Eze 11
11
Zeruzalɛmu a dɔlɔ
1Dɛnaa Lawa yiri ma saa. Lawa a kion lɛ a kiɛnlɛ mɛn yɔrɔ bɛ́ dia-n lɛ̀giala li, á woo ma-n walan. Giĩ fuəwensooro (25) na á goã bɛa kiɛnlɛ lɛ lɛ-a. Bɛn bii, má Azuuru a nɛgiĩ Yazaniya laanka Benayawuu a nɛgiĩ Pelatiyawuu yɛ, zaman lɛ a nyɛɛnaandɛnan min paa lɛa. 2Lawa yiri tɔ́n pɛ ma nɛ: – Nsɛ minbuiin a nɛ min mɛnɛn bɛ́ n taasɛ ka sii kɔkɔrɔ zɛnaa-n kiwi lɛ nɛ, ǹ nə́ yiri kɔkɔrɔ koe minin la, ǹ dinin man ka kɛn nɛ. 3Maǹ pii: «Kion-dɔ biikoo bie ke wa. Kiwi lɛ n fɔlɔ donkolon lɛa, wɔsɛn man siĩ lɛa a nɛ#11.3 Kiwi lɛn fɔlɔ donkolon lɛa: Boo giməə ne. Bɛ n nyɛɛ mà ǹ giã kiwi lɛ nɛ á soɛ ǹ wo gùli kɔ nɛ..» 4Bɛ lɛ taman yii, nsɛ minbuiin a nɛ, maa boo gii da ǹ nɛ. A da ǹ nɛ koe!
5Dɛnaa Lawa yiri daa ma kũ, á pɛ ma nɛ: – Wo boo kɛ pɛ: «Masɛ Dɛnaa Lawa n kɛ pii: Izirayeli minin lɛn, ka bɛ́ màn mɛn diɛ, ma á miɛ. Sii mɛn bɛ́ ka yiri ni, ma á doɛ̃. 6Ka min gigiã dɛ kiwi lɛ nɛ, gere n tán zii la bǎã yii ni. 7Bɛ lɛ na á toa masɛ Dɛnaa Lawa á pii: Kiwi lɛ n ka fɔlɔ donkolon bɛ́ lɔn sonbore. Ka min mɛnɛn lɛn dɛ ka ǹ kaa tán-a a nɛ, siĩ lɛ n ka bɛ nɛ. Sɛnɛ, ma á re kasɛn wɛɛ ma soo ka nɛ. 8Táa ka n nyɛ́ɛ biɛ zia nɛ? A bɛ́ miɛ̃ masɛ á re zia diɛ ka la. Ma din Dɛnaa Lawa a da ǹ boo ne. 9Má á re ka lui ma ka bɔ kiwi lɛ nɛ, ma ka kɔ tɔrɔ kɔsɔn la, ma maa dɔlɔ kɛ bɔ ka ganaa. 10Ka á re giɛ̃ zia la. Man die maa dɔlɔ lɛ boe ka ganaa Izirayeli gána din ni. Ka á re doɛ̃ kəni, mà ma din nə Dɛnaa Lawa lɛa. 11Kiwi kɛ lɛ a re kaa fɔlɔ donkolon biɛ, ka dinin nə́ siĩ lɛa a nɛ wa. A giala, man die maa dɔlɔ lɛ boe ka ganaa Izirayeli gána lɛ din ni. 12Ka á re doɛ̃ bɛa biikoo li kəni, mà masɛ din nə Dɛnaa Lawa lɛa. Á ke, maa landa boon kɛn, ka kɔ bɛn lɛ wa, ka maa sii yɔrɔ bɔ ǹ boon kɛn dɔn tamaa wa. A giala, tɔrɔ kɔsɔn mɛnɛn bɛ́ ka lɛnpɛnɛ, ka n ka bɛn sii zɛnaa ǹ gɔn saa.»
13A ma toa Lawa a boo gii lɛ diɛ, Benayia a nɛgiĩ Pelatia gã. Má tɔ́n bɔ má mɛnaa tán ma lɛ la, má n lɛ dɛ kɔsɛkɔsɛ má pɛ: «E, Dɛnaa Lawa! Izirayeli minin mɛnɛn nə goã, man die bɛn dɔn tumaa dii?»
Lawa n wusii a zaman soekɔn
14Dɛnaa Lawa a boo dɔ ma li á pɛ: 15– Nsɛ minbuiin a nɛ, n dɔɔ̃nɔn lɛn tumaa, n dikion minin ni, Izirayeli tɔrɔn lɛn kuturu, Zeruzalɛmu minin lɛn man pii ka nɛ: «Ka n wɔlɔ lui Dɛnaa Lawa ganaa, a giala, gána kɛ lɛ na á n kɔ wɔsɛn dinin la. 16Bɛ lɛ taman yii, Dɛnaa Lawa mà ma kɛ pɛ ma nyaa goa wolen lɛn manɛ: Má woo ka nɛ tɔrɔ kɔsɔn bii sɔsɔɔ, má ka pɛsɛ̃ gána kɔsɔn nɛ, a laan bɛ yii ni, ma á kun ka nɛ walan, ka maa kion kɛ n kun ka ka nɛ. 17Bɛ lɛ nɛ, á pɛ ǹ nɛ mà masɛ Dɛnaa Lawa n kɛ pii: Ma ka pɛsɛ̃ tɔrɔn mɛnɛn bii ka gána kɔsɔn nɛ, ma á re ka wɛɛ walan, ma ka sɔkɔn, ma Izirayeli gána lɛ kɔ ka la. 18Bɛ̀ ká dɔ, dì guguru kɔ ǹ mànan tumaa, ka ǹ bɛ́ sii bɔbɔnɛɛ zɛnɛɛ ka mànan mɛnɛn tumaa nɛ, ka bɛn goa, ka ǹ bɔ gána lɛ nɛ. 19#Eze 36.26-28 Ma á re foo dii koe ka la, ma yiri dii kɔ ka la. Foo kakabaa mɛn bɛ́ ka nɛ ka kɔlɔ bɛ́ lɔn, ma á re bɛ boe ma minbuiin nɛ baa ǹ foo basiɛ̃ kɔ ka la. 20Man die bɛ zɛnɛɛ màn mɛn bɛ́ toɛ, ka kɔ maa landa boon kɛn lɛ, ka maa sii yɔrɔ bɔ ǹ boon kɛn tamaa, kaa tɔ wɔ kɔn pɛ ǹ nɛ. Ka á re goɛ̃ maa zaman lɛa, ma dɔ á re goɛ̃ ka dɔn Lawa lɛa. 21Sɛnɛ, min mɛnɛn taasiɛ bɛ́ tɔn doa-n dì mànan laanka sii bɔbɔnɛɛn kɛn ganaa, ma á re bɛn zɛnaa ǹ siin lɛn dɔlɔ diɛ ǹ dinin mìi ni. Ma din Dɛnaa Lawa a da ǹ boo ne.»
22 #
Eze 43.2-5
Lon màn yiikoonaan lɛn nə́ n nyàan lɛ bɔ. Wotoro gòãn lɛn dɔn nə́ yoo kunun ǹ ni. Izirayeli tɔrɔn Lawa lɛ a siĩnbaa na á goã ǹ lalan lon. 23Dɛnaa Lawa a siĩnbaa yoo á n bɔ kiwi lɛ gɔ́ɔ̃ nɛ, á woo mɛ kele kɛ la Zeruzalɛmu a lɛ̀giala-n. 24Lawa yiri daa ma saa á woo ma nɛ goa wolen lɛn li *Baabilonii gána nɛ. Lawa yiri na a bɛ nyaa ma nɛ sii-nyaa gɔ́ɔ̃ nɛ. Ma yii goã màn mɛn ganaa, bɛ daa á papaã á n bɔ ma lalan. 25Dɛnaa Lawa goã á màn mɛn nyaa ma nɛ, má bɛ tumaa boo da goa-wolen lɛn manɛ.
اکنون انتخاب شده:
Eze 11: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.