Mis 1
1
1 #
Kiin2 15.32–16.20; 18.1–20.21; KZS2 27.1-7; 28.1–32.33 Dɛnaa Lawa a boo n ka kɛ nɛ, á pɛ Moresɛtin Misee ne. Zudaa tɔrɔn kiin kɛn, Zoatamu ni, Ahaazi ni ka Ezekiasi ni, bɛn gogoonmaa a wasa nɛ, Misee sii-nyaa yɛ Samarii laanka Zeruzalɛmu wɔ paǹ li.
Lawa dɔlɔ mɛn boo da a zaman wɔ paǹ li
2Haya, tɔrɔn tumaa, ka n too kɔ!
Tán laanka màn mɛn tumaa bɛ́ la,
ka n too kɔ doɛ̃!
A giala,
Dɛnaa Lawa n die yui ka gialaa.
Dɛnaa din nə die n toɛ
a kion sonbore kɛ nɛ,
a yoo ka gialaa.
3Haya, Dɛnaa Lawa á ke soe
a giã ǹ bǎã nɛ!
Á ke die gisĩ,
a n tɔ we kele sɔsɔrɔn la,
die gisĩ tán.
4Kelen kɛn man die wurii
a gòãn giulun,
nyankɔrɔ basan kɛn man die yaliɛ,
ka zoo gón bɛ́ tɛ li lɔn,
ka mu bɛ́,
ǹ nə́ kaa kele baã zuməə ǹ bǎã-n lɔn.
5Zakɔba tɔrɔn kɛn bɔlɔ-tii taman yii ni,
kɛ tumaa á die n zɛnɛɛ.
Izirayeli minin lɛn sii baraa a lɛa nɛ,
kɛ tumaa á die n zɛnɛɛ.
Izirayeli gána a bɔlɔ-tii kɛ na á bɔ die li?
Samarii kiwi kɛ lɛ sii ni.
Zudaa gána a dì wúlu bɔ kɛ na á bɔ die li?
Zeruzalɛmu kiwi kɛ lɛ sii ni.
6Dɛnaa Lawa mà Samarii kiwi
kɛ á die don biɛ.
A kɛbɔlɔ á die
*rezɛ̃ da zumu ǹ wuru biɛ.
Ma á die a dɔǹ kɔlɔn lɛn birikəĩ,
ma ǹ kaa nyankɔrɔ basa kɛ nɛ.
Ma á die wurii
yǎa a gòã daa ǹ bǎã kɛ nɛ.
7A màn nyínin kɛn lɛn tumaa á die pɔpɔsɛ.
A kɔrɔbaa ǹ mànan lɛn tumaa á die n tiɛ̃.
Ma á die a dìn kɛn tumaa yɔyɔrɛ.
A giala, kɔrɔbaa ǹ mànan manɛ,
ǹ tá re wusii, ǹ kɔrɔbaa ǹ dí nya.
Bɔ̀n mɛn bɛ́ re Zeruzalɛmu yii
8Bɛ lɛ n ke,
masɛ Misee á die wuu pii,
man din dɛdɛ.
Man die n sɔlɛɛ,
ma tɔ wɔ ka ma gòã kooro ne,
ka yii koe-yele n ma nɛ.
Man die n lɛ dii ka toloka bɛ́ lɔn,
man die lɛ biɛ, ka bɛnda bɛ́ lɔn.
9A giala,
sii mɛn bɛ́ die Samarii ganaa,
a lɛ goa ǹ gɔn banban.
Á ke á dɔ Zudaa gána dɔ din ganaa,
á woo yǎa ma tɔrɔn kɛn kiɛnlɛ-a,
yǎa Zeruzalɛmu kiwi.
10Ka nyan toa
Gaati minin nə kɛ ma wa,
ka nyan kɛ din a wuu pɛ wa.
Bɛti-Lefra minin lɛn,
ka n birikəə̃ tán tii li,
ka koe na á ka yɛ.
11Safiiri minin,
ka wo ka ka tontoro ne,
ka kaa sìi ni.
Saanan minin dinin ba re soe doo wa.
Bɛti-Esɛli minin dɔn bɛ́ ke wuu kɛ pii,
n duduwii,
kaa duru ǹ bǎã ba walan doo wa.
12Marɔti minin man nə́ goã
n yii diɛ a susuu lɛ la,
sɛnɛ, á kɔsɛ ǹ ganaa.
Á ke,
bɔ̀n na á bɔ lon Dɛnaa Lawa li,
á daa Zeruzalɛmu *kiwi a kiɛnlɛ-a.
13Lakiisi minin lɛn,
ka sùin kaa wotoron ganaa.
A giala,
*Siɔn kiwi minin lɛn man nə́ ǹ saa
ka dinin li,
ǹ nə́ tɔ́n sii baraa zɛnaa.
Bɛ̀ ń yaa Izirayeli minin lɛn nə́ n piã,
ka dinin sii ni.
14Bɛ lɛ nɛ,
yǎa ka n lɛ boe Moresɛti-Gaati ganaa.
Akziibu kiwi a kionən kɛn,
Izirayeli kiin kɛn bebele ǹ wɔn manɛ.
15Maresaa minin lɛn,
man die min kɔsɔn diɛ
ǹ da zia baa ka ganaa.
Izirayeli minin bɛ́ n dinin koɛ
ǹ kiin mɛnɛn taman yii,
bɛn lɛn tá re baa sii,
ǹ wo n duru
Adulaamu kele kɛa yala-n.
16Zeruzalɛmu minin lɛn,
ka n mìi kɔɔ̃.
Ka zèwon bɛ́ lɔn,
ka nyan ka toa ka mìi-n wa,
kaa là-paparɛɛ taman yii,
kaa nɛnyaanan kɛn lɛn lɛa,
ka tá ǹ narɛ.
A giala, maǹ die ǹ goɛ,
ǹ wo ǹ ne bɛ̀rɛbaa ǹ bǎã nɛ,
ǹ wɔlɔ lui ka ganaa.
اکنون انتخاب شده:
Mis 1: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.