Eze 17
17
Giməə mɛn nə n da kiin wɔ paǹ li
1Dɛnaa Lawa boo da ma nɛ á pɛ: 2«Minbuiin a nɛ, boo tì da Izirayeli tɔrɔn lɛn manɛ, giməə da ǹ nɛ. 3A pɛ ǹ nɛ, mà Dɛnaa Lawa n kɛ pii:
Giogialatã-a gole ne,
a nyàan nə́ dadara kɔ,
a nyàa kan nə́ sɔsɔrɔ kɔ,
á ka pã ka kɛkɛ,
a ka lɛ n sɛsia wɔkaka.
A na á daa Liban kele la,
á da kaka kɛ goon mìi na,
4a gùrù mɛn bɛ́ sasa á bɛ yiɛ,
á woo ne pii-kɔlen gána nɛ,
á woo da tán màn-sãlin kiwi.
5Á wusoo á gána lɛ a da goon
gùrù saa,
ǹ bǎã mɛn kɔsɔ, á zumu walan,
á woo ne mu gigiã bǎã nɛ,
á zumu walan ka tàaraa da bɛ́ lɔn.
6Da lɛ yoo, á *rezɛ̃ da baa,
á n gùrùn nyɔmaa,
ka màrà kusi bɛ́ lɔn
á na á gùrùn lɛn yɔrɔ dia
giogialatã-a lɛ la.
Á n gòonən lɛ bɔ a giulun.
Da lɛ rezɛ̃ da baa,
á gùrùn bɔbɔ, á luu pã.
7Sɛnɛ, giogialatã-a gole kɔsɔ daa,
a nyàan nə́ dadara,
a ka n mɔnaa nɛ.
Á ke rezɛ̃ da lɛ nə n gòonən
dia giogialatã-a lɛ la.
Á gùrùn bɔ á n yɔrɔ dia la
a n giɛ mu gigiã li a li.
8A da yaa,
maǹ nə́ goã ǹ nə́ zumu bǎã
sonbore ne,
ǹ nə́ zumu mu gole lɛ-a,
màn mɛn bɛ́ toɛ a gùrùn bɔ,
a nɛ kɔ,
a rezɛ̃ da sonbore baa.
9A pɛ mà masɛ Dɛnaa Lawa
gole n kɛ pii:
Rezɛ̃ da lɛ á re bǐɛ̃ koe sonbore?
Giogialatã-a bibinaa lɛ á re
a gòonən lɛn woɛ̃,
á re toɛ a nɛ bɛbɛnɛ, a laa.
A gùrù diin mɛnɛn tumaa nə n woɛ̃,
bɛn tá re laɛ.
A woɛ̃ din bie sii kaka lɛa wa,
a bie min gigiã sii dɔ lɛa wa!
10Á ke ǹ nə́ zumu,
sɛnɛ, a re gole koe wa.
Bɛ̀ lɛ̀giala piɛ̃ kɛ daa bìn da a ganaa,
a tumaa á re laɛ.
Sonbore, a bɔ tán bǎã mɛn lɛ nɛ,
á re laɛ a gòãn la walan.»
Boo giməə lɛ bɛ́ boo mɛn giala pii
11Dɛnaa Lawa boo da ma nɛ á pɛ: 12#Kiin2 24.15-20; KZS2 36.10-13 – Wo pɛ piã-wɔlen lɛn manɛ mà ǹ tá boo kɛ giala miɛ ke? A giala á ke, Baabiloniin kii na á daa Zeruzalɛmu. Á Zeruzalɛmu a kii laanka a nyɛɛnaandɛnan kũ, á woo ǹ ne *Baabilonii gána nɛ. 13Á kii tɔrɔ goon kũ á lɛ kɔ kɔn la wɔ ka bɛ nɛ. Á pɛ nɛ, mà yǎa a nə n liɛ, mà asɛ á re goɛ̃ bɔlɔgoondɛnaa lɛa bɛa lɛ kɔ kɔn la lɛ gɔ́ɔ̃ nɛ. Á woo ka gána lɛ a min tɔnaan nɛ, 14màn mɛn bɛ́ toɛ gána lɛ pàã kiɛɛrɛ kɔ, a sii ná a boe la á woe nyɛɛn wa, a lɛ kɔ kɔn la mɛn wɔ, a boo la a bɛa sii toa a giala la. 15Sɛnɛ, á n gòãn doa kɔn ka Baabiloniin kii lɛ nɛ, á minin dia Ezipti gána nɛ, mà bɛn nə n dɔ asɛ lɛ, ka sùin laanka sɔraasi gigiã nɛ. Min mɛn bɛa siin kɛn lɛn tɔrɔ zɛnaa, á re bǐɛ̃ koe a gɔn? Á re n boe a nɛ? A bɛ́ á lɛ kɔ kɔn la lɛ ziziɛ̃, á re n boe a-n sonbore? 16A ma toa ma yii n koo, masɛ Dɛnaa Lawa a da ǹ boo á ke: «Ma kii mɛn lɛ koa pàã la, á re giɛ̃ bɛ lɛ a gána nɛ. A giala, a liɛ mɛn wɔ bɛa kii lɛ nɛ, á n lɛ bɔ, a lɛ kɔ kɔn la mɛn wɔ kun ni, á bɛ ziziɛ̃. A n die giɛ̃ bɛa kii lɛ a gána nɛ Baabilonii. 17Bɛ̀ Baabilonii minin kɛn nə́ bèlèn dɔ ǹ nə́ nyankɔrɔn fɔfɔ̃ ǹ mɛn waáraa, màn mɛn bɛ́ toɛ ǹ min gigiã dɛ, Eziptin kii kɛ a re boe la a n dɔ lɛ ka sii kɔn nɛ bɛa zia lɛ gɔ́ɔ̃-n wa. Haalɛ ta Eziptin kii lɛ nə́ n dɔ lɛ ka sɔraasi gigiã nɛ, haalɛ ta á zaman gigiã paã. 18A liɛ mɛn wɔ, á n lɛ bɔ, a lɛ kɔ kɔn la lɛ ziziɛ̃. Á goã á n lɛ kɔ taãn-taãnɛ, sɛnɛ, a din na á wusoo á siin kɛn lɛn tumaa zɛnaa. Bɛ lɛ na á toa, a ba re n boe a-n wa.
19Bɛ lɛ na á toa masɛ Dɛnaa Lawa gole á kɛ pii:
A ma toa maa yiikoonaabaa
kɛ gɔ́ɔ̃ nɛ,
liɛ mɛn nə n wɔ
ka bɔlɔgoondɛnaabaa nɛ,
a sàn mɛn kɔ ka bɛa liɛ lɛ nɛ,
a lɛ kɔ kɔn la mɛn ziziɛ̃,
ma á re bɛa dɔlɔ diɛ a mìi ni.
20Ma á re biɛ koɛ nɛ,
maa kan tá re kuĩ.
A naarɛbaa ǹ sii mɛn zɛnaa,
Ma á re woe ne Baabilonii gána nɛ,
ma á re dɔlɔ boe a ganaa walan.
21A sɔraasi kurun lɛn sɔraasi
sonboren tumaa á re giɛ̃ zia la.
Ǹ mɛnɛn bɛ́ re goɛ̃,
bɛn tá re n pɛsɛ̃,
ǹ wo bǎã tumaa nɛ.
Ǹ tá re doɛ̃ ka bɛ-n kəni,
mà ma din Dɛnaa Lawa má boo da.
Dɛnaa Lawa lɛ kɔ Izirayeli la ka kii ni
22Masɛ din Dɛnaa Lawa n kɛ pii:
Ma á re da kaka kɛa gùrù ten boe
a mìi ni,
ma á re yiɛ ma bɔ a gùrù
lɛwɔn ganaa lon,
ma dinmaa n die zumi
kele sasa goon mìi ni lon.
23Man die zumi Izirayeli a kele
sasa kɛ goon mìi ni.
Á re gùrùn boe a nɛ kɔ,
á re da kaka biɛ gole gole.
Bàan tɔrɔ tumaa á re kiɛ la,
ǹ tá re ǹ kii doe a gùrùn la.
24Bɛa biikoo li kəni,
da mɛn tumaa bɛ́ don,
ǹ tá re doɛ̃ mà ma din nə
Dɛnaa Lawa lɛa.
Da mɛn nə́ ke lon,
ma din nə boe ma daa.
Ǹ mɛn nə́ ke tán,
ma din nə siɛ ma da lon.
Da mɛn yii bɛ́ koo,
ma din nə dii.
Da mɛn bɛ́ á gã,
ma din nə wusii ma a yii kaa.
Masɛ Dɛnaa Lawa,
bɛ̀ má boo mɛn da,
man bɛ lɛ zɛnɛɛ.»
اکنون انتخاب شده:
Eze 17: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.