Eze 13
13
Soɛ-bɔlen mɛnɛn bɛ́ Lawa a boo gii diɛ
1Dɛnaa Lawa boo da ma nɛ á pɛ: 2– Nsɛ minbuiin a nɛ, min mɛnɛn bɛ́ n dinin biɛ Lawa a boo gii-dalin lɛa Izirayeli gána nɛ, ǹ nə́ boo diɛ ǹ dinin gɔn wìi a lɛa, sɛ̀ pɛ ǹ ganaa. A pɛ ǹ nɛ, maǹ nə n too kɔ masɛ Dɛnaa Lawa a da ǹ boo li. 3Masɛ Dɛnaa Lawa n kɛ pii: Lawa a boo gii-dalin kɛn baãnaan lɛa, koe ǹ dinin taasiɛn lɛ, a da yaa ǹ yii sii kɔn yɛ wa, bɔ̀n na á bɛn yɛ. 4Izirayeli minin lɛn, kaa Lawa a boo gii-dalin lɛn man ka tolokan bɛ́ lɔn, n bibiĩ kɛbɔlɔn la. 5Kungɔn lɛ a yalan mɛnɛn bɛ́ ǹ tan, ǹ bɛn tã wa, ǹ kungɔn dɔ ǹ nə́ Izirayeli tɔrɔn lɛn lɛnpɛnɛ nɛ wa, màn mɛn bɛ́ toɛ, ka n gòãn doa Dɛnaa Lawa a foo-yoo pinaa kɛ-n wa. 6Sii-nyaa kooron manɛ ǹ tá yii, maǹ nə n gɔn noɛ̃: «Dɛnaa Lawa a da ǹ boo ne.» A da yaa, masɛ Dɛnaa Lawa nə ǹ dia wa. Maǹ nə n yii diɛ kəni, mà masɛ sii lɛ zɛnaa a kɔnpɛ ka ǹ da ǹ boo ne. 7Man pii ǹ ni: «Ka n sii-nyaa kooron yii, ka nə n gɔn noɛ̃, ka n pii mà masɛ Dɛnaa Lawa a da ǹ boo ne, a da yaa ma boo da ka-n wa.» 8Bɛ lɛ na á toa masɛ Dɛnaa Lawa á kɛ pii: «Ka sii-nyaa kooron mɛnɛn pɛsɛ̃, ka soɛn mɛnɛn bɔbɔ, bɛn lɛn taman yii, ma á re die ka gialaa.» Ma din Dɛnaa Lawa a da ǹ boo ne. 9Lawa a boo gii-dalin mɛnɛn bɛ́ sii-nyaa kooron yii, ǹ nə́ soɛ boon didiɛ, masɛ á re goɛ̃ kɔn ka bɛn nɛ. Ǹ ba re goɛ̃ kun ka maa zaman nɛ doo wa. Izirayeli tɔrɔn tɔ bɛ́ kiɛ̃-n sɛ́wɔ mɛn nɛ, ǹ tɔ dɔ a re n kiɛ̃ walan doo wa, ǹ ba re we Izirayeli gána-n doo wa. Ka á re doɛ̃ ka bɛ lɛ-n kəni, mà masɛ din nə Dɛnaa Lawa lɛa.
10 #
Zer 6.14; 8.11 Maǹ maa minin lɛn bebele mà «là nyantoro tan», a da yaa là nyantoro din banban. Maa zaman lɛ bɛ́ kungɔn mɛn doe, ǹsɛn man bɛ gialaa tɔrɛ#13.10 Ǹsɛn man bɛ gialaa tɔrɛ: Lawa a boo gii-dalin lɛn man sonbore duri zaman lɛ ganaa ka ǹ bɛ́ kungɔn tɔrɛ lɔn ǹ ná a wɔ̀lɔ̀ duri.. 11Min mɛnɛn lɛn bɛ́ a gialaa tɔrɛ, a pɛ ǹ nɛ ma kungɔn lɛ á re kiɛ. A giala, la gole á re die, á re kiɛ ka gii ni, piɛ̃ gole á re boe. 12Bɛ̀ kungɔn lɛ kaa ǹ mɛn waáraa, minin tá re pii ka nɛ, mà «a tɔrɛɛ là n ka wàa nɛ?» 13Bɛ lɛ na á toa masɛ Dɛnaa Lawa á kɛ pii: «Maa foo-yoo lɛ gɔ́ɔ̃ nɛ, ma á re piɛ̃ gole diɛ bɔ ganaa, ma la gole da kaa ganaa. Maa foo busii lɛ gɔ́ɔ̃ nɛ, la a gii mɛn nə ke wɔlɔ yui, ma á re bɛ kiɛ ǹ la. 14Ka kungɔn mɛn lɛ tɔrɔ, ma á re nyɛnɛɛ ma duwəə tán, a gòã daa ǹ bǎã kɛ yɛ kanaa. Kungɔn lɛ á re kiɛ, ka dinin tá re papaɛ̃ a bii walan. Ka á re doɛ̃ ka bɛ lɛ-n kəni, mà ma din nə Dɛnaa Lawa lɛa. 15Yǎa masɛ nə n foo nyɛɛ kungɔn kɛ laanka a tɔrɛɛ wolen la. Ma á re pii ka nɛ: Maa kungɔn lɛ kaa. A tɔrɛɛ wolen lɛn dɔn dinin banban doo wa. 16Ǹ dinin Izirayeli gána a Lawa a boo gii-dalin lɛn mɛnɛn dɔn dinin nə goã boo diɛ Zeruzalɛmu wɔ paǹ li ǹ nə́ pii mà là nyantoro tan a da yaa là nyantoro din banban, bɛa boo gii-dalin lɛn dɔn dinin banban doo wa. Masɛ Dɛnaa Lawa a da ǹ boo ne.»
17Nsɛ minbuiin a nɛ, n too kɔ: «N tɔrɔn lɔn mɛnɛn bɛ́ n dinin biɛ Lawa a boo gii-dalin lɛa, n yiin waa ǹ li dɛ! Maǹ boo diɛ á kɔnpii ka ǹ dinin taasiɛ nɛ. Maa boo gii kɛ da ǹ nɛ 18n pɛ: Masɛ Dɛnaa Lawa n kɛ pii: Bɔ̀n tá re ka yii. A giala, ka n mɔnaa gɔnɔn zɛnɛɛ, ka n kiɛ min tumaa gɔn wìi-a, ka n pataran zɛnɛɛ, mà min tumaa bɛ kɔ a mìi lɛ, màn mɛn bɛ́ toɛ ka gɔn dɔ ǹ telenboenen#13.18 Telenboenen kuĩ: Bɛa gɔn kɛ lɛ la, maǹ zaman lɛ siɛ̃ ǹ nə́ ǹ niɛ ǹ boe Lawa ganaa. ganaa. Ka n giɛ li ka maa zaman kɛa minin telenboenen kũ, ka dinin telenboenen kɛn, ka bɛn tamaa. Bɛ giala n ka wàa nɛ? 19Ka masɛ yii puusə kɔ, maa zaman lɛ yɔrɔ-a, *ɔrzi gɔn yii goon a lɛa ka buuru lɛkoron ne. Ka doamaa bɛ́ nɛ ka min mɛnɛn yii toa koo, ka n bɛn dii; ka doamaa bɛ́ nɛ ka min mɛnɛn dɛ, ka ǹ bɛn yii toɛ koo. Maa zaman lɛ bɛ́ a ba n mìi bibiĩ doɛ̃ wa, ka nə ǹ yiri siɛ̃ ka bɛa yɔrɔ lɛ nɛ.» 20Bɛ lɛ na á toa masɛ Dɛnaa Lawa á kɛ pii ka nɛ: «Á ke, ka bɛ́ minin kuĩ ka mɔnaa gɔnɔn mɛnɛn lɛn nɛ, ma á re bɛa zia diɛ ka ganaa. Ma á re mɔnaa gɔnɔn lɛn tɔtoɛ̃ ma ǹ bɔ ǹ gɔn wìin ganaa. Ka min mɛnɛn lɛn kũ, ma á re bɛn sii ma ǹ kaa. 21Ma á re kaa pataran lɛn tɔtoɛ̃, ma maa zaman kɛ kũ ma si ka la, ka gɔn ba re doe ǹ ganaa doo wa. Ka tá re doɛ̃ ka bɛ-n kəni, mà masɛ din nə Dɛnaa Lawa lɛa. 22A giala ka n min sonbore foo ziziɛ̃ ka kaa soɛ boon kɛn lɛn nɛ. A da yaa, masɛ ba li, ma sii baraa zɛnaa min sonbore-n wa. Ka n min baraa foo taɛ̃, bɛ lɛ nɛ, a ba wusii a sii baraa zɛnaa kio, ń giɛ a yii á goɛ̃ koo wa. 23Sisia kəni, ka a re sii-nyaa kooron kɛn yii doo wa, ka a re n gɔn noɛ̃ doo wa. Ma á re maa zaman lɛ kuĩ ma si ka la. Ka á re doɛ̃ kəni, mà masɛ din nə Dɛnaa Lawa lɛa.»
اکنون انتخاب شده:
Eze 13: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.