Eze 48
48
Gɔsɛ a lɛ̀gɔn la minin bǎã
1Tɔrɔn lɛn tɔn nə́ ke, ka ǹ bǎã giin ni: Dan tɔrɔn wɔ gii n die goɛ̃ gɔsɛ a lɛ̀gɔn la gɔ́ɔ̃ li, zii kɛ lɛkoro-a boe Etilɔn kiwi, a wo Lebo-Amaati kiwi, Hasaara-Enɔn nɛ, a Damaasi gána toa gɔsɛ a lɛ̀gɔn la, kunu Amaati ganaa. A n die siɛ gána lɛ ganaa lɛ̀giala gɔn la, a wo yǎa Yìsi mu gole kɛ ganaa lɛ̀nyɛɛnɛ. 2Dan tɔrɔn wɔ lɛ para li, a saa lɛ̀giala ganaa a wo lɛ̀nyɛɛn yaa, bɛ n Asɛɛrɛ tɔrɔn wɔ lɛa. 3Nɛfutalii tɔrɔn wɔ n Asɛɛrɛ tɔrɔn wɔ para li, 4Manaasee tɔrɔn wɔ n Nɛfutalii tɔrɔn wɔ para li, 5Efrayimu tɔrɔ wɔ n Manaasee tɔrɔn wɔ para li, 6Urubɛn tɔrɔn wɔ n Efrayimu tɔrɔn wɔ para li. 7Zudaa tɔrɔn wɔ n Urubɛn tɔrɔn wɔ para li, a saa lɛ̀giala ganaa, a wo lɛ̀nyɛɛn yaa.
Dɛnaa Lawa wɔ gii
8Zudaa tɔrɔn bǎã kɛ para li, a saa gèlè kɛ ganaa lɛ̀giala-n, a wo n doa Yìsi mu gole kɛ ganaa lɛ̀nyɛɛnɛ, ǹ die ǹ bǎã kɔn koa, ǹ mɛn a sasabaa bɛ́ re goɛ̃ goon ka tɔrɔn lɛn gogoonmaa wɔ nɛ. Bǎã lɛ a pəməbaa goã gùrù yii duu fuəwensooro (25 000). Lawa a kion lɛ n die goɛ̃ bɛ bii. 9Ka bɛ́ re bǎã mɛn kuri ka koa tán Dɛnaa Lawa wɔ lɛa, a sasabaa n die goɛ̃ gùrù yii duu fuəwensooro, a gɔ́ɔ̃ a pəməbaa goã gùrù yii duu fù (10 000). 10Bǎã lɛ a mɛn bɛ́ re doe Lawa a wúlu-bɔlen kɛn ganaa, a saa lɛ̀giala ganaa, a wo lɛ̀nyɛɛn li yìsi mu kɛ lɛ-a, bɛ n gùrù yii duu fuəwensooro, a saa gɔsɛ a lɛ̀gɔn la ganaa, a wo gusin a lɛ̀gɔn la yaa, bɛ n gùrù yii duu fù. Dɛnaa Lawa a kion lɛ n die goɛ̃ bii. 11Ǹ Sadɔki tɔrɔn mɛnɛn koa Lawa a wúlu-bɔlen lɛa, bɛa bǎã lɛ n die doe bɛn ganaa. Ǹsɛn nə́ Dɛnaa Lawa a dí nya ka bɔlɔgoondɛnaabaa nɛ. Ǹ Lawa toa walan ka *Levii tɔrɔn kɛn nə́ ke ǹ nə́ zɛnaa lɔn, Izirayeli tɔrɔn Lawa bɔlɔ tii kɛa biikoo li wa. 12Bɛ lɛ nɛ, ǹ bǎã mɛn lɛ kuru gána lɛ nɛ, ǹ nə́ koa tán Lawa wɔ lɛa, kunu Levii tɔrɔn bǎã kɛ ganaa, bɛ lɛ n doe ǹ ganaa. 13Levii tɔrɔn kɛn, ǹ bǎã a pəməbaa doamaa nɛ a goã goon ka Lawa a wúlu-bɔlen kɛn wɔ nɛ. A sasabaa doamaa nɛ a goã gùrù yii duu fuəwensooro, a gɔ́ɔ̃ a pəməbaa goã gùrù yii duu fù. 14Bɛa bǎã lɛ kɔn ba n siɛ̃ wa, a lon ba n koe wa, a ba n koe min dɔ la wa. A giala a din nə gána lɛa bǎã sonbore lɛa, a na á n kɔ Dɛnaa Lawa la. 15Ǹ bǎã mɛn lɛ kuru ǹ nə́ koa tán, gùrù yii duusooro (5 000) tá gùrù yii duu fuəwensooro lɛ la, a sasabaa li. Bɛ n die goɛ̃ kiwi lɛ a bǎã kooro lɛa, kionən dɔ ǹ bǎã laanka tɔɔn buu sɔ̃ ǹ bǎã lɛa, kiwi lɛ din nə́ bii.
16A gùrùn lɛn tumaa a sasabaa n die goɛ̃ gùrù yii duu sii ka biɛsooro (4 500), gɔsɛ a lɛ̀gɔn la, gusin a lɛ̀gɔn la, lɛ̀giala laanka lɛ̀nyɛɛn nɛ. 17Bǎã kooro mɛn bɛ́ re n toɛ walan, á n kiwi lɛ lɛnpɛnɛ a wàã sii tumaa li, bɛa pəməbaa n die goɛ̃ gùrù yii biɛpaa ka posooro (250). 18Ǹ bǎã mɛn lɛ koa Dɛnaa Lawa wɔ lɛa, bǎã kɔn nə die goɛ̃ a tan gùrù yii duu fù a lɛ̀giala gɔn la, gùrù yii duu fù a lɛ̀nyɛɛn gɔn la. Ǹ tá re màn-bii boe bɛ lɛ nɛ, ǹ kiwi lɛ a dí-nyalin too ne. 19Bɛa bǎã lɛ a dí-nyalin man die boe Izirayeli tɔrɔn lɛn bii. 20Ǹ bǎã mɛn koa Dɛnaa Lawa wɔ lɛa, wàã sii zɛnɛ kɔnlɛ nɛ, a gogoonmaa n gùrù yii duu fuəwensooro. Bɛ lɛ a talakɔn sii goon nə die kiwi lɛ a giã ǹ bǎã biɛ. 21Gialakun kɛ n die goledɛnaa wɔ biɛ. Bǎã mɛn nə n koa Dɛnaa Lawa wɔ lɛa, ka ǹ mɛn dɔ bɛ́ kiwi lɛ din a giã ǹ bǎã lɛa, goledɛnaa lɛ wɔ gii doamaa nɛ a n bɔ ǹ paanan nɛ. A n die goɛ̃ bǎã gialakunun kɛn lɛn para li, a sasabaa n gùrù yii duu fuəwensooro, a wo yǎa lɛ̀giala gɔn la a gèlè kɛ ganaa. Lɛ̀nyɛɛn gɔn la, a sasabaa n gùrù yii duu fuəwensooro, a n woe yǎa Yìsi mu gole kɛ lɛ dan ganaa. Bǎã mɛn nə n koa Dɛnaa Lawa wɔ lɛa, ka a kion sonbore kɛa dɔ ǹ bǎã nɛ, bɛn man die goɛ̃ gána lɛ a bǎã kuru a koa tán wole lɛ bii. 22Levii tɔrɔn kɛn bǎã laanka kiwi lɛ a giã ǹ bǎã nɛ, bɛn man die goledɛnaa lɛ a bǎã lɛ niɛ̃ kɔn paa, a paǹ goon nə́ Zudaa tɔrɔn bǎã nɛ gɔsɛ a lɛ̀gɔn la, a goon kɛ n Bɛnzamɛn tɔrɔn bǎã nɛ gusin a lɛ̀gɔn la.
Gusin a lɛ̀gɔn la minin bǎã
23Tɔrɔ gialakunun kɛn dɔn bǎãn giin man ka kɛn nɛ: Bɛnzamɛn tɔrɔn kɛn gii n die siɛ lɛ̀giala gɔn la a gèlè kɛ ganaa, a wo yǎa Yìsi mu gole kɛ lɛ-a lɛ̀nyɛɛnɛ. 24Simiɔn tɔrɔn kɛn gii n die goɛ̃ Bɛnzamɛn tɔrɔn wɔ para li, a saa lɛ̀giala ganaa, a wo lɛ̀nyɛɛn yaa. 25Isakaara tɔrɔn wɔ n die goɛ̃ Simiɔn tɔrɔn wɔ para li, 26Zabulɔn tɔrɔn wɔ goã Isakaara tɔrɔn wɔ para li, 27Gaadi tɔrɔn wɔ goã Zabulɔn tɔrɔn wɔ para li, a saa a din lɛ̀giala lɛ ganaa, a wo kaa lɛ̀nyɛɛn lɛ. 28Gaadi kiwi a gusin a lɛ̀gɔn la gèlè n die goɛ̃ gána lɛ gèlè lɛa. A n die n toɛ Tamaara kiwi lɛ̀giala-n, a wo Meribaa tà kɛ lɛ-a Kadɛsi kiwi, bɛ kio, a kɔ Ezipti a lɛ̀giala tà kɛ gɔ̀nɔn lɛ, a wo yǎa Yìsi mu gole kɛ lɛ-a. 29Ka gána lɛ gii Izirayeli tɔrɔn lɛn bii ka bɛa yɔrɔ lɛ nɛ, ka didie wɔ gii kɔ la. Ma din Dɛnaa Lawa a da ǹ boo ne.
Kiwi lɛ a kiɛnlɛn
30-31 #
SNS 21.12-13
Kiwi lɛ a wɔ ǹ kiɛnlɛn man ka kɛn nɛ. Izirayeli tɔrɔn lɛn gogoonmaa tɔ n die goɛ̃ kiɛnlɛ lɛ a gogoonmaa ganaa. Kungɔn ke gɔsɛ a lɛ̀gɔn la a sasabaa n gùrù yii duu sii ka biɛsooro, kiɛnlɛ sɔɔ n die goɛ̃ bɛ ganaa: Urubɛn a kiɛnlɛ nɛ, Zudaa wɔ nɛ ka Levii wɔ nɛ. 32Kungɔn goon dɔ á re goɛ̃ lɛ̀giala gɔn la, a sasabaa n gùrù yii duu sii ka biɛsooro. Kiɛnlɛ sɔɔ n die goɛ̃ bɛ dɔ ganaa: Zozɛfu a kiɛnlɛ nɛ, Bɛnzamɛn wɔ nɛ, ka Dan wɔ nɛ. 33Kungɔn lɛ a mɛn dɔ bɛ́ re goɛ̃ gusin a lɛ̀gɔn la, bɛ dɔ a sasabaa n gùrù yii duu sii ka biɛsooro. Kiɛnlɛ màn sɔɔ n bɛ dɔ ganaa: Simiɔn a kiɛnlɛ nɛ, Isakaara wɔ nɛ, ka Zabulɔn wɔ nɛ. 34Kungɔn mɛn dɔ bɛ́ re goɛ̃ lɛ̀nyɛɛnɛ, bɛ dɔ a sasabaa n die goɛ̃ gùrù yii duu sii ka biɛsooro. Kiɛnlɛ sɔɔ n die goɛ̃ bɛ dɔ ganaa: Gaadi a kiɛnlɛ nɛ, Asɛɛrɛ wɔ nɛ, ka Nɛfutalii wɔ nɛ. 35Kungɔn mɛn bɛ́ re kiwi lɛ lɛnpɛnɛ, a sasabaa n die goɛ̃ gùrù yii duu fulukiwisi (18 000).
Kiwi lɛ tɔ
A kũ bɛa pinaa lɛ ganaa, kiwi lɛ tɔ n die goɛ̃ ka kɛ nɛ: "Dɛnaa Lawa tá kànaa".
اکنون انتخاب شده:
Eze 48: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.