SGK 30
30
1Raseli bɛ́ á yɛ, mà asɛ a nɛ yii Zakɔba-n wa, á foo wuu pɛ ǹ gololɔ lɛ li. Á pɛ Zakɔba nɛ: «Nɛnyaanan kɔ ma la, bɛ bie wa, man giɛ̃ dɛ!»
2Zakɔba foo yoo Raseli li, á pɛ: «Lawa n ka masɛ-n ya? Lawa din na a lɛ kɔ, mà n nɔ̀ si wa!»
3Raseli tɔ́n pɛ. «Maa bɛ̀rɛlɔ Biilaa á ke. N mɔrɔ a ganaa, màn mɛn bɛ́ toɛ, a nɛnyaanan yɛ. Masɛ dɔ á re nɛnyaanan yii bɛ ganaa, ma ǹ kũ ma din wɔn lɛa.»
4A ná a bɛ̀rɛlɔ Biilaa kɔ Zakɔba la lɔ lɛa, á n mɔrɔ a ganaa. 5Biilaa nɔ̀ si, á nɛgiĩ yɛ Zakɔba nɛ. 6Raseli tɔ́n pɛ: «Lawa sonbore kɔ ma la. Á ma lɛ si dɔn, á nɛgiĩ kɔ ma la.»
Bɛ lɛ nɛ, á bíi Dan (bɛ giala mà "Sonbore kɔ min la"). 7Raseli a bɛ̀rɛlɔ Biilaa lɛ nɔ̀ si doo, á nɛgiĩ paabaa ǹ wɔ yɛ Zakɔba nɛ. 8Raseli tɔ́n pɛ: «Ma yɔ gole bɔ ma gololɔ lɛ ganaa, ma gɔ̀lɔ̀baa yɛ.»
Á bɛa nɛgiĩ lɛ tɔ kɔ Nɛfutalii (bɛ giala mà "Yɔbɔkɔn").
9Leyaa bɛ́ á yɛ, mà a nɛ-yɛ nə́ n lɛ kũ, a ná a bɛ̀rɛlɔ Zilpaa kũ, á kɔ Zakɔba la lɔ lɛa. 10Leyaa a bɛ̀rɛlɔ Zilpaa nɛgiĩ goon yɛ Zakɔba nɛ. 11Leyaa tɔ́n pɛ: «Ma gɛrɛsiɛ bɔ koɛ!»
Á nɛ lɛ bíi Gaadi (bɛ giala mà "Gɛrɛsiɛ"). 12Bɛ kio doo, Zilpaa nɛgiĩ paabaa ǹ wɔ yɛ Zakɔba nɛ. 13Leyaa tɔ́n pɛ: «Maa wɔ bǐɛ̃ kɔ dɛ! A giala, lɔn nə́ ma bíi bǐɛ̃lɔ.»
Á bɛa nɛ lɛ bíi Asɛɛrɛ (bɛ giala mà "Bǐɛ̃kɔmaa").
14 *Belee kurii waáraa, Urubɛn woo ga lɔn gɛrɛsiɛ yɛ ǹ da nɛ li don. Á bɛa da nɛ lɛ yɛ, á daa kɔ ǹ dan Leyaa la. Raseli tɔ́n pɛ Leyaa nɛ: «Ma gɔ ka n nɛgiĩ lɛ a da nɛ lɛ kɔ́n nɛ.»
15Leyaa ná a lɛ si: «Ń ma zuũ si ma la, bɛa doe n yii li wa, yǎa n maa nɛgiĩ dɔ a lɔn gɛrɛsiɛ yɛ ǹ da nɛ sii?»
Raseli tɔ́n pɛ: «A bɛ́ miɛ̃, Zakɔba die a giã kunun n ni pelo tèlò-n, n nɛgiĩ lɛ a da nɛ lɛ doo.»
16Wasamiɛ̃nɛ, Zakɔba bɛ́ boe don die, Leyaa soo á woo n da lɛ, á pɛ nɛ: «N doamaa nɛ n tèlò zɛnaa kun ka masɛ nɛ. A giala, má maa nɛ a lɔn gɛrɛsiɛ yɛ ǹ da nɛ kɔ Raseli la, màn mɛn bɛ́ toɛ, ma Zakɔba si.»
Á bɛa tèlò lɛ zɛnaa kun ka Leyaa nɛ. 17Lawa Leyaa lɛ si, á daa á nɔ̀ si, á nɛgiĩ soorobaa ǹ wɔ yɛ Zakɔba nɛ. 18Leyaa tɔ́n pɛ: «Lawa ma saraa, maa bɛ̀rɛlɔ kɔ ma zuũ la lɛ taman yii.»
A ná a nɛgiĩ lɛ bíi Isakaara (bɛ giala mà "Saraa"). 19Leyaa wusoo doo á nɔ̀ si, á nɛgiĩ sɔrɔbaa ǹ wɔ yɛ Zakɔba nɛ. 20Á pɛ ka bɛ nɛ: «Lawa màn siĩn kɔ masɛ la dɛ! Sisia kəni, ma zuũ lɛ á die ma là doɛ̃, a giala, má nɛgiĩ sɔrɔ yɛ nɛ.»
Á nɛgiĩ sɔrɔbaa ǹ wɔ lɛ bíi Zabulɔn (bɛ giala mà "Là"). 21Bɛ kio, á nɛlɔ goon yɛ, á bɛ bíi Diinaa.
22Lawa nə́ n yiri koa Raseli dɔ li, a ná a nyankɔ lɛ si, á gɛrɛsiɛ kɔ la. 23Á daa á nɔ̀ si, á nɛgiĩ yɛ. Á pɛ ka bɛ nɛ: «Lawa sìi saa á bɔ ma la kəni!»
24Á bɛ bíi Zozɛfu (bɛ giala mà "Màn da màn Li"), a giala mà a na á goã pii kɛnɛn: «Dɛnaa die a nɛgiĩ kɔsɔ da li ma lon!»
Zakɔba a pàãmabaa
25Raseli bɛ́ á Zozɛfu yɛ lɔn, Zakɔba pɛ Laban nɛ: «Ma toa walan, ma wo piɛ, maa gána nɛ. 26Ma dí nya n nɛ lɔn mɛnɛn taman yii, bɛn kɔ ma la ka ǹ nɛnyaanan nɛ, man die woe. Ma dí mɛn nya n nɛ, n din tá bɛ doɛ̃ parsiini.»
27Laban tɔ́n pɛ nɛ: «Bɛ̀ ma sii tá kɔɔ̃nɛ n ganaa, n nə n too kɔ ma lon. Maa mànan nə́ nyaa ma nɛ, mà n din a lɛa nɛ, Dɛnaa barka wɔ ma nɛ. 28N bɛ́ li ma n saraa lɛ mɛn ganaa, bɛ pɛ, ma á re bɛ koe n la.»
29Zakɔba ná a lɛ si: «Ma dí nya n nɛ lɔn, n tɔɔn lɛn nə́ bulubɔ kun ka ma nɛ, n dinmaa á bɛ doɛ̃. 30Ma bɛ́ ma tɔn da ǹ mɛn waáraa wa, màn taãn bɛ́ a goã n lon wa. Sɛnɛ, maa daa kɛ lɛ gɔ́ɔ̃ nɛ, Dɛnaa barka wɔ n nɛ, n gɔn màn mɔnaa parsiini. Masɛ n die ma din a kion dí nyɛɛ biĩ kəni?»
31Laban tɔ́n pɛ: «Man die n sarɛɛ ka wàa nɛ?»
Zakɔba ná a lɛ si: «N baran masɛ saraa ka màn kɔ́n nɛ wa. Ma bɛ́ re màn mɛn boo diɛ n nɛ, bɛ̀ ń lɛ kɔ ń bɛ kɔ ma la, ma á re wusii ma da n tɔɔn lɛn lɛduə̃, ma ga ǹ walan. 32Ma á re n bibiĩ n sèren laanka n bòen lɛn tumaa bii pelo. Sère nɛ mɛn tumaa bɛ́ tì sɛsia, hinlaa kɛkɛrɛ ná a dɔ̀ɔ̃ nɛ, bòe mɛn tumaa dɔ bɛ́ tì sɛsia, hinlaa kɛkɛrɛ ná a dɔ̀ɔ̃ nɛ, ma á die bɛn tumaa boe, ma ǹ bɔ n tɔɔn lɛn li. Bɛ dinsɔɔ̃ n die goɛ̃ masɛ a saraa lɛa. 33Bɛ̀ ń daa ga masɛ a saraa lɛ ganaa ǹ mɛn pinaa, ń tá re maa min peperebaa doɛ̃ bɛa pinaa. Bɛ̀ ń bòe mɛn tumaa yɛ bòen lɛn bii, a ná a ba sɛsia wa, bɛ̀ ń sère mɛn dɔ yɛ sèren lɛn bii, tì ná a ba a ganaa wa, a dɔ̃ mà man má n wurumu baa.»
34Laban tɔ́n pɛ: «Á siĩni. N pɛ lɔn, a zɛnaa miɛ̃.»
35A din pinaa lɛ nɛ, Laban butumu sɛsia tumaa waa, ka bòe dan sɛsia tumaa nɛ, bòe dan fufun laanka sère tìtìn ni, á ǹ kaa a nɛnyaanan nyɛɛnɛ. 36Á toa Zakɔba nə́ n gòã bɔ a nyɛɛn lɛawaa sɔɔ, a dɔ tɔ́n yoo á kɔ a kio lɛ. Zakɔba na á goã Laban a tɔɔ gialakunun lɛn lɛduĩ.
37Zakɔba ga dan kɔnɔn gùrù buruun li: da lɛ a goon tɔ n puplie, goon tɔ n amandie, goon tɔ n platane. Á bɛa bàlà burunun lɛn bǎã tɛnɛn fɔrɔ bɔ, á ǹ nyaǹ kɔ fufu. 38Á bɛa bàlà nyaǹdɛnan lɛn kaa tɔɔn lɛn mu mi ǹ màn nɛ ǹ yɔrɔ-a. Bɛ̀ ǹ nə́ die mu mii ǹ mɛn waáraa, manə n nanaɛ taãn-taãnɛ. 39Tɔɔn lɛn nə́ goã dii kɔn la bàbàlan lɛn yɔrɔ-a. Ǹ daanan lɛn nə́ nɔ̀ si, ǹ nə́ nɛnyaanan yɛ sɛsia, kɛkɛrɛ nə́ n tɛn dɔ̀ɔ̃ nɛ, ǹ tɛn nə́ sɛsia wakaka nɛ.
40Zakɔba sèren mɛnɛn na á ǹ kaa ǹ gɔrɔn, á bɛn lɛn loo, á ǹ yɔrɔ dia Laban wɔn lɛn la, ǹ mɛnɛn tumaa bɛ́ sɛsia, hinlaa tì a tɔɔn lɛn bii. Á tɔɔ kurun yɛ miɛ̃, á ǹ na, á ǹ bɔ kɔn ka Laban wɔn nɛ. 41Bɛ̀ tɔɔn lɛn kasiɛ̃ wolen tá dii kɔn la lɔn, Zakɔba n bàbàlan lɛn kiɛ tán-a ǹ yɔrɔ-a, ǹ mu mi ǹ goo lɛ nɛ, màn mɛn bɛ́ toɛ, ǹ dii kɔn la bɛn lɛn yɔrɔ-a.
42Bɛ̀ tɔɔ pɛrɛɛ wolen manɛ, a bàbàlan lɛn kiɛ tán bɛn yɔrɔ-a wa. Tɔɔ pɛrɛɛ wolen lɛn man nə́ goã Laban wɔn lɛa, a kasiɛ̃ wolen lɛn man nə́ goã Zakɔba wɔn lɛa. 43Zakɔba màndɛnaa baa parsiini, tɔɔ kuru gigiã goã a lon: sèren ne, bòen ne, nyɔɔmaan nɛ ka dundunun ni. Bɛ̀rɛlɔn dɔn laanka bɛ̀rɛgiĩn nə́ goã a lon.
اکنون انتخاب شده:
SGK 30: SBPE2011
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.