Mar 5
5
Yezu n nɔ̀ɔn babaraan lui ǹ boe giĩ goon ganaa
(Mat 8.28-34; Luk 8.26-39)
1Bɛ kio, Yezu laanka a kialandɛnan nə́ woo, ǹ nə́ dɔ Galilee tà lɛ a lɛkoro goon ganaa, Geraazaa minin kiwi. 2Yezu bɛ́ á soo á n bɔ goo lɛ gɔ́ɔ̃-n lɔn gɔrɔ, giĩ goon soo geren bĩ ǹ bǎã nɛ á daa n da lɛ. Nɔ̀ɔnɔn man nə́ goã bɛa giĩ lɛ ganaa. 3A na á goã giɛ̃ geren bĩ ǹ bǎã nɛ. Min kɔ́n ba boe la a kũ a yii doo wa, haalɛ ta ǹ nə́ yii ka fɔlɔ biɛn nɛ. 4Ǹ tɛn nɛ, maǹ a gòãn kiɛ kan nɛ, ǹ fɔlɔ biɛn kaa a gɔnɔn ganaa, sɛnɛ, a n kan lɛ kiɛ, a fɔlɔ biɛn lɛn na. Pàã ba min kɔ́n lon a boo la a kũ a tamaa wa. 5Biikoo yii, penleen ba la wa, tèlò ba la wa, a na á goã n bibiĩ geren bĩ ǹ bǎã nɛ, á wo kelen la, bɛ̀ a n lɛ dɛ, a n din tɔtoɛ̃ ka kɔlɔ nɛ.
6A bɛ́ á Yezu yɛ tiãlɛa, á baa si á woo kaa tán a giulun, 7á n lɛ dɛ kɔsɛkɔsɛ á pɛ: «N wàa dí n masɛ ganaa, Yezu, Lawa gole a Nɛ? Ma nə n gòã kuĩ ka Lawa tɔ nɛ, n nyan fuu nyaa ma-n wa.»
8Giĩ kɛ n pii miɛ̃, a giala mà Yezu na á pɛ nɔ̀ɔnɔn lɛn manɛ, maǹ soo, ǹ nə n bɔ giĩ lɛ nɛ!
9Yezu tɔ́n nɔ̀n da giĩ lɛ la kɛnɛn: «N tɔ n die?»
Á tɔ́n pɛ Yezu ni: «Ma tɔ n "Damata", a giala, wɔsɛn tá gigiã.»
10Nɔ̀ɔnɔn lɛn nə́ Yezu nyankɔ parsiini, mà a baran ǹsɛn loo a ǹsɛn bɔ gána lɛ-n wa.
11Birii gigiã goã walan kele lɛ giala li, giɛ màn-bii li. 12Nɔ̀ɔnɔn lɛn nə́ tɔ́n Yezu nyankɔ mà a ǹsɛn dia ǹ wo kaa bɛa biriin lɛn nɛ.
13Yezu bɛ lɛ a lɛ kɔ ǹ la. Nɔ̀ɔnɔn lɛn nə́ n bɔ giĩ lɛ ganaa, ǹ nə́ woo kaa biriin lɛn nɛ. Biriin lɛn tumaa dɔ birii duu paa (2 000); ǹ nə́ gisĩ kele lɛ la fufuu, ǹ nə́ woo kaa tà mu li, mu nə́ ǹ kũ.
14Biriin-lɛduə̃lin lɛn nə́ baa si ǹ nə́ woo a boo da kiwi gɔ́ɔ̃ dɛnan laanka lalaa lɛ-a dɛnan manɛ. Sii mɛn bɛ́ á n zɛnaa, minin nə́ da ga a ganaa. 15Ǹ bɛ́ ǹ nə́ dɔ Yezu li, nɔ̀ɔn gigiã bɛ́ á goã giĩ mɛn ganaa, ǹ nə́ woo yaa giã-n tán ka mɔnaan nɛ a ganaa, a yiri lɛpiɛ̃maa nɛ. Nyɛ́ɛ nə́ ǹ kũ. 16Min mɛnɛn nə sii mɛn din tumaa yɛ á n zɛnaa nɔ̀ɔndɛnaa lɛ laanka biriin lɛn manɛ, ǹ ná a laakalaa minin lɛn yii ni. 17Bɛ lɛ na á toa ǹ nə́ Yezu nyankɔ mà a woo a n bɔ ǹsɛn gána nɛ.
18Nɔ̀ɔndɛnaa zizi lɛ bɛ́ á Yezu yɛ we tà kuru ǹ goo ne, á Yezu nyankɔ mà a toa asɛ giã kun ni.
19Yezu bɛa lɛ kɔ la wa, sɛnɛ a na á pɛ nɛ mà a wusoo a wo piɛ. Dɛnaa makara bɔ a ganaa, á sii mɛn tumaa zɛnaa nɛ, mà a woo a na a tumaa laakalaa a kion minin manɛ.
20Yezu sii mɛn tumaa zɛnaa giĩ lɛ nɛ, á woo á bɔ á mɛ a tumaa la a ná a laakalaa Kiwi Fù gána nɛ. A ma wole din tumaa nə́ n kaãbaa parsiini.
Yezu Zayirusu a nɛlɔ kaka kɔ
(Mat 9.18-26; Luk 8.40-56)
21Yezu wɔ goo ne, á wusoo á woo tà lɛ a lɛkoro kɔsɔ ganaa. A bɛ́ tà lɛkoro-a, zaman gigiã daa a lɛnpɛnɛ. 22Zuifun lɛsɔkɔn kion a goledɛnaa goon daa, a tɔ n Zayirusu. A bɛ́ á Yezu yɛ lɔn gɔrɔ, á n duwəə tán a giulun. 23A ná a nyankɔ parsiini, á pɛ: «Maa nɛlɔ n die giɛ̃. Ma nə n nyankoe n da n gɔn da la, n Lawa nyankɔ nɛ, màn mɛn bɛ́ toɛ a kaka kɔ a yii goã koo.»
24Yezu woo kun ni. Zaman gole kɔ Yezu lɛ, ǹ nə́ gɛwaa a paǹ yii ganaa. 25Lɔ goon dɔ́ goã walan lɛ-n, lɔn mà kaa ǹ busu na a ganaa á dɔ lɛ̀ fulupaa a nyɛɛ wa. 26Á nɔmaa dagòã-bɔle gigiã gɔn parsiini, a gɔn màn tumaa nya. Bɛ din tumaa kio a pɛsã kɔ wa, sɛnɛ, a n tɔn kaka koe woe. 27-28A bɛ́ á Yezu boo ma minin lɛ-n, a na á taasɛ a din gɔ́ɔ̃ nɛ, mà bɛ̀ asɛ n boe la a n gɔn da a mɔnaa din ganaa kooro, mà asɛ a busu n nyɛɛ. Bɛ lɛ nɛ á tɔ́n daa n dɔ zaman lɛ bii, á golee Yezu kio, á n gɔn da a mɔnaa ganaa.
29A din bǎã-n gɔrɔ mà lɛ golee, á dɔ̃ a din gɔ̀nɔn ganaa mà asɛ a busu nya. 30Bɛa bǎã-n gɔrɔ Yezu dɔ̃ a din ganaa mà pàã kɔ́n soo asɛ nɛ. Á n yɔrɔ bɔyaa zaman lɛ bii, á nɔ̀n da: «Die na á n gɔn da maa mɔnaan ganaa?»
31A kialandɛnan lɛn nə́ tɔ́n pɛ nɛ: «N yii-n zaman lɛ dɔ ganaa n gɛwɛɛ n paǹ yii-a, ma n nɔ̀n diɛ mà die na á n gɔn da nsɛ ganaa?»
32Sɛnɛ, Yezu na á goã giɛ a paran ma li màn mɛn bɛ́ toɛ a sii kɛ lɛ a zɛnaali yɛ. 33Lɔ lɛ gɔ̀nɔn na á goã bìn diɛ nyɛ́ɛ gɔn, a giala sii mɛn bɛ́ á n zɛnaa nɛ a din dɔ̃. Bɛ lɛ nɛ, á woo n duwəə tán Yezu giulun, á sonbore din tumaa pɛ nɛ. 34Yezu tɔ́n pɛ nɛ: «Lɔ lɛɛ, n din a goleemali na á n kirisibaa. Wo ka bǐɛ̃ nɛ, n goã ka là nyantoro ne.»
35Yezu bɛ́ bɛa boo lɛ diɛ miɛ̃, dia dí-a wolen nə́ bɔ goledɛnaa Zayirusu a piɛ, ǹ nə́ daa pɛ nɛ mà a nɛlɔ lɛ gã. Mà wàa na á baa a tá Mìinaa nɔmiɛ doo?
36Sɛnɛ, Yezu nə n too kɔ ǹ boon li wa. Á tɔ́n pɛ Zayirusu ni: «N baran nyɛ́ɛ baa wa, yǎa n goleemali wɔ.»
37A lɛ kɔ mà min kɔ́n wo kun ka asɛ-n wa, bɛ̀ á n bɔ Piɛrɛ nɛ, ka Zaaki laanka ǹ diɛ̃ Zaã nɛ. 38Ǹ bɛ́ ǹ nə́ dɔ lɛsɔkɔn kion a goledɛnaa lɛ a piɛ, Yezu minin yɛ ǹ lala diɛ, ǹ nə wuu pii n lɛ wurii. 39Yezu wɔ kion, á pɛ ǹ nɛ: «Wàa lɛ-dɛ gigiã n ka bɛ nɛ? Wàa na á baa ka á wuu pii? Nɛ lɛ bie á gã wa, a n nyuù we.»
40Ǹ nə́ yaa wɔ Yezu ganaa. Yezu nə́ ǹ tumaa loo á ǹ kaa kanaa, á tɔ́n nɛ lɛ di ni, ka ǹ dan laanka a din a kialandɛnaa sɔɔ lɛ toa kun ka a din ni, á woo ǹ ne nɛ lɛ a waa ǹ kion. 41Á wɔ kion lɛ nɛ, á nɛ lɛ kũ a gɔn ganaa, á pɛ nɛ: «Nɛnɛn lɛɛ, masɛ n pii ni, máa n yoo lon!» (Ka ǹ dinin bɔlɔ nɛ: mà «Talita kumii.»)
42Nɛnɛn lɛ yoo gɔrɔ, a ná a giala kɔ a tɔ wɔ. (Lɛ̀ fulupaa nɛ nɛ). Ǹ bɛ́ ǹ nə́ bɛ yɛ lɔn gɔrɔ, á kaãbaa gole da ǹ ganaa parsiini. 43Sɛnɛ, Yezu nə́ n gɔn waa ǹ nɛ taãn-taãnɛ mà ǹ nyan toa ǹ na a boo da min kɔ́n yii-n wa.
Bɛ kio á tɔ́n pɛ ǹ nɛ: mà ǹ màn-bii kɔ la a bii.
اکنون انتخاب شده:
Mar 5: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
