Mar 6
6
Nazarɛti minin ba golee Yezu li wa
(Mat 13.53-58; Luk 4.16-30)
1Yezu soo á n bɔ bɛa bǎã lɛ nɛ. A bɛ́ á too kiwi mɛn nɛ, a kialandɛnan nə́ kɔ lɛ, ǹ nə́ woo walan. 2*Susu ǹ pii pinaa, á yoo á minin daraa Zuifun lɛsɔkɔn kion. Min gigiã mɛn tumaa na a lɛ ma, bɛn nə́ n kaãbaa parsiini, ǹ nə́ goã pii: «Eebe, a n boe ka kɛ-n maa? Die na á yiridɛnaabaa kɛ kɔ la? Wàa ǹ kaãbaa ǹ siin man kɛn nɛ a tá ǹ zɛnɛɛ? 3A din da-sɛlɛli kɛ lɛ bie wa ya? Mariya a nɛ kɛ lɛ bie wa? Ǹ dɔɔ̃ngiĩ bie ka Zaaki ni, ka Zoze ne ka Zude laanka Simɔn nɛ wa? Ǹ miãnɛnɛn bie ke kun ka wɔsɛn nɛ kànaa wa ya?»
Bɛ lɛ na á toa, ǹ nə́ n piã nɛ.
4 #
Zaã 4.44
Yezu tɔ́n pɛ ǹ nɛ: «Lawa a boo gii-dali yii a puusə koe bǎã kɔ́n nɛ wa, bɛ̀ á n bɔ a din a yɛ ǹ kiwi ni, ka a din dɔɔ̃nɔn laanka a din a sumu minin bii.»
5Yezu na á n gɔn da busulən kɔnɔn la walan, á ǹ kaka kɔ. Bɛ̀ á n bɔ bɛ nɛ, a boo la á kaãbaa ǹ sii kɔ́n zɛnaa walan wa. 6Ǹ dinin golee Yezu li baã kɛ lɛ-n á kaãbaa da Yezu ganaa.
Yezu na a kialandɛnan dia dí-a ka yɔrɔ mɛn nɛ
(Mat 10.5-15; Luk 9.1-6)
Bɛ kio, Yezu goã n bibiĩ lɛ-a ǹ kiwin ni á n minin darɛɛ. 7Yezu lɛ dia a kialandɛnaa fulupaa lɛ la, á ǹ dia dí-a min papaa. Á nɔ̀ɔnɔn loo ǹ pàã kɔ ǹ la, 8#Luk 10.4-11 á pɛ ǹ nɛ: «Bɛ̀ á n bɔ bàbàla nɛ, ka nyan toa ka màn kɔ́n saa zii tɔ-wɔ lɛ taman yii wa. Ka baran buuru saa wa, ka baran nyankɔ ǹ bɔnaa saa wa, ka baran wɔrɔ dɔ saa ka da kaa zéwo-n wa. 9Ka kɔsɔn wɔ ka gòã ganaa, sɛnɛ, ka baran dɔnkɛ paa kaa kɔn la wa.»
10Á wusoo á pɛ ǹ nɛ doo: «Bɛ̀ ka dɔ kiwi mɛn-a, ka bɛ́ re n yui kion mɛn nɛ, ka goã bɛa kion lɛ-n miɛ̃, yǎa ka wo bǎã kɔsɔ-n doe. 11#NDS 13.51 Bɛ̀ bǎã mɛn a minin nə́ n piã, mà ka baran n yu ǹsɛn la wa. Bɛ̀ ǹ nə́ n piã, ǹ nə n too kɔ ka lon wa, ka n gòã gusuũ duduu, ka soo ka n bɔ walan: Bɛ n gɔn waa ǹ sii lɛa ǹ wɔ paǹ li.»
12A kialandɛnan lɛn nə́ woo ǹ nə́ pɛ minin manɛ, mà ǹ doamaa nɛ ǹ nə n taasɛ, ǹ wusoo ǹ sii baraan kio. 13#Zaaki 5.14 Ǹ nə́ nɔ̀ɔn gigiã loo ǹ nə́ ǹ bɔ minin ganaa, ǹ nə́ nyɔɔ lɔ busulə gigiã ganaa ǹ nə́ ǹ kaka kɔ.
Zaã, batɛmu-dali a gɛ̀
(Mat 14.1-12; Luk 9.7-9)
14 #
Mat 16.14; Mar 8.28; Luk 9.19 Bɛa biikoo lɛ li, kii Erɔdi dɔ́ Yezu boo ma, a giala, a tɔ bɔ bǎã tumaa nɛ. Min tɛn na á goã pii mà Zaã, *batɛmu-dali yii na á kaa á n bɔ geren bii, mà bɛ lɛ na á toa pàã tá a lon á kaãbaa ǹ siin zɛnɛɛ.
15Min tɛn dɔ mà Lawa a boo gii-dali Yilii mɛn doamaa bɛ́ na a daa, mà bɛ lɛ nɛ.
Ǹ tɛn dɔ mà a laanka Lawa a lɛlɛ a boo gii-dalin kɛn lɛn man goon.
16Erɔdi bɛ́ á bɛ ma ǹ mɛn waáraa, á tɔ́n pɛ mà asɛ pɛ, mà ǹ Zaã mɛn lɛ mìi kuru lɛlɛ, mà a din lɛ nɛ, mà a yii na á wusoo á kaa.
17 #
Luk 3.19-20
Zaã mìi lɛ a kurii saa màn mɛn li á ke: Erɔdi na á Erɔdiadi saa lɔ lɛa, a da yaa a din dɔ diɛ̃giĩ Filipi a lɔ nɛ. 18Zaã tɔ́n pɛ nɛ mà a doamaa bie a ǹ diɛ̃giĩ lɛ a lɔ lɛ kũ a si la, a baa a lɔ lɛa wa. 19Bɛ lɛ nɛ, Erɔdiadi foo yoo Zaã li á la yii ni, á goã giɛ a dɛ ǹ gɔn li. Erɔdi tɔ́n pɛ, mà ǹ Zaã kũ ǹ yii ǹ da kòso-n. Á goã Zaã tamaɛ, a ba li mà Erɔdiadi dɛ wa. 20Erɔdi goã nyɛ́ɛ biɛ Zaã nɛ, a giala, á dɔ̃ mà Zaã n Lawa a min sonbore lɛa. Á goã kɔɔ̃n a ganaa a n too kɔ Zaã a boo li, sɛnɛ, bɛ̀ a tá n too koe li, a yiri yii nə n lɔloɛkɔn.
21Sɛnɛ, Erɔdi a yɛ ǹ zɔ́n zɛnaa pinaa na á n baa Erɔdiadi a lɛawaa sonbore lɛa. Bɛ lɛ a pinaa, Erɔdi màn-bii gole zɛnaa a pàã a mìilandɛnan manɛ ka sɔraasin goledɛnan laanka Galilee gána a min dadaran nɛ. 22Erɔdiadi a nɛlɔ wɔ ǹ bii walan, á bɛ̀ baa, bɛ́ kɔɔ̃n kɔ Erɔdi laanka a min mɛnɛn bíi màn-bii ganaa. Erɔdi tɔ́n pɛ nɛniɛ lɛ nɛ mà a bɛ́ màn mɛn li, mà a pɛ asɛ nɛ, mà asɛ á die koe la.
23Á tɔ́n liɛ kɛ wɔ nɛ mà a bɛ́ re màn woo màn nyankoe asɛ lon, mà asɛ á die koe la, haalɛ ta asɛ a pàã lɛ a talɛɛ din ni.
24Nɛniɛ lɛ soo á woo nɔ̀n da ǹ dan la mà asɛ pɛ nɛ mà a wàa kɔ?
Ǹ dan pɛ mà a pɛ nɛ mà Zaã, batɛmu-dali ke, mà a bɛ mìi kɔ.
25Nɛniɛ lɛ nə́ n nanaa á woo kii li, á pɛ mà Zaã, batɛmu-dali ke, mà asɛ n giɛ li, a bɛ mìi kɔ asɛ la màn nɛ sisia!
26Kii nə́ n yɔrɔ kɔsɛ parsiini, sɛnɛ, a boe la a n lɛ bɔ doɛ̃ doo wa, a giala, a min mɛnɛn bíi, á n liɛ ǹ tumaa yɔrɔ-a. 27Bɛa bǎã-n gɔrɔ, a sɔraasin giĩ mɛn a dí bɛ́ ka bɛ nɛ, á bɛ dia, mà a wo Zaã mìi na, a da nɛ. Sɔraasin giĩ lɛ woo wɔ kòso kion, á Zaã mìi kuru. 28Bɛ kio, á daa ka a mìi lɛ-n màn nɛ, á kɔ nɛniɛ lɛ la, nɛniɛ lɛ dɔ́ tɔ́n saa á kɔ ǹ dan la.
29Zaã a kialandɛnan bɛ́ ǹ nə́ bɛ ma ǹ mɛn waáraa, ǹ nə́ daa a gere saa ǹ nə́ woo bĩ.
Yezu minbuiin duu sooro too ka màn-bii ni
(Mat 14.13-21; Luk 9.10-17; Zaã 6.1-14)
30Dia dí-a wolen lɛn nə́ sii mɛn tumaa zɛnaa, ǹ minin daraa sii mɛn tumaa ganaa, ǹ nə́ wusoo ǹ nə́ daa Yezu li, ǹ ná a tumaa laakalaa nɛ. 31Woo a daa wolen nə́ mɔnaa parsiini, haalɛ biikoo din ba Yezu laanka a kialandɛnan lon ǹ tá màn bii wa. Bɛ lɛ nɛ á tɔ́n pɛ ǹ nɛ mà ǹ da kun ka asɛ nɛ bǎã kɔ́n nɛ tiãlɛa, ǹ nə n susu boɛɛn nɛ.
32Ǹ dininsɔɔ̃nɔn nə́ tɔ́n wɔ tà kuru ǹ goo ne, ǹ nə́ woo tiãlɛa. 33Sɛnɛ, min gigiã nə́ ǹ yɛ woe ǹ nə́ ǹ dɔ̃. Ǹ nə́ bɔ kiwi din tumaa ganaa, ǹ nə́ baa si ka ǹ gòã nɛ, ǹ nə́ dɔ walan Yezu laanka a kialandɛnan nyɛɛnɛ.
34 #
MNS 27.17; Kiin1 22.17; KZS2 18.16; Eze 34.5; Mat 9.36 Yezu bɛ́ á soo á n bɔ goo lɛ nɛ ǹ mɛn waáraa, á zaman gole yɛ. Minbuiinin lɛn makara kũ parsiini, a giala mà ǹ nə́ goã goon ka sèren mɛnɛn bɛ́ lɛduə̃li ná a ba ǹ la wa. A ná a giala kɔ á ǹ daraa sii gigiã ganaa.
35Wasa bɛ́ á mɛ, Yezu a kialandɛnan nə́ n zɔ̃ ǹ nə́ dɔ a li, ǹ nə́ pɛ nɛ: «Wasa mɛ, bǎã lɛ dɔ n don lɛa. 36Minin lɛn toa ǹ wo màn-bii pii ǹ dinin manɛ don kionən laanka lɛ-a ǹ kiwin ni.»
37Yezu pɛ ǹ nɛ: «Ka dinin nə màn-bii kɔ ǹ la ǹ bii.»
Ǹ nə́ tɔ́n pɛ Yezu ni: «Ma n giɛ li wɔsɛn nə lɛawaa biɛpaa a dí nya ǹ giɔ̀mɔ saa wɔ wo buuru pii ni, wɔ tɔn da kɔ ǹ la ǹ sɔ̃?»
38Yezu tɔ́n pɛ ǹ nɛ: «Buuru mìi gia n ka lon? Ka wo ga.»
Ǹ bɛ́ ǹ nə́ nɔ̀n da, ǹ nə́ wusoo ǹ nə́ daa pɛ nɛ mà buuru mìi sooro laanka zɔ̀ màn paa na a tan.
39Bɛ kio, Yezu pɛ a kialandɛnan lɛn manɛ: «Ka zaman lɛ tatala kɔn kuru kuru, ǹ giã tán buu buruu lɛ la.»
40Ǹ nə́ giã tán, kuru tɛn nə min paabiɛ, ǹ tɛn nə min posooro. 41Bɛ kio Yezu bɛa buuru sooro lɛ laanka zɔ̀ màn paa lɛ goa, á n yɔrɔ dia lon á barka da Lawa nɛ. Á buuru lɛ yiyiɛ kɔn á kɔ a kialandɛnan lɛn la, mà ǹ gii zaman lɛ nɛ. Á zɔ̀ màn paa lɛ dɔ gii ǹ tumaa bii. 42Didie màn bii á kã. 43Buuru gialakun laanka zɔ̀ gialakun mɛn goã, a kialandɛnan lɛn nə́ goa ǹ nə́ woo ne, á kankaan fulupaa pã. 44Buuru lɛ a sɔ̃lin man nə́ goã giĩ duu sooro (5 000), lɔn laanka nɛnyaanan gòɛ̃ ná a ba a-n wa.
Yezu n tɔ we tà mu la
(Mat 14.22-33; Zaã 6.15-21)
45Bɛ kio gɔrɔ, Yezu ná a kialandɛnan lɛn kaa tà kuru ǹ goo ne, mà ǹ wo asɛ nyɛɛnɛ Bɛtsayidaa kiwi tà lɛ a lɛkoro goon kɛ ganaa, bɛ̀ asɛ din baa zaman lɛ diɛ zii ǹ woo. 46A bɛ́ á ǹ da zii ǹ mɛn waáraa, á woo dii kele la á Lawa nyankɔ.
47Wɔlɔ bɛ́ á tii, goo lɛ n tà mu bii, bɛ̀ Yezu dinsɔɔ̃ n tán kooro la. 48Á yɛ mà mu kurii tá a kialandɛnan lɛn nɔmiɛ parsiini, a giala, piɛ̃ na á goã n diɛ ǹ lɛ. Koonən wuu pɛ waáraa, Yezu tɔ wɔ mu la a tele ǹ ganaa, a na á baa re ǹ niɛ̃ dinin. 49Ǹ bɛ́ ǹ nə́ yɛ tɔ we mu la, maǹ nə́ baa gere nyín lɛa, ǹ nə́ ǹ lɛ dɛ. 50Ǹ tumaa yɛ lɔn, ǹ nyín yii soo.
Bɛa bǎã-n gɔrɔ, Yezu tɔ́n boo da ǹ nɛ, á pɛ ǹ nɛ: «Ka n foo taã. Masɛ nɛ. Ka baran nyɛ́ɛ baa wa.»
51Bɛ kio á wɔ goo-n kunun ǹ ni, piɛ̃ lɛ tɔ́n golee. A kialandɛnan lɛn nə́ n kaãbaa parsiini haalɛ. 52A giala, a kaãbaa ǹ sii mɛn zɛnaa ka buurun lɛn nɛ, ǹ na a giala ma wa, ǹ yiri a boe la a dɔ a gɔ́ɔ̃-n wa.
Yezu bɛ́ á dí mɛn nya Zenezarɛti gána nɛ
(Mat 14.34-36)
53Ǹ nə́ tà kuru ǹ nə́ nya ǹ nə́ dɔ tán kooro ganaa Zenezarɛti gána nɛ, ǹ nə́ ǹ goo doa tà lɛkoro-a. 54Ǹ bɛ́ ǹ nə́ soo ǹ nə́ n bɔ goo ne ǹ mɛn waáraa, minin nə́ Yezu dɔ̃. 55Ǹ nə́ baa si ǹ nə́ woo a boo da bǎã din tumaa nɛ. Bɛ̀ ǹ nə́ ma mà a tá bǎã woo bǎã nɛ, maǹ busulən goɛ ka ǹ piìn ni bɛ̀ ǹ wo ǹ ne a li. 56Yezu bɛ́ woe bǎã mɛn tumaa nɛ, kiwi bisinin ni, kiwi dadaran laanka don kionən ne, minin man die ka ǹ busulən ne zaman paã ǹ bǎã nɛ, bɛn na a nyankɔ mà a toa ǹsɛn nə n gɔn da a mɔnaa lɛkoro ganaa. Min mɛn tumaa bɛ́ á goã n gɔn diɛ a ganaa, bɛn busu nya.
اکنون انتخاب شده:
Mar 6: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
