Eze 16
16
Izirayeli minin sii baraa zɛnaa
1Dɛnaa Lawa boo da ma nɛ á pɛ: 2– Minbuiin a nɛ, Zeruzalɛmu minin giã ǹ gɔn bɔbɔnɛɛ kɛ lɛ boo da ǹ dinin manɛ. 3N die n pɛ ǹ nɛ, ma masɛ Dɛnaa Lawa n kɛ pii Zeruzalɛmu kiwi ni. Kanaan gána nə ǹ digolon bǎã lɛa, ka n ka yɛ walan. N díi n Amɔɔrɔ tɔrɔ lɛa, n náa n Ɛti tɔrɔ lɛa. 4N yɛ pinaa, ǹ nə n bùũ lɛ kuru wa. Ǹ nə n zoo mu li n bɔ wa, ǹ yìsi dɔ tuturu n ganaa wa, ǹ mɔnaa gɔnɔn pɛpɛnɛ n ganaa wa. 5N yɛ pinaa gɔrɔ, min kɔn nə n makara dɔ̃ á bɛa siin kɛn lɛn kɔn zɛnaa n nɛ wa. N tìĩ bɔ ǹ nyin ni, ǹ nə́ n zũ don. 6Ma bɛ́ má kiɛ̃ kunu n li, má n yɛ n dudui tán n mà li. Má tɔ́n pɛ n nɛ máa n yii goã koo, a laanɛ n tá tán mà bii. Man laa máa n yii goã koo. 7Ma din nə má n da gole kɔ ganaa, ka da ten bɛ́ lɔn. N gole kɔ n woo lon, n siĩn kɔ n la yii ni. N nyɔn nə́ bɔ, ka pã n ganaa. Sɛnɛ, mɔnaa goã n ganaa wa, n gɔ̀nɔn kooro na á goã nɛ. 8Bɛ kio, ma bɛ́ má wusoo má bɔ walan doo, má n yɛ. Bɛa biikoo li, bɛ̀ ń dɔ lɔbaa ganaa. Ma tɔ́n maa mɔnaa lɛkoro lɛ bɔ má kɔ n lɛ, má n sìi duru ni. Bɛ kio má n lɛ kɔ n la, má n liɛ n nɛ. Máa n masɛ wɔ baa ka bɛa yɔrɔ lɛ nɛ. Ma din Dɛnaa Lawa a da ǹ boo ne. 9Má n zoo mu li, má n mà kɛ pii ka mu gigiã nɛ, ma tɔ́n nyɔɔ gìĩ kɔɔ̃n lɔ n ganaa. 10Má mɔnaa wɔrɛɛ kɔ n la, kɔsɔ sonboren ne, maabɛlɛ kəkə ne, ka dɔnkɛ sonbore ne. 11Má nyaǹ bɔ ǹ mànan kaa n gana: Má zanan kaa n gɔn wìin-a, má gii da n bɔlɔ-a. 12Ma kaaran da n nyin ni, má kɛn kaa n too ne, má kiibaa ǹ bafolo sonbore wɔ n mìi-a. 13N nyaǹ bɔ ǹ mànan lɛn man nə́ goã wɔrɔ laanka sana lɛa, n wɔ ǹ mɔnaan kɛn man nə́ goã mɔnaa gugurun lɛa, mɔnaa tɔrɔ sonboren lɛa, mɔnaa wɔrɛɛn lɛa. Ma nə́ n goã wùsu tɔrɔ sonbore bii, ka zoo nyɔɔ laanka *olivie nyɔɔ nɛ. Bɛ̀ lɛ na á toa n siĩn kɔ n la yii ni, n daa n gána baa.
14N tɔ bɔ gána kɔsɔn nɛ n siĩnbaa lɛ taman yii. A giala, ma nyaǹ mànan mɛnɛn kaa n ganaa, bɛ lɛ na á toa, n siĩnbaa lɛ pã. Masɛ din Dɛnaa Lawa a da ǹ boo ne.
Zeruzalɛmu minin man ka lɔ kɔrɔ bɛ́ lɔn
15Ma n nə́ n saa n siĩnbaa kɛ li, n tɔ a bɔ kɛ taman yii, n kɔrɔbaa zɛnaa. N nə́ n din kɔ kiɛ̃ wolen tumaa la, ń kɔrɔbaa#16.15 Kɔrɔbaa boo: A n Izirayeli minin Lawa bɔlɔ tii a sii a kɔnboe lɛa Lawa wɔ paǹ li. zɛnaa kunun ǹ ni, n nə́ n goã bɛn lɛn wɔ lɛa. 16N nə́ n mɔnaan tɛnɛn goa ń nyaǹ kaa wúlu bɔ ǹ bǎãn ganaa ka bɛn nɛ, ń naarɛbaa zɛnaa ǹ là. Bɛa sii lɛ miã bin tɔn nə n zɛnaa wa, ǹ miã dɔ din ba re n zɛnɛɛ doo wa. 17Ma goã má nyaǹ bɔ ǹ mànan mɛnɛn kɔ n la, sana laanka wɔrɔ lɛa, ma nə́ n màn nyínin zɛnaa ka bɛn nɛ, giĩn lɛa, ń kɔrɔbaa zɛnaa kunun ǹ ni. 18Ma n nə́ n mɔnaa wɔrɛɛn kɛn goa, n bɛn kɔ ǹ lɛ. Ma din dɔ nyɔɔ laanka da yon gìĩ kɔɔ̃n mɛn kɔ n la, n bɛn kaa tán-a ǹ yɔrɔ-a. 19Ma goã n toe ka màn-bii mɛn nɛ, wùsu tɔrɔ sonbore kɛ nɛ, nyɔɔ nɛ, ka zoo nyɔɔ nɛ, n bɛn lɛn kaa tán-a ǹ yɔrɔ-a, nyɔɔ gìĩ kɔɔ̃n lɛa, kiɛ ǹ foo la. N màn mɛn zɛnaa, a din lɛ n ka bɛ nɛ. Ma din Dɛnaa Lawa a da ǹ boo ne. 20Zeruzalɛmu, n nɛgiĩn laanka n nɛlɔn nɛ, n nə ǹ mɛnɛn lɛn yɛ masɛ wɔn lɛa, ń wusoo ń wúlu bɔ ka bɛn nɛ, bɛa dìn lɛn ganaa. N bɛ kɔrɔbaa mɛn zɛnɛɛ, bɛ na a goã n boe wa? 21N maa nɛnyaanan dɛ n dìn ganaa, n nə́ ǹ tã. 22N sii bɔbɔnɛɛ zɛnaa kɛ lɛ tumaa laanka n kɔrɔbaa ǹ siin kɛn lɛn gɔ́ɔ̃ nɛ, n nə n yiri kɔ ka n lɛlɛ ǹ kɛ-n wa. Táa n gɔ̀nɔn kooro na á goã, n goã n din pɛsɛ̃ tán mà li.
23N wɔ n ka bɔ̀n nɛ, bɔ̀n woo bɔ̀n! Ma din Dɛnaa Lawa a da ǹ boo ne! A giala, n sii baraa kɛ lɛ tumaa kio, 24ń kɔrɔbaa ǹ bǎã dɔ: Bɛ n ka kaa dì wúlu bɔ ǹ bǎãn kɛn nɛ, zaman paã ǹ bǎã tumaa nɛ. 25Ń *wúlu bɔ ǹ bǎã dɔ zii tumaa a giala kɔ ǹ bǎã nɛ. N nə́ n din a siĩnbaa kɛ ziziɛ̃ walan. Ma n nə́ n din kɔ kiɛ̃ wolen tumaa la, ń wusoo ń màn da n din a kɔrɔbaa li. 26Zeruzalɛmu, n kɔrɔbaa zɛnaa kun ka Ezipti minin kɛn nɛ, n miãkɛnɛn lɛn, ǹ tɔntɔraabaa n gole. N màn da n kɔrɔbaa lɛ li, yǎa ń má foo yoo. 27Á ke, bɛ lɛ nɛ má tɔ́n yoo n gialaa, má màn-bii kurəə n ganaa. Filisiti kiwin mɛnɛn bɛ́ n zɔ́ɔn lɛa, má n wɔ bɛn gɔn, ǹ nə n foo nyɛɛ n la. N gɛsɛbaa lɛ dinmaa lɛ n sìi diɛ bɛn ganaa. 28Ma nə́ n kɔrɔbaa zɛnaa kun ka Asiirii minin kɛn nɛ, a giala mà màn ba n boe wa. Sɛnɛ, a laanɛ n kɔrɔbaa lɛ zɛnaa kunun ǹ ni, a bɛ́ a n bɔ wa. 29N kɔrɔbaa lɛ a gigiã zɛnaa *Baabilonii, pii-kɔlen gána kɛ nɛ. Sɛnɛ, bɛn lɛn dɔn dinin wɔ lɛ bɛ́ a n bɔ wa. 30E! Wàa mɛn foo tãbaa tɔrɔ n ka bɛ nɛ nsɛ lon, n bɛa siin kɛn lɛn tumaa zɛnɛɛ nɛ, kɔrɔbaa nə nsɛ a dí lɛa! Ma din Dɛnaa Lawa a da ǹ boo ne. 31N bɛ́ kɔrɔbaa ǹ bǎãn kɛn doe, dì wúlu bɔ n bǎãn kɛn, ziin tumaa a giala kɔ ǹ bǎãn nɛ, zaman paãn bǎã tumaa nɛ, n bie n zɛnaa ka lɔ kɔrɔn kɛn dɔn dinin wɔ bɛ́ lɔn wa. N lɛ kɔ saraa ganaa wa. 32Ma n ka lɔ naarɛ bɛ lɔn, n nə́ n din zuũ kɛ toɛ walan, n nə́ giĩ kɔsɔn si. 33Maǹ màn koe lɔ kɔrɔ tumaa la, sɛnɛ, nsɛ nə n màn kɔ n tɔntɔraan lɛn tumaa la. N nə́ ǹ saraa, màn mɛn bɛ́ toɛ ǹ bɔ bǎã tumaa nɛ, bɛ̀ ǹ da giã kunun n ni. 34Nsɛ nə́ n kɔrɔbaa lɛ a zɛnaa ǹ gɔn bɔyaa, n bɔ n miã lɔn wɔ li. Min kɔn goã baa sii n kio mà n nə n lɔ kɔrɔ lɛa wa, n din nə n goã n tɔntɔraan lɛn pii ka wɔrɔ nɛ. Ǹsɛn bɛ́ ǹ goã màn kɔn koe n la wa, sii làfu ni, n goã zɛnɛɛ.
35Nsɛ Zeruzalɛmu, lɔ kɔrɔ, n too kɔ Dɛnaa Lawa a boo ganaa kəni: 36Masɛ Dɛnaa Lawa n kɛ pii: N bɛ́ n kɔrɔbaa lɛ zɛnɛɛ kun ka tɔntɔraan laanka dì bɔbɔnɛɛn kɛn tumaa nɛ, ma nə n goã n nə́ n sɔlɔ n nə́ n tontoro da. Haalɛ n din a nɛnyaanan kɛn, n bɛn dɔn kɔ ǹ la. 37Á ke, a bɛ́ miɛ̃, n sii kɔɔ̃n kɔ tɔntɔraan mɛnɛn tumaa ganaa, n nə ǹ mɛnɛn tumaa narɛ, ka ǹ mɛnɛn tumaa bɛ ǹ kɔɔ̃n kɔ n ganaa wa, ma á re ǹ tumaa soekɔn. Ma á re n tontoro diɛ ǹ yɔrɔ-a. Ǹ tá re n sìi tumaa yii#16.37 Bɛ n nyɛɛ mà Zeruzalɛmu giaáran dinin man die yui a gialaa.. 38Lɔ naarɛn laanka ǹ mɛnɛn bɛ́ gɛ̀ dii, bɛn doamaa bɛ́ ka dɔlɔ mɛn nɛ, ma á re bɛ lɛ tɔrɔ diɛ n mìi ni. Ma á re mà boe n ganaa maa foo yoo kɛa pinaa, a giala ń ma sã. 39Ma á re n we ǹ gɔn. Ma á re n kɔrɔbaa ǹ bǎãn kɛn dii ma ǹ kaa, n wúlu bɔ ǹ bǎãn kɛn. Ǹ tá re n mɔnaan kɛn sɔlɛɛ ǹ nə ǹ bɔ n ganaa, ǹ nə n nyaǹ bɔ ǹ màn sonboren kɛn si n la, ǹ nə n gɔ̀nɔn kooro fulupaa da bii-a. 40Ǹ tá re zaman kiɛ n ganaa, ǹ kɔlɔ kaã bɔ n ganaa, ǹ nə n kakã ka ǹ gɔya san kɛn nɛ. 41Ǹ tá re n kionən tiɛ̃. N doamaa bɛ́ ka dɔlɔ mɛn nɛ, ǹ tá re bɛ boe n ganaa lɔ damata yii ni. Ma á re n kurii n kɔrɔbaa kɛ lɛ ganaa, n nə́ n ba re boe la n min din saraa doo wa. 42Man die n foo nyɛɛ n la. Bɛ̀ maa zia nya á n bɔ n ganaa ǹ mɛn waáraa, ma foo á re basɛ̃, a re yui doo wa. 43A giala, n nə n taasɛ n lɛlɛ ǹ kɛ-n wa. Bɛ lɛ nɛ, n sii kɛ lɛ tumaa zɛnaa n masɛ foo yoo ne. Bɛ lɛ nɛ, má n zɛnaa ǹ sii kɛ lɛ a dɔlɔ da n din mìi ni. Ma din Dɛnaa Lawa a da ǹ boo ne. Táa ma nə n bɛa sii gɔgɔrɛ kɛ lɛ zɛnaa n da n zɛnaa ǹ sii bɔbɔnɛɛn kɛn lɛn la.
Zeruzalɛmu a bɔnɛɛbaa la kiwi kialakunun wɔ nɛ
44A ke, suusu-dalin tumaa á re suusu kɛ diɛ n ganaa: «Náa bɛ́ lɔn, a nɛ dɔ n goɛ̃ miɛ̃!» 45Lɔ mɛn nə́ ke ǹ zuũ laanka a nɛgiĩn tìĩ bɔ a nyin ni, n nə n bɛa nɛlɔ lɛa. N dɔɔ̃nlɔn dɔn man miɛ̃. N dɔn zuũn laanka ǹ nɛgiĩn tìĩ na á bɔ ǹ nyin ni. Ka dan na á goã Ɛti tɔrɔ lɛa, ka di na á goã Amɔɔrɔ tɔrɔ lɛa. 46N gololɔ n ka Samarii kiwi kɛ nɛ gɔsɛ a lɛ̀gɔn la, kun ka a lɛkoro lɛ-a kiwin ni. N diɛ̃lɔ n ka Sodɔmu kiwi kɛ nɛ gusin a lɛ̀gɔn la, kun ka a lɛkoro lɛ-a kiwin ni. 47N bie n kɔ ǹ zɛnaa ǹ siin kɛn dininsɔɔ̃nɔn lɛ wa, n bie n sii bɔbɔnɛɛn kɛn dininsɔɔ̃nɔn zɛnaa wa. A n ka ma nə n màn kɔn din zɛnaa wa. N zɛnaa ǹ sii lɛ baraa kɔ á la ǹ wɔ nɛ. 48A ma toa ma yii n koo, ma din Dɛnaa Lawa a da ǹ boo ne, n din Zeruzalɛmu laanka n lɛkoro-a kiwin nə sii baraa mɛn zɛnaa, n dɔɔ̃nlɔ Sodɔmu kiwi kɛ laanka a lɛkoro-a kiwin nə bɛ din zɛnaa wa. 49Á ke, ǹ dɔɔ̃nlɔ Sodɔmu laanka a lɛkoro lɛ-a kiwin sii baraa n ka kɛ nɛ: Maǹ nə́ goã n dinin gole koe. A giala, maǹ nə́ kã, ǹ nə́ là nyantoro la, ǹ ba n taasɛ ka sii kɔn nɛ wa. Ǹ nə n dɔ doobaan laanka nɔmaa wolen lɛ wa. 50Maǹ nə́ n dinin saa lon, sii mɛn bɛ́ bɔbɔnɛɛ ma yii li, maǹ nə́ bɛ zɛnaa. Bɛ lɛ na á toa má ǹ dɛ má ǹ bɔ kanaa ka n yii bɛ́ a ganaa lɔn. 51Samarii kiwi din nə n sii baraan kɛn talɛɛ zɛnaa wa. N sii bɔbɔnɛɛ zɛnaa lɛ la a wɔ nɛ. Bɛ̀ a n saa a zɔɔ̃ kɔn lɛa ka Sodɔmu laanka Samarii wɔ kɛ nɛ, n dɔɔ̃nlɔn kɛn, a n ka bɛn dinin nə màn kɔn zɛnaa wa. 52Táa nsɛ nə n goã n dɔɔ̃lɔn lɛn zɛ̀rɛ biɛ? A da yaa, n din bɛ́ sii bɔbɔnɛɛ mɛn zɛnɛɛ, á la ǹ wɔ kɛ nɛ. N sii baraan lɛn taman yii, n din nə n toɛ̃ ka a sìi-n kəni! N din a zɛnaa ǹ sii na á nyaa, mà n dɔɔ̃lɔn lɛn tá pepere ǹ nə́ la n nɛ. Sìi laanka puusəbaa lɛ n doe n din ganaa sisia. A giala, n din a zɛnaa ǹ sii na á nyaa, mà n dɔɔ̃lɔn lɛn tá pepere ǹ nə́ la n nɛ. 53Ma á re wusii ma Sodɔmu laanka a lɛkoro lɛ-a kiwin giã ǹ gɔn bɔyaa, ma Samarii laanka a lɛkoro lɛ-a kiwin giã ǹ gɔn bɔyaa. Ma á re Zeruzalɛmu dɔ laanka a lɛkoro lɛ-a kiwin giã ǹ gɔn bɔyɛɛ, 54màn mɛn bɛ́ toɛ, n sii mɛn tumaa zɛnaa, bɛ lɛ a sìi nə n kũ, n nə n toɛ̃ ka n sìi ni. Bɛ á re n dɔɔ̃nlɔn lɛn foo basɛ̃. 55Sodɔmu ni, Samarii ni ka ǹ lɛkoro lɛ-a kiwin ni, n dɔn tá re wusii ǹ nə n baa ka ǹ lɛlɛ ǹ bɛ́ lɔn. N dɔ laanka n lɛkoro lɛ-a kiwin ni, ka dɔn tá re wusii ka n baa ka kaa lɛlɛ ǹ bɛ́ lɔn. 56N din-koa lɛ a waáraa, táa ma nə n goã n dɔɔ̃nlɔ Sodɔmu lɛ piɛ̃ boe. 57Bɛa biikoo li, bɛ̀ n baraabaa lɛ tɔn soo kanaa wa. Edɔmu kiwi laanka a lɛkoro lɛ-a minin nə́ ke sɔ kiɛ n dɔ la kanna, Filisiti kiwin nə́ ke n piɛ̃ boe. 58N sii baraan laanka sii bɔbɔnɛɛn mɛnɛn zɛnaa, bɛn dɔlɔ tá n mìi ni. Ma din Dɛnaa Lawa a da ǹ boo ne.
59Masɛ Dɛnaa Lawa n kɛ pii: N sii mɛn zɛnaa, man die bɛ lɛ miã zɛnɛɛ n nɛ. A giala, n liɛ mɛn wɔ, n bɛ baa sii lɛa wa, n lɛ kɔ kɔn la lɛ ziziɛ̃. 60Sɛnɛ, ma lɛ kɔ kɔn la mɛn wɔ ka n nɛ n tenmaa waáraa, ma á re n yiri koɛ bɛ li. Man die lɛ kɔ kɔn la duduu we ka n nɛ. 61Bɛ̀ n kɔn yɛ ka n gololɔn laanka n diɛ̃lɔn kɛn nɛ, n yiri á die gisĩ ka n din a zɛnaa ǹ sii kɛ nɛ, bɛ á re sìi biɛ n ganaa. Ma á re ǹ kiɛ n pàã giulun, a laanɛ wɔ bɛ pɛ kɔn nɛ lɛ kɔ kɔn la lɛ gɔ́ɔ̃-n wa. 62Zeruzalɛmu, ma á re wusii ma lɛ kɔ kɔn la wɔ ka n nɛ. N tá re doɛ̃ ka bɛ lɛ-n kəni, mà ma din nə Dɛnaa Lawa lɛa. 63Bɛa biikoo li kəni, n yiri á die gisĩ ka lɛlɛ ǹ kɛ nɛ. Sìi á re n kuĩ, n yii din ba re we, n nə n lɛ bũ n boo da wa. Sɛnɛ, n sii baraa mɛn tumaa zɛnaa, ma á re ǹ toɛ n nɛ. Ma din Dɛnaa Lawa a da ǹ boo ne.
اکنون انتخاب شده:
Eze 16: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.