Eze 30
30
Dɛnaa a foo yoo Ezipti gána li
1Dɛnaa Lawa boo da ma nɛ á pɛ: 2Minbuiin a nɛ, maa boo kɛ da n pɛ: Dɛnaa Lawa a da ǹ boo á ke:
Ka n lɛ dɛ ka pɛ: E!
Lɛawaa mɛn tɔrɔ n ka kɛ nɛ!
3A giala, lɛawaa lɛ diri,
Dɛnaa a lɛawaa lɛ diri.
A n die labara lɛawaa biɛ,
a n die tɔrɔn sii yɔrɔ bɔ pinaa biɛ.
4Zia á re we Ezipti gána nɛ.
Bɛ̀ ǹ nə́ minin dɛ ǹ nə́ ǹ kaa
tán Ezipti gána nɛ,
a gɔ̀nɔn bìn diɛ á re doe Etiopii gána nɛ.
Ǹ tá re ǹ gɔn mànan goɛ,
ǹ kionən tá re kɛbɔlɔ biɛ.
5Etiopii minin ni, Puti wɔn nɛ,
Ludu wɔn nɛ,
Larabu gána wɔn nɛ,
bɛa tɔrɔ lɔlɔkɔn kɛ lɛ tumaa á re
kiɛ kunun ǹ ni zia la,
haalɛ ma din tɔrɔn kɛn lɛn dɔn
dinin minin.
6Masɛ Dɛnaa Lawa a da ǹ boo á ke:
Ezipti a dɔmalɛ wolen kɛn
tá re mɛnɛɛ zia la,
a saa Migdɔli ganaa,
a wo Siyɛni yaa.
A bɛ́ n din koɛ a pàã mɛn
taman yii, bɛ á re nyɛɛ.
Ma din Dɛnaa Lawa a da ǹ boo ne.
7Ezipti á re diə gole biɛ, a la diə gole tumaa nɛ. A kiwin tá re kɛbɔlɔ dinsɔsɔɔ̃ biɛ. 8Bɛ̀ má tɛ da Ezipti gána kɛ ganaa ǹ mɛn waáraa, bɛ̀ má a dɔmalɛ wolen kɛn tumaa dɛ, ǹ tá re doɛ̃ bɛa biikoo li, mà ma din nə Dɛnaa Lawa lɛa. 9Bɛa pinaa kɛ lɛ nɛ, ma á re minin diɛ mu la ǹ goo ne, ǹ wo nyɛ́ɛ da Etiopii minin kɛn ganaa, ǹsɛn mɛnɛn bɛ́ taasɛ, mà ǹsɛn man là nyantoro la. Ezipti minin sii lɛ a pinaa, ǹ gɔ̀nɔn tá re bìn diɛ. Á ke, a lɛawaa á die.
10Masɛ Dɛnaa Lawa a da ǹ boo á ke:
Man die Baabiloniin kii
Nebukadenezɔɔrɔ diɛ Ezipti gialaa,
a wo a zaman damata kɛ dɛ.
11Kii lɛ laanka a zaman nɛ,
kɛn lɛn kakaarɛ ǹ nə́ la tɔrɔn
tumaa nɛ,
ǹ tá re die ǹ ne, ǹ gána lɛ ziziɛ̃,
ǹ tá re ǹ gɔya sa wɔ̃woɛ̃ Ezipti
minin li,
ǹ tá re gɛ̀ dii ǹ gána lɛ gɔ́ɔ̃ pã nɛ.
12Ma á re n tà gòã kɛ tumaa biɛ
bǎã gere lɛa,
ma á re n gána lɛ koe min
kakaarɛn la,
ma á re tiin diɛ ǹ wo n gána lɛ ziziɛ̃,
ka a gɔ́ɔ̃gɔ́ɔ̃ ǹ mànan tumaa nɛ.
Ma din Dɛnaa Lawa n má pɛ.
13Masɛ Dɛnaa Lawa a boo á ke:
Ma á re ǹ dì kɛn yɔyɔrɛ,
màn kooron kɛn ǹ tá ǹ guguru koe,
ma á re bɛn papaɛ̃ ma ǹ bɔ
Manfisi kiwi,
kii a re yii a giã Ezipti gána mìi
la doo wa.
Ma á re nyɛ́ɛ kiɛ Ezipti gána lɛ nɛ.
14Man die Ezipti gána a gusin a
lɛ̃ gɔn la kɛ ziziɛ̃,
ma tɛ kaa Soan kiwi kɛ ganaa,
ma dɔlɔ bɔ Tɛbu kiwi kɛ ganaa.
15Ma á re maa foo-yoo kɛa
sii zɛnɛɛ Sini kiwi kɛ nɛ,
bǎã kaka mɛn lɛ á ke Ezipti
gána tamaɛ.
Ma á re Tɛbu a zaman damata kɛ dii.
16Ma á re tɛ diɛ Ezipti gána
kɛ ganaa,
Sini kiwi na a là-paparɛɛ wɔ.
Ma á re wɔ ǹ bǎã boe Tɛbu kiwi
kɛ ganaa,
zɔ́ɔn nə kaa Manfisi kiwi
penleen tiɛɛ̃nɛ.
17Onu kiwi laanka Pibesɛti kiwi a giĩ tenən kɛn tá re giɛ̃ zia la. Ǹ tá re ǹ min gialakunun kɛn goɛ, ǹ wo ǹ ne bɛ̀rɛbaa ǹ bǎã nɛ. 18Bɛ̀ má Ezipti minin pàã kɛ ziziɛ̃ ǹ mɛn pinaa, wɔlɔ a re fúli Tapanɛsi bɛa pinaa wa. Ǹ pàã mɛn lɛ á ke toɛ ǹ tá n dinin gole koe, ma á re bɛ lɛ nyɛɛ ma bɔ kiwi lɛ nɛ. Labara tì á re n kumii kiwi lɛ ganaa, bǎã lɛ a minin tá re woe bɛ̀rɛbaa ǹ bǎã nɛ. 19Ma á re dɔlɔ boe Ezipti gána lɛ ganaa. Ǹ tá re doɛ̃ bɛa pinaa kəni, mà ma din nə Dɛnaa Lawa lɛa.
Baabiloniin kii n dí nya ǹ màn lɛa Lawa gɔn
20Ezipti minin goa a lɛ̀ fulugoonbaa ǹ wɔ, mui bibinaa a lɛawaa sɔbaabaa ǹ wɔ pinaa, Dɛnaa Lawa boo da ma nɛ á pɛ: 21– Minbuiin a nɛ, ma á re Eziptin kii *Faarahɔn a pàã kɛ nyɛɛ. Ka min gɔn bɛ́ yiɛ lɔn, min din ba re yii a dagòã da a ganaa, a kũ a da màn nɛ a yii, màn mɛn bɛ́ toɛ, bɛa gɔn lɛ nya, a wusoo a gɔya sa kũ doo wa. 22Bɛ lɛ na á toa masɛ Dɛnaa Lawa á kɛ pii: «Á ke, man die Eziptin kii Faarahɔn kɛ gialaa. Man die a gɔnɔn paanan yiɛ. A gɔn lɛ a mɛn bɛ́ siĩni, man die bɛ dɔ yiɛ, ma ti a yiɛ wole kɛ lɛ ganaa, a gɔya sa kɛ nə n si la a mɛnaa. 23Ma á re Ezipti minin lɛn sasawɛɛ ma ǹ kaa tɔrɔ kɔsɔn bii, masɛ á re ǹ pɛpɛsɛ̃ gána kɔsɔn nɛ. 24Sɛnɛ, ma á re pàã koe Baabiloniin kii kɛ la, ma ma din a gɔya sa wɔ a gɔn. Ma Faarahɔn mɛn lɛ gɔnɔn yiyiɛ, á re gigini tán-a a zɔ́ɔn yɔrɔ-a, a kere. 25Ma á re pàã koe Baabiloniin kii kɛ la. Sɛnɛ, Faarahɔn pàã á re nyɛɛ. Bɛ̀ má maa gɔya sa wɔ Baabiloniin kii kɛ gɔn ǹ mɛn waáraa, á re pepere Ezipti gána kɛ li. Ǹ tá re doɛ̃ bɛa biikoo li kəni, mà ma din nə Dɛnaa Lawa lɛa. 26Ma á re Ezipti minin lɛn sasawɛɛ ma ǹ kaa tɔrɔ kɔsɔn bii, ma á re ǹ pɛpɛsɛ̃ gána kɔsɔn nɛ. Ǹ tá re doɛ̃ ka bɛ lɛ-n kəni, mà ma din nə Dɛnaa Lawa lɛa.»
اکنون انتخاب شده:
Eze 30: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.