Dan 1
1
Danayeli laanka a ti-kun wolen
1 #
Kiin2 24.1; KZS2 36.5-7 Zudaa tɔrɔn kii Zozakimu a kiibaa lɛ̀ sɔɔbaa ǹ wɔ, *Baabilonii gána a kii Nebukadenezɔɔrɔ daa kɔ Zeruzalɛmu lɛ. 2#Kiin2 20.17-18; 24.10-16; KZS2 36.10; Iza 39.7-8 Dɛnaa Zudaa tɔrɔn kii Zozakimu wɔ a gɔn kɔnlɛ ka Lawa a kion kɛ a dí nya ǹ mànan tɛnɛn nɛ. Nebukadenezɔɔrɔ daa ǹ nɛ Baabilonii gána nɛ, á mànan lɛn kaa a dì kion, a dì lɛ gɔn mànan tamaa ǹ bǎã nɛ.
3Ǹ kɔn pinaa, Nebukadenezɔɔrɔ pɛ a dí-nyalin goledɛnaa Asipenaazi-n kɛnɛn: «Nɛgininin kɔnɔn bɔ Izirayeli minin lɛn bii n da ǹ nɛ, ǹ mɛnɛn bɛ́ kii tɔrɔn lɛa, sumu yii guguru-a minin lɛa. 4Wɔ̀lɔ̀ kɔn doamaa bie a goã bɛa nɛgininin lɛn ganaa wa. Ǹ yɔrɔ doamaa nɛ a goã siĩni. Sii-doɛ̃ doamaa nɛ a goã ǹ lon sii tumaa wɔ paǹ li, yiri nə́ ǹ lon, ǹ nə́ sii a woo ǹ bǎã doɛ̃, ǹ nə́ die boe la ǹ kii a kion dí nya. Ka tá re bɛa nɛgininin lɛn darɛɛ Baabiloniin bɔlɔ laanka ǹ sɛ́wɔ kiɛ̃ ǹ gɔn ganaa. 5Ma din bɛ́ màn mɛn bii, ma din bɛ́ duvɛ̃ mɛn mii, ka bɛ kɔn kɔ ǹ la baraabaraa. Ka ǹ too yǎa lɛ̀ sɔɔ, bɛ kio, ka tɔn nə ǹ kaa maa dí ni.»
6Ǹ min mɛnɛn bɔ, Zudaa minin kɔnɔn nə́ goã ǹ bii: Danayeli ni, Anania nɛ, Mikayeli ni ka Azaria nɛ. 7Dí-nyalin goledɛnaa lɛ tɔ kɔsɔn wɔ ǹ ganaa: á Danayeli bíi Bɛlsazaara, á Anania bíi Sadraki, á Mikayeli bíi Mesaki, á Azaria bíi Abɛdi-Negoo.
8Sɛnɛ, Danayeli a taasiɛ màn mɛn kũ, bɛ n ka kɛ nɛ, mà asɛ a die kii a màn bii, a na a duvɛ̃ mi, a *gɔ̀ da a din ganaa wa. Á dí-nyalin goledɛnaa lɛ nyankɔ, mà a baran asɛ da bɛa màn kɛ tɔrɔ bii ganaa ka pàã nɛ, asɛ gɔ̀ da a din ganaa wa. 9Lawa tɔn bǐɛ̃ kɔ Danayeli ganaa, a ná a sii kɔɔ̃n kɔ dí-nyalin goledɛnaa lɛ ganaa. 10Sɛnɛ, dí-nyalin goledɛnaa lɛ pɛ Danayeli ni kɛnɛn: «Man nyɛ́ɛ biɛ maa dɛnaagiĩ kii lɛ nɛ, a giala, ka doamaa bɛ́ nɛ ka màn mɛn bii, ka màn mɛn mi, a din na á bɛ pɛ á koa tán. Bɛ̀ maa dɛnaagiĩ lɛ ka yɛ ka n pɛrɛ ka n liɛ ka miã lɛn manɛ, ka n die sii siɛ ka da masɛ mìi ni, ma nyin nɔmaa a goã a nɛ kii gɔn.»
11Danayeli ni, Anania nɛ, Mikayeli laanka Azaria nɛ, dí-nyalin goledɛnaa lɛ nə́ ǹ sii wɔ min goon gɔn. Danayeli na á pɛ bɛa dɛnaa lɛ nɛ: 12«Bǐɛ̃ kɔ n dù luun dininsɔɔ̃nɔn kɔ wɔ la wɔ sɔ̃, n mu kooro kɔ wɔ la wɔ mi lɛawaa fù gɔ́ɔ̃ nɛ n ga a ganaa. 13Bɛ kio, n ga wɔ yɔrɔ-a, ka wɔ miãlɛn kɛn lɛn wɔ nɛ, kii a màn kɔɔ̃n kɛ bii. Bɛ́ n màn mɛn yɛ, n die n sii zɛnaa wɔsɛn manɛ, a kɔnpɛ ka bɛ nɛ.» 14Giĩ lɛ lɛ kɔ bɛa boo lɛ ganaa, á ga ǹ ganaa lɛawaa fù gɔ́ɔ̃ nɛ. 15Á pii mà a n woe doe lɛawaa fù, ǹ nə́ kasã ǹ yɔrɔ ń tɛ pii á la ǹ miã nɛgininin lɛn tumaa wɔ nɛ, ǹ mɛnɛn nə goã kii a màn-bii kɔɔ̃n lɛ bii. 16A saa bɛ lɛ ganaa, ǹ sii nə n wɔ min mɛn lɛ gɔn, màn-bii kɔɔ̃n laanka duvɛ̃ mɛn doamaa bɛ́ nɛ a n kɔ ǹ la, asɛ n bɛn goɛ, bɛ̀ a dù luu lɛ kɔ Danayeli laanka ǹ miãn lɛn la. 17Bɛa nɛgininin kɛn lɛn, Lawa doɛ̃ kɔ ǹ dinin min sii la, á sɛ́wɔ dɔ̃ ǹ yiri kɔ ǹ la, ka sii-doɛ̃ nɛ. Danayeli lɛ sɛ na á goã sii-nyaan tumaa laanka narɛɛn dɔn giala doɛ̃ a tá ǹ pii.
18Kii Nebukadenezɔɔrɔ biikoo mɛn pɛ, bɛ bɛ́ á dɔ, dí-nyalin goledɛnaa lɛ nɛgininin lɛn kũ á woo ǹ ne kii lɛ li. 19Kii lɛ sùn baa kunun ǹ ni. Sɛnɛ, ǹ dinin tumaa bii, Danayeli ni, Anania nɛ, Mikayeli laanka Azaria nɛ, a min kɔn yɛ ka bɛn bɛ́ lɔn wa. Bɛ lɛ nɛ, ǹsɛn lɛn nə́ tɔ́n kii a dí-nyalin baa. 20Sii mɛn tumaa bɛ́ sii-doɛ̃ laanka yiri ná a yɔrɔ boe, kii lɛ nɔ̀n da ǹ la ka ǹ mɛnɛn nɛ, á woo yǎa bɛ̀ ǹ nə́ la a gána lɛ a wɔ-kũlin laanka bòon kɛn tumaa nɛ gunyin fù.
21Bɛ lɛ nɛ Danayeli goã walan, yǎa kii Siirusu a pàã saa lɛ̀ bibinaa li.
اکنون انتخاب شده:
Dan 1: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.