Eze 6
6
Lawa n dɔlɔ boe dì guguru-kɔlen ganaa
1Dɛnaa Lawa a boo dɔ ma li á pɛ kɛnɛn: 2Nsɛ minbuiin a nɛ, n yɔrɔ bɔyaa n dia Izirayeli a kelen kɛn la, n masɛ a boo gii kɛ da ǹ ganaa. 3N die n pɛ kɛnɛn: «Izirayeli a kelen lɛn, ka n too kɔ Dɛnaa Lawa a boo li. Dɛnaa Lawa n boo kɛ lɛ diɛ kelen wɔ paǹ li, tentenen ne, kele biin laanka nyankɔrɔ lɛn nɛ. Man die zia kiɛ ka ganaa, ma kaa wúlu bɔ ǹ bǎãn kɛn ziziɛ̃. 4Ma á re kaa *wúlu màn tã ǹ bǎãn kɛn ziziɛ̃, ma kaa nyɔɔ gìĩ kɔɔ̃n tã ǹ mànan kɛn yu, ma kaa minin kɛn dɛ ma ǹ geren kaa tán kaa dìn kɛn yɔrɔ-a. 5Má á re Izirayeli nɛgiĩn geren kiɛ tán kaa dìn kɛn yɔrɔ-a, má á re ka wen pɛpɛsɛ̃ ma kaa wúlu bɔ ǹ bǎãn kɛn lɛnpɛnɛ nɛ. 6Ka bɛ́ kiwin mɛnɛn tumaa nɛ, bɛa kiwin lɛn gɔ́ɔ̃ kooro á die goɛ̃, kaa wúlu bɔ ǹ bǎãn kɛn tá re goɛ̃ tán. Kaa wúlu màn tã ǹ bǎãn kɛn tá re wurii, ǹ nə́ ǹ ba re màn kɔn bǐɛ̃ koe doo wa. Kaa dìn kɛn tá re yɔyɔrɛ ǹ papaã. Kaa nyɔɔ gìĩ kɔɔ̃n tã ǹ mànan kɛn laanka ka màn mɛn tumaa zɛnaa, bɛn tá re ziziɛ̃. 7Min gigiã á re giɛ̃ ka bii. Ka á re doɛ̃ kəni, mà ma din nə Dɛnaa Lawa lɛa. 8Sɛnɛ, ma á re toɛ ka gialakun nə goã zia lɛ kio, ma bɛn pɛsɛ̃ gána kɔsɔn nɛ. 9Ma bɛ́ re woe ka kaa la wolen lɛn nɛ tɔrɔn mɛnɛn bii, ǹ tá re n taasɛ ka ma-n walan. Ka taasiɛ kɔrɔ laanka ga kɔrɔ mɛn wɔ, ka wusoo ka n bɔ masɛ kio, ka kaa naarɛɛbaa ǹ yiin kɛn doa dìn la, masɛ á re bɛa giã baraa lɛ ziziɛ̃. Ka tìĩ á re boe ka dinin nyin ni, kaa sii baraan laanka kaa sii bɔbɔnɛɛn kɛn tumaa taman yii ka zɛnaa. 10Ka á re doɛ̃ ka bɛ lɛ-n kəni, mà ma din nə Dɛnaa Lawa lɛa, kooro bie má pɛ, máa ma á re bɛa koe kɛ lɛ diɛ ka mìi-n wa.»
11Masɛ Dɛnaa Lawa n kɛ pii: – N gɔn dɛ, n nə n gòã tɔ tán n pɛ: «Sii lɛ lɛ pã kəni!» Izirayeli tɔrɔn sii baraa bɔbɔnɛɛ lɛ tumaa taman yii, ǹ tá giɛ̃ zia la, bòo nə ǹ tɛn dɛ, piɛ̃ busu nə ǹ tɛn dɛ. 12Ǹ mɛnɛn wɔlɔ bɛ́ sɔsɔɔ, piɛ̃ busu á re bɛn dii. Ǹ mɛnɛn wɔlɔ bɛ́ kunun, bɛn tá re giɛ̃ zia la. Ǹ nə n mɛnɛn kũ ǹ yii n koo, bòo á re bɛn dii. Man die bɛ lɛ zɛnɛɛ ǹ nɛ yǎa ma foo nyɛɛ. 13Ǹ geren tá re goɛ̃ tán kun ka ǹ dìn lɛn nɛ, ǹ wúlu bɔ ǹ bǎãn kɛn lɛnpɛnɛ, tenten sɔsɔrɔn tumaa laanka kelen tumaa mìi ni, da tumaa giulun ǹ mɛnɛn bɛ́ luu buruu lɛa ka kɛkɛ, ǹ goã wúlu boe bǎã mɛn tumaa nɛ ka màn gìĩ kɔɔ̃ nɛ ǹ dì kɔrɔn ganaa. 14Man die yui ǹ gialaa, ta maǹ giã-n bǎã mɛn nɛ gána lɛ nɛ, ma á re ǹ tumaa lui, a saa diə gole kɛ ganaa, a wo Dibla kiwi yaa. Ǹ tá re doɛ̃ ka bɛ lɛ-n kəni, mà ma din nə Dɛnaa Lawa lɛa.
اکنون انتخاب شده:
Eze 6: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.