Eze 29
29
Boo mɛn nə n da Ezipti gána wɔ paǹ li
1 #
Iza 19.1-25; Zer 46.2-26 Izirayeli minin goa lɛ a lɛ̀ fùbaa ǹ wɔ, a mui fùbaa ǹ wɔ a lɛawaa fulupaabaa ǹ wɔ pinaa, Dɛnaa Lawa boo da ma nɛ á pɛ: 2Minbuiin a nɛ, n yɔrɔ da Eziptin kii *Faarahɔn kɛ la, n masɛ a boo kɛ da, n yoo a gialaa, n yoo Ezipti gána tumu dɔ gialaa. 3Boo da n pɛ, mà masɛ Dɛnaa Lawa n kɛ pii:
Nsɛ Eziptin kii Faarahɔn kɛ lɛ,
man die n gialaa.
Nsɛ mu li ǹ màn babaraa kɛ lɛ,
waa-n tán Ezipti a tà gòã nɛ,
táa n din nə́ ń pɛ
mà nsɛ din a tà n ka n tà nɛ,
ma nsɛ nə ń zɛnaa n din wɔ lɛa.
4Nsɛ basa gole ke,
ma á re koɛɛ̃n we n lɛ-n,
ma n baã ma soo n ne,
n din laanka zɔ̀nɔn kɛn tumaa
wɔrɛɛ nɛ n fɔ́rɔ ganaa.
5Ma á re woe n zuĩ diə gole kɛ nɛ,
n din laanka n tà lɛ a zɔ̀n tumaa nɛ.
N tá re woe mɛnɛɛ tán furu-n n gã,
min din ba re yii a n gere saa
a bĩ wa.
Ma á re n gere koe don
mànan laanka bàanan la.
6 #
Iza 36.6
Ezipti minin tumaa á re doɛ̃ kəni,
mà ma din nə Dɛnaa Lawa lɛa.
Izirayeli tɔrɔn lɛn man nə́ n foo
doa ka dinin ganaa,
sɛnɛ, ka soɛ kɔ buruu-n wa.
7Ǹ bɛ́ ǹ nə́ n gɔn kũ n ganaa,
ń yiɛ ǹ gɔn,
ń nə́ ǹ nyàa koo tumaa sɔsɔlɔ.
Ǹ bɛ́ ǹ nə́ n foo doa n ganaa,
ń yiɛ ǹ gɔn,
ń nə́ ǹ foo ziziɛ̃.
8Bɛ lɛ na á toa masɛ Dɛnaa Lawa á kɛ pii: «Á ke, ma á re zia yiɛ ma kaa n ganaa, a n minbuiinin laanka n tɔɔn dɛ. 9Ezipti gána kɛ gɔ́ɔ̃ kooro á die goɛ̃ ka diə gole bɛ́ lɔn. Ka á re doɛ̃ bɛa biikoo li, mà masɛ din nə Dɛnaa Lawa lɛa. A giala, kaa kii lɛ na á pɛ mà Ezipti a tà lɛ na asɛ din wɔ lɛa, mà asɛ din na á fɔ̃.
10Bɛ lɛ n ke, ma á re die n laanka n tà lɛ gialaa. Ma á re Ezipti gána lɛ biɛ kɛbɔlɔ lɛa, kɛbɔlɔ kooro lɛa, a saa Migidɔli ganaa, yǎa Siyɛni kiwi, a wo yǎa Etiopii gèlè la. 11Minbuiin nɛ a re boe a-n doo a kiɛ̃ wa, tɔɔ dɔ a re boe a-n doo a kiɛ̃ wa. Màn yiikoonaa kɔn ba re giɛ̃ a-n wa, yǎa lɛ̀ pusi. 12Ma á re Ezipti gána kɛ gɔ́ɔ̃ kooro diɛ, a la diə golen kɛn tumaa nɛ. Masɛ á re a kiwin kɛn biɛ kɛbɔlɔ lɛa, a la kiwi kɔsɔn kɛn manɛ. A n die goɛ̃ miɛ̃, yǎa lɛ̀ pusi. Masɛ á re Ezipti minin kɛn sasawɛɛ ma ǹ kaa tɔrɔ kɔsɔn bii, masɛ á re ǹ pɛsɛ̃, ma ǹ kaa gána kɔsɔn nɛ.» 13Sɛnɛ, masɛ Dɛnaa Lawa gole n kɛ pii: «Bɛ̀ á dɔ lɛ̀ pusi, ma Ezipti minin lɛn sasawaa má ǹ kaa tɔrɔn mɛnɛn bii, ma á re ǹ wɛɛ walan, ma ǹ sɔkɔn. 14Ma á re wusii ma da ka Ezipti a kòso nɛn lɛn nɛ. Ma á re die ǹ ne Ezipti gána a gusin a lɛ̀gɔn la, ǹ yɛ ǹ gána nɛ. Ǹ tá re giɛ̃ walan, ǹ gána boɛɛn koa. 15Á re goɛ̃ boɛɛnɛ gána kɔsɔn ganaa, a re liɛ tɔrɔ kɔsɔn kɛn man doo wa. Masɛ á re a kiɛɛrɛ koe, màn mɛn bɛ́ toɛ, a baran giã tɔrɔ kɔsɔn kɛn mìi la doo wa. 16A Izirayeli minin kɛn foo doa ǹ bǎã biɛ doo wa. A giala, Ezipti gána lɛ din a tan nə die ǹ yiri gisĩ ka ǹ dinin sii baraa nɛ, ǹ dinin wusoo a wo kaa kun ka Ezipti gána-n kɛ lɛ. Ǹ tá re doɛ̃, mà masɛ din nə Dɛnaa Lawa lɛa.»
Kii Nebukadenezɔɔrɔ n die Ezipti kuĩ
17Izirayeli minin lɛn goa a lɛ̀ fuəwensɔbaabaa ǹ wɔ, mui bibinaa a lɛawaa bibinaa pinaa, Dɛnaa Lawa boo da ma nɛ á pɛ: 18– Minbuiin a nɛ, ga! Baabiloniin kii Nebukadenezɔɔrɔ yoo Tiiri kiwi gialaa, á dí gole da a sɔraasin mìi ni. Ǹ baã ka tumaa kaa, ǹ nyàa koo tumaa sɔsɔlɔ. Sɛnɛ, a dí mɛn nya Tiiri ganaa, a din laanka a sɔraasin lɛn nə là goon yɛ a-n wa. 19Bɛ lɛ na á toa masɛ Dɛnaa Lawa á kɛ pii: «Á ke, man die Ezipti gána lɛ koe Baabiloniin kii Nebukadenezɔɔrɔ la. Á re a naforon goɛ, a na a mànan tumaa goa, a kiwi lɛ gɔ́ɔ̃ duduə lenlen. Bɛ lɛ á die a sɔraasin lɛn saraa biɛ. 20A nɔmaa mɛn wɔ Tiiri ganaa, man die Ezipti gána kɛ koe la a saraa lɛa. A giala, a din laanka a sɔraasin lɛn nə́ dí nya masɛ nɛ. Ma din Dɛnaa Lawa a da ǹ boo ne.
21Bɛa pinaa kɛ lɛ nɛ, ma á re màn diɛ Izirayeli minin kɛn pàã li. Ma á re toɛ nsɛ Ezekieli boo la n boo da ǹ bii. Ǹ tá re doɛ̃ ka bɛ lɛ-n kəni, mà ma din nə Dɛnaa Lawa lɛa.»
اکنون انتخاب شده:
Eze 29: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.