Dan 9
9
Danayeli a Lawa nyankɔ
1Zɛrzɛsi mɛn bɛ́ Mɛdi tɔrɔ lɛa, ǹ nə́ bɛa nɛgiĩ Dariyusu koa kii lɛa, *Baabilonii gána mìi la. 2#Zer 25.11; 29.10 A kiibaa lɛ̀ bibinaa li, a kɔnpɛ ka Dɛnaa Lawa a boo kɛ nɛ, á goã á pɛ a boo gii-dali Zeremii ni, masɛ Danayeli ná a giala ma Lawa a Boo Sɛ́wɔ nɛ, mà Zeruzalɛmu kiwi lɛ bɛ́ á yu, mà a gɔ́ɔ̃ kooro n die goɛ̃ tán yǎa lɛ̀ pɔsɔbaa. 3Ma bɛ yɛ lɔn, má n lɛ sɔɔ, ma boroo wɔ ma ganaa, ma ton kaa ma ganaa ka gɛ̀ na á gã ma la. Má n yɔrɔ dia Dɛnaa Lawa la, má a nyankɔ, má gòã-kũ da a ganaa. 4Má tɔ́n maa Lawa, Dɛnaa Lawa nyankɔ, má n mɛ bɔ maa zaman a sii baraan lɛa má pɛ kɛnɛn:
«E, Dɛnaa Lawa, man gòã-kũ diɛ n ganaa! N din nə Lawa gole lɛa, n sii n nyɛ́ɛ diɛ. Min mɛnɛn bɛ́ n narɛ, ǹ nə́ n gɔn waa ǹ boon kɛn sii, n lɛ kɔ mɛn wɔ ka bɛn nɛ, n nə n bɔlɔgoondɛnaa lɛa bɛ gɔ́ɔ̃ nɛ, n tá bǐɛ̃ zɛnɛɛ ǹ nɛ. 5Wɔ́ sii baraa zɛnaa, wɔ́ kɔkɔrɔbaa ǹ sii zɛnaa. Wɔ́ baraabaa zɛnaa, wɔ́ n gòãn dii Lawa ganaa, wɔ́ kanaa wɔ́ n bɔ n dí pɛ ǹ boon laanka n sii yɔrɔ bɔ ǹ boon kɛn kio. 6N dí-nyalin mɛnɛn nə goã n boo gii diɛ, wɔ n too kɔ bɛn lon wa. Ǹ dinin lɛn man nə́ boo da wɔa kiin manɛ, wɔa goledɛnan nɛ, wɔ digolon laanka gána lɛ a zaman tumaa nɛ, ka n din tɔ nɛ. 7Dɛnaa, zɛ̀rɛ ba nsɛ-a wa. Wɔ dinin wɔ n ka sìi ni pelo: Zudaa minin wɔ n ka sìi ni, Zeruzalɛmu minin ni, Izirayeli minin tumaa, ǹ mɛnɛn wɔlɔ bɛ́ kunun, ka ǹ mɛnɛn wɔlɔ bɛ́ sɔsɔɔ. A giala, ǹ goã bɔlɔ tii siin mɛnɛn zɛnɛɛ n nɛ, bɛn lɛn man nə́ toa, ń nə́ ǹ loo, ń nə́ ǹ kaa gána kɔsɔn nɛ. 8Dɛnaa Lawa, wɔ dinin ni, wɔa kiin ni, wɔa goledɛnan laanka wɔ digolon ne, wɔ dinin wɔ n ka sìi ni. A giala, wɔ́ sii baraa zɛnaa n nɛ. 9Sɛnɛ Dɛnaa Lawa, wɔa Lawa, a laanɛ wɔ́ n bɔlɔ tii, n din nə makara boe wɔ ganaa, n tá wɔa sii baraan toɛ wɔ nɛ. 10Ka bɛ dɔ nɛ, n boo gii-dalin mɛnɛn bɛ́ n dí nyɛɛ, n nə n dí-pɛn boon mɛnɛn kɔ bɛn la mà ǹ nə ǹ kɔ wɔ la, wɔ n too kɔ n din Lawa, Dɛnaa Lawa lɛ lon, wɔ́ kɔ bɛn lɛ wa. 11Izirayeli minin tumaa nə́ n dí-pɛ lɛ da ǹ kio. Ǹ nə́ kanaa, ǹ nə n too kɔ n lon wa. Bɛ lɛ nɛ, bɔ̀n da ǹ siin laanka lɛn baraa bíi mɛn boo bɛ́ kiɛ̃-n Lawa a dí-nyali Muizu a dí-pɛn sɛ́wɔ kɛ nɛ, bɛn nə́ daa kaa wɔ la, a giala, wɔ n wɔ́ sii baraa zɛnaa n nɛ Lawa. 12N boon mɛnɛn da wɔ dininmaan wɔ paǹ li ka goledɛnan mɛnɛn dɔn bɛ́ ǹ nə́ goã wɔ mìi la, ń bɛn sii zɛnaa ń ná a lɛ pã: n nə́ ń bɔ̀n gole da wɔ ganaa Zeruzalɛmu kiwi, ǹ miã kɔsɔ tɔn nə n zɛnaa bǎã kɔn nɛ kanaa kɛ-n wa. 13Bɛa sii babaraa kɛ lɛ tumaa na á wɔ yɛ ka a bɛ́ kiɛ̃-n Muizu a landa sɛ́wɔ-n lɔn. A giala Dɛnaa Lawa, wɔa Lawa, wɔ gòã-kũ da n ganaa wa. Wɔ wusoo wɔ́ n bɔ wɔa sii baraan kio wa, n sonbore mɛn pɛ, wɔ tɔ wɔ á kɔnpɛ ka bɛ-n wa. 14Bɛ lɛ nɛ, Dɛnaa Lawa, ń koa li miɛ̃, ń bɛa sii baraa kɛ lɛ da wɔ mìi ni. A giala, Dɛnaa Lawa, wɔa Lawa, n zɛnaa ǹ sii tumaa n pepere. Wɔ dinin man wɔ n too kɔ n lon wa.
15Dɛnaa Lawa wɔa Lawa, n bɛ́ ń nə́ n zaman kɛ waa ka pàã nɛ n nə́ ǹ bɔ Ezipti gána nɛ, n tɔ mɛn yɛ bɛ gɔ́ɔ̃ nɛ, bɛa tɔ lɛ á tɔn nə n ganaa haalɛ pelo. Sɛnɛ, wɔsɛn man wɔ́ sii baraa zɛnaa, wɔ zɛ̀rɛ nɛ. 16Dɛnaa, n zɛnaa ǹ sii sonboren lɛn tumaa taman yii, bǐɛ̃ kɔ, n nə n foo-yoo kɛ laanka n foo-busii kɛ yɔrɔ saa n bɔ Zeruzalɛmu la, n din a kiwi ke, n kele sonbore ke! A giala, wɔa sii baraan kɛn taman yii, ka wɔ digolon kɛn sãn nɛ, min mɛnɛn bɛ́ wɔ lɛnpɛnɛ, bɛn man sɔ kiɛ Zeruzalɛmu laanka n zaman kɛ la. 17Sisia kəni, wɔa Lawa, bǐɛ̃ kɔ n nə too kɔ maa nyankɔ li, n maa gòã-kũ si. N kion sonbore ke ǹ nə́ yu, wusoo n nə n yɔrɔ bǐɛ̃ da la, n din a lɛa! 18E, maa Lawa, n too kɔ doɛ̃! Basaã mɛn wɔ yɛ, wɔ laanka n kiwi kɛ nɛ n din tɔ n la, n yii bũ n ga bɛa basaã lɛ-a. A giala, wɔa zɛnaa ǹ sii pepere a lɛa bie toɛ wɔ ń gòã-kũ kɛ diɛ n ganaa wa. Sɛnɛ, n din a makara-doɛ̃ gole kɛ a lɛa nɛ. 19Dɛnaa, n too kɔ! Dɛnaa wɔa sii baraa lɛ toa wɔ nɛ. Dɛnaa, n too kɔ doɛ̃! N din a lɛa maa Lawa, sii zɛnaa, n baran n lɔlɔɔ wa! A giala, n din a kiwi ni, n din a zaman nɛ.»
20Má goã Lawa nyankɔ la miɛ̃, má ń ma din a sii baraa laanka maa zaman, Izirayeli minin kɛn sii baraan pii n ni, má ń gòã-kũ diɛ maa Lawa, Dɛnaa Lawa ganaa, a din a kele sonbore kɛ a lɛa. 21#Luk 1.19,26 Ma bɛ́ tɔn na a gialaa Lawa nyankoe, ma goã má lon a dia dí-a wole Gabarayeli mɛn lɛ yɛ bibinaa nɛ, bɛ́ piɛ̃ á daa ma li ka baa nɛ, wasamiɛ̃n a wúlu-bɔ biikoo li. 22Á tɔ́n sii lɛ yɔrɔ nyaa ma nɛ, á pɛ: «Nsɛ Danayeli, sisia kəni, man má daa n yiri fulu. 23Ń bɛ́ ń na a giala kɔ ń gòã-kũ diɛ Lawa ganaa ǹ mɛn waáraa, boo kɔn soo Lawa lɛ-n, man má daa bɛ lɛ pɛ n nɛ, a giala, n sii á kɔɔ̃n Lawa ganaa parsiini. Bɛ lɛ taman yii, n too kɔ bɛa boo lɛ li, n sii-yɛ kɛ lɛ giala ma.
24Lɛ̀ sɔbaa wɔlɔ pɔsɔbaa nə́ n koa,
n zaman laanka
n kiwi sonbore kɛ wɔ lɛa.
Màn mɛn bɛ́ toɛ,
Lawa bɔlɔ tii ǹ siin kɛn nə nya,
sii baraa zɛnaa lɛ nə n da,
Lawa minin sãn toa ǹ nɛ.
Peperebaa mɛn bɛ́ a nyɛɛ wa,
bɛ á re die, sii-yɛ laanka
Lawa a boo gii mɛn nə n da,
bɛn lɛ á re piɛ̃,
Lawa a kion sonbore kɛ á re
wusii a na a wɔ baa.
25Bɛ lɛ nɛ, toa n kɛ dɔ̃ n na a giala ma: boo mɛn nə n da, mà ǹ wusoo ǹ da Zeruzalɛmu kiwi lɛ dɔ, a saa bɛa boo lɛ a diɛ ganaa, a da kaa goledɛnaa kɛ a daa lɛ, Lawa pɛ mà asɛ á re diɛ, lɛ̀ sɔbaa wɔlɔ sɔbaa nɛ. Bɛ kio, lɛ̀ sɔbaa wɔlɔ pɔsɔrɔwenpaa, Zeruzalɛmu kiwi kɛ laanka a kungɔn tɔn nə n dɔ. Sɛnɛ, bɛa biikoo lɛ n die goɛ̃ kaka. 26Lɛ̀ sɔbaa wɔlɔ pɔsɔrɔwenpaa lɛ kio, Lawa min mɛn lɛ bɔ á koa, ǹ tá re bɛ dii, min kɔn ná a sii a da wa. Bɛ kio, goledɛnaa goon tá re die ka a zaman nɛ ǹ kiwi lɛ laanka Lawa a kion lɛ ziziɛ̃. Sɛnɛ, a giala-nyɔmiɛ̃ li, Lawa a foo-yoo á re bɛa goledɛnaa lɛ bii. A wo kaa zia lɛ a nya lɛ, basaã n die goɛ̃ a tan miɛ̃ ká a bɛ́ á n pɛ lɔn. 27#Dan 11.31; 12.11; Mat 24.15; Mar 13.14 Lɛ̀ sɔbaa giala-nyɔmiɛ̃ lɛ a biikoo li, goledɛnaa lɛ á re die lɛ kɔ kɔn la we min gigiã nɛ. Lɛ̀ sɔɔ ka talɛɛ gɔ́ɔ̃ nɛ, á re minin kurii wúlu-bɔ laanka Lawa gɔ màn nɛ ganaa. Bɛa basaã-kɔle lɛ á re a sii bɔbɔnɛɛn lɛn zɛnɛɛ ka baafuubaa nɛ yǎa basaã woe a din yii a giala-nyɔmiɛ̃ biikoo li, ka a bɛ́ á n pɛ lɔn.»
اکنون انتخاب شده:
Dan 9: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.