MAAKU 1

Yahaya Da'itɛkɛri waazikɛnaa

(Mat 3:1-17; Luk 3:1-22; Yuh 1:19-28)

1Luda Nɛ́ Yesu Kirisi baarun dí. 2À nàa lákũ à kú annabi Isaya takada gũn nà à pì:

Mani ma zĩ̀ri gbarɛ n ã

à zɛ́ kɛkɛnnɛ.

3À baarukparii kòto ma dɔ gbárannan àtɛn pì:

À zɛ́ kɛkɛ Dikirinɛ,

à zɛ́ kotinanɔ poronɛ súsu.

4Lɛn Yahaya Da'itɛkɛri sù gbárannan lɛ, àtɛn waazi kɛ gbɛ̃nɔnɛ à pì ò nɛ̀sɛ litɛ ò da'itɛ kɛ, Luda ni ń durunnanɔ kɛ̃ḿma. 5Yudea bùsudenɔ kũ Yurusalɛmudenɔ gɛ̀ɛ a kĩnaa ń pínki. Òdi ń durunnanɔ o gupuraa, akũ àdi ń da'itɛ kɛ Yodai. 6Yahaya dìgɔ̃ pɔ́kasa kũ ò tã̀ kũ lakumi kãonɔ dana, àdi bára asa dɔ a pi. Kwa kũ zɔ́'ioomɛ a pɔ́ble ũ. 7À waazi kɛ̀ à pì: Gbɛ̃ke ni su ma gbɛra a gbãna demala. Mádi ká mà kútɛ mà a kyate bobonɛro, 8madì á da'itɛ kɛ kũ íomɛ, àkũ mɛ́ ani á da'itɛ kɛ kũ Luda Ninio.

Yesu da'itɛkɛna

(Mat 3:13-4:11; Luk 3:21-22)

9Gɔrɔ birea Yesu bò Nazɛra, Galili bùsun, à sù, akũ Yahaya a da'itɛ kɛ̀ Yodai. 10Kũ Yesu bikũ̀ gɔ̃̀nɔ, à è ludambɛ tɛn wɛ̃kɔ̃a, Luda Nini tɛn suawa lán potɛ̃nɛ bà. 11Akũ à kòtoo mà bona ludambɛ à pì: Mɔkɔ̃mɛ ma nɛ́ mɛ̀n do légelege yenyĩde ũ, kũ ma pɔ nnamma manamana.

Yesu yɔ̃ogwanaa

(Mat 4:1-11; Luk 4:1-13)

12Akũ Luda Nini a gbàrɛ gbárannan gɔ̃̀nɔ, 13akũ à kú gwe kũ nɔ̀bɔsɛ̃ntɛnɔ ari gɔrɔ bupla, Setan tɛni a yɔ̃ à gwa. Akũ malaikanɔ sù ò kpài.

Yesu ìba káakunɔ sisinaa

(Mat 4:18-22; Luk 5:1-11)

14Yahaya kũnaa gbɛran Yesu tà Galili, àtɛn baaru nna kũ à bò Luda kĩnaa kpá 15à pì: A gɔrɔ kà, kpata kũ à bò Luda kĩnaa kà kãni. À nɛ̀sɛ litɛ à baaru nna pì sí.

16Kũ Yesu tɛn do Galili sɛ̀bɛɛi, à Simɔ kũ a dakũna Anduruoo è, òtɛn birigi kpá sɛ̀bɛɛ pìn, zaakũ sɔrɔkɔnɔmɛ. 17Akũ Yesu pìńnɛ: À mɔ́ à tɛ́mai, mani á kɛ gbɛ̃wɛtɛrinɔ ũ. 18Zaa gwe gɔ̃̀nɔ ò ń biriginɔ tòn ò bò ò tɛ̀i. 19Kũ à gɛ̀ɛ arɛ fíti, à Zebedi nɛ́ Yamisi è kũ a dakũna Yuhanao. Ò kú gó'itɛ gũn, òtɛni ń biriginɔ kɛkɛ. 20À ń sísi gɔ̃̀nɔ, akũ ò ń de Zebedi kũ zamalingakɛrinɔ tò gó gũn gwe ò bò ò tɛ̀i.

Yesu tãnade werekɔ̃ana Kapɛnamu

(Luk 4:31-37)

21Ò gɛ̀ɛ Kapɛnamu. Kũ kámmabogɔrɔ kà, Yesu gɛ̀ɛ aduakɛkpɛn, àtɛn yã dańnɛ. 22A yãdannɛnaa bò ń sarɛ, zaakũ àdi dańnɛ kũ ikooomɛ, adi kɛ lán ludayãdannɛrinɔ pɔ́ bànlo.

23Gɔrɔ birea gɔ̃gbɛ̃ tãnade ke kú aduakɛkpɛn gwe. À wiki lɛ̀ à pì: 24Bɔ́n ó vĩ kɔ̃ ɔ̃ii, Yesu Nazɛra? N su ǹ ó kakatɛn yá? Má dɔ̃ gbɛ̃ kũ ń de a ũ, mɔkɔ̃mmɛ Luda gbɛ̃ kũ à kú adona ũ. 25Akũ Yesu gì tãna pìinɛ à pì: Ǹ yĩtɛ! Ǹ go gbɛ̃ pìia. 26Akũ tãna pì a yĩ̀gãyĩgã à wiki gbãna lɛ̀, akũ à gòa. 27Bídi gbɛ̃nɔ kũ̀ ń pínki, òtɛn kɔ̃ lala: Bɔ́ taka buri yãn díi? Yãdannɛna dufun yá? Àdi yã dańnɛ kũ ikooo fá! Bee kũ tãnanɔ, tó à yã dìtɛńnɛ, òdi a yã mamɛ. 28Akũ kãnto a tɔ́ dà Galili bùsula pínki.

Yesu gyãrenɔ werekɔ̃ana dasi

(Mat 8:14-17; Luk 4:38-41)

29Kũ Yesu bò aduakɛkpɛn, akũ à tà Simɔ kũ Anduruo bɛa gɔ̃̀nɔ kũ Yamisio kũ Yuhanao. 30Simɔ nanɔ da wútɛna, mɛ̀wãna a kũ̀, akũ ò a yã ò Yesunɛ gɔ̃̀nɔ. 31À gɛ̀ɛ a kĩnaa à a kũ̀ a ɔa à a fùtɛ. Akũ a sikonnaa pìi wèrea ari à pɔ́ble kɛ̀ńnɛ.

32Kũ ɔkɔsi kɛ̀, ifãntɛ̃ tɛn gɛ̃ kpɛ́n, ò sùnɛ kũ gyãrenɔ kũ tãnadenɔ ń pínki. 33Wɛ̃tɛdenɔ kàkara a kpɛ́ kpɛ́lɛlɛa ń pínki. 34À gbɛ̃nɔ kɛ̃̀kɔ̃a dasi kũ gyã buri sĩnda pínkio, à tãnanɔ gò gbɛ̃nɔa dasidasi. Àdi tãnanɔ gba zɛ́ ò yã oro, zaakũ ò dɔ̃ gbɛ̃ kũ à de a ũ.

Yesu waazikɛna zaa Galili

(Luk 4:42-44)

35Kɔnkɔkɔnkɔ Yesu fùtɛ à bò à gɛ̀ɛ sɛ̃̀n gusarɛ, àtɛn adua kɛ gwe. 36Akũ Simɔ kũ a gbɛ̃nɔ pɛ̀tɛi. 37Kũ ò bòa, ò pìnɛ: Gbɛ̃ sĩnda pínki tɛni n gbɛka. 38Akũ à pìńnɛ: Ò gɛ́ gu pãndea lakutu kũ à kú ó sarɛnɔ gũn, mani waazi kɛ gwe dɔ, zaakũ abire yãin ma su. 39Lɛmɛ àdigɔ̃ kure Galili bùsu gu sĩnda pínkia lɛ, àdigɔ̃ waazi kɛ ń aduakɛkpɛnɔ gũn àdigɔ̃ tãnanɔ gogoḿma.

Kusude werekɔ̃anaa

(Mat 8:1-4; Luk 5:12-16)

40Akũ kusude ke sù a kĩnaa à kùtɛ à wɛ́ kɛ̀a à pì: Tó ń yei, ĩni fɔ̃ ǹ ma werekɔ̃a swáswa. 41À kɛ̀ Yesunɛ wɛ̃nda, akũ à ɔ bò à kɛ̀a à pì: Má yei, ǹ gɔ̃ swáswa. 42Zaa gwe gɔ̃̀nɔ a kusu làka à gɔ̃̀ swáswa. 43Akũ Yesu a gbàrɛ gɔ̃̀nɔ à gìnɛ à pì: 44Ǹsun o gbɛ̃ke maro. Ǹ gɛ́ ǹ n zĩda mɔ sa'oriinɛ, ǹ sa'opɔ kũ Musa dìtɛ kpá n werekɔ̃ana sèeda ũ gbɛ̃nɔnɛ. 45Kũ à bò, à gɛ̀ɛ àtɛn yã pì o'ońnɛ. Yã pìi dàgula, akũ Yesu dì fɔ̃ à gɛ̃ wɛ̃tɛn gupuraa doro. Àdigɔ̃ kú sɛ̃̀n gusarɛmɛ, akũ òdigɔ̃ bo gu sĩnda pínkia ògɔ̃ su a kĩnaa.

اکنون انتخاب شده:

MAAKU 1: BB2005

های‌لایت

کپی

مقایسه

به اشتراک گذاشتن