SGK 25
25
Abrahamu a gɛ̀
1Abrahamu wusoo á lɔ kɔsɔ saa, a tɔ n Keturaa. 2A nɛgiĩn mɛnɛn yɛ Abrahamu ni, bɛn man ka Zimrana nɛ, Yoksan nɛ, Medan nɛ, Madiã nɛ, Yiisibaki laanka Suwa nɛ. 3Yoksan na á Sabaa laanka Dedan yɛ. Dedan tɔrɔn man ka Asuuru minin ni, Letuusu minin ni ka Lewumu minin ni. 4Madiã a nɛnyaanan man ka Ɛfaa nɛ, Ɛfɛɛrɛ nɛ, Anɔɔki ni, Abidaa laanka Eldaa nɛ. Bɛn lɛn tumaa n Keturaa tɔrɔn lɛa.
5Abrahamu ná a gɔn màn tumaa kɔ Izaaki la. 6Sɛnɛ, Abrahamu yii bɛ́ tɔn koo ǹ mɛn waáraa, a ná a bɛ̀rɛlɔn nɛgiĩn lɛn dɔn gɔ ka màn nɛ, bɛ kio, á tɔn nə ǹ na, á ǹ bɔ a nɛgiĩ Izaaki ganaa, á ǹ dia gána kɔ́n nɛ lɛ̀giala-n.
7Abrahamu na á lɛ̀ paabiɛ ka pɔsɔbaawensooro (175) zɛnaa kanaa, 8bɛ kio, á tɔ́n gã. Á zizi kɔ parsiini, á gã bɛ̀ a yii n nyɛɛ nɛ a zizi kɔ lɛ gɔ́ɔ̃ nɛ. Ǹ ná a gere bĩ ǹ minin geren bĩ ǹ bǎã nɛ. 9A nɛgiĩ Izaaki laanka Isimayeli ná a gere bĩ kele kolo yala lɛ-n Makpelaa, Ɛti tɔrɔ Sohara a nɛgiĩ Efrɔn a wuru lɛ nɛ, Manbre yɔrɔ-a. 10#SGK 23.3-16 Abrahamu na á goã á bɛa wuru lɛ pii Ɛti tɔrɔn lon. Maǹ nə́ Abrahamu din laanka a lɔ Saaraa bĩ walan. 11Abrahamu a gɛ̀ kio, Lawa barka wɔ a nɛgiĩ Izaaki lɛ nɛ. Izaaki na á goã giã-n Lahayi-Royi Tù lɛ-a.
12Saaraa a bɛ̀rɛlɔ Agaara, Ezipti min lɛ, a nɛgiĩ mɛn yɛ Abrahamu ni, a tɔ n Isimayeli, bɛ tɔrɔn man ka kɛn nɛ. 13Isimayeli a nɛnyaanan nə yɛ kɔn kio lɔn, bɛn man ka kɛn nɛ: a nɛ goledɛnaa n ka Nebayɔti ni. Bɛ kio, Kedaara, Adebeeli, Mibusaamu, 14Miisima, Duumaa, Masa, 15Adaadi, Temaa, Yetuuru, Nafisi ni ka Kedeemaa nɛ. 16Isimayeli a nɛgiĩn man ka bɛn nɛ, min fulupaa. Ǹ tumaa sɔmɔdɛnaa baa. Ǹ nə́ ǹ dinin tɔ kɔ ǹ kiwin ganaa ka ǹ giã ǹ bǎã nɛ. 17Isimayeli lɛ̀ paabiɛ ka pɔsɔɔwensɔbaa (137) nɛ, á tɔ́n gã, ǹ ná a gere bĩ ǹ minin geren bĩ ǹ bǎã nɛ. 18Isimayeli tɔrɔn lɛn nə́ giã Avilaa laanka Suuru bii ni, kunu Ezipti li foɛɛ̃nɛ, dia-n woe Assiirii gána la. Ǹ zia tàan bɛ́ a ba laɛ wa, ǹ nə́ giã ǹ gɔrɔn, ǹ nə́ n yɔrɔ dia Abrahamu tɔrɔ gialakunun lɛn la.
Zakɔba boo
(25.18–36.43)
Ezawu laanka Zakɔba
19Abrahamu a nɛgiĩ Izaaki tɔrɔ giala basa á ke. Abrahamu na á Izaaki yɛ. 20Izaaki a yɛ lɛ̀ pusi, á Rebeka saa lɔ lɛa. Rebeka n Laban ǹ miãnɛn lɛa, Betoeli mɛn bɛ́ Aramu min lɛa boe Mezopotamii gána nɛ, bɛa nɛlɔ nɛ. 21Rebeka goã nɛ yii wa, Izaaki Dɛnaa nyankɔ a lɛa. Dɛnaa makara bɔ Izaaki ganaa, a lɔ Rebeka lɛ daa á nɔ̀ si bɛlɛmanan lɛa a gɔ́ɔ̃ nɛ. 22Nɛnyaanan lɛn man nə́ goã kɔn nyɛnyɛnɛɛ a gɔ́ɔ̃ nɛ. Rebeka tɔ́n pɛ: «Bɛ̀ kɛ nə́ n zɛnaa miɛ̃ á woo nyɛɛnɛ, á re baraa koe ma ganaa!» Á nɔ̀n da Dɛnaa la. 23#Rɔm 9.12 Dɛnaa tɔ́n pɛ nɛ:
Gána paa a minin manə n gɔ́ɔ̃ nɛ.
Tɔrɔ tɔtɔ paa n die boe n gɔ́ɔ̃ nɛ.
Goon tá re pàã yii a la ǹ miã nɛ.
Goledɛnaa lɛ á die dí nyɛɛ kiɛɛrɛdɛnaa lɛ nɛ.
24Rebeka a gisiĩ biikoo bɛ́ á dɔ, á bɛlɛmanan yɛ. 25Ǹ mɛn soo bibinaanɛ, bɛ gɔ̀nɔn nə tã kəwu ni, a tumaa n ka lɛa ka tɔɔ ki bɛ́ lɔn. Ǹ nə́ bɛ bíi Ezawu (bɛ giala mà "Kadɛnaa"). 26Bɛ kio, ǹ miã lɛ soo, a gɔn nə́ paraa-n Ezawu gòãtoro ganaa. Ǹ nə́ bíi Zakɔba (bɛ giala mà "Gòãtoro"). Ǹ bɛ́ yii ǹ mɛn waáraa, bɛ̀ Izaaki lɛ̀ pɔsɔrɔ nɛ.
27Nɛgininin lɛn nə́ gole kɔ. Ezawu na á goã don-baali gole lɛa, n bibiĩ don parsiini. Zakɔba na á goã nɛnyaan tɛrɛɛn lɛa, giã zìã-n goã kɔɔ̃n a ganaa. 28Ezawu sii na á goã kɔɔ̃n Izaaki ganaa, a giala, Izaaki goã don siĩ narɛ. Zakɔba dɔ sii na á goã kɔɔ̃n Rebeka ganaa.
29Ǹ kɔn pinaa, Zakɔba zii tɔrɔ kɔ́n kɔrɛ. Ezawu bɔ donbaa ǹ bǎã nɛ á daa. Á goã nɔmaa-n parsiini. 30Á tɔ́n pɛ Zakɔba nɛ: «Toa ma zii tã kɛ kɔ́n bɔ ma da ma lɛ-n, a giala, bòo n die ma dii. Bɛ lɛ nɛ, ǹ nə́ tɔ́n Ezawu bíi Edɔmu, bɛ giala mà "Tã".»
31Zakɔba tɔ́n pɛ nɛ: «N kiãbaa lɛ kɔ ma la bɔrɔ.»
32Ezawu pɛ nɛ: «Ma bɛ́ re giɛ̃, maa kiãbaa lɛ là n ka wàa nɛ?»
33 #
Ebr 12.16
Zakɔba tɔ́n pɛ nɛ: «N liɛ ma-n bɔrɔ.»
Ezawu nə́ n liɛ Zakɔba nɛ, a ná a kiãbaa lɛ sã la. 34Zakɔba buuru laanka zii kɔ Ezawu la. Á màn bii, á yoo á kiɛ̃. Ezawu sàn kɔ ka a kiãbaa lɛ nɛ.
اکنون انتخاب شده:
SGK 25: SBPE2011
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.