Mis 4
4
Là nyantoro boo Zeruzalɛmu wɔ paǹ li
1Lɛawaan kɔnɔn tá re doe,
Dɛnaa Lawa a kion lɛ bɛ́ kele mɛn la,
bɛ á die goɛ̃ ǹ miã kelen mìi la,
lon tentenen tumaa mìi la,
tɔrɔn tá re yiɛ girigiri bɛ̀ ǹ wo la.
2Gána gigiã á die zii siɛ,
bɛ̀ ǹ nə́ pii kɔn nɛ:
Ka daa wɔ n tá
wɔ dii Dɛnaa Lawa a kele la,
wɔ wo Zakɔba a Lawa kɛa kion.
A din tá re a zii lɛ a tɔ wɔ ǹ gɔn nyɛɛ wɔ nɛ,
bɛ̀ a din wɔ da zii mɛn la,
wɔ á re koe bɛ lɛ.
A giala,
dí-pɛn boon lɛn man boe *Siɔn,
Dɛnaa Lawa a boo lɛ n boe Zeruzalɛmu.
3 #
Iza 2.4; Zow 4.10 A din nə die sabara-dali biɛ
tɔrɔ gigiã bii,
pàã bɛ́ gánan mɛnɛn lon,
ǹ wɔlɔ dɔ din nə sɔsɔɔ,
a din nə die bɛn wɛɛ kɔn.
Ǹ ziabaa ǹ gɔya san kɛn,
ǹ tá re bɛn biɛ kána nànan lɛa.
Ǹ sɛmiɛ̃n kɛn,
ǹ tá re bɛn biɛ sɛǹ gɔyan lɛa.
Gánan ba re gɔya san goɛ
kɔn li doo wa,
min ba re n darɛɛ
ziabaa ganaa doo wa.
4 #
Zak 3.10
Didie á re giɛ̃ tán
a din a *rezɛ̃ da laanka
a din a gɔ́rɔ da giulun.
Min kɔn ba re nyɛ́ɛ diɛ ǹ ganaa wa.
A giala,
Dɛnaa Lawa Pàãyiidɛnaa din lɛ na á pɛ.
5Tɔrɔn kɛn tumaa gogoonmaa n koe
ǹ dìn lɛ.
Sɛnɛ, wɔsɛn man koe wɔa Lawa,
Dɛnaa Lawa lɛ yǎa duduu.
Lawa a zaman a sɔkɔn
6Dɛnaa Lawa a da ǹ boo á ke:
«Bɛa pinaa kɛ lɛ nɛ,
wɔ̀lɔ̀ goã ǹ mɛnɛn lɛn ganaa
ka sère busulən bɛ́ lɔn,
ma á re bɛn soekɔn.
Ǹ goã ǹ nə́ ǹ mɛnɛn loo,
ǹ nə́ woo ǹ ne,
ma fuu nyaa ǹ mɛnɛn lɛn manɛ,
ma á re wusii ma ǹ si.
7Wɔ̀lɔ̀ goã ǹ mɛnɛn lɛn ganaa,
ma á re bɛn toɛ
maa zaman lɛ tɔrɔ lɛa.
Ǹ nə ǹ mɛnɛn lɛn loo,
ǹ nə́ woo ǹ ne sɔsɔɔ,
ma á re ǹ soekɔn,
ma ǹ baa gána pàãdɛnaa lɛa.
Dɛnaa Lawa din tá re goɛ̃ ǹ kii lɛa,
Siɔn kele kɛ la,
a kũ bɛa pinaa lɛ ganaa, yǎa duduu.
8Nsɛ Siɔn kele lɛ,
maa zaman kɛa daa ǹ bǎã,
Zeruzalɛmu kiwi a lɛduə̃ ǹ bǎã,
n lɛlɛ a pàã lɛ á re wusii a dɔ n-a,
kiibaa lɛ á re wusii
a da Zeruzalɛmu kiwi.»
Si nɔmaa la
9Zeruzalɛmu, là-paparɛɛ bɛ́ á dɔ n-a,
wàa na á baa n tá n lɛ dii kanna,
ka lɔ nɔnɔ-a n nɔ̀ɔrɔ koe?
N kii lɛ na a banban doo wa?
N doroli lɛ na á gã?
10Zeruzalɛmu minin,
ka n mɔmɔɔsɛ là-paparɛɛ gɔn ka
n lɛ dɛdɛ,
ka lɔ nɔnaa n nɔɔrɔ koe.
A giala, kanna,
ka n die soe ka kiwi lɛ toa,
ka á re giɛ̃ don miɛ̃,
yǎa ka woe doe *Baabilonii.
Sɛnɛ, ka á re kirisibiɛ walan,
Dɛnaa Lawa á re ka sii
kaa zɔ́ɔn lɛn la.
11Sɛnɛ sisia,
gána gigiã nə́ n lɛ sɔkɔn,
ǹ tá ka gialaa.
Maǹ pii:
«Ka daa wɔ Zeruzalɛmu zaãbaa,
bɛ̀ wɔ yii nàn diɛ̃ bɔ a kɛbɔlɔ la.»
12Sɛnɛ, ǹ ba Dɛnaa Lawa a taasiɛ doɛ̃ wa.
A bɛ́ li a sii mɛn zɛnaa,
ǹ yiri a doe bɛ gɔ́ɔ̃-n wa:
a na á gánan lɛn sɔkɔn,
ka ǹ bɛ́ *belee soekɔn lɔn
a duwəə ǹ bǎã nɛ.
13Zeruzalɛmu minin lɛn,
ka yoo kəni, ka kaa belee duwəə,
ma din tá re a duwəə ǹ pàã koe ka la.
Dii mɛn bɛ́ a bɛnɛn nə́ fɔlɔ lɛa,
a gòon tɔnɔn nə́ zan lɛa,
ma á re ka biɛ bɛa dii lɛ miã lɛa,
ka á re boe la ka tɔrɔ gigiã yɔyɔrɛ
ka gòãn giulun.
Ǹ gɔn mànan kɛn,
ka bɛn kɔ Dɛnaa Lawa la,
ǹ pàãmabaa ǹ mànan kɛn,
ka bɛn kɔ kanaa tumaa a dɛnaa la.
14Zeruzalɛmu a minin lɛn,
ka n gɔ̀nɔn tɔtoɛ̃
ka gɛ̀ na á gã ka la.
Zɔ́ɔn nə́ ke ǹ nə́ daa n doa
wɔ nyɛɛnɛ.
Ǹ nə́ ke Izirayeli a sii-yɔrɔ bɔle
lɛ duwii a para giala-a ka bàlà nɛ.
اکنون انتخاب شده:
Mis 4: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.