MAAKU 2
2
Gbɛ̃ kɔ̃̀nɔkuna werekɔ̃anaa
(Mat 9:1-8; Luk 5:17-26)
1Gɔrɔ pla gbɛra Yesu ɛ̀ra à tà Kapɛnamu. Kũ ò mà à kú bɛ, 2akũ ò kàkarai dasidasi, gɛ̃ki kun doro bee kpɛ́lɛlɛa, àtɛn Luda yã ońnɛ. 3Akũ ò sùnɛ kũ gbɛ̃ kɔ̃̀nɔkunaao, gbɛ̃nɔn siikɔ̃ mɛ́ ò a sɛna. 4Kũ odi le ò nà kãao Yesuiro pari yãi, akũ ò dìdi kãao kpɛ́ musu, ò kpɛ́ fɔ̃̀ gu kũ Yesu kunwa. Kũ ò fɔ̃̀, akũ ò gyãre pìi kìpa kũ a wútɛbɔɔo. 5Kũ Yesu è ò a náani vĩ, à pì gbɛ̃ kɔ̃̀nɔkunaa pìinɛ: Ma gbɛ̃, n durunnanɔ kɛ̃̀mma. 6Ludayãdannɛri kenɔ vutɛna gwe òtɛn o ń nɛ̀sɛɛ gũn: 7Bɔ́yãi gbɛ̃ dí tɛn o lɛɛ? Àtɛn dɔkɛ kũ Ludaomɛ! Dí mɛ́ ani fɔ̃ à durunnanɔ kɛ̃ḿma, tó adi kɛ Luda ado baasiroo? 8Gwe gɔ̃̀nɔ Yesu dɔ̃̀ a nɛ̀sɛɛ gũn laasun kũ òtɛn lɛ́, akũ à ń lá à pì: Bɔ́yãi átɛn laasun bire taka lɛ́ á nɛ̀sɛɛ gũnn? 9Tó ma pì gbɛ̃ kɔ̃̀nɔkunaa pìinɛ a durunnanɔ kɛ̃̀a, ke tó ma pì à futɛ à a wútɛbɔ sɛ́ à táa o, a kpate mɛ́ à aragaa? 10Ma ò lɛ de àgɔ̃ dɔ̃ kũ Bisãsiri Nɛ́ durunnanɔ kɛ̃mmana iko vĩ zĩtɛ lamɛ. Akũ à ò gbɛ̃ kɔ̃̀nɔkunaa pìinɛ à pì: 11Ma ònnɛ ǹ futɛ ǹ n wútɛbɔ sɛ́ ǹ tá bɛ. 12Akũ à fùtɛ gɔ̃̀nɔ à a wútɛbɔɔ pìi sɛ̀ à bòo gbɛ̃nɔ wára ń pínki. Yã pìi bò ń sarɛ, akũ ò Luda tɔ́ bò ò pì: Ódi yã dí taka e yãro.
Yesu Levi sisinaa
(Mat 9:9-17; Luk 5:27-39)
13Yesu ɛ̀ra à bò à gɛ̀ɛ sɛ̀bɛ lɛ́a. Òtɛn su a kĩnaa dasidasi, akũ àtɛn yã dańnɛ. 14Gɔrɔ kũ àtɛn gɛ̃tɛ, akũ à Alafeu nɛ́ Levi è vutɛna a bɛ'ɔgɔsikin. À pìnɛ: Ǹ mɔ́ ǹ tɛ́mai. Akũ à fùtɛ à tɛ̀i.
15Zĩkea kũ Yesu tɛn pɔ́ ble Levi pì bɛa, bɛ'ɔgɔsirinɔ kũ kifirinɔ tɛn pɔ́ ble kãao dasi kũ a ìbanɔ lɛɛlɛ. Zaakũ gbɛ̃ bire takanɔn tɛ́i dasi. 16Farisi kũ òdi Luda yã dańnɛnɔn kú gwe. Kũ ò è Yesu tɛn pɔ́ ble lɛɛlɛ kũ bɛ'ɔgɔsirinɔ kũ kifirinɔ, akũ ò a ìbanɔ là ò pì: Bɔ́yãin àtɛn pɔ́ ble lɛɛlɛ kũ bɛ'ɔgɔsirinɔ kũ kifirinɔoo? 17Kũ Yesu yã pìi mà, à pìńnɛ: Gbɛ̃ kũ à aafia vĩ bàka kú kũ likita yãoro, sé gyãre. Mádi su gbɛ̃ mananɔ sísiro, sé kifirinɔ.
Lɛ́yĩnaa
(Mat 9:14-17; Luk 5:33-39)
18Yahaya Da'itɛkɛri ìbanɔ kũ Farisinɔ tɛn lɛ́ yĩ, akũ ò sù ò Yesu là ò pì: Yahaya ìbanɔ kũ Farisi ìbanɔ dì lɛ́ yĩ, akũ n ìbanɔ dì yĩ sero bi? 19Akũ Yesu pìńnɛ: Nɔsɛri gbɛ̃nɔ ni lɛ́ yĩ gɔrɔ kũ à kú kũńwo nɔsɛ gũn yá? Oi! Gɔrɔ kũ nɔsɛri kú kũńwo, oni lɛ́ yĩro. 20A gɔrɔ ni su kũ oni nɔsɛri bo ń tɛ́. Gɔrɔ birean oni lɛ́ yĩ sà. 21Òdi pɔ́lɛ dufu nambata di uta zĩlaro. Tó ò kɛ̀ lɛ, a dufu ni sɔ̃kũn oni kɛ̃kɔ̃a, uta zĩ fɔ̃na ni kara. 22Òdi sèwɛ̃ dufu ká tùru zĩ gũnlo. Tó ò kɛ̀ lɛ, wɛ̃ pì ni tùru pũtã, wɛ̃ kũ tùruuo ni yaka ń pínki. Oi, òdi sèwɛ̃ dufu ká tùru dufu gũmmɛ.
Kámmabogɔrɔ yã
(Mat 12:1-21; Luk 6:1-11)
23Kámmabogɔrɔ zĩ kea Yesu tɛn pã buranɔla. Lákũ àtɛn gɛ́ nà a ìbanɔ pɔ́blewɛ wòro òtɛn só. 24Akũ Farisinɔ pìnɛ: Ǹ gwa! Bɔ́yãin òtɛn yã kũ òdi kɛ kámmabogɔrɔ zĩro kɛɛ? 25Akũ Yesu wèḿma à pì: Àdi a kyó kɛ ziki a è lákũ Dauda kɛ̀ gɔrɔ kũ àpii kũ a gbɛ̃nɔ tɛn takasi kɛ, kũ nà tɛni ń dɛroo? 26Sa'oriki Abiata gɔrɔa à gɛ̃̀ Luda ɔnn, à burodi kũ ò kàtɛ Ludanɛɛ sò, kũ gbɛ̃ke a sona zɛ́ vĩro, sé sa'orinɔ, akũ à kpà a gbɛ̃nɔa. 27Yesu ɛ̀ra à pìńnɛ dɔ: Luda kámmabogɔrɔ dìtɛ bisãsiri aafia yãimɛ. Adi kɛ kámmabogɔrɔn à bisãsiri kɛ̀iro. 28Abire yãi Bisãsiri Nɛ́ iko vĩ kámmabogɔrɔa se.
اکنون انتخاب شده:
MAAKU 2: BB2005
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bisã Bible © SIM International, 2005.
