Eze 12
12
Ezekieli sii a kɔnboe mɛn nyaa
1Dɛnaa Lawa boo da ma nɛ á pɛ: 2#Iza 6.9-10; Zer 5.21; Mar 8.18 «Nsɛ minbuiin a nɛ, n bɛ́ giã-n tɔrɔn mɛnɛn bii, piã-wɔlen manɛ. Yiin tá ǹ lon, sɛnɛ, maǹ nə n piɛ̃, ǹ ba giɛ ǹ nɛ wa. Toon tá ǹ lon, sɛnɛ maǹ nə n piɛ̃, ǹ ba n too koe wa. A giala, piã-wɔle din taãn-taãnɛn manɛ. 3Nsɛ minbuiin a nɛ, n too kɔ! N mànan sɔkɔn, ka wo bɛ̀rɛbaa ǹ bǎã-n wole a mànan bɛ́ lɔn. N soo penleen tiɛɛ̃nɛ ǹ dinin yii ni, n woo. N die n soo n nə n bɔ bǎã kɛ nɛ, n wo bǎã kɔsɔ nɛ ǹ dinin yii ni. Kɔntan ǹ tá re doɛ̃ ka bɛ nɛ, màn ǹsɛn man piã-wɔlen lɛa. 4N die n nə n mànan goa ka wo gùli kɔ ǹ bǎã-n wole wɔn bɛ́ lɔn, soo ǹ ne penleen tiɛɛ̃nɛ ǹ dinin yii ni, wasamiɛ̃nɛ, n soo ǹ dinin yii ni ka wo bɛ̀rɛbaa ǹ bǎã-n wole bɛ́ lɔn. 5Yala fɔ̃ kungɔn ganaa ǹ dinin yii ni, n soo ka n mànan lɛn nɛ bɛa yala lɛ nɛ. 6N kaa n wìi li ǹ dinin yii ni, soo ǹ ne wɔlɔ tì li. N die n màn kɔ n yɔrɔ lɛ, màn mɛn bɛ́ toɛ, n baran ga gána lɛ ganaa wa. A giala, man die n biɛ sii a kɔnboe lɛa Izirayeli tɔrɔn lɛn manɛ.»
7A n pɛ ma-n lɔn, má zɛnaa miɛ̃ ka te. Má soo ka maa mànan lɛn nɛ penleen tiɛɛ̃nɛ, ka wo gùli kɔ ǹ bǎã-n wole a mànan bɛ́ lɔn. Wasamiɛ̃nɛ, má yala fɔ̃ kungɔn lɛ ganaa ka ma gɔn nɛ. Bɛ kio, má maa mànan goa wɔlɔ tì li má ǹ kaa ma wìi li, má soo ǹ ne ǹ dinin yii ni.
8A lɛawaa baayɛlɛ, Dɛnaa Lawa boo da ma nɛ, á pɛ ma nɛ: 9– Nsɛ minbuiin a nɛ, Izirayeli tɔrɔn piã-wɔlen lɛn maǹ nɔ̀n diɛ n la mà waa-n sii n ke n tá zɛnɛɛ. 10A pɛ ǹ nɛ: «Maa goledɛnaa mɛn bɛ́ Zeruzalɛmu, kɛ n bɛa gɔn waa ma n lɛa, kun ka Izirayeli tɔrɔn mɛnɛn tumaa bɛ́ Zeruzalɛmu.» 11A pɛ ǹ nɛ kɛnɛn: Man sii a kɔnboe lɛa ka yɔrɔ-a. Ma zɛnaa lɔn, a n die n zɛnɛɛ ka nɛ miɛ̃. Ǹ tá re ka goɛ, ǹ wo ka nɛ bɛ̀rɛbaa ǹ bǎã nɛ. 12Goledɛnaa mɛn bɛ́ kun ka nɛ, bɛ á die a guĩ siɛ a da a wìi li wɔlɔ tì li. Ǹ bɛ́ re yala mɛn foɛ̃ kungɔn ganaa soo ǹ bǎã lɛa, á re soe ka bɛ nɛ. Á re màn koe a yɔrɔ lɛ, a ná a re boe la a gána lɛ yɛ ka a yii-n wa. 13#Kiin2 25.7; Zer 52.11 Sɛnɛ, masɛ Lawa á re kan koɛ nɛ a kũ. Ma á re woe ne *Baabilonii, Kalde gána nɛ. Á re giɛ̃ walan, a yii ná a re gána lɛ yii wa. 14Min mɛn tumaa bɛ́ a lɛnpɛnɛ, a lɛduə̃lin laanka a sɔraasin tumaa nɛ, ma á re bɛn sasawɛɛ, ǹ wo bǎã tumaa nɛ. Ma á re maa gɔya sa kɛ woɛ̃, ma ǹ kio loo ne. 15Bɛ̀ masɛ nə́ n sasawaa má ǹ kaa tɔrɔ kɔsɔn bii ǹ mɛn waáraa, bɛ̀ má ǹ pɛsɛ̃ má ǹ kaa gána kɔsɔn nɛ, ǹ tá re doɛ̃ bɛa biikoo li, ma masɛ din nə Dɛnaa Lawa lɛa. 16Min mɛnɛn bɛ́ re liɛ zia kɛ kio, bòo kɛ nɛ ka piɛ̃ busu kɛ nɛ, ma á re bɛn gialakunun toɛ walan. Bɛn bɛ́ re woe tɔrɔ kɔsɔn mɛnɛn bii, ǹ tá re ǹ dinin zɛnaa ǹ sii bɔbɔnɛɛn kɛn laakalɛɛ bɛn yii ni. Bɛn dɔn tá re doɛ̃, mà masɛ din nə Dɛnaa Lawa lɛa.
17Dɛnaa Lawa wusoo á boo da ma nɛ, á pɛ ma nɛ: 18– Nsɛ minbuiin a nɛ, n màn bii, bɛ̀ n gɔ̀nɔn nə́ bìn diɛ. N mu mi ka nyɛ́ɛ nɛ, ka gɔ́ɔ̃-bii ni. 19Bɛ kio, n pɛ gána lɛ a minin manɛ: «Dɛnaa Lawa n kɛ pii Zeruzalɛmu minin wɔ paǹ li, ǹ mɛnɛn bɛ́ Izirayeli gána nɛ: Ǹ tá re ǹ màn bii ka gɔ́ɔ̃-bii ni, ǹ nə ǹ mu mi ka sùsù ni. A giala, gána lɛ á re ziziɛ̃ kun ka a gɔ́ɔ̃gɔ́ɔ̃ ǹ màn tumaa nɛ, gána minin lɛn tumaa a kakaarɛbaa taman yii. 20Minin bɛ́ kiwin mɛnɛn nɛ, bɛa kiwin lɛn kɛbɔlɔn tá re kiɛ, gána lɛ á re don biɛ. Ka á re doɛ̃ ka bɛ-n kəni, mà masɛ din nə Dɛnaa Lawa lɛa.»
21Dɛnaa Lawa boo da ma nɛ á pɛ: 22Minbuiin a nɛ, wàa na á baa ǹ tá suusu kɛ diɛ Izirayeli gána wɔ paǹ li: – Biikoo á ke kiɛ̃, sii nyaa lɛn kɔn nə́ ke a ná a tɔn nə n zɛnaa wa. 23A pɛ ǹ nɛ, mà masɛ Dɛnaa Lawa n kɛ pii: «Man die zɛnɛɛ ǹ nyan bɛa suusu kɛ boo da Izirayeli gána-n doo wa. Sɛnɛ, a pɛ ǹ nɛ mà siinyaa lɛ tumaa a zɛnaa ǹ lɛawaan nə́ diri. 24Sii-nyaa kooron kɛn, gɔn-nɔɔ siin kɛn nɛ, bɛn kɔn ba re yii Izirayeli minin bii doo wa. 25A giala, masɛ din nə Dɛnaa Lawa lɛa. Bɛ̀ ma màn mɛn pɛ, bɛa zɛnaa ba ǹ lɔloɛ wa. Man die ka toɛ ka yii n koo tɔrɔ piã-wɔlen lɛn, ma bɛ́ màn mɛn pii, ma bɛ zɛnaa. Ma din Dɛnaa Lawa a da ǹ boo ne.»
26Dɛnaa Lawa wusoo á boo da ma-n doo á pɛ: 27– Minbuiin a nɛ, Izirayeli tɔrɔn man kɛ pii n wɔ paǹ li: «Giĩ kɛ lɛ yii bɛ́ sii mɛn ganaa, a bɛ́ boo mɛn diɛ, sisia sii bie wa, a wɔlɔ á tɔn sɔsɔɔ. 28Bɛ lɛ taman yii, a pɛ ǹ nɛ mà masɛ Dɛnaa Lawa n kɛ pii: Ma a da ǹ boon kɛn kɔn a sii ba re n lɔloɛ doo wa. Ma bɛ́ màn mɛn pii, bɛ lɛ n die n zɛnɛɛ. Ma din Dɛnaa Lawa a da ǹ boo ne.»
اکنون انتخاب شده:
Eze 12: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.