Mar 7
7
Digolon nə daraa mɛn kɔ
(Mat 15.1-9)
1 *Fariziɛ̃n laanka Zuifun landa sii-daraalin kɔnɔn nə́ bɔ Zeruzalɛmu, ǹ nə́ woo n lɛ sɔkɔn Yezu li. 2Ǹ nə́ Yezu a kialandɛnan tɛnɛn yɛ màn bii ka ǹ gɔn gɔgɔrɛ nɛ, bɛ giala, mà ǹ ba n gɔn pii, á kɔnpii ka landa nɛ ka Fariziɛ̃n bɛ́ zɛnɛɛ lɔn wa.
3Sonbore ne, ka dɔ̃ mà a kɔnpɛ ka ǹ digolon landa siin ni, Fariziɛ̃n laanka Zuifu gialakunun tumaa, ǹ kɔ́n ba màn bii, bɛ̀ a ná a n gɔn pii á kɔnpɛ ka bɛa landa lɛ-n wa. 4Ta ǹ nə́ bɔ pii ni ǹ nə́ daa, bɛ̀ ǹ nə n zoo bɔrɔ wa, ǹ ba màn bii wa. Landa sii gigiã tan ǹ digolon nə́ ǹ nyaa ǹ nɛ, ǹ tá ǹ tamaɛ, ka paanan pii ǹ gɔn sonbore á ke lɔn, ka dɔ́nɔn nɛ, ka fɔlɔ donkolonən laanka giã ǹ goon pii ni.
5Fariziɛ̃n laanka landa sii-daraalin nə́ tɔ́n nɔ̀n da Yezu la: «Wàa na á baa wɔsɛn digolon nə landa siin mɛnɛn koa, nsɛ a kialandɛnan ba bɛn tamaɛ wa, ǹ nə́ màn bii ka ǹ gɔn gɔgɔrɛ nɛ?»
6 #
Iza 29.13
Yezu tɔ́n pɛ ǹ nɛ: – Gɔ́ɔ̃ tì-an kɛn, Izayii lon á Lawa a boo gii da kaa wɔ paǹ li, ka a bɛ á n kiɛ̃ kɛnɛn lɔn:
«Lawa mà minin kɛn man ma guguru koe ka ǹ lɛ nɛ,
sɛnɛ, ǹ gɔ́ɔ̃ wɔlɔ á lui-n ma ganaa.
7 Maǹ ma guguru koe kooro,
a giala, maǹ minbuiinin dí-pɛn siɛ
ǹ tá ǹ biɛ Lawa a dí-pɛn lɛa,
bɛ̀ ǹ minin daraa ǹ ganaa.»
8Yezu pɛ ǹ nɛ: «Ka n Lawa a dí-pɛn diɛ ka para li, ka á koe minbuiinin landa siin lɛ.»
9Yezu tɔ́n pɛ ǹ nɛ doo: – Ka á boe piã la dɛ, ka n piã ka Lawa a dí-pɛ nɛ, ka n ka dinin landa siin lɛn zɛnɛɛ! 10#BBN 20.12; 21.17; TDP 5.16; LWS 20.9 Muizu na á pɛ: «N díi laanka n náa guguru kɔ, bɛ̀ min mɛn boo baraa da ǹ di hinlaa ǹ dan ganaa, ǹ doamaa nɛ n bɛa dɛnaa dɛ a gã.» 11Sɛnɛ kasɛn man pii mà bɛ̀ min pɛ ǹ di laanka ǹ dan nɛ: «Masɛ doamaa bɛ́ nɛ ma màn mɛn kɔ n la "kɔrban nɛ",» ǹ dinin bɔlɔ nɛ bɛ giala mà bɛ n Lawa wɔ lɛa, 12ka n pii mà bɛa dɛnaa doamaa bie a màn kɔn kɔ ǹ di hinlaa ǹ dan la doo wa. 13Bɛa zɛnaa miɛ̃ kɛ lɛ, ka n Lawa a boo lɛ biɛ boo kooro lɛa, ka á ka dinin landa siin pɛsã koe ne, ka dinin nə kɔn daraa ǹ mɛnɛn lɛn ganaa. Ka á bɛa siin kɛn lɛn miã gigiã zɛnɛɛ.
Mànan mɛnɛn bɛ́ min gɔgɔrɛ koe
(Mat 15.10-20)
14Yezu wusoo á lɛ dia zaman lɛ la á pɛ ǹ nɛ: «Ka dinin tumaa nə n too kɔ, ka masɛ a boo kɛ ma. 15Màn woo màn boe kanaa a wɔ min *gɔ́ɔ̃ nɛ, bɛ bie min gɔgɔrɛ koe wa. Màn mɛn bɛ́ boe a din gɔ́ɔ̃ nɛ, bɛ lɛ na a gɔgɔrɛ koe. [ 16Toon bɛ́ ka lon, ka n too kɔ koe!]»
17Yezu bɛ́ á zaman lɛ toa walan ǹ mɛn waáraa, á woo wɔ kion, a kialandɛnan nə́ nɔ̀n da la ka bɛa boo giməə lɛ giala nɛ. 18Yezu tɔ́n pɛ ǹ nɛ: «Ka dɔn man tɔn yiriwɛɛnaan lɛa? Ka a tɔn bɛ doɛ̃ wa? Màn woo màn boe kanaa a wɔ gɔ́ɔ̃ nɛ, bɛ bie min gɔgɔrɛ koe wa. 19A giala, a bie we a foo-n wa, sɛnɛ, a n we a nɔ̀ nɛ, bɛ kio, á tɔ́n soo goɛɛ̀rɛ lɛa.»
Yezu na á bɛa boo kɛ lɛ da á nyaa mà màn-bii din tumaa á boe la a n bii.
20Á tɔ́n wusoo á pɛ ǹ nɛ: «Màn mɛn bɛ́ boe min ni, bɛ lɛ na a gɔgɔrɛ koe. 21Taasiɛ naarɛn mɛnɛn bɛ́ boe min gɔ́ɔ̃ nɛ, bɛ giala mà a foo ne, bɛn lɛn man diɛ kɔrɔbaa ganaa, wurumabaa nɛ, gɛ̀-dɛ nɛ, 22naarɛbaa nɛ, yii a bɔ min kɔsɔ gɔn màn li ni, baraabaa nɛ, din kũ-doɛ̃baã nɛ, minin bebele ne, foo a wuu pɛ nɛ, min kɔsɔ tɔ ziziɛ̃ nɛ, din gole kɔ nɛ, ka baãnaabaa nɛ. 23Bɛa sii kɛ lɛ din tumaa n boe minbuiin gɔ́ɔ̃ nɛ, bɛn lɛn man a gɔgɔrɛ koe.»
Tii lɔ mɛn golee Yezu li
(Mat 15.21-28)
24Bɛ kio, Yezu soo á n bɔ Zuifun gána nɛ, á woo kiwi kɔ́n nɛ kunu Tiiri kiwi ganaa. Á n yu kion kɔ́n nɛ, a goã li mà min kɔ́n dɔ̃ mà asɛ tá walan wa. Sɛnɛ a boo la á n duru wa. 25Lɔ goon ne, nɔ̀ɔnɔn man a nɛlɔ ganaa. A bɛ́ á Yezu boo ma lɔn gɔrɔ, a na á woo a li á n duwəə tán a giulun, 26a ná a nyankɔ mà a nɔ̀ɔnɔn lɛn loo, á ǹ bɔ asɛ a nɛlɔ lɛ ganaa.
Bɛa lɔ kɛ lɛ na á yɛ bɛa gána lɛ nɛ, a bie Zuifu lɛa wa. 27Yezu tɔ́n pɛ nɛ: «A toa nɛnyaanan nə ǹ màn-bii bii, a giala a siĩni min nɛnyaanan màn-bii saa n kɔ ginin la wa.»
28Lɔ lɛ tɔ́n pɛ Yezu ni: «Mìinaa, taãn nɛ. Sɛnɛ, nɛnyaanan bɛ́ toɛ màn-bii bisin mɛn nə́ kiɛ tán, ginin tá bɛ bii sɛn.»
29Yezu tɔ́n pɛ nɛ: «Boo kɛ lɛ n da, bɛ lɛ taman yii, wusoo n wo piɛ, nɔ̀ɔnɔn lɛn nə́ n bɔ n nɛlɔ lɛ ganaa.»
30Á wusoo á woo piɛ, á woo a nɛ lɛ yaa waa-n tán piì la. Nɔ̀ɔnɔn lɛn nə́ n bɔ a ganaa.
Yezu sii mɛn zɛnaa giĩ too tere-a lɛ tere-a nɛ
31Bɛ kio Yezu soo Tiiri gána nɛ, á bɔ Sidɔn, á Kiwi Fù gána wɔsɔ kɔn, á wusoo á daa Galilee tà lɛ-a. 32Minin kɔnɔn nə́ daa giĩ goon kɔ la, too tere-a nɛ, ka bɛ dɔ nɛ, boo diɛ n kaka a ganaa. Ǹ nə́ Yezu nyankɔ mà a n gɔn da la a Lawa nyankɔ nɛ. 33Yezu tɔ́n giĩ lɛ dinsɔɔ̃ kũ, á n zɔ̃ á n bɔ zaman ganaa, á n gòonən wɔ a toon ne, á sɛ̀ kaa, á n gɔn da a lɛwɔn ganaa. 34Bɛ kio, á n yɔrɔ dia lon, á piɛ̃ baã ka fɔɔ, á tɔ́n pɛ giĩ lɛ nɛ: «N toon laanka n lɛ nə n bũ, (ǹ dinin bɔlɔ nɛ mà: "Efataa").»
35Bɛa bǎã-n gɔrɔ, giĩ lɛ toon nə́ n bũ, a lɛwɔn nə́ n fore, a ná a giala kɔ á boo da sɔnbɔraanɛ. 36Yezu nə́ n gɔn waa min din tumaa nɛ, mà ǹ nyan toa ǹ na a boo da min yii-n wa. Sɛnɛ, a bɛ́ ǹ gɔn wɛɛ ǹ nɛ lɔn, ǹ dɔn man màn diɛ a pɛ li miɛ̃. 37Minin nə́ goã n kaãbiɛ a zɛnaa ǹ siin ganaa á la yii ni. Bɛ lɛ nɛ, ǹ nə́ goã pii: «E, ka ga a zɛnaa ǹ siin ganaa dɛ! Ǹ tumaa n siĩn sɔɔ̃nɛ. A n too tere-an dinin diɛ boo ma ganaa, a n lɛ tere-an dɔn diɛ boo diɛ ganaa.»
اکنون انتخاب شده:
Mar 7: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
