Mis 3
3
Goledɛnan mɛnɛn bɛ́ pàã nyɛɛ minin manɛ
1Zakɔba tɔrɔn goledɛnan lɛn,
Izirayeli minin sii yɔrɔ-bɔlen lɛn,
masɛ Misee n ka nyankoe:
ka bǐɛ̃ kɔ ka n too kɔ.
Min doamaa nɛ a sii yɔrɔ bɔ ǹ gɔn
nyaa kasɛn kɛn ma-n doo?
2Sɛnɛ, ka a sii bǐɛ̃ li wa,
yǎa a baraa.
Ka dinin man ma tɔrɔn lɛn ki boe,
ka dinin man ma tɔrɔ minin lɛn
siĩ sɔlɛɛ boe ǹ wen ganaa.
3A n goon ka
ka n ma tɔrɔ minin lɛn siĩ soɛ̃.
A n goon ka ka n ká ǹ ki bɔ,
ka ǹ wen yiyiɛ,
ka siĩ din bɛ́ ǹ tá kukuri,
bɛ̀ ǹ kaa kùsì-n lɔn,
ka siĩ bɛ́ ǹ tá kukuri,
bɛ̀ ǹ kaa fɔlɔ donkolon ne lɔn,
ka n ká ma tɔrɔn lɛn baa miɛ̃.
4Min mɛnɛn bɛ́ bɛ lɛ zɛnɛɛ,
ta ǹ nə́ n lɛ dɛ Dɛnaa Lawa ganaa ǹ mɛn pinaa,
a re n nyii ǹ la wa.
A n die n yɔrɔ din bɔyɛɛ
a bɔ ǹ la bɛa pinaa,
ǹ zɛnaa ǹ sii babaraan lɛn taman yii.
Lawa a boo gii-dalin mɛnɛn bɛ́ Izirayeli minin yiri siɛ̃
5Lawa a boo gii-dalin mɛnɛn bɛ́
Dɛnaa Lawa a zaman kɛ yiri siɛ̃,
Dɛnaa Lawa na á kɛ pɛ bɛn wɔ paǹ li:
«Bɛ̀ min mɛn gɔn màn tá ǹ lɛ-n,
maǹ là nyantoro boo diɛ bɛa dɛnaa nɛ.
Bɛ̀ min mɛn gɔn màn ba ǹ lɛ-n wa,
maǹ zia yɔrɔ diɛ bɛa dɛnaa la.
6A bɛ́ miɛ̃, á nya kəni!
Ma a die sii kɔn nyɛɛ ǹ nɛ doo wa,
ǹ yii ba re sii kɔn yii doo wa.
Lɛawaa á die tèlò biɛ ǹ ganaa,
wasa yii á die wɔlɔ tì biɛ ǹ ganaa.
7Sii-nyalin kɛn wɔ n ka sìi ni,
sii yɛ wolen kɛn wɔ n ka sìi ni.
Ǹ tá re pìi koe ǹ yɔrɔ lɛ,
mà ǹsɛn manə ǹ sìi duri ni.
A giala, Lawa a re ǹ lɛ sii doo wa.»
8Sɛnɛ, masɛ Misee,
Dɛnaa Lawa yiri na á pàã gole kɔ ma la,
ka peperebaa laanka foo tãbaa nɛ,
màn mɛn bɛ́ toɛ,
ma Zakɔba tɔrɔn kɛn
Lawa bɔlɔ tii boo kɛ da ǹ nɛ,
ma Izirayeli minin kɛn
sii baraa kɛ pɛ ǹ nɛ.
Dɔlɔ mɛn bɛ́ re n boe Zeruzalɛmu ganaa
9Zakɔba tɔrɔn goledɛnan lɛn,
ka bǐɛ̃ kɔ, ka n too kɔ kɛ li!
Izirayeli mìilandɛnan lɛn,
sii pepere a kɔɔ̃n ka ganaa wa.
Ka n sii pepere din tumaa kɔrɛ.
10Ka n ká mà kaa,
ká tɔ́n *Siɔn kiwi kɛ dɔ nɛ.
Ka n ká sii baraa zɛnaa,
ká tɔ́n Zeruzalɛmu kiwi kɛ dɔ nɛ.
11A kiri-wɔlen man minin sii yɔrɔ boe màn ganaa,
A Lawa a wúlu-bɔlen man minin darɛɛ giɛ saraa li,
A Lawa a boo gii-dalin manə ǹ dí nyɛɛ wɔrɔ-a.
Maǹ wusii n gòãn koɛ Dɛnaa Lawa la,
ǹ nə́ pii:
Dɛnaa Lawa bɛ́ kun ka wɔsɛn nɛ,
wàa mɛn sii baraa n die wɔ yii?
12 #
Zer 26.18
Bɛ lɛ na á toa,
ka dinin kɛn lɛn taman yii,
Zeruzalɛmu á die kɛbɔlɔ biɛ,
ǹ tá re Siɔn kele kɛ kɔsɛ wuru lɛa,
kion bǎã lɛ a kele lɛ á re daã biɛ.
اکنون انتخاب شده:
Mis 3: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.