SGK 29
29
Zakɔba a kaa Raseli lɛ boo
1Zakɔba yoo á mɛ zii la, á woo gána goon ne lɛ̀giala-n. 2Ǹ kɔn pinaa, á tù goon yɛ lalaa lɛ-a. Sère kuru sɔɔ goã walan, waa-n tán tù lɛ lɛ-a, a giala, maǹ nɛn bɛ̀ ǹ mu mi walan. Sɛnɛ, maǹ nə́ goã tù lɛ lɛ tiɛ̃ ka kɔlɔ kaaraa kɔ́n nɛ. 3Bɛ̀ tɔɔn lɛn tumaa daa, ǹ nə́ kaa kɔn li ǹ mɛn waáraa, maǹ kɔlɔ lɛ birikəĩ, ǹ bɔ tù lɛ lɛ, ǹ mu baã ǹ kɔ tɔɔn lɛn la ǹ mi, ǹ tɔn wusoo ǹ kɔlɔ lɛ birikəə̃, ǹ tù lɛ lɛ tã nɛ.
4Zakɔba nɔ̀n da tɔɔn-lɛduə̃lin lɛn la kɛnɛn: «Ma diɛ̃n lɛn, ka n boe maa?»
Ǹ ná a lɛ si: «Wɔsɛn man boe Kaaran kiwi.»
5Á tɔ́n nɔ̀n da ǹ la: «Kaa Nahɔɔrɔ a nɔ̀ɔn Laban kɛ doɛ̃?»
Ǹ ná a lɛ si: «Hiĩ, wɔ á doɛ̃.»
6Á nɔ̀n da ǹ la doo: «Á siĩni?»
Ǹ ná a lɛ si: «Á siĩni. A nɛlɔ Raseli din nə́ ke sèren lui die ǹ ne.»
7Zakɔba wusoo á pɛ ǹ nɛ: «Ka ga, wasa á tɔn gole bɔrɔ. Tɔɔn lɛn lɛ sɔkɔn biikoo tɔn dɔ wa. Ka ǹ gɔ mu ni, ka ǹ loo ka wo ǹ kaa buu ganaa.»
8Ǹ nə́ Zakɔba lɛ si kɛnɛn: «Bɛ̀ tɔɔn lɛn tumaa bie ǹ daa ǹ kaa kɔn li wa, wɔ a boe la wa. Bɛ̀ ǹ tumaa daa ǹ nə́ kaa kɔn li ǹ mɛn waáraa, wɔ n kɔlɔ lɛ birikəĩ wɔ bɔ tù lɛ lɛ, wɔ tɔn mu baã, wɔ kɔ ǹ la.»
9Zakɔba bɛ́ tɔn boo diɛ ǹ nɛ, Raseli daa á dɔ, ka ǹ di a sèren ne, a giala, Raseli na á goã tɔɔn-lɛduə̃li lɛa. 10Zakɔba yii bɛ́ á mɛ ǹ diãgiĩ Laban a nɛlɔ Raseli ganaa lɔn, ka ǹ diãgiĩ lɛ a sèren lɛn nɛ, á n zɔ̃ á dɔ, á kɔlɔ lɛ birikəə̃, á bɔ tù lɛ lɛ, á mu kɔ ǹ diãgiĩ Laban a sèren lɛn la. 11Zakɔba nə́ n sɔɔ Raseli ni, á n lɛn saa lon, á wuu pɛ. 12Zakɔba pɛ Raseli ni, mà ǹ di lɛ a min nə ka asɛ nɛ, mà ǹ miãnɛn Rebeka a nɛ n ka asɛ nɛ.
Raseli baa si á woo pɛ ǹ di ni. 13Laban bɛ́ á ǹ miãnɛn a nɛgiĩ Zakɔba boo ma lɔn gɔrɔ, á baa si á woo n da lɛ. A bɛ́ á dɔ a li, á n sɔɔ a nɛ, á kũ á woo-n kion. Zakɔba siin lɛn tumaa laakalaa nɛ. 14Laban tɔ́n pɛ nɛ: «Ma din a min taãn-taãn nə n nɛ, n laanka masɛ n goon toto.»
Zakɔba giã Laban li yǎa mui goon.
Zakɔba a lɔ paa goa
15Ǹ kɔn pinaa, Laban pɛ Zakɔba nɛ: «N nə n masɛ a min lɛa sonbore. Sɛnɛ, ma a boe la ma da bɛ mìi ni, ma pɛ mà n dí nya masɛ-n kooro wa. N saraa bɛ́ goɛ̃ lɛ mɛn ganaa, bɛ pɛ masɛ nɛ.»
16Bɛ á zɛnɛɛ, bɛ̀ nɛlɔ paa tá Laban lon. A goledɛnaa tɔ mà Leyaa, a kiɛɛrɛdɛnaa tɔ mà Raseli. 17Leyaa yiin man nə goã nuùnaa nɛ, Raseli na á goã siĩn yɔrɔ-a, a gama-a n kɔɔ̃nɛ. 18Raseli sii goã kɔɔ̃n Zakɔba ganaa. Bɛ lɛ nɛ, á pɛ Laban nɛ: «Ma á re dí nyɛɛ n nɛ lɛ̀ sɔbaa gɔ́ɔ̃ nɛ, n nə n nɛlɔ kiɛɛrɛdɛnaa Raseli lɛ kɔ ma la.»
19Laban tɔ́n pɛ: «Masɛ a lɛa, bɛ̀ má kɔ n la, bɛ á soɛ a kɔ min kɔsɔ la nɛ. Giã ma li.»
20Zakɔba dí nya Laban nɛ lɛ̀ sɔbaa gɔ́ɔ̃ nɛ, Raseli a lɛa. Sɛnɛ, bɛa lɛ̀ sɔbaa lɛ nə́ n baa laan paa dinsɔɔ̃ lɛa Zakɔba yii li. A giala, á goã Raseli narɛ parsiini. 21Bɛ kio, Zakɔba tɔ́n pɛ Laban nɛ: «Maa lɔ lɛ kɔ ma la, man mɔrɔ a ganaa. A giala, maa dí biikoo lɛ pã.»
22Laban màn-bii gigiã zɛnaa, á bǎã lɛ a minin tumaa bíi. 23Wasa bɛ́ á mɛ, Laban ná a nɛlɔ Leyaa kũ, á woo kɔ Zakɔba la, á tèlò zɛnaa kun ni. 24Laban ná a bɛ̀rɛlɔ Zilpaa kɔ a nɛlɔ Leyaa la, á n baa a bɛ̀rɛlɔ lɛa. 25Lɛ̀ bɛ́ á waa ǹ mɛn waáraa, Zakɔba yɛ mà Leyaa nɛ. Á tɔ́n pɛ Laban nɛ: «Wàa-n sii n ka kɛ nɛ, ń zɛnaa ma nɛ? Ma bie má dí nya n nɛ Raseli a lɛa wa ya? Wàa na á baa ń ma bebele?»
26Laban ná a lɛ si: «Diɛ̃lɔ kɔ giĩ la gololɔ nyɛɛnɛ, bɛa n zɛnɛɛ wɔsɛn piɛ wa. 27Kɛ lɛ a kɔn wɔ ǹ zɔ́n piizii lɛ lɛ pã bɔrɔ. Bɛ kio, lɛ̀ sɔbaa dí nya ma-n doo, ma á re nɛlɔ kiɛɛrɛdɛnaa lɛ dɔ koe n la.»
28Zakɔba na á bɛ lɛ zɛnaa. Á Leyaa a kɔn wɔ ǹ piizii lɛ lɛ pã, bɛ kio, Laban ná a nɛlɔ Raseli kɔ la lɔ lɛa. 29Laban ná a bɛ̀rɛlɔ Biilaa kɔ a nɛlɔ Raseli la, á n baa a bɛ̀rɛlɔ lɛa. 30Zakɔba tèlò zɛnaa kun ka Raseli dɔ nɛ, á bɛ narɛ parsiini, á la Leyaa nɛ. Á wusoo á lɛ̀ sɔbaa dí nya Laban nɛ doo, Raseli taman yii.
Zakɔba a nɛnyaanan
31Dɛnaa bɛ́ á yɛ, mà Zakɔba a Leyaa narɛ taãn wa, á gɛrɛsiɛ kɔ Leyaa la, Raseli goã lɔ nɛ-yɛle baãnaa lɛa. 32Leyaa nɔ̀ si, á nɛgiĩ yɛ, a ná a tɔ kɔ Urubɛn (bɛ giala mà "Ga min a sii Walan"). A giala, a na á pɛ: «Dɛnaa ga maa nɔmaa ganaa, ma zuũ lɛ á die ma narɛ kanna.»
33Bɛ kio, á nɔ̀ si doo, á nɛgiĩ yɛ. Á tɔ́n pɛ: «Lawa ma mà ǹ ba ma narɛ wa, bɛ lɛ nɛ, á kɛ dɔ kɔ ma la.»
Á bɛ bíi Simiɔn (bɛ giala mà "Boo ma"). 34Á wusoo doo á nɔ̀ si, á nɛgiĩ yɛ. Á pɛ ka bɛ nɛ: «Sisia kəni, ma zuũ lɛ á die damaɛ ma ganaa, a giala, má nɛgiĩ sɔɔ yɛ nɛ.»
Bɛ lɛ nɛ, á bɛa nɛgiĩ lɛ bíi Levii (bɛ giala mà "Damakɔn"). 35Bɛ kio doo, á nɔ̀ si á nɛgiĩ yɛ. Á tɔ́n pɛ: «Sisia, man die Dɛnaa tɔ boe.»
Bɛ lɛ nɛ, á nɛ lɛ bíi Zudaa (bɛ giala mà "Tɔbɔ").
Bɛ kio, a nɛ-yɛ nə́ n lɛ kũ.
اکنون انتخاب شده:
SGK 29: SBPE2011
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.