MAAKU 3

1Yesu ɛ̀ra à gɛ̀ɛ aduakɛkpɛn. Gɔ̃gbɛ̃ ke kú gwe a ɔ do íbana. 2Gbɛ̃kenɔ tɛn Yesu tàasi ká, tó ani a werekɔ̃a kámmabogɔrɔ zĩ, de ò yã le ò dia. 3Akũ Yesu pì gbɛ̃ kũ a ɔ íbanaa pìinɛ: Ǹ futɛ ǹ zɛ zàa gũn. 4Akũ à ń lá à pì: Kámmabogɔrɔ zĩ à zɛ́ vĩ ò a mana kɛn yá, ke a vãni? Ò gbɛ̃ mì sín yá, ke ò dɛmɛ? Akũ odi yãke oro. 5Yesu ń gwá pɔfɛ̃o à lìkai, zaakũ a pɔ yàka ń sãgbãna yãi. Akũ à pì gɔ̃gbɛ̃ pìinɛ: Ǹ n ɔ pìi poro. Kũ à pòro, akũ a ɔ pìi kɛ̀ a gbɛ̀n. 6Akũ Farisinɔ bɔ̀tɛ ò gɛ̀ɛ ò yã gɔ̃gɔ̃ kũ kína Hɛrɔdu gbɛ̃nɔ gɔ̃̀nɔ, deran oni kɛ nà ò Yesu dɛ.

Dasi kɔ̃kakarana sɛ̀bɛ lɛ́a

7Yesu kũ a ìbanɔ ń zĩda gàńnɛ gwe ò gɛ̀ɛ sɛ̀bɛ lɛ́a. Akũ pari bò Galili ò tɛ̀i. 8Gbɛ̃kenɔ bò Yudea dɔ kũ Yurusalɛmuo kũ Ɛdɔmu bùsuuo kũ Yoda barao kũ Tayao kũ Sidɔ̃o ò sù a kĩnaa dasidasi, kũ ò yã kũ àtɛn kɛnɔ baaruu mà yãi. 9Pari yãi Yesu ò a ìbanɔnɛ ò gó'itɛ soru kɛarɛ, de òsun nakaraawaro yãi. 10Zaakũ Yesu gbɛ̃nɔ wèrekɔ̃a dasi yãi, akũ gyãrenɔ tɛn nakaraa dasi de ò le ò ɔ naa. 11Tãnadenɔ sɔ̃, tó ò a wɛ́ è, òdi su ò wútɛ a arɛmɛ, òdi wiki lɛ́ ò pi: Mɔkɔ̃mmɛ Luda Nɛ́ ũ. 12Akũ Yesu dì gíńnɛ ò o gbɛ̃ kũ á de a ũ.

Yesu zĩ̀ri gbɛ̃nɔn kuri awɛɛplanɔ ditɛnaa

(Mat 10:1-4; Luk 6:12-16)

13Kũ Yesu dìdi kpia, à gbɛ̃ kũ à yeinɔ sìsiai, akũ ò sù a kĩnaa. 14Akũ à gbɛ̃nɔn kuri awɛɛplanɔ dìtɛ ògɔ̃ kú kãao, de àgɔ̃ ń zĩ waazi kɛ, 15ògɔ̃ iko vĩ ò tãnanɔ goḿma. À tɔ́ kpàńnɛ zĩ̀rinɔ. 16Ń tɔ́n dí: Simɔ kũ à tɔ́ kpànɛ Pita. 17Zebedi nɛ́ Yamisi kũ a dakũna Yuhanao. À tɔ́ kpàńnɛ Bɔanɛgɛ. Tɔ́ bire pì surapatammarinɔ. 18Abire gbɛra Anduru, Filipi, Batɔlɔmiu, Matiu, Tomasi, Alafeu nɛ́ Yamisi, Tadeu, Simɔ Kokaride 19kũ Yudasi Isikariɔti kũ à bò a kpɛo.

Tãnagona gbɛ̃nɔa

(Mat 12:22-32; Luk 11:14-23)

20Kũ Yesu tà bɛ, akũ gbɛ̃nɔ ɛ̀ra ò kàkara dɔ dasi, akũ Yesu kũ a ìbanɔ dí zɛ́ le ò pɔ́ blè sero. 21Kũ a bedenɔ yã pìi mà, ò dà zɛ́n ò a gbɛsɛ, zaakũ òtɛn pi ĩa kàamɛ.

22Ludayãdannɛri kũ ò bò Yurusalɛmu ò sùnɔ pì: À Bɛlɛzɛbubu vĩ, tãnanɔ kína pì gbãnan àdi tãna gooḿma. 23Akũ Yesu ń sísiai à yãlɛkɔ̃ana òńnɛ à pì: Setan ni fɔ̃ à a zĩda goḿma yá? 24Tó kpata gbɛ̃nɔ ibɛrɛɛ sɛ̀ kũ kɔ̃o, kpata pì ni gì kɛ yá? 25Tó bɛ kɛ̃̀kɔ̃a lɛu pla, akũ ibɛrɛ kú ń dagura, bɛ pì ni gì kɛ yá? 26Tó Setan ibɛrɛɛ sɛ̀ kũ a zĩda gbɛ̃nɔ ò kɛ̃̀kɔ̃a, ani gì kɛro, ani mì dɛmɛ. 27Gbɛ̃ke ni fɔ̃ à gɛ̃ gɔ̃sa gbãna kpɛ́n à a pɔ́nɔ sɛ́tɛro, séto à a yĩ̀ gĩa, gbasa à a kpɛ́ wara.

28Yãpuran matɛn oárɛ, Luda ni gbɛ̃nɔ durunnanɔ kɛ̃ḿma kũ a tɔ́ vãni kũ òdi sísinɔ pínki, 29ama tó gbɛ̃ Luda Nini tɔ́ vãni sìsi, ani kɛ̃aro, zaakũ ade durunna kũ àdi sí kɛ̃ḿmaro kɛ̀mɛ. 30Yesu ò lɛ kũ ò pì à tãna vĩ yãimɛ.

Yesu danɛnɔ

(Mat 12:46-50; Luk 8:19-21)

31Kũ a da kũ a dakũnanɔ kà, ò zɛ̀ bàai, akũ ò gbɛ̃ zĩ̀ ò a sísi. 32Gbɛ̃nɔn vutɛna ò likai dasi, akũ ò pìnɛ: Ǹ gwa! N da kũ n dakũnanɔ zɛ bàai òtɛni n gbɛka. 33Akũ à wèḿma à pì: Dín ma da kũ ma dakũnanɔ ũu? 34Akũ à gbɛ̃ kũ ò vutɛnaainɔ gwà à pì: Ma da kũ ma dakũnanɔn dí. 35Gbɛ̃ kũ àdi Luda pɔyenyĩna kɛmɛ ma dakũna kũ ma dãreo kũ ma dao ũ.

اکنون انتخاب شده:

MAAKU 3: BB2005

های‌لایت

کپی

مقایسه

به اشتراک گذاشتن