Mar 4
4
Yezu boo giməə mɛn da màn tɔrɔ pɛsɛ̃li wɔ paǹ li
(Mat 13.1-9; Luk 8.4-8)
1 #
Luk 5.1-3
Yezu wusoo á minin-daraa giala kɔ Galilee tà lɛ-a doo, zaman gigiã daa a lɛnpɛnɛ, yǎa á wɔ tà kuru ǹ goo ne, á giã mu lalan. Zaman lɛ din tumaa golee tà lɛkoro-a. 2A na á goã ǹ darɛɛ sii gigiã ganaa ka boo giməə ne. A bɛ́ ǹ darɛɛ, a na á goã pii ǹ ni: 3«Ka n too kɔ. Giĩ goon na á soo á woo màn tɔrɔ pɛsɛ̃. 4A bɛ́ màn tɔrɔ lɛ pɛsɛ̃ a wuru-n, ǹ tɛn mɛnaa zii lɛkoro-a. Bàanan nə́ daa ǹ nə́ bɛn mui. 5Ǹ tɛn dɔ́ mɛnaa gɛtaã bǎã nɛ, tii nɔnɔɔ bɛ́ a gigiã bǎã mɛn nɛ wa. Bɛn nə́ bɔ fufuu a giala, tán lɛ giulun ba zulii-n wa. 6Wasa bɛ́ á dii lon, a ná a màn bisin lɛ kũ á bɛbɛnɛ, á dɛ, a giala, gòon taãn ba ǹ lon wa. 7Màn tɔrɔ lɛ tɛn mɛnaa koronkoron nyandɛnaa bǎã nɛ. Nyan bisin lɛ yoo á màn bisin lɛ gɛwaa, a boo la á yoo á màn kɔ́n baa wa. 8Sɛnɛ, màn tɔrɔ lɛ tɛn mɛnaa tán sonbore ne, á bɔ, á gole kɔ, á nàn bɔ, ǹ tɛn nə́ nàn pɔsɔɔ bɔ, ǹ tɛn pɔsɔrɔ bɔ, ǹ tɛn dɔ́ paabiɛ bɔ.»
9Yezu tɔ́n pɛ ǹ nɛ: «Toon bɛ́ ka lon, ka n too kɔ koe!»
Wàa na á baa bɛ̀ Yezu boo giməə da a sii nyaa nɛ?
(Mat 13.10-17; Luk 8.9-10)
10Yezu wɔlɔ bɛ́ á lui zaman lɛ ganaa ǹ mɛn waáraa, a támali wolen laanka a kialandɛnaa fulupaa lɛ tɔ́n pɛ nɛ, mà a boo giməə lɛn giala pɛ ǹsɛn manɛ. 11Yezu tɔ́n pɛ ǹ nɛ:
– Lawa bɛ́ a kiibaa ǹ dí lɛ nyɛɛ lɔn lɛlɛ, a n sii-durii lɛa. Sɛnɛ, bɛ lɛ na á n nyaa kasɛn manɛ sisia. Sɛnɛ, min gialakunun kɛn, sii din tumaa nə n nyɛɛ bɛn manɛ ka boo giməə ne, 12#Iza 6.9-10 màn mɛn bɛ́ toɛ, a kɔnpɛ ka Lawa a boo kɛ nɛ: «Ǹ tá re giɛ ǹ yii laa, sɛnɛ, ǹ yii a re wɔlɔ yii wa, ǹ tá re n too koe ǹ nɔmaa, sɛnɛ, ǹ ba re boo miɛ wa. Bɛ bie wa, ǹ tá re wusii ǹ da Lawa li, Lawa dɔ á die ǹ sii baraan toɛ ǹ nɛ, sɛnɛ, bɛ bɛ́ a bie ǹ yii li ǹ sii lɛa wa.»
Màn tɔrɔ pɛsɛ̃li a boo giməə lɛ giala n ka wàa nɛ?
(Mat 13.18-23; Luk 8.11-15)
13Yezu tɔ́n pɛ a kialandɛnan lɛn manɛ: «Bɛ̀ ka a boo giməə kɛ giala miɛ wa, ka n die n biɛ lɔn ka tɔn boo giməə gialakun kɛ din tumaa giala ma? 14Màn tɔrɔ pɛsɛ̃li lɛ n Lawa a boo pɛsɛ̃. 15Màn tɔrɔ lɛ mɛnaa zii mɛn lɛkoro-a, min tɛn nə goon ka bɛa zii kɛ lɛ nɛ. Bɛ̀ ǹ nə́ Lawa a boo lɛ ma lɔn, *Sɛtaan nə die, a bɛa boo kɛ lɛ bɔ a bɔ ǹ yiri ni. 16Min tɛn nə goon ka gɛtaã bǎã nɛ, bɛ̀ ǹ nə́ Lawa a boo lɛ ma lɔn gɔrɔ, maǹ sii ka nyɛnyɛɛ nɛ. 17Sɛnɛ, ǹ ba toɛ a gòon bɔ ǹ nɛ wa, a ba goɛ̃ ǹ nɛ a belebɔ wa. Bɛ lɛ nɛ, bɛ̀ foo-ziziɛ̃ daa, hinlaa bɛ̀ minin man fuu nyɛɛ ǹ nɛ Lawa a boo lɛ taman yii, ǹ mìi n ziziɛ̃ gɔrɔ. 18Màn tɔrɔ mɛnaa nyan bǎã mɛn nɛ, min tɛn dɔ n miɛ̃. Ǹ tá Lawa a boo lɛ miɛ, 19sɛnɛ, kanaa sii a taasiɛn nɛ, naforo a lɛn bebele sii laanka foo sii tɔrɔ kɔsɔn man we ǹ ne, ǹ Lawa a boo lɛ kũ, ǹ baa nɛ-kɔbaã wole lɛa ka da nɛ-kɔbaã wole bɛ́ lɔn. 20Sɛnɛ, min tɛn nə goon ka tán sonbore mɛn bɛ́ ǹ nə́ màn tɔrɔ pɛsɛ̃ a nɛ. Bɛ̀ ǹ nə́ Lawa a boo lɛ ma, maǹ sii, ǹ nɛ dɔ kɔ, ǹ tɛn wɔ n pɔsɔɔ, ǹ tɛn wɔ n pɔsɔrɔ, n tɛn dɔ wɔ n paabiɛ.»
Yezu boo giməə mɛn da bólon wɔ paǹ li
(Luk 8.16-18)
21 #
Mat 5.15; Luk 11.33 Yezu tɔ́n pɛ ǹ nɛ: «Bɛ̀ min bólon lɛ sã, a n biɛ lɔn? A n tan kumii a ganaa? Hinlaa a n diɛ gə̀rə̀n giulun? A bie a lɛ siɛ̃ a da màn la lon wa? 22Sii mɛn bɛ́ durii ni, Lawa á die bɛ nyɛɛ, á die diɛ wɔlɔ fúlu-a foaãnɛ. 23Toon bɛ́ ka lon, ka n too kɔ koe!»
24 #
Mat 7.2; Luk 6.38 Yezu tɔ́n pɛ ǹ nɛ doo: «Ka bɛ́ boo mɛn miɛ, ka n yiri kɔ bɛ li parsiini. Lawa n die a gii ǹ màn zoɛ̃ a kɔ ka la a kɔnpɛ ka ka dinin too kɔ ǹ gɔn nɛ, a màn da li a kɔ ka la. 25#Mat 13.12; 25.29; Luk 19.26A giala, bɛ̀ màn tá min mɛn lon, kɔsɔ á die n diɛ bɛa dɛnaa wɔ li, sɛnɛ, màn kɔ́n bɛ́ a ba min mɛn lon wa, a boɛɛn mɛn dɔ din bɛ́ a lon, bɛ lɛ dɔ n die n kuĩ a n si la.»
Yezu boo giməə mɛn da màn tɔrɔ a gole kɔ a din ganaa wɔ paǹ li
26Yezu tɔ́n pɛ doo: «*Lawa a kiibaa lɛ a kɔnboe á ke: Giĩ goon na á màn tɔrɔ pɛsɛ̃ a wuru-n. 27Bɛ kio, tèlò-n a n nyuù we, bɛ̀ a yoo baayɛlɛ baayɛlɛ. Bɛa biikoo kɛ lɛ gɔ́ɔ̃ nɛ, màn tɔrɔ lɛ gii á bɔ, sɛnɛ giĩ lɛ a màn kɔ́n doɛ̃ bɛ gɔ́ɔ̃-n wa. 28Màn tɔrɔ lɛ n boe tán a din ganaa, a bàlà bɔ, bɛ kio a mìi bɔ, a tɔn nàn bɔ sɔnbɔraanɛ bɛa mìi lɛ ganaa. 29#Zow 4.13 Bɛ̀ bɛa nàn lɛ ma ǹ mɛn waáraa, giĩ lɛ n yui a na a sɛn gɔya saa, a na a kurii giala kɔ, a giala, a kurii waáraa na á dɔ.»
Yezu boo giməə mɛn da mutardə we wɔ paǹ li
(Mat 13.31-32,34; Luk 13.18-19)
30Yezu tɔ́n pɛ doo: «Kasɛn man die pii mà Lawa a kiibaa lɛ n kɔnboe ka wàa nɛ? Kasɛn man die zoɛ̃ kɔn ka wàa nɛ? 31A n kɔnboe ka mutardə we goon ne. A diɛ biikoo li, a din ni boɛɛnɛ kanaa a màn we tɔrɔ tumaa bii. 32Sɛnɛ, bɛ̀ ǹ nə́ da, a n yui a gole kɔ, a kiɛ̃ ǹ miã dù gɔrɔ da tumaa la. A n gùrùn boe dadara, bàanan dinin nə boo la ǹ nə ǹ kii dɔ la, a wúlu li.»
33Yezu na á goã boo giməə gigiã diɛ kɛnɛn lɛn, bɛ̀ a min tumaa daraa nɛ. A too kɔmalon wole lɛn taasiɛ bɛ́ doe màn mɛn ganaa, a na á goã ǹ darɛɛ á kɔnpii ka bɛ lɛ nɛ. 34A boo kɔ́n diɛ ǹ nɛ, bɛ̀ boo giməə gòɛ̃ ná a ba a-n wa, sɛnɛ, bɛ̀ a laanka a kialandɛnan lɛn dininsɔɔ̃nɔn tá kun, a na a tumaa giala pii ǹ ni.
Yezu n piɛ̃ gole lɛ kuĩ
(Mat 8.23-27; Luk 8.22-25)
35A din pinaa wasamiɛnɛ, Yezu pɛ a kialandɛnan manɛ: «Ka daa wɔ n ta tà lɛ a lɛkoro goon kɛ ganaa.»
36Ǹ nə́ n bɔ kun zaman lɛ nɛ. Yezu goã tà kuru ǹ goo mɛn nɛ, a kialandɛnan nə́ woo kun ni bɛ lɛ gɔ́ɔ̃ nɛ. Tà kuru ǹ goon kɔsɔn dɔn nə́ goã kunu a li. 37Piɛ̃ gole ná a giala kɔ gɔrɔ á yoo, mu lɛ n yui, bɛ̀ a n duwəə goo lɛ gɔ́ɔ̃ nɛ. Bɛa yɔrɔ lɛ la, goo lɛ na a gialaa piɛ̃ ka mu-n gɔrɔ. 38Yezu nə́ n mìi da pìti la, á goã nyuù we goo lɛ-n kio. A kialandɛnan nə́ tɔ́n bũ, ǹ nə́ pɛ nɛ: «Mìinaa, wɔ ǹ die giɛ̃! Bɛ a sii lɛa n yii li wa?»
39Yezu yii kaa, á yoo, á paraa piɛ̃ lɛ li, á pɛ: «Sisia!»
Piɛ̃ lɛ nə́ n lɛ kũ bɛ lɛ-a. Á pɛ tà mu lɛ dɔ nɛ: «Golee!»
Tà mu lɛ dɔ́ golee, wɔlɔ nyɛɛ ka kiĩn.
40Yezu tɔ́n pɛ a kialandɛnan lɛn manɛ: «Wàa na á baa ka á nyɛ́ɛ biɛ? Goleemali ba ka lon haalɛ tɔn pelo wa?»
41Sɛnɛ, ǹ nə́ nyɛ́ɛ baa parsiini, ǹ nə́ nɔmaa ǹ nə́ pɛ kɔn nɛ: «Wàa min tɔrɔ n ke? Piɛ̃ laanka tà mu din tumaa na a bɔlɔ sii!»
اکنون انتخاب شده:
Mar 4: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
