Eze 2
2
Lawa Ezekieli dia dí mɛn ganaa
1Bɛa dɛnaa lɛ tɔ́n pɛ ma nɛ: «Minbuiin a nɛ, yoo lon, n golee n gòãn la, a giala, man die boo diɛ n nɛ.» 2A bɛ́ bɛa boo lɛ diɛ ma nɛ ǹ mɛn waáraa, Lawa yiri daa wɔ ma nɛ, á ma saa á ma da lon. Min mɛn bɛ́ boo lɛ diɛ ma nɛ, má tɔ́n nə n too kɔ bɛ lon. 3Á tɔ́n pɛ ma-n kɛnɛn: – Nsɛ minbuiin a nɛ, man die n diɛ Izirayeli minin kɛn li, bɛa piã-wɔlen kɛn lɛn ǹ nə́ n gòãn dii masɛ ganaa. Ǹ digolon nə ma bɔlɔ tii lɔn, a din lɛ n ke ǹ dɔn tá la, a da pelo kɛ lɛ yaa. 4Bɛa too kaakaan kɛn lɛn sii woon zɛnaa wolen lɛa, man die n diɛ ǹ li, n wo pɛ ǹ nɛ kɛnɛn: «Dɛnaa Lawa n kɛ pii.» 5Ǹ bɛ́ n piã-wɔlen lɛn lɛa, bɛ̀ ǹ nə́ n too kɔ n lon, ta ǹ nə n too kɔ ǹ lon wa, ǹ tá re doɛ̃, mà Lawa a boo gii-dali tá ǹsɛn bii.
6Nsɛ minbuiin a nɛ, n nyan nyɛ́ɛ baa ǹ nɛ wa, n nyan nyɛ́ɛ baa ǹ da ǹ boon dɔn man wa. N tá kunun ǹ ni kɛ n ka min na á giã koronkoron laanka nyan bii, ka min na á giã ton kɛ la sɔn doe. N nyan nyɛ́ɛ baa ǹ da ǹ boon man wa, n nyan nyɛ́ɛ baa ǹ yii-n duduu wa. A giala, piã-wɔlen manɛ. 7Sɛnɛ, maa boon kɛn pɛ ǹ nɛ, á kɔɔ̃nɛ ǹ nə n too kɔ li hinlaa ǹ baran n too kɔ li wa: Piã-wɔlen manɛ.
8Nsɛ minbuiin a nɛ, masɛ bɛ́ re boo mɛn pii n ni, n too kɔ bɛ li: N nyan toa n piã-wɔle baa ka minin kɛn bɛ́ lɔn wa dɛ. Má bɛ́ re màn mɛn koe n la, n lɛ bũ n bɛ si n sɔ̃.
9 #
SNS 5.1
Ma bɛ́ giɛ, bɛ̀ gɔn goon nə́ ke dia-n ma la, ka sɛ́wɔ-munii ná a nɛ. 10Á bɛa sɛ́wɔ lɛ lɛ bũ ma yɔrɔ-a. Màn na á goã kiɛ̃ nɛ a yɔrɔ laanka a dɔ̀ɔ̃ la. Màn mɛn goã kiɛ̃-n sɛ́wɔ lɛ nɛ, gɛ̀ loen manɛ, yɔrɔ-kɔsɛ ǹ siin ni, ka lɛ-dɛ ǹ siin ni.
اکنون انتخاب شده:
Eze 2: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.