Eze 5
5
Lawa n die dɔlɔ boe Izirayeli ganaa
1Nsɛ minbuiin a nɛ, gɔya sa lɛ-bɔle-a saa, n nə n mìi ka laanka n lɛtoro ka kɔɔ̃#5.1 Mìi ka laanka n lɛtoro ka kɔɔ̃: Bɛ n nyɛɛ mà Izirayeli tɔrɔn tá re we bɛ̀rɛbaa n bǎã nɛ. Maǹ bɛ̀rɛn mìi ka laanka ǹ lɛtoro ka koɛ̃. nɛ ka kùn bɛ́ lɔn. N bɛ́ re ka mɛn koɛ̃, n zɔɔ̃, n talakɔn wɔlɔ sɔɔ. 2Bɛ̀ Zeruzalɛmu nə n kũ biikoo mɛn li, n ka lɛ a talakɔn sɔɔ goon tã kiwi lɛ bii. A talakɔn sɔɔ lɛ a paabaa ǹ wɔ ke, n bɛ yawaa ka gɔya sa nɛ, n kiwi lɛ lɛnpɛnɛ nɛ. A talakɔn lɛ a sɔɔbaa ǹ wɔ ke, n die n bɛ pɛsɛ̃ piɛ̃ li, ma á re a kio lui ka maa gɔya sa nɛ. 3Sɛnɛ, n die n mìi ka lɛ a boɛɛn bɔ, n kaa n dɔnkɛ zéwo ne. 4N die n na a kɔn dɔ bɔ, n kaa tɛ-n n tã. Tɛ á re soe bɛ lɛ nɛ, a Izirayeli tɔrɔn lɛn tumaa kũ.
5Masɛ Dɛnaa Lawa n kɛ pii: «Bɛ lɛ n die Zeruzalɛmu yii. Man má Zeruzalɛmu bɔ tɔrɔ kɔsɔn bii má koa, gána kɔsɔn ná a lɛnpɛnɛ. 6Zeruzalɛmu minin lɛn nə́ n piã ka maa sii yɔrɔ bɔ ǹ boon ne, ǹ nə́ baraa kɔ ǹ nə́ la tɔrɔ kɔsɔn manɛ. Ǹ nə́ n piã ka maa landa boon ne, ǹ nə́ la gánan kɛn manɛ ǹ lɛnpɛnɛ. A giala, ǹ nə́ maa sii yɔrɔ bɔ ǹ boon lɛn tii, ǹ kɔ maa landa boon lɛn lɛ wa.» 7Bɛ lɛ na á toa masɛ Dɛnaa Lawa á kɛ pii: «Tɔrɔn mɛnɛn bɛ́ ka lɛnpɛnɛ kaa too kakabaa lɛ la bɛn wɔ nɛ. Ka tɔ wɔ á kɔnpɛ ka maa landa boon kɛn laanka maa gɔn waa ǹ boo kɛn nɛ wa. Tɔrɔn mɛnɛn dinin bɛ́ ka lɛnpɛnɛ, ka kɔ bɛn dɔn dinin landan lɛ wa.» 8Bɛ lɛ taman yii, masɛ Dɛnaa Lawa n kɛ pii: «Ma dɔ á die ka gialaa. Man die dɔlɔ boe ka ganaa kiwi lɛ bii, tɔrɔ kɔsɔn kɛn tumaa yɛ. 9Ǹ zɛnaa ǹ siin lɛn nə́ bɔbɔnɛɛ kɔ á la yii ni. Bɛ lɛ taman yii, ma bɛ́ re sii mɛn zɛnɛɛ ka nɛ, ma bin nə ǹ miã zɛnaa duduu wa, ma ba re ǹ miã dɔ din zɛnɛɛ doo duduu wa. 10#BPS 4.10 Díin tá re ǹ nɛnyaanan soɛ̃ kiwi lɛ nɛ, nɛnyaanan dɔn tá re ǹ díin soɛ̃. Ma dɔlɔ mɛn boo da, man die bɛ lɛ boe ka ganaa. Kaa min mɛnɛn dɔn bɛ́ re goɛ̃, ma á re bɛn tumaa sasawɛɛ, ma ǹ kaa kanaa paǹ tumaa nɛ.»
11Dɛnaa Lawa a da ǹ boo á ke: Ma tɔ taman yii, ka bɛ́ ka *gɔ̀ da maa kion sonbore kɛ ganaa kaa sii babaraan kɛn tumaa laanka kaa sii bɔbɔnɛɛn kɛn tumaa nɛ, man die ka dii lenlen, ka ǹ bɛ́ min mìi koɛ̃ lenlen lɔn. Ma a re makara boe ka ganaa wa, ma a re ka toɛ walan wa. 12Piɛ̃ busu á re kaa minin lɛn talakɔn sɔɔ a goon dii, hinlaa bòo á re ǹ nyɛɛ a ǹ bɔ kiwi lɛ nɛ. Ǹ tá re kaa talakɔn sɔɔ lɛ a paabaa ǹ wɔ dii zia la kiwi lɛ lɛkoro-a. Kaa talakɔn sɔɔ lɛ a giala-nyɔmiɛ̃ ke, ma á re bɛn pɛsɛ̃ kanaa paǹ tumaa nɛ, ma maa gɔya sa kɛ woɛ̃ ǹ li. 13Ma foo mɛn yoo ke, yǎa ma a nyɛɛ ǹ bǎã yii. Man die n foo nyɛɛ ka dinin lɛn la, ma maa gɛ̀ dòo bɔ ka ganaa. Ka á re doɛ̃ ka bɛ-n kəni mà ma din Dɛnaa Lawa n má boo da ka nɛ, a giala ma foo na á goã yoo-n ka li kaa lɛ-tii kɛ lɛ a lɛa.
14Man die Zeruzalɛmu kiwi lɛ bɔ̀n biɛ. Tɔrɔ kɔsɔn mɛnɛn bɛ́ a lɛnpɛnɛ, a yɛ á re sìi diɛ bɛn ganaa kun ka kiɛ̃ wolen kɛn tumaa nɛ. 15Ma á re dɔlɔ boe a ganaa ka ma foo ne, ka kakaarɛbaa nɛ, ma a sɔ̀n pɛ taãn-taãnɛ. Bɛ̀ ma bɛ zɛnaa ǹ mɛn waáraa, tɔrɔn mɛnɛn bɛ́ a lɛnpɛnɛ, bɛn tá re sɔ kiɛ la, ǹ da yaa lɛa. Bɛ lɛ á re min kɔsɔn doree, a nyɛ́ɛ da ǹ ganaa. Ma din Dɛnaa Lawa n ma pɛ.
16Ma á re bòo babaraa diɛ ka gialaa, ka kiɛ babaraa bɛ́ lɔn basaã koe. Man die bɛ lɛ diɛ a da ka dɛ. Man die bòo lɛ baraa koe ka ganaa, a ka gɔn li ǹ màn-bii tumaa nya lenlen. 17#SNS 6.8 Ma á re bòo laanka don màn babaraan diɛ ǹ da ka gialaa, ǹ kaa nɛnyaanan dɛ. Piɛ̃ busu ni, kɔn-dɛ nɛ, bɛ á re yii kaa kiwi lɛ nɛ. Ma á re zia kiɛ ka ganaa. Ma din Dɛnaa Lawa n má pɛ.
اکنون انتخاب شده:
Eze 5: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.