Mar 3
3
Yezu sii mɛn zɛnaa giĩ gɔn gere-a nɛ
(Mat 12.9-14; Luk 6.6-11)
1Yezu wusoo á woo Zuifun lɛsɔkɔn kion. Giĩ gɔn goon gere-a kɔ́n dɔ́ goã ǹ lɛsɔkɔn kion lɛ-n bɛa pinaa. 2Min mɛnɛn bɛ́ ǹ nə́ goã walan, bɛn man nə́ goã giɛ Yezu gɔn li sɔnbɔraanɛ, bɛ̀ á die giĩ lɛ a busu nyɛɛ *susu ǹ pii pinaa, ǹsɛn nə́ dɔ̃. A giala, maǹ giɛ a zɛ̀rɛbaa ǹ gɔn li. 3Yezu tɔ́n pɛ giĩ gɔn gere-a lɛ nɛ: «Yoo n da kànaa min din tumaa yɔrɔ-a.»
4Min mɛnɛn bɛ́ tán giɛ, Yezu tɔ́n nɔ̀n da bɛn la: «Wɔa landa siin lɛn man lɛ koe wàaǹ sii nə n zɛnaa min ni susu ǹ pii pinaa, sii bǐɛ̃ hinlaa a baraa? N min nyin si gɛ̀ la hinlaa n na a nyin bɔ?»
Sɛnɛ, bɛn nə́ n lɛ tã.
5Ǹ baãnaabaa lɛ taman yii, Yezu foo busu ǹ li, á n yii saa á ga ǹ ganaa, a yɔrɔ kɔsɛ parsiini. Á tɔ́n pɛ giĩ lɛ nɛ: «N gɔn lɛ bɔ kɔn.»
Á bɔ kɔn, a gɔn wusoo á bǐɛ̃ kɔ.
6Minin mɛnɛn bɛ́ kii Erɔdi a pàã li, *Fariziɛ̃n nə́ soo lɛsɔkɔn kion, ǹ nə́ n lɛ kaa kun bɛn nɛ gɔrɔ, ǹ nə́ ga Yezu dɛ a gã ǹ gɔn li.
Zaman gigiã mɛn da Yezu li tà lɛ-a
7Yezu laanka a kialandɛnan nə́ wusoo ǹ nə́ woo Galilee tà lɛ-a. Zaman gigiã kɔ a kio lɛ. Ǹ tɛn bɔ Galilee gána nɛ, ǹ tɛn bɔ Zudee gána nɛ, 8ǹ gialakun nə́ bɔ Zeruzalɛmu kiwi. Idumee gána minin laanka Zurdɛ̃ tà kio minin ni, Tiiri laanka Sidɔn lɛkoro-a ǹ kiwi minin manɛ ǹ tɛn nɛ. Bɛa zaman gigiã kɛ lɛ na á woo Yezu li, a giala, a bɛ́ sii mɛn tumaa zɛnɛɛ, ǹ ná a boo ma. 9#Mar 4.1; Luk 5.1-3 Yezu tɔ́n pɛ a kialandɛnan manɛ, mà ǹ mu la ǹ goo boɛɛn yɔrɔ bɔ ǹ koa asɛ nɛ, màn mɛn bɛ́ toɛ zaman lɛ baran asɛ gɛwaa wa. 10Yezu busulə gigiã kaka kɔ lɛlɛ, bɛ lɛ na á toa min mɛnɛn dinin tumaa bɛ́ ǹ nə́ goã nɔmaa-n busu gɔn, bɛn nə́ goã n nanaɛ woe Yezu li, màn mɛn bɛ́ toɛ, ǹ boo la ǹ nə n gɔn da a ganaa. 11Bɛ̀ nɔ̀ɔndɛnan nə́ yɛ lɔn, maǹ nə n duwii tán a giulun ǹ nə n lɛ dɛ, bɛ̀ ǹ pɛ mà a n Lawa a Nɛgiĩ lɛa! 12Sɛnɛ, Yezu nə́ n gɔn waa ǹ nɛ taãn-taãnɛ: «Ka nyan toa minin nə maa Lawa a Nɛbaa dɔ̃ wa.»
Yezu a dia dí-a wole fulupaa bíi boo
(Mat 10.1-4; Luk 6.12-16)
13Bɛ kio Yezu dii kele la. A bɛ́ li a min mɛnɛn bɔ, á lɛ dia bɛn la ǹ nə́ daa a li. 14Maǹ min fulupaa, á ǹ koa dia dí-a wolen lɛa. A na á ǹ bɔ, mà ǹ goã kun ka asɛ nɛ, bɛ̀ asɛ nə ǹ dia ǹ wo Lawa a boo pɛ. 15Á pàã dɔ kɔ ǹ la bɛ̀ ǹ nɔ̀ɔnɔn loo ne, ǹ nə ǹ bɔ minin ganaa.
16A min fulupaa mɛn bɔ, ǹ tɔn nə́ ke: Simɔn nɛ (Yezu bɛ tɔ kɔ mà Piɛrɛ, bɛ giala, mà á kaka ka kɔlɔ nɛ), 17ka Zebedee a nɛgiĩ Zaaki laanka Zaã nɛ (Yezu nə́ ǹ tɔ kɔ mà Foo Fuunaan, ǹ dinin bɔlɔ nɛ mà Boanɛrzɛsi); 18Andre ne, Filipi ni, Bartelemii ni, Matiə ne, Toomaa nɛ, Alfee a nɛgiĩ Zaaki ni, ka Taadee ne, ka Simɔn nɛ (min mɛn bɛ́ zia diɛ a gána a lɛa), 19ka Kariyɔtin Zudaasi ni (min mɛn lɛ Yezu kɔ a zɔ́ɔn la).
Wàa na á toa Yezu a kion minin nə́ woo a kio?
20Yezu wusoo á daa piɛ. Zaman gole wusoo á n lɛ sɔkɔn doo, haalɛ biikoo din ba a laanka a kialandɛnan lon ǹ tá màn bii wa. 21A kion minin bɛ́ ǹ nə́ bɛa boo kɛ lɛ ma, ǹ nə́ yoo ǹ nə́ zii saa, mà maǹ woe kuĩ, a giala, maǹ taasɛ mà a yiri na á n si la!
Yezu laanka Sɛtaan dɔ a wàa-n kun?
(Mat 12.22-32; Luk 11.14-23; 12.10)
22 #
Mat 9.34; 10.25 Landa sii-daraalin mɛnɛn nə bɔ Zeruzalɛmu ǹ nə́ daa walan, bɛn man nə́ goã pii kɛnɛn: «A laanka nɔ̀ɔnɔn kiã *Sɛtaan lɛ-n kun. Bɛ lɛ n pàã koe la, bɛ̀ a nɔ̀ɔnɔn lɛn loo ne.»
23Yezu tɔ́n lɛ dia ǹ la, á boo giməə da ǹ nɛ: «Sɛtaan nə boe la a n din loo lɔn? 24Bɛ̀ gána mɛn a minin tá zia diɛ kɔn ganaa, bɛa gána lɛ a boe la a bǐɛ̃ kɔ wa. 25Bɛ̀ kion mɛn a minin tá zia diɛ kɔn ganaa, bɛa kion lɛ a boe la a bǐɛ̃ kɔ wa. 26Bɛ̀ á daa yaa Sɛtaan nə zia diɛ a din ganaa, bɛ̀ a din a gána minin lɛ a kun wa, a pàã lɛ a boe la a bǐɛ̃ kɔ wa, a wɔ na á nya.
27Min kɔ́n ba boe la, a wɔ min kaka a kion, a na a gɔn mànan goa, bɛ̀ a ná a bɛa min kaka lɛ yii bɔrɔ á da tán wa. Bɛ̀ á yii ǹ mɛn waáraa, á boe la a na a kion màn din tumaa goa.
28Masɛ n pii ka-n sonbore, minbuiinin sii baraa tumaa á re n toɛ ǹ nɛ, ka ǹ Lawa tɔ ziziɛ̃ ǹ boon dinin tumaa nɛ. 29#Luk 12.10 Sɛnɛ, min mɛn bɛ́ re Lawa a Yiri Fu tɔ ziziɛ̃, bɛa dɛnaa a sii baraa na a mìi-n duduu, Lawa a re bɛ toɛ ǹ dɛnaa-n wa.»
30Yezu na á pɛ ǹ nɛ miɛ̃, a giala, maǹ nə́ goã pii mà nɔ̀ɔnɔn man a ganaa.
Yezu ǹ dan laanka ǹ dɔɔ̃nɔn man ka dien ne?
(Mat 12.46-50; Luk 8.19-21)
31Bɛa biikoo li, Yezu ǹ dan laanka ǹ dɔɔ̃nɔn nə́ daa. Ǹ nə́ n toa kion kio, ǹ nə́ min dia mà a wo lɛ dia Yezu la a daa. 32Min gigiã na á goã giã-n tán Yezu lɛnpɛnɛ. Ǹ nə́ tɔ́n pɛ Yezu ni: «Ga, n dan laanka n dɔɔ̃nɔn tá kanaa nɔ̀n diɛ n li.»
33Yezu tɔ́n pɛ: «Die n masɛ dan lɛa? Dien man masɛ dɔɔ̃nɔn lɛa?»
34Min mɛnɛn lɛn bɛ́ giã-n tán a lɛnpɛnɛ, á n yii saa á ga bɛn lɛn ganaa, á pɛ: «Ka ga, masɛ dan laanka ma dɔɔ̃nɔn man ka kɛn nɛ kànaa. 35A giala, min mɛn bɛ́ Lawa foo sii zɛnɛɛ, bɛ lɛ n masɛ dɔɔ̃ngiĩ lɛa, bɛ lɛ n masɛ miãnɛn lɛa, bɛ lɛ n masɛ dan lɛa.»
اکنون انتخاب شده:
Mar 3: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
