke ralk'uwal ati Cloe ub'im chwe chi o ch'oj chixol chrij ikojonik. 12Intom yin chi yix xaqjun ti inojb'al; o i kkib'ij: “Yin kinterej chrij i ma Pablo”; kecha. Xaq o i kkib'ij: “Yin kinterej chrij i ma Apolos”; kecha. Xaq o i kkib'ij: “Yin kinterej chrij i ma Cefas”; kecha. Xaq o i kkib'ij: “Yin kinterej chrij i Cristo”; kecha. 13Ix, wachalal, ¿Xatab'a i Cristo u'anom k'i che rib'? ¿Xatab'a yin ma Pablo xinkamsax chwach i krus tob'al iwe? ¿Xatab'a xkuxtax inb'i yin piwi are xqajsax ya piwi? 14Mantiox che i Dios man lik mijun chiwe yix xinqajsaj ya puwi, xwi puwi i ma Crispo i ma Gayo. 15Rumali, mijun kub'ij chi xinqajsaj ya puwi xaq we chwij yin kterej wi. 16Xwiri kk'un chink'ux chi xaq xinqajsaj ya pkiwi i ma Estéfanas xaq pkiwi i ralk'uwal, lik nti chik jun chik xinqajsaj ya puwi. 17Man i Cristo xinutaq ti yin chuqajsaxik ya pkiwi i winaq. Inchak yin are ajb'il re i utz laj tzij k'ak' re i Dios, yin xinutaq ti chub'ixkil chomiq taq tzij, man keje ile kinqajsaj ti u'ij i Cristo chi xkikamsaj chwach i krus.
Ru' i Cristo kqariq wi i no'oj xaq i cho'ab'
18O winaq kkich'ob'o chi i ukamik i Cristo chwach i krus tob'al ke, ile xa ch'uj laj tzij. Are i winaq chi kich'ob' ile lik ketotaj taj, man ki'atom kipen chu'anik i utz taj. Xwiri, yoj chi ya xojtotajik are kqata i tzij le, chom kqata, man qeta'am chi o ucho'ab' i Dios che. 19Ke'eloq pacha xub'ij i Dios chupam uwuj ujer:
Kinsachsaj ni kino'oj ni'pa i o kino'oj
xaq chsach ni kib'iwil ni'pa taq i je b'iw.#1.19 Keje ile tz'ib'tal kanoq: Isaías 29.14.
20I Dios uk'utum chi i winaq re uwach i jyub' ta'aj lik nti kinojb'al man kkina taq ike ronojel lik keta'am. Xwiri saq la tzij lik are i o kino'oj are i winaq chi kkita ub'e wach kub'ij i utzij i Dios. 21I Dios lik o uno'oj; man xuya ti retamaxik uwach che jun winaq we rumal taq uno'oj. Ire uch'ob'om chi ketotaj ni'pa i kul kik'ux che rumal utzij chi k'uttal chik chke. Xkikojo, tupu i jub'an winaq kkib'ij chi xa ch'uj laj tzij. 22I aj Judío kkikoj taj man ike kkaj rilik jun k'utb'al re chi lik nim laj il. I aj Grecia winaq kkikoj taj, man to' kkaj kkita nimaq taq nojb'al. 23Xwiri, yoj xwi kqapaxsaj ub'ixkil chi i Jesús are i Cristo chi xripik xaq xtz'aw chwach i krus. I aj Judío winaq tzel kkita ile; i aj Grecia winaq kkib'ij chi xa ch'uj laj tzij. 24Xwiri ni'pa i xe'ul rumal i Dios, we je aj Judío o we je aj Grecia winaq, is keta'am chi i nim laj ucho'ab', nim laj uno'oj i Dios, k-aljinik rumal i Cristo. 25Are wach uch'ob'om i Dios, chi xa ch'uj laj nojb'al kkib'ij i winaq, ch'uj taj; ile lik nim chwach ronojel i kinojb'al i winaq. Are i u'anom ire chi nti qas ucho'ab' kkib'ij i winaq, ile mas nim chwach i kicho'ab' konojel i winaq.
I saq laj tzij ke aj Corinto
26Chk'un chik'ux wach te i'anom yix are xixu'ul i Dios. I winaq kkib'ij chi xa jujun chiwe yix o i no'oj, lik xa jujun chiwe o te ipatan chi o u'ij; xaq xa jujun chiwe chi lik o ki'ij iqajaw ichuch. 27Ni'pa i to' je re uwach i jyub' ta'aj, ike kkib'ij chi yix nti ino'oj. Xwiri i Dios ix ucha'om yix yab'al kik'ix i jub'an chi nimaq kino'oj. Ix ucha'om yix chi nti icho'ab' yab'al kik'ix i jub'an chi o kicho'ab'. 28I Dios xeucha i winaq chi nti ki'ij, nti kichak chkiwach i je re uwach i jyub' ta'aj, xeucha i keajwax taj man ire kusachsaj u'ij ni'pa taq i o u'ij chwach i jyub' ta'aj. 29Keje ile xu'an i Dios, man mijun winaq ktiki chu'anik nim che rib' chwach Ire. 30I Dios u'anom chiwe chi ix o chik che i Jesucristo. Rumal i Cristo, o chik qanojb'al saqil; rumal ire oj utz chik chwach i Dios; rumal ire oj ch'am chik; rumal ire oj elnaq chik pu'ab' itzel. 31Rumali, pacha kub'ij uwuj i Dios chi tz'ib'tal kanoq: “We o jun kraj ku'an nim che rib', are chub'ij uri wach i nim laj anik u'anom i Ajwal che uk'aslemal.”#1.31 Keje ile tz'ib'tal kanoq: Jeremías 9.23-24.
اکنون انتخاب شده:
1 Corintios 1: ACHICUB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Biblia Achí de Cubulco, Derechos reservados de Sociedad Bíblica de Guatemala