Eze 1
1
Ezekieli Lawa a siĩnbaa yɛ
1 #
SNS 19.11
Masɛ Ezekieli lɛ̀ pɔsɔɔbaa ǹ wɔ li, a mui a siibaa ǹ wɔ a lɛawaa soorobaa ǹ wɔ pinaa, man má goã kun ka goa wolen kɛn nɛ Kebaara tà lɛ-a. Ma bɛ́ walan, lon nə́ n lɛ bũ, má siin yɛ Lawa a din nyaa siin lɛa. 2#Kiin2 24.10-16; KZS2 36.9-10 Bɛ á zɛnɛɛ, bɛ̀ ǹ nə́ woo ka kii Zoakini ni bɛ̀rɛbaa ǹ bǎã nɛ, á dɔ lɛ̀ sooro. Bɛa lɛ̀ soorobaa ǹ wɔ lɛ a mui a lɛawaa soorobaa ǹ wɔ pinaa, 3Dɛnaa Lawa boo da ka masɛ Buuzi a nɛ Ezekieli ni, *Baabilonii minin gána nɛ, Kebaara tà lɛ-a. Dɛnaa Lawa a pàã gisĩ masɛ la walan.
4Ma bɛ́ giɛ, bɛ̀ la a piɛ̃ kaara á ke, á n toa gɔsɛ a lɛ̀gɔn la á n die. Labara gangabiɛ na á goã a nyɛɛnɛ, la ń tɛ pii bɛ̀ a bɛ bii kukuru kɔn. Tɛ fúlu kɔn na á goã bɛa labara lɛ lɛnpɛnɛ, a bii kɛ na á goã tɛ pii ka zan tɛ-pɛle bɛ́ lɔn. 5#SNS 4.6 Màn yiikoonaa sii kɔn na á goã labara lɛ bii, ka n pɛ mà minbuiinin manɛ. 6Ǹ gogoonmaa yɔrɔ na á goã màn sii, ǹ nyàa dɔn màn sii. 7Ǹ kèrèn man nə́ goã pepere, ǹ gòãn nə́ ka dii ten gòon tɔ́nɔn bɛ́ lɔn, tɛ pii ka zan zɔnɛɛ bɛ́ lɔn. 8Minbuiin nɛ gɔn na á goã nyàan lɛn gogoonmaa giulun, gɔn lɛ a gogoonmaa yɔrɔ n dia-n kanaa a lɛ̀ gùrù sii kɛ googoonmaa la. Màn yiikoonaa sii lɛ tumaa yɔrɔn laanka ǹ nyàan lɛn dɔn man nə́ goã miɛ̃. 9Ǹ nyàan lɛn lɛwɔnɔn maǹ nə́ goã n doɛ kɔn. Bɛ̀ ǹ tá woe bǎã mɛn nɛ, ǹ laadoo ba a ganaa, ǹ nə n bɔyaa wa. Ǹ gogoonmaa na á goã woe a din nyɛɛn pepere. 10#Eze 10.14; SNS 4.7 Ǹ yɔrɔ lɛ na á goã boe-n minbuiin nɛ wɔ li. Ǹ siimaa lɛ tumaa, yàra yɔrɔ na á goã ǹ gogoonmaa gusin, dii gɔ̀lɔ̀ yɔrɔ nə́ ǹ gɔsɛ. Giogialatã-a yɔrɔ na á goã ǹ siimaa lɛ tumaa dɔ lon. 11Ǹ tumaa nyàa na á goã sii. Maǹ nyàa paa lɛ boe lon, ǹ nə́ ǹ doɛ kɔn-a. Nyàa lɛ a màn paa kɔsɔ kɛ na á goã n koe ǹ gɔ̀nɔn lɛ. 12Didie na á goã woe a din nyɛɛn pepere. Ǹ bɛ giɛ li ǹ wo maa maǹ woe walan, ǹ laadoo ná a ba a ganaa, ǹ nə n bɔyaa wa. 13#SNS 4.5 A n ka tɛ nàn na á goã kuĩ màn yiikoonaan lɛn ganaa. A n ka tɛ buə̃ na á goã kuĩ ǹ ganaa. Tɛ lɛ na á goã n binbirin boe ǹ bii. Bɛa tɛ lɛ na á goã kiɛ min yii ni, la a tɛ-pɛ n boe a nɛ. 14Màn yiikoonaan lɛn man nə́ goã baa sii bɛ̀ ǹ woo bɛ̀ ǹ nə n bɔyaa, ǹ yii n fuu ka la a tɛ pɛ bɛ́ lɔn.
15 #
Eze 10.9-13
Ma bɛ́ giɛ màn yiikoonaan lɛn ganaa, bɛ̀ wotoro gòã á ke tán ǹ gogoonmaa li. 16Bɛ̀ ń wotoro gòãn lɛn yɛ, maǹ tɛ pii ka kɔlɔ kùsidɛnaa giɔ̀mɔ kaka-a kɛ bɛ́ lɔn. Ǹ zɛnaa ǹ gɔn kɛ tumaa n goon, ka maǹ nə́ ǹ wɔ kɔn nɛ. 17Bɛ̀ wotoro gòãn lɛn tá woe, maǹ boe la ǹ tɔ wɔ ka ǹ wàã sii tumaa nɛ, bɔyaa sii ná a ba a-n wa. 18#SNS 4.8 Wotoro gòãn lɛn gaganan kɛn, bɛn maǹ nə́ goã sasa, nyɛ́ɛ diɛ. Yii nànan maǹ nə́ goã ǹ siimaa lɛ tumaa a gaganan ganaa, ǹ ná a lɛnpɛnɛ nɛ. 19Bɛ̀ màn yiikoonaan lɛn tá woe, wotoro gòãn lɛn dɔn man tɔ we ǹ wàã li. Bɛ̀ màn yiikoonaan lɛn nə́ yoo ǹ nə́ n bɔ tán, wotoro gòãn lɛn dɔn man yui, ǹ nə n bɔ tán. 20Ǹ bɛ giɛ li ǹ wo maa maǹ woe walan. Wotoro gòãn lɛn dɔn man nə́ goã yui kunun ǹ ni. A giala, màn mɛn bɛ́ á goã woe ka màn yiikoonaan lɛn nɛ, a din lɛ dɔ na á goã woe ka wotoro gòãn lɛn nɛ. 21Bɛ̀ màn yiikoonaa lɛn nə́ n zɔ̃, wotoro gòãn lɛn dɔn man nə n zoɛ̃, bɛ̀ ǹ nə́ golee, wotoro gòãn lɛn dɔn man golee. Bɛ̀ ǹ nə́ yoo ǹ nə́ n bɔ tán, wotoro gòãn lɛn dɔn man yui, ǹ nə n bɔ tán. A giala, màn mɛn bɛ́ á goã woe ka màn yiikoonaan lɛn nɛ, a din lɛ dɔ na á goã woe ka wotoro gòãn lɛn nɛ.
22 #
SNS 4.6
Màn na á bɔ á n nyɔmaa lon sɔsɔɔ ka bara bɛ́ lɔn, màn yiikoonaan lɛn gogoonmaa mìi la. Bɛa màn lɛ na á goã tɛ pii, ka *mu nyuù wole bɛ́ lɔn. 23Bɛa bara lɛ giulun lon, maǹ nə́ goã ǹ nyàa màn papaa lɛ boe, bɛ̀ ǹ nə ǹ doa kɔn. Nyàan lɛn màn papaa dɔ na á goã, ǹ nə́ bɛn koe ǹ dinin lɛ. 24#SNS 1.4-15; 19.6 Ǹ bɛ́ ǹ nə́ yoo ǹ nə́ woe, má ǹ nyàa ka wuu ma. A n ka mu gole wuu bɛ́ lɔn, ka Pàãyiidɛnaa kɛa ginii bɛ́ lɔn. Ǹ wuu na á goã boe ka sɔraasi zaman gole lɛ wuu ni. Bɛ̀ ǹ nə́ golee, maǹ nə́ goã n nyàan lɛn gisĩ, 25lɛn goon tɔ́n bɔ bara lɛ-n lon ǹ mìi lalan. 26#Eze 10.1; SNS 4.2-3 Bara mɛn lɛ goã ǹ mìi lalan, kii dankan a kɔnboe na á goã bɛ lalan, tɛ pii ka kɔlɔ bɔlaan kɛ bɛ́ lɔn. Min a kɔnboe dɔ na á goã bɛa kii dankan lɛ lalan lon. 27#Eze 8.2 Bɛa dɛnaa lɛ na á goã tɛ pii ka zan bɛ́ lɔn. A saa a binbin wɔlɔ ganaa a da lon, a n ka tɛ na á goã kuĩ a lɛnpɛnɛ. A saa a binbin wɔlɔ ganaa a da tán, a n ka tɛ na á goã kuĩ a lɛnpɛnɛ, wɔlɔ fúlu da bii. 28Wɔlɔ fúlu mɛn lɛ goã a lɛnpɛnɛ, bɛ na á goã ka lamɛn bɛ́ lɔn, la a kaa pinaa. Bɛa wɔlɔ fúlu lɛ na á goã Dɛnaa Lawa a siĩnbaa kɛa kɔnboe lɛa. Ma bɛ yɛ lɔn, má bɔ má mɛnaa tán ma lɛ la. Má tɔ́n min goon lɛ ma boo diɛ.
اکنون انتخاب شده:
Eze 1: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.