Eze 4
4
Zeruzalɛmu a kuĩ
1Dɛnaa Lawa pɛ ma-n doo: Nsɛ minbuiin a nɛ, toopaa saa n da tán n yɔrɔ-a, n Zeruzalɛmu kiwi nyín zɛnaa la. 2N nyaa, ka maǹ nə́ kũ. N nyankɔrɔ bɔ, n na a tii dɔ kaa kɔn la n kiwi nyín lɛ lɛnpɛnɛ nɛ, zia-baalin bǎãn nyín ni, ka ziabaa ǹ màn dadaran nyínin ni, n kiwi nyín lɛ lɛnpɛnɛ nɛ. 3Fɔlɔ pataraa goon saa n zumu tán ka kungɔn bɛ́ lɔn, n laanka kiwi lɛ bii n ni. N ga kiwi lɛ ganaa gongongon, a n die goɛ̃ ka maǹ nə́ kũ, a giala, ma n nə́ n doa kiwi lɛ nyɛɛnɛ. Bɛ n die goɛ̃ sii a kɔnboe lɛa, a n nyaa Izirayeli tɔrɔn lɛn manɛ.
4Waa n gɔsɛ a wàã la, n toa bɛa wàã lɛ la, n nə n toɛ̃ ka Izirayeli minin lɛn sii baraa a guĩ ni. N bɛ́ re wɛɛ bɛa wàã lɛ la n lɛawaa lɛ mɛn dɔ, n die n nə n toɛ̃ ka ǹ sii baraan guĩ ni, bɛa lɛawaan lɛn gɔ́ɔ̃ nɛ. 5Ǹ sii baraa lɛ zɛnaa lɛ̀ lɛ mɛn gɔ́ɔ̃ nɛ, man die lɛawaa lɛ diɛ n mìi ni, a kɔnpɛ ka bɛ nɛ. Lɛawaa biɛsɔɔ ka pɔmanangɔrɔ (390). N die n nə n toɛ̃ ka Izirayeli minin lɛn sii baraa a guĩ ni bɛa lɛawaan lɛn gɔ́ɔ̃ nɛ. 6Bɛ̀ bɛa lɛawaan lɛn lɛ pã, n bɔyaa n waa n gusin a wàã dɔ la, n nə n toɛ̃ ka Zudaa minin kɛn dɔn sii baraa a guĩ ni lɛawaa pusi gɔ́ɔ̃ nɛ. Ǹ sii baraa zɛnaa lɛ̀n mɛnɛn gɔ́ɔ̃ nɛ, ma a lɛawaa gogoon kɔ n la, ǹ gogoonmaa wɔ lɛa. 7N die n nə n yɔrɔ dia n nə n gɔn pepere Zeruzalɛmu kiwi kɛ li, zɔ́ɔn nə́ da bii. N die n masɛ a boo gii da a ganaa. 8Á ke, man die biɛn kiɛ n ganaa, màn mɛn bɛ́ toɛ n baran n bɔyaa n nə n bɔ n wàã goon la n waa kɔsɔ la wa, yǎa n gɔn pepere Zeruzalɛmu kiwi kɛ li a lɛawaan lɛ piɛ̃.
9 *Belee saa, ka *ɔrzi ni, dù gere ne, zii ni, wii ni ka belee bibiɛ nɛ. N nə ǹ tumaa lɔlɔkɔn màn goon ne, n buuru zɛnaa nɛ. N bɛ́ re goɛ̃ waa-n tán n wàã la lɛawaa biɛsɔɔ ka pɔmanangɔrɔ mɛn gɔ́ɔ̃ nɛ, n tá re bɛa buuru lɛ soɛ̃ bɛa lɛawaan lɛn gɔ́ɔ̃ nɛ. 10Bɛ lɛ n die goɛ̃ n màn-bii lɛa. N die n bɛ lɛ a garamu biɛsɔɔ bii baraabaraa. 11N mi ǹ mu dɔ á re n zoɛ̃ bɛ̀ a n kɔ n la: litiri goon nə n tá re mii babaraa. 12N die n màn-bii lɛ zɛnaa ka ɔrzi mɔ̀mɔ bɛ́ lɔn. N die n kɔrɛ ka minbuiin nɛ bù ni, ǹ dinin yii ni. 13Dɛnaa Lawa tɔ́n pɛ doo: «Izirayeli minin lɛn man die màn gɔgɔrɛ bii miɛ̃ tɔrɔ kɔsɔn bii, ma bɛ́ re ǹ lui ma ǹ kaa tɔrɔn mɛnɛn lɛn bii.» 14Má tɔ́n a lɛ si má pɛ: «E! Dɛnaa Lawa, ma tɔn *gɔ̀ da ma din-a duduu wa. A saa maa nɛnyaanbaa waáraa ganaa a da kaa pelo lɛ, bɛ̀ màn mɛn gã a din li hinlaa don mànan man nə́ dɛ, máa ma bin bɛa siĩ sɔ̃ duduu wa, ma bin siĩ gɔgɔrɛ kɔn wɔ ma lɛ-n wa.» 15Á tɔ́n pɛ ma nɛ: «Bɛ̀ á miɛ̃, minbuiin nɛ bù lɛ toa walan, n diin bù goa, n nə n màn-bii lɛ kɔrɛ nɛ.» 16Á tɔ́n pɛ ma-n doo: «Nsɛ minbuiin a nɛ, á ke màn-bii mɛn tumaa á ke ǹ nə́ koa ǹ gɔn li Zeruzalɛmu kiwi, masɛ á re a tumaa papaɛ̃. Ǹ tá re ǹ màn-bii zoɛ̃ bɛ̀ ǹ kɔ ǹ la, ǹ bii ka foo ziziɛ̃ nɛ, ǹ tá re ǹ mi ǹ mu zoɛ̃ bɛ̀ ǹ kɔ ǹ la ǹ mi, bɛ̀ ǹ gɔ́ɔ̃ ń woɛ̃ nɛ. 17A giala, màn-bii laanka mu á re nyaabiɛ. Bɛ lɛ á re nyɛ́ɛ diɛ min tumaa ganaa, ǹ tá re pɛrɛ ǹ sii baraan lɛn taman yii.»
اکنون انتخاب شده:
Eze 4: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.