SGK 24
24
Izaaki laanka Rebeka a kɔn-wɔ
1Abrahamu zizi kɔ parsiini. Dɛnaa barka wɔ a-n sii tumaa gɔ́ɔ̃ nɛ. 2Ǹ kɔn pinaa, Abrahamu pɛ a kion a bɛ̀rɛgiĩ goon ne, ǹ mɛn lɛ bɛ́ zizi á la a kion a bɛ̀rɛ gialakunun kɛn manɛ, a n giã nɛ a gɔn mànan tumaa mìi la: «N gɔn da masɛ gisi li. 3N liɛ ka Dɛnaa, lon laanka tán a Lawa tɔ nɛ, mà ma bɛ́ giã-n Kanaan minin mɛnɛn bii, mà n ba re bɛn nɛ we lɔ lɛa, n kɔ maa nɛgiĩ Izaaki la wa. 4N liɛ masɛ nɛ, mà n tá re woe masɛ á bɔ ǹ gána nɛ, n ma din a kion min saa lɔ lɛa, n da kɔ Izaaki la.»
5A bɛ̀rɛgiĩ lɛ tɔ́n pɛ-n kɛnɛn: «Kɔntan, lɔ lɛ a re lɛ koe a kɔ masɛ lɛ, a da gána kɛ-n kànaa wa. Bɛ̀ á n baa miɛ̃, ma doamaa nɛ ma n nɛgiĩ Izaaki lɛ kũ, ma wo ne n bɔ ǹ gána lɛ nɛ?»
6Abrahamu tɔ́n pɛ nɛ: «N din kũ, n baran toa n wo ka maa nɛgiĩ-n walan wa! 7Dɛnaa, lon a Lawa na á masɛ bɔ ma dikion, maa yɛ ǹ gána nɛ, á boo da ma nɛ, á liɛ kɛ wɔ ma nɛ, mà asɛ á re gána kɛ lɛ koe ma tɔrɔn la. A din Lawa lɛ á die a lon a dia dí-a wole diɛ n nyɛɛnɛ. Lɔ saa walan masɛ a nɛgiĩ lɛ wɔ lɛa. 8Bɛ̀ lɔ lɛ lɛ kɔ, mà á koe n lɛ á die wa, bɛa liɛ kɛ ba n bɔlɔ-a wa. Sɛnɛ, n nyan toa n wo ka masɛ a nɛgiĩ-n walan wa.»
9Bɛ̀rɛgiĩ lɛ nə́ n gɔn da a dɛnaagiĩ Abrahamu gisi li, á n liɛ nɛ, mà asɛ á re zɛnɛɛ ka a bɛ́ á pɛ lɔn. 10Bɛ̀rɛgiĩ lɛ nyɔɔmaa fù bɔ a dɛnaagiĩ lɛ a nyɔɔmaan bii, á woo. A màn sonbore mɛn tumaa bɛ́ a tan, á yoo ka bɛ kɔ́n nɛ a gɔn, a n woe Nahɔɔrɔ a kiwi, Mezopotamii gána nɛ.
11A bɛ́ á dɔ tù kɔ́n lɛ-a kiwi lɛ lɛkoro-a, á nyɔɔmaan lɛn kaa tán walan. Bɛ á zɛnɛɛ bɛ̀ wasamiɛ̃n nɛ, lɔn soo a da mu sii waáraa. 12Á Lawa nyankɔ á pɛ:
– Dɛnaa, maa dɛnaagiĩ Abrahamu a Lawa, toa maa tɔ-wɔ kɛ bǐɛ̃ kɔ pelo. N din a sonborebaa nyaa masɛ a dɛnaagiĩ Abrahamu ni. 13Ma bɛ́ golee-n tù kɛ lɛ-a, kiwi lɛ a minin nɛlɔn tá re soe, mà maǹ die mu sii. 14Haya! Ma á re pii goon ne kɛnɛn: «N dɔ́n lɛ kanaa ma mu mi.» Bɛ̀ á pɛ mà ma mi, mà asɛ á re baɛ̃ a kɔ maa nyɔɔmaan lɛn dɔn la ǹ mi, ma á re doɛ̃, máa n nə n bɛ lɛ bɔ n bɛ̀rɛgiĩ Izaaki wɔ lɛa. Ma á re doɛ̃ ka bɛ nɛ, máa ń maa dɛnaagiĩ lɛ kũ ka sonborebaa nɛ.
15Sɛnɛ, a boo da á nya wa, bɛ̀ Rebeka bɛ́ á soo ka dɔ́n nɛ a wìi li. Abrahamu ǹ dɔɔ̃ngiĩ Nahɔɔrɔ a lɔ Milkaa a nɛgiĩ Betoeli a nɛlɔ nɛ. 16Nɛnɛn lɛ á siĩn yɔrɔ-a á la yii ni. A tɔn giĩ dɔ̃ bɔrɔ wa. Á daa tù lɛ lɛ-a, a ná a dɔ́n pã á n bɔyaa. 17Abrahamu a bɛ̀rɛgiĩ lɛ baa si á woo n da lɛ, á pɛ-n kɛnɛn: «Bǐɛ̃ kɔ, n nə n dɔ́n gɔ́ɔ̃ ǹ mu lɛ a boɛɛn kɔ ma la ma mi.»
18A ná a lɛ si. «Da si n mi le, giĩ lɛ!»
Á dɔ́n lɛ gisĩ, á kũ a gɔn fufuu, á mu lɛ kɔ la á mi. 19A bɛ́ á mu lɛ kɔ la á mi á nya ǹ mɛn waáraa, á wusoo á pɛ nɛ mà asɛ á die woe mu sii a da kɔ a nyɔɔmaan lɛn dɔn la, yǎa ǹ mii ǹ kiɛ̃.
20Á n nanaa á dɔ́n mu lɛ binyəə tɔɔn mu mi ǹ goo lɛ nɛ, á wusoo á woo ga mu li tù lɛ-a. Á mu baã á kɔ nyɔɔmaan lɛn tumaa la. 21Giĩ lɛ nə́ n lɛ tã, á goã giɛ a ganaa ka a yii ni, bɛ̀ Dɛnaa á die asɛ a tɔ-wɔ lɛ bǐɛ̃ koe, hinlaa bɛ̀ a die a bǐɛ̃ koe wa asɛ dɔ̃. 22Nyɔɔmaan lɛn bɛ́ ǹ nə́ mu mi ǹ nə́ nya lɔn, giĩ lɛ sana kaaran gole saa á kɔ la, a gugurubaa dɔ garamu sɔrɔ, á gɔn ganaa ǹ sana zan màn paa dɔ kɔ la, bɛn dɔn gogoonmaa a gugurubaa dɔ garamu paabibiɛ. 23Á nɔ̀n da la: «Die a nɛlɔ n ka nsɛ nɛ? Bɛ̀ yu ǹ bǎã á yii ń di a kion, a pɛ ma nɛ, ma laanka ma miãn nə wo n yu walan.»
24Nɛnɛn lɛ tɔ́n pɛ: «Milkaa nɛgiĩ mɛn yɛ Nahɔɔrɔ la, a tɔ n Betoeli, bɛa nɛlɔ n ka masɛ nɛ.»
25Bɛ kio, á pɛ nɛ dɔn: «Tɔɔn làpaa laanka ǹ sɔ̃ ǹ buu tá wɔsɛn piɛ gigiã, waa ǹ bǎã dɔ din tan.»
26Giĩ lɛ kaa tán, á barka da Dɛnaa nɛ, bɛ̀ á n pii: 27«Maa barka tá Dɛnaa ganaa, maa dɛnaagiĩ Abrahamu a Lawa ganaa, bɛ mɛn bɛ́ á sonborebaa taãn nyaa maa dɛnaagiĩ ni, a ná a lɛkɔmala ǹ siin tumaa lɛ pã a wɔ paǹ li. N din ni n mɛ masɛ nyɛɛnɛ, n daa ma koa maa dɛnaagiĩ ǹ dɔɔ̃nɔn kion.»
28Nɛnɛn lɛ baa si, á woo bɛa siin lɛn tumaa laakalaa ǹ dan li kion. 29Rebeka ǹ miãgiĩ goon goã, a tɔ n Laban. Bɛ́ baa si á soo kanaa, á woo giĩ lɛ li tù lɛ lɛ-a. 30Bɛ á zɛnɛɛ, á kaaran lɛ laanka zanan lɛn yɛ, ǹ miãnɛn Rebeka gɔn ganaa. Giĩ lɛ boon mɛnɛn pɛ nɛ, á bɛn dɔn ma a lɛ-n. Á kiɛ̃ á woo giĩ lɛ yaa, golee-n tù lɛ lɛ-a ka a nyɔɔmaan nɛ: 31«Da wɔsɛn piɛ, Dɛnaa a min sonbore! Wàa na á baa n tá golee kanaa? Má bǎã zɛnaa maa kion, má nyɔɔmaan lɛn dɔn kaa ǹ bǎã zɛnaa.»
32Abrahamu a bɛ̀rɛgiĩ lɛ daa Laban a kion. Ǹ nə́ guĩ fore ǹ nə́ bɔ a nyɔɔmaan lɛn la, ǹ nə́ làpaa laanka buu kɔ ǹ la. Ǹ nə́ mu kɔ a din laanka a da zii wolen la, mà ǹ nə n gòã pii ni. 33Ǹ nə́ màn-bii kɔ la mà a bii. Sɛnɛ, á pɛ ǹ nɛ: «Maa màn bii bɔrɔ, bɛ̀ ma maa daa ǹ mìi pɛ wa.»
Laban tɔ́n pɛ nɛ: «Haya, boo da!»
34Giĩ lɛ tɔ́n pɛ:
– Masɛ n Abrahamu a bɛ̀rɛgiĩ lɛa. 35Dɛnaa barka wɔ maa dɛnaagiĩ lɛ nɛ, á paãma gole baa. Á sèren kɔ la, ka bòen laanka diin ni, wɔrɔ laanka sana nɛ, bɛ̀rɛlɔn laanka bɛ̀rɛgiĩn ni, ka nyɔɔmaan laanka dundunun ni. 36A lɔ Saaraa lɛ nɛgiĩ yɛ nɛ a zizimaa kɛ lɛ gɔ́ɔ̃ nɛ. Maa dɛnaagiĩ ná a gɔn màn tumaa kɔ bɛa nɛgiĩ lɛ la. 37Maa dɛnaagiĩ pɛ ma-n kɛnɛn: «Ma Abrahamu bɛ́ giã-n Kanaan minin mɛnɛn gána nɛ, n liɛ mà n ba re bɛn nɛlɔ we lɔ lɛa, n kɔ maa nɛgiĩ Izaaki la wa. 38N liɛ, n pɛ mà n tá re woe ma dikion, ma dɔɔ̃nɔn li, n lɔ saa masɛ a nɛgiĩ lɛ wɔ lɛa.» 39Má tɔ́n pɛ maa dɛnaagiĩ lɛ nɛ máa kɔntan, lɔ lɛ a die lɛ koe, a kɔ masɛ lɛ a da kànaa wa. 40Á ma lɛ si á pɛ: «Ma bɛ́ Dɛnaa mɛn a zii tɔ we, a din lɛ n die a lon a dia dí-a wole diɛ n nyɛɛnɛ, a n tɔ-wɔ lɛ bǐɛ̃ kɔ. Ma din dɔɔ̃nɔn nɛ wɔ lɔ lɛa ma din dikion, n kɔ maa nɛgiĩ lɛ la. 41Bɛ̀ ń woo maa minin lɛn li ǹ mɛn waáraa, n nə n liɛ masɛ-n ka sii mɛn nɛ, bɛ nə́ n bɔ n mìi ni. Ta ǹ nə́ n piã dɔn, ǹ lɔ lɛ kɔ n la wa, bɛ ba n ganaa doo wa.» 42Ma bɛ́ má daa má dɔ tù kɛ lɛ-a pelo, má Lawa nyankɔ: «Maa dɛnaagiĩ Abrahamu a Dɛnaa Lawa, ma bɛ́ zii tɔ mɛn we, bǐɛ̃ kɔ ma ganaa, n ma gòã bǐɛ̃ na a nɛ.» 43Ma bɛ́ golee-n tù kɛ lɛ-a, bɛ̀ nɛnɛn mɛn daa mu si, ma á re pii ni: N dɔ́n mu lɛ a boɛɛn kɔ ma mi. 44Bɛ̀ á ma lɛ si kɛnɛn: «N dinmaa mi, ma á re baɛ̃ ma kaa n nyɔɔmaan dɔn lon, ma á re doɛ̃ ka bɛ nɛ, máa Dɛnaa na á bɛ lɛ bɔ, maa dɛnaagiĩ lɛ a nɛgiĩ lɛ a lɔ lɛa.» 45Ma bɛ bɛa boo lɛ diɛ nyɛɛ ma din gɔ́ɔ̃-n kɛnɛn, bɛ̀ Rebeka bɛ́ á soo ka a dɔ́n nɛ a wìi li, á n die mu sii tù lɛ-a. Má pɛ nɛ: «Bǐɛ̃ kɔ, n mu kɔ ma la, ma mi.» 46Á n nanaa a ná a dɔ́n lɛ kanaa, á pɛ ma nɛ: «A mi, ma á re mu koe n nyɔɔmaan lɛn dɔn la ǹ mi.» Má mi, á maa nyɔɔmaan lɛn dɔn gɔ ka mu ni. 47Má nɔ̀n da la dɔn máa die a nɛlɔ n ka asɛ nɛ? Á pɛ ma nɛ: «Milkaa nɛgiĩ mɛn yɛ Nahɔɔrɔ la, a tɔ n Betoeli, bɛa nɛlɔ n ka masɛ nɛ.» Bɛ lɛ nɛ, má kaaran lɛ da a nyin ni, má zanan lɛn kaa a gɔn wìin ganaa. 48Má kaa tán Dɛnaa yɔrɔ-a, má a guguru kɔ. Má barka da maa dɛnaagiĩ Abrahamu a Dɛnaa Lawa nɛ, bɛ mɛn bɛ́ á mɛ ma nyɛɛnɛ sɔnbɔraanɛ, maa zii tɔ-wɔ kɛ gɔ́ɔ̃ nɛ, màn mɛn bɛ́ toɛ, ma maa dɛnaagiĩ lɛ dɔɔ̃n a nɛ saa, ma da kɔ a nɛgiĩ la lɔ lɛa. 49Sisia, bɛ̀ ka á li, ka sii sonbore zɛnaa maa dɛnaagiĩ lɛ nɛ ka bɔlɔgoondɛnaabaa nɛ, ka pɛ ma nɛ. Bɛ̀ a giala yii dɔn wa, ka pɛ ma nɛ, ma wo bǎã kɔsɔ nɛ.
50Laban tɔ́n nə n lɛ da boo lɛ nɛ. A din laanka Betoeli tɔ́n pɛ: «Sii kɛ na á bɔ Dɛnaa din li, boo kɔ́n ba wɔsɛn lɛ-n, wɔ pɛ n nɛ wa. 51Rebeka lɛ á ke n yɔrɔ-a, a kũ n wo ne. A die a n baa n dɛnaagiĩ a nɛgiĩ lɛ a lɔ lɛa, ka Dɛnaa bɛ́ á pɛ lɔn.»
52Abrahamu a bɛ̀rɛgiĩ lɛ bɛa boon lɛn ma lɔn, á kaa tán Dɛnaa yɔrɔ-a, a ná a guguru kɔ. 53Bɛ kio, bɛ̀rɛgiĩ lɛ mànan waa, ǹ nə́ ǹ tɛn zɛnaa ka wɔrɔ nɛ, ǹ tɛn nə́ sana lɛa, á ǹ kɔ Rebeka la, ka mɔnaan nɛ. Á màn giɔ̀mɔ kakan kɔ nɛnɛn lɛ miãgiĩ laanka ǹ dan dɔ la. 54Bɛ̀rɛgiĩ lɛ laanka a da zii wolen nə́ màn bii kun, ǹ nə́ yoo ǹ nə́ woo waa tán.
Ǹ bɛ́ ǹ nə́ yoo baayɛlɛ, Abrahamu a bɛ̀rɛgiĩ lɛ pɛ Rebeka ǹ miãgiĩ laanka ǹ dan nɛ: «Ka toa man bɔyaa ma wo maa dɛnaagiĩ lɛ li sisia.»
55Nɛnɛn lɛ miãgiĩ laanka ǹ dan ná a lɛ si kɛnɛn: «A toa a giã wɔ li boɛɛnɛ, lɛawaa fù kɛ miã, bɛ kio, á re woe.»
56Bɛ̀rɛgiĩ lɛ tɔ́n pɛ ǹ nɛ: «Ka baran ma kurəə wa. Dɛnaa bɛ́ á masɛ a tɔ-wɔ bǐɛ̃ kɔ, ka toa man bɔyaa, ma wo maa dɛnaagiĩ lɛ li.»
57Ǹ nə́ tɔ́n pɛ nɛ: «Toa wɔ nɛnɛn lɛ din bíi, wɔ nɔ̀n da la ka a bɔlɔ yala nɛ.»
58Ǹ nə́ Rebeka bíi ǹ nə́ nɔ̀n da la: «Ń tá li n wo kun ka giĩ kɛ-n ya?»
Rebeka pɛ kɛnɛn: «Hiĩ.»
59Ǹ nə́ ǹ miãnɛn Rebeka lɛ toa walan á woo, kun ka lɔ mɛn too, ka Abrahamu a bɛ̀rɛgiĩ lɛ laanka a da zii wolen ne. 60Ǹ nə́ lɛn bǐɛ̃ bíi li, bɛ̀ ǹ tá pii: «Miãnɛn, Lawa die a toa n minbuiin duu damata a náa baa. Min mɛnɛn bɛ́ n tɔrɔn biɛ zɔ́ɔ, Lawa die a toa, n tɔrɔn nə bɛn giã ǹ bǎã a dɛnan baa.»
61Rebeka yoo kun ka a bɛ̀rɛlɔn nɛ, ǹ nə́ dii nyɔɔmaan lɛn la, ǹ nə́ kɔ giĩ lɛ lɛ, ǹ nə́ woo kun.
62Izaaki yoo á n bɔ Lahayi-Royi Tù lɛ-a. A na á goã giã-n gusin a lɛ̀gɔn la. 63Ǹ kɔn pinaa wasamiɛ̃nɛ, á soo a tá n bibiĩ lalaa lɛ-a. Á n yii saa lon, á nyɔɔmaan lɛn yɛ die. 64Rebeka bɛ́ á n yii saa lon, a Izaaki yɛ lɔn, á parɛ á n bɔ nyɔɔmaa lɛ la, 65á nɔ̀n da bɛ̀rɛgiĩ lɛ la: «Giĩ mɛn nə ke tɔ we lalaa lɛ-a, á n die n diɛ wɔ lɛ?»
Bɛ̀rɛgiĩ lɛ ná a lɛ si: «Maa dɛnaagiĩ ni.»
Rebeka ná a da ma wìi li ǹ mɔnaa bɔ, á kɔ a din mìi lɛ. 66Bɛ̀rɛgiĩ lɛ sii mɛn tumaa zɛnaa, a ná a tumaa laakalaa Izaaki ni. 67Izaaki Rebeka kũ á woo-n zìã nɛ, ǹ dan Saaraa bɛ́ á giã ǹ mɛn nɛ. Rebeka Izaaki a lɔ baa. Izaaki narɛ, a foo basã bɛ gɔ́ɔ̃ nɛ ǹ dan a gɛ̀ lɛ kio.
اکنون انتخاب شده:
SGK 24: SBPE2011
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.