Eze 46
46
Goledɛnaa doamaa bɛ́ nɛ a sii mɛn zɛnaa
1Dɛnaa Lawa a boo n ka kɛ dɔ nɛ: «Sumu gɔ́ɔ̃ a kiɛnlɛ ke a yɔrɔ n dia-n lɛ̀giala la, bɛ doamaa nɛ a goã tiɛ̃ nɛ dí nya ǹ lɛawaa sɔrɔ kɛ tumaa gɔ́ɔ̃ nɛ. Sɛnɛ, *susu ǹ pii laanka mui dii zɔ́n pinaa, ka doamaa nɛ, ka bũ ka da koo. 2Bɛ̀ goledɛnaa lɛ á boe kanaa die, a doamaa nɛ a wɔ ka dàã a kiɛnlɛ kɛ nɛ, a wo n naa kiɛnlɛ lɛ a gɔnɔn ganaa. Bɛ kio, wúlu-bɔlen lɛn na a *wúlu màn tiɛ̃ laanka a barka da Lawa nɛ ǹ wúlu mànan kɔ Lawa la. Bɛ kio, goledɛnaa lɛ nə n zuməə tán kiɛnlɛ lɛ baãbii a tɔn soo. Sɛnɛ, kiɛnlɛ lɛ n die goɛ̃ koo miɛ̃, yǎa wasamiɛ̃nɛ. 3Susu ǹ piin laanka mui dii zɔ́nɔn pinaa, Lawa a zaman gialakun kɛ tumaa kaa tán Dɛnaa Lawa yɔrɔ-a bɛa kiɛnlɛ lɛ lɛ-a.
4Goledɛnaa lɛ doamaa bɛ́ nɛ a mànan mɛnɛn dɛ wúlu màn tiɛ̃ lɛa, susu ǹ pii pinaa, sère nɛ sɔrɔ laanka sère gɔ̀lɔ̀ goon ne, wɔ̀lɔ̀ ná a ba ǹ ganaa wa. 5A die a *belee kilo pɔsɔɔ ti sère gɔ̀lɔ̀ gogoonmaa ganaa a da nɛ. A din bɛ́ li a belee mɛn ti sère nɛn lɛn ganaa, a bɛ ti ǹ ganaa. A die a nyɔɔ litiri sɔrɔ kaa belee kilo pɔpɔsɔɔ li. 6Mui dii zɔ́n pinaa, ǹ doamaa nɛ ǹ dii gɔ̀lɔ̀ goon dɛ, sère nɛ sɔrɔ laanka sère gɔ̀lɔ̀ goon ne, wɔ̀lɔ̀ ná a ba ǹ kɔn ganaa wa. 7Goledɛnaa lɛ die a belee kilo pɔsɔɔ ti dii gɔ̀lɔ̀ gogoonmaa laanka sère gɔ̀lɔ̀ gogoonmaa ganaa, Lawa gɔ ǹ wɔ lɛa. Sère nɛn kɛn wɔ paǹ li, bɛ̀ a gɔn kaa belee mɛn lɛ, a bɛ ti ǹ ganaa. A die a nyɔɔ litiri sɔrɔ kaa belee kilo pɔpɔsɔɔ li. 8Bɛ̀ goledɛnaa lɛ á die we kion lɛ nɛ, a wɔ ka dàã li a kiɛnlɛ kɛ nɛ, a wusoo a soo ka a din lɛ nɛ. 9Sɛnɛ, zaman lɛ a gialakun ke, bɛ̀ bɛn nə́ daa zɔ́n biikoon li, ǹ mɛnɛn bɛ́ re we ka gɔsɛ a lɛ̀gɔn la a wɔ ǹ kiɛnlɛ kɛ nɛ ǹ Dɛnaa Lawa guguru kɔ, bɛn die ǹ soo ka gusin a lɛ̀gɔn la a kiɛnlɛ kɛ nɛ. Min mɛnɛn dɔn bɛ́ re we ka gusin a lɛ̀gɔn la a kiɛnlɛ kɛ nɛ, bɛn die ǹ soo ka gɔsɛ a lɛ̀gɔn la wɔ kɛ nɛ. Bɛ̀ min mɛn wɔ ka kiɛnlɛ mɛn nɛ, ǹ dɛnaa nyan wusoo a soo ka bɛ-n wa. Kiɛnlɛ kɔsɔ mɛn yɔrɔ bɛ́ dia-n la, a soo ka bɛ nɛ. 10Goledɛnaa lɛ dɔ n die we kun ka zaman lɛ nɛ, bɛ̀ ǹ tá soe ǹ mɛn waáraa, a dɔ soo kunun ǹ ni.
Sii mɛn doamaa bɛ́ nɛ a n zɛnaa wúlu bɔ paǹ li
11Zɔ́n pinaan laanka lɛawaa dadaran nɛ, ǹ bɛ́ re dii gɔ̀lɔ̀ hinlaa sère gɔ̀lɔ̀ mɛn biɛ wúlu màn lɛa, ǹ *belee kilo pɔsɔɔ ti bɛ ganaa, Lawa gɔ ǹ wɔ lɛa. A din bɛ́ li a belee mɛn ti sère nɛn lɛn ganaa, a bɛ ti ǹ ganaa. A die a nyɔɔ litiri sɔrɔ kaa belee kilo pɔpɔsɔɔ li.
12Bɛ̀ goledɛnaa din tá li a Dɛnaa Lawa gɔ ka màn mɛn nɛ, ta wúlu màn tiɛ̃ nɛ hinlaa ta zɔ́ɔ da Lawa nɛ ǹ wúlu màn nɛ, kiɛnlɛ mɛn yɔrɔ bɛ́ dia-n lɛ̀giala la, ǹ bɛ bũ, a na a wúlu màn tiɛ̃ laanka a zɔ́ɔ da Lawa nɛ ǹ wúlu lɛ bɔ, ka a bɛ́ zɛnɛɛ susu ǹ pii pinaa lɔn. Bɛ̀ á nya á soo, ǹ tɔn kiɛnlɛ lɛ kũ ǹ tã a kio. 13Lɛ̀ goon sère nɛ mɛn bɛ́ wɔ̀lɔ̀ ná a ba a ganaa wa, ǹ die ǹ bɛ kɔ Dɛnaa Lawa la, wúlu màn tiɛ̃ lɛa baraabaraa. Bɛa wúlu lɛ nə n boe baayɛlɛ baayɛlɛ. 14Baraabaraa baayɛlɛ dɔn, ǹ wùsu kilo sooro lɔlɔkɔn ka nyɔɔ litiri paa nɛ, ǹ bɛ kɔ Dɛnaa Lawa la. Dɛnaa Lawa gɔ ǹ wɔ n ka bɛ nɛ, ǹ die ǹ bɛ zɛnaa miɛ̃ duduu. 15Sère nɛ kɛ nɛ, ka wùsu lɛ laanka nyɔɔ lɛ nɛ, ǹ doamaa nɛ ǹ bɛ kɔ Dɛnaa Lawa la wúlu màn tiɛ̃ lɛa, baraabaraa baayɛlɛ. Bɛ nə n zɛnaa miɛ̃ duduu.»
Goledɛnaa lɛ a nɛnyaanan bǎã
16Dɛnaa Lawa màn mɛn pɛ, bɛ n ka kɛ nɛ: «Bɛ̀ goledɛnaa lɛ ná a bǎã pɔrɔ á kɔ a nɛ mɛn la, bɛa bǎã lɛ n goɛ̃ bɛa nɛ lɛ wɔ lɛa. Bǎã lɛ n goɛ̃ a nɛ lɛ a yɛ ǹ nɛnyaanan wɔ lɛa, a dɛnaabaa dɔ a tɔrɔn ganaa miɛ̃ a woo. 17#LWS 25.10 Bɛ̀ goledɛnaa lɛ ná a dí-nyali mɛn gɔ ka bǎã nɛ, bɛa bǎã lɛ n die goɛ̃ bɛa dí-nyali lɛ wɔ lɛa, yǎa lɛ̀ posooro zɔ́n kɛ doe, a tɔn wusii a goledɛnaa lɛ wɔ biɛ. Goledɛnaa lɛ din bǎã mɛn kuru á kɔ a nɛgiĩn la, bɛ dinsɔɔ̃ n die goɛ̃ bɛn gɔn duduu. 18Goledɛnaa lɛ doamaa bie a zaman lɛ a min kɔn a bǎã kũ a si la ka pàã-n wa. A bɛ́ re bǎã mɛn koe a nɛnyaanan lɛn la, a doamaa nɛ a bɛ kuru a din wɔ nɛ, màn mɛn bɛ́ toɛ, a zaman lɛ a min kɔn wɔlɔ baran lui a din a bǎã ganaa wa.»
Lawa a kion lɛ a kùsì bǎãn
19Bɛ kio, wɔ ǹ bǎã mɛn bɛ́ gɔsɛ a lɛ̀gɔn la a kiɛnlɛ kɛ li, giĩ lɛ ma kũ á bɔ ka ma nɛ walan, á wɔ ka ma nɛ kion sonbore sonboren kɛn gɔ́ɔ̃ nɛ, ǹ mɛnɛn lɛn bɛ́ Lawa a wúlu-bɔlen wɔ lɛa. Bǎã kɔn na á goã a gɔ́ɔ̃ li, lɛ̀nyɛɛn gɔn la. 20Á tɔ́n pɛ ma nɛ: «Ǹ bɛ́ re sii baraa sawaa ǹ wúlu mànan laanka zɛ̀rɛ si Lawa la ǹ wúlu mànan mɛnɛn dii, wúlu-bɔlen lɛn doamaa nɛ, ǹ nə ǹ kɔrɛ kanaa, ǹ Lawa gɔ ǹ mànan kɛn dɔn tã. Ǹ zɛnaa miɛ̃ màn mɛn bɛ́ toɛ ǹ baran wo ka màn kɔn nɛ sɔmɔ gɔ́ɔ̃ kɛ nɛ, ǹ sii saa ǹ kaa zaman lɛ ganaa wa.»
21Bɛ kio, á ma kũ á soo ma nɛ sɔmɔ gɔ́ɔ̃ kɛ nɛ, á bɔ ka ma nɛ sɔmɔ gɔ́ɔ̃ lɛ a gùrù sii tumaa ganaa. Sumu gɔ́ɔ̃ bɔnboɛɛn na á goã a gùrù sii lɛ a gogoonmaa ganaa. 22Sumun mɛnɛn nə goã a gùrù sii lɛ tumaa ganaa, maǹ nə́ goã boɛboɛ: ǹ sasabaa na á goã gùrù yii pusi, ǹ pəməbaa na á goã gùrù yii pɔsɔɔ. A siimaa lɛ tumaa a pəməbaa na á goã goon. 23Ǹ nə́ kungɔn dɔ ka kɔlɔ nɛ, ǹ nə́ bɛa sumu lɛ a gogoonmaa lɛnpɛnɛ nɛ. Maǹ nə́ goã ǹ nə́ kùsìn doa bɛa kungɔn lɛ ganaa, ǹ ná a lɛnpɛnɛ nɛ. 24Giĩ lɛ tɔ́n pɛ ma nɛ: Kùsin manɛ. Lawa a kion lɛ a dí-nyalin man die zaman lɛ a wúlu mànan siĩ kɔrɛɛ walan.
اکنون انتخاب شده:
Eze 46: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.