Eze 47
47
Lawa a kion lɛ a mu a bɔ ǹ bǎã
1 #
Zak 14.8; Zaã 7.38; SNS 22.1 Bɛ kio, giĩ lɛ wusoo á daa ka ma nɛ Lawa a kion lɛ a wɔ ǹ kiɛnlɛ kɛ lɛ-a. Ma bɛ́ giɛ, bɛ̀ mu á ke soe Lawa a kion lɛ a kiɛnlɛ giulun, lɛ̀giala gɔn la. A giala, kion lɛ yɔrɔ na á goã dia-n lɛ̀giala la. Mu lɛ na á goã baa sii woe kion lɛ a gusin a lɛ̀gɔn la, á n kiɛ̃ *wúlu bɔ ǹ bǎã kɛa gusin a lɛ̀gɔn la. 2Bɛ kio, á ma kũ á soo ka ma nɛ, ka gɔsɛ a lɛ̀gɔn la a kiɛnlɛ kɛ nɛ. Á tɔ́n kion lɛ lɛnpɛnɛ ka ma nɛ, á woo yǎa sɔmɔ gɔ́ɔ̃ a kiɛnlɛ kɛ lɛ-a, ǹ mɛn lɛ yɔrɔ bɛ́ dia-n lɛ̀giala gɔn la. Ma bɛ́ giɛ, bɛ̀ mu lɛ á ke baa sii kiɛnlɛ lɛ a gusin a lɛ̀gɔn la.
3Giĩ lɛ soo á woo lɛ̀giala gɔn la, ka màn zɔɔ̃ ǹ biɛ ná a gɔn. Á tɔ́n gùrù yii duu goon (1 000) zɔɔ̃. Bɛ kio, á ma kũ, á mu lɛ kuru ka ma nɛ. Mu lɛ na á goã ma kuĩ ma gòã kòrò ganaa. 4Á wusoo á gùrù yii duu goon zɔɔ̃, á ma kũ, á mu lɛ kuru ka ma nɛ. Bɛa mu lɛ na á goã ma kuĩ ma musin ganaa. Bɛ kio doo, á gùrù yii duu goon zɔɔ̃, á ma kũ á mu lɛ kuru ka ma nɛ. Bɛa bǎã a mu na á goã ma kuĩ ma bɔsɔ̃-n. 5Bɛ kio doo, á wusoo á gùrù yii duu goon zɔɔ̃. Bɛa bǎã a mu na á goã mu gole lɛa ma goã boe la ma á kuri wa. A giala, mu lɛ na á goã á dii lon, min ba boe la á kuri ka yɔrɔ kɔsɔ-n wa, yǎa bɛ̀ á mu biɛ doɛ̃. 6A bɛ́ miɛ̃, giĩ lɛ tɔ́n nə n toa ma ganaa kɛnɛn: «Minbuiin a nɛ, ń yɛ ke?» Bɛ kio, á ma kũ á wusoo á daa ka ma nɛ mu lɛ lɛ-a. 7Ma bɛ́ ma dɔ mu lɛ lɛ-a, ma bɛ́ giɛ, bɛ̀ dan nə́ ke mu lɛ lɛkoro-a gigiã, a paǹan paanan li. 8Á tɔ́n pɛ ma nɛ: «Mu kɛ lɛ n baa sii woe gána lɛ a lɛ̀giala gɔn li. A n gisĩ a bɔ Zurdɛ̃ a nyankɔrɔ basa kɛ nɛ, a kiɛ̃ a wo kaa yìsi mu kɔsɛ kɔsɛ kɛ li. Bɛ̀ á kaa yìsi mu lɛ li, a n bɔyɛɛ, a baa mu sonbore lɛa. 9Bɛa biikoo li, màn yiikoonaa mɛn tumaa bɛ́ bìn diɛ, mu lɛ bɛ́ re kiɛ bǎã woo bǎã nɛ, bɛn tá re ǹ yiikoonaabaa zɛnɛɛ walan. Bɛ̀ á n baa miɛ̃, zɔ̀ á re mɔnɛɛ parsiini, a giala, mu lɛ bɛ́ re kiɛ yìsi mu lɛ li, a n die bɔyɛɛ a baa mu sonbore lɛa. Mu lɛ bɛ́ re doe bǎã woo bǎã nɛ, yiikoonaabaa á yii walan. 10Bɛa biikoo li, zɔ̀-kũlin tá re golee tà lɛ lɛ-a. A kũ Ɛn-Gedii ganaa yǎa Ɛn-Eglayimu, bɛa bǎã kɛ tumaa á re zɔ̀ɔn nyɔmaa ǹ bǎã biɛ. Zɔ̀ tɔrɔ gigiã á re goɛ̃ li, ka Yìsi mu gole kɛ bɛ́ lɔn. 11Sɛnɛ, a lɛkoro lɛ-a bǎãn kɛn mu á re n bɔyɛɛ a mu sonbore baa wa. Bɛn tá re goɛ̃ yìsi bɔ ǹ bǎã lɛa. 12#SNS 22.2 Mu gole lɛ lɛkoro-a, a wàãn paanan li, da nɛ-kɔle tɔrɔ tumaa bɔ. Ǹ luu á re bɛbɛnɛ wa, ǹ nɛ dɔ a re nyɛɛ a n bɔ ǹ la wa. Mui woo mui, maǹ die nɛ mərə niɛ̃ ǹ la. A giala, mu gole lɛ n soe Lawa a kion. Dan lɛn nɛ á re màn-bii biɛ, ǹ luu tá re dagòã biɛ.»
Gána lɛ gèlèn
13Dɛnaa Lawa tɔ́n pɛ kɛnɛn: «Izirayeli tɔrɔ fulupaa lɛ bɛ́ re gána mɛn lɛ gii kɔn, man die a gèlè nyɛɛ ka nɛ. Bɛ̀ ka á gii, ka die ka Zozɛfu tɔrɔn kɛn wɔ baa paa. 14Gána lɛ á die kaa wɔ biɛ. Sɛnɛ, ka gii kɔn, ka tumaa wɔ goã goon. A giala, man má liɛ wɔ ka digolon manɛ, máa ma á re gána lɛ koe ǹ la. Sonbore, gána lɛ á re doe ka ganaa, a kaa wɔ baa. 15Gána lɛ gèlè n die goɛ̃ ka kɛ nɛ: A gɔsɛ a lɛ̀gɔn la gèlè n yui tán Yìsi mu gole kɛ lɛ-a, a kɔ zii kɛ lɛ boe Etilɔn kiwi, Lebo-Amaati laanka Sedati kiwi, 16a kiɛ̃ a da bɔ Berotaa laanka Sibrayimu kiwin kɛn nɛ, Damaasi laanka Hamati gána bii. A nə n toɛ walan, a wo bɔ Asɛɛrɛ-Tikɔn gána kɛ nɛ, kunu Horan gána gèlè ganaa. 17Bɛa yɔrɔ lɛ la, gèlè lɛ n die yui tán Yìsi mu gole kɛ lɛ-a, a wo yǎa Asara-Enan kiwi, Damaasi gána laanka Hamati gána a gɔsɛ a lɛ̀gɔn la. Gɔsɛ a lɛ̀gɔn la wɔ n ka bɛ nɛ. 18Lɛ̀giala gɔn la a gèlè kɛ n yui tán Damaasi laanka Horan biin ni, a kɔ Zurdɛ̃ a nyankɔrɔ basa kɛ lɛ, Galaati gána laanka Izirayeli gána biin ni, a kũ gɔsɛ a lɛ̀gɔn la gèlè ganaa, yǎa yìsi mu kɔsɛ kɔsɛ kɛ lɛ-a. Lɛ̀giala gɔn la wɔ n ka bɛ nɛ. 19Gusin a lɛ̀gɔn la, gèlè lɛ n die siɛ tán Tamaara kiwi, a wo Meribaa tà kɛ lɛ-a Kadɛsi kiwi. A n die koe Ezipti a lɛ̀giala gɔn la tà kɛ gɔ̀nɔn lɛ, a wo yǎa Yìsi mu gole kɛ lɛ-a. Gusin a lɛ̀gɔn la gèlè n ka bɛ nɛ. 20Lɛ̀nyɛɛn gɔn la, Yìsi mu gole kɛ n die goɛ̃ gèlè lɛa, a saa gusin a lɛ̀gɔn la ganaa, a wo yǎa Lebo-Amaati yɔrɔ-a. Bɛ n lɛ̀nyɛɛn gɔn la wɔ lɛa.
21Ka dinin Izirayeli tɔrɔ fulupaa lɛ die ka gána lɛ gii kɔn. 22Ka n pã bǎãn lɛn ganaa, ka tɔn nə ǹ gii kɔn ka dinin laanka tiin mɛnɛn bɛ́ giã-n ka bii, ǹ nə́ nɛnyaanan yɛ ka bii. Ka ǹ dɔn kũ Izirayeli minin lɛa, ǹ dɔn nə n pã ǹ bǎãn ganaa kun ka ka nɛ. 23Tii lɛ bɛ́ giã-n kaa tɔrɔn lɛn mɛnɛn bii, ka a bǎã kɔ la walan. Ma din Dɛnaa Lawa a da ǹ boo ne.»
اکنون انتخاب شده:
Eze 47: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.