Dan 8
8
Sii-yɛ paabaa ǹ wɔ: sère gɔ̀lɔ̀ laanka butumu
1Bɛltazaara a kiibaa lɛ̀ sɔɔbaa ǹ wɔ, masɛ Danayeli sii kɔsɔ yɛ doo, bibinaa wɔ kɛ lɛ a yɛ kio. 2Narɛɛ lɛ gɔ́ɔ̃ nɛ, ma bɛ́ giɛ, bɛ̀ ma dinmaa á ke Suuzu kiwi gole kɛ nɛ, Elamu gána nɛ. Ma yii na á goã ma din ganaa Ulayi tà kɛ lɛ-a. 3Má n yii saa má ga, bɛ̀ sère gɔ̀lɔ̀ goon nə́ ke golee-n tà lɛ lɛ-a. A bɛnɛn man nə́ goã sɔsɔrɔ màn paa, goon nə́ sasa á la ǹ miã nɛ. Sɛnɛ ǹ mɛn lɛ bɛ́ sasa, bɛ lɛ din na á bɔ nyɔɔbaa. 4Má sère gɔ̀lɔ̀ lɛ yɛ zia biɛ lɛ̀nyɛɛn ganaa, gɔsɛ a lɛ̀gɔn la nɛ ka gusin a lɛ̀gɔn la nɛ. Tɔɔ kɔn goã boe la á n golee a nyɛɛn wa, la n bǎã ba min kɔn lon wa. A na á goã sii zɛnɛɛ a din dùũ li miɛ̃, màn nə́ miɛ̃ a pàã li woe.
5Ma bɛ́ a gialaa n taasɛ bɛa sii lɛ ganaa, bɛ̀ butumu goon nə́ ke á n toa lɛ̀nyɛɛn li á die. A na á goã n bibiĩ kanaa paǹ tumaa nɛ, sɛnɛ, a gòã dɔ din goã miɛ tán la wa. Bɛn sasa gegere goon na á goã bɛa butumu lɛ baãbii#8.5 Bɛa butumu kɛ lɛ n boo diɛ Alɛksandrə Gole kɛ wɔ paǹ li, á goã gána gigiã mìi la.. 6Butumu lɛ daa miɛ̃ yǎa sère gɔ̀lɔ̀ bɛn paa dɛnaa lɛ li, ma goã má ǹ mɛn yɛ golee-n lon tà lɛ lɛ-a. A na á baa si á daa a ganaa ka a pàã tumaa nɛ. 7Má yɛ á woo á dɔ sère gɔ̀lɔ̀ lɛ li, á n tele li ka a foo ne. Á sère gɔ̀lɔ̀ lɛ dɛ á ná a bɛn màn paa lɛ yiɛ, sère gɔ̀lɔ̀ lɛ boo la á golee a nyɛɛn wa. Á dɛ á da tán, á tuturu tán, min kɔn yɛ á sère gɔ̀lɔ̀ lɛ kũ á si la wa. 8Butuu lɛ pàã daa á gole kɔ taãn-taãnɛ. Sɛnɛ, pàã bɛ́ a lon ǹ mɛn waáraa taãn-taãnɛ, bɛn gole lɛ yiɛ. Bɛn sɔsɔrɔ gegere màn sii bɔ a bǎã nɛ, ǹ gogoonmaa yɔrɔ n dia-n kanaa a lɛ̀ gùrù sii kɛ gogoon la.
9Bɛn kɔsɔ bɔ bɛn boɛɛn lɛ ganaa, á daa á gole kɔ taãn-taãnɛ. Á ná a pàã yɔrɔ dia gusin a lɛ̀gɔn la, lɛ̀giala laanka gána siĩn-siĩn kɛ la#8.9 Bɛa gána siĩn-siĩn lɛ n ka Izirayeli ni.. 10#SNS 12.4 Á yoo lon mànan dɔn dinin gialaa. Á ǹ gigiã nyanaa á ǹ kaa tán, ka leeren dɔn nɛ, á tɔtɔrɔ ǹ la. 11Á n yɔrɔ da lon mànan lɛn goledɛnaa dɔ din la. Ǹ bɛ́ wúlu mànan mɛnɛn koe bɛ la babaraa, á minin kurəə bɛa kɔ ganaa. Á ná a kion sonbore kɛ ziziɛ̃ ka lenlen. 12A baraabaa taman yii, ǹ nə́ lon mànan lɛn wɔ a gɔn, ka babaraa a wúlu mànan kɛn dɔn nɛ. Tɔɔ bɛn lɛ sonbore lɛ zũ tán. A dí mɛn lɛ bɔ, bɛ́ giala yɛ a gɔn.
13Má lon a dia dí-a wole goon lɛ ma boo diɛ. Lon a dia dí-a wole kɔsɔ tɔ́n nɔ̀n da bɛ la á pɛ: «Màn mɛn bɛ́ sii-yɛn kɛn lɛn gɔ́ɔ̃ nɛ, bɛ n die n zɛnɛɛ yǎa biĩ? Babaraa a wúlu ke ǹ nə́ minin kurəə a bɔ ganaa, bɔlɔ-tii sii ke basaã koe, Lawa a bǎã sonbore ke, ka lon mànan kɛn nɛ á tɔtɔrɛ ǹ la, bɛa siin kɛn lɛn man nə ǹ gòã la yǎa biĩ?» 14Lon a dia dí-a wole bibinaa lɛ tɔ́n na a lɛ si á pɛ nɛ: «Yǎa wasamiɛ̃n laanka baayɛlɛ duu paa biɛsɔɔ (2 300). Bɛ kio, Lawa a kion lɛ a sii tɔn nə n tele.»
Sii-yɛ paabaa ǹ wɔ lɛ giala bɛ́ ka màn mɛn nɛ
15Masɛ Danayeli bɛ́ má bɛa sii kɛ lɛ ma, man má goã n taasɛ nɛ, máa ma a giala ma. Bɛa biikoo li, màn kɔn daa golee ma yɔrɔ-a ka minbuiin nɛ bɛ́ lɔn. 16#Luk 1.19,26 Má tɔ́n min lɛ ma boe Ulayi tà kɛ bii, n lɛ dii pii kɛnɛn: «Gabarayeli, sii-nyaa lɛ giala pɛ kɛ a dɛnaa kɛ nɛ!» 17Ma din goã golee-n bǎã mɛn nɛ, Gabarayeli nə́ n zɔ̃ á dɔ walan. A bɛ́ á dɔ ma li, nyɛ́ɛ ma kũ, má bɔ má mɛnaa tán ma lɛ la. Á tɔ́n pɛ ma nɛ: «Minbuiin a nɛ, toa n narɛɛ kɛ lɛ giala ma koe! N sii mɛn lɛ yɛ, a n boo diɛ biikoo giala nyɔmiɛ̃ wɔ paǹ li.»
18A bɛ́ boo diɛ ma nɛ, ma yiri nə n si ma la, má bɔ má mɛnaa ma lɛ la tán. Ma goã golee-n bǎã mɛn nɛ, á wusoo á ma kũ á ma da lon walan. 19Bɛ kio, á tɔ́n pɛ ma nɛ: «Sii mɛn bɛ́ re n zɛnɛɛ Lawa a foo-yoo kɛ taman yii, masɛ n die bɛ pii n ni. A giala, biikoo nə́ n koa giala-nyɔmiɛ̃ biikoo lɛa. 20N sère gɔ̀lɔ̀ mɛn yɛ a bɛn nə́ paa, Mɛdin kii laanka Pɛrsin kii kɛ n ka bɛ nɛ. 21Butumu ke Grɛkin kii kɛ n ka bɛ nɛ. Bɛn gole mɛn goã a baãbii, kii lɛ a bibinaa kɛ n ka bɛ nɛ.
22A bɛn lɛ bɛ́ á yiɛ, màn sii kɔsɔ na á bɔ a bǎã nɛ. Bɛn man kii màn sii lɛa, die yui ǹ kii baa bibinaa kɛ lɛ bǎã nɛ, sɛnɛ, ǹ pàã na a re doe a wɔ li wa. 23Ǹ kiibaa lɛ a nya biikoo li, min baraan baraabaa lɛ bɛ́ re piɛ̃ ǹ mɛn waáraa, kii din-koali goon tá re yui, minin bebelee ná a dí lɛa. 24Màn tá re miɛ̃ a pàã li miɛ a woo, sɛnɛ, bɛ bie re boe a din a boo sii la li wa. Á re basaã dadaran koe. A nya ǹ dí tumaa á re bǐɛ̃ koe a gɔn. Á re pàãdɛnan dii, haalɛ Lawa a minin lɛn dɔn dinin. 25A yiri lɛ bɛ́ wooro, á re boe la a min gigiã bebele. Bɛa biikoo li, á re n din gole koe. Min mɛnɛn bɛ́ taasɛ mà ǹsɛn man là nyantoro la, á re bɛn gigiã dii. Á re yui kiin Kii kɛ dɔ din gialaa. Sɛnɛ, a pàã lɛ á re ziziɛ̃, bɛ̀ min dɔ din ná a n gɔn da a ganaa wa. 26N sii mɛn yɛ wasamiɛ̃n laanka baayɛlɛ wɔ paǹ li, ka a bɛ́ á n pɛ lɔn, taãn nɛ. Sɛnɛ, bɛa sii-yɛ kɛ lɛ a boo toa n gɔ́ɔ̃ nɛ, a giala, sii lɛ a zɛnaa wɔlɔ á tɔn sɔsɔɔ bɔrɔ.»
27Bɛa biikoo li, masɛ Danayeli gù gã ma din-a, má busu kɔ lɛawaa paa. Ma bɛ́ má yoo, má wusoo má woo kii a dí nya. Bɛa sii-yɛ kɛ lɛ masɛ yiri lɔlɔkɔn parsiini. Sɛnɛ, min kɔ́n goã maa yiri lɔlɔkɔn lɛ mìi doɛ̃ wa.
اکنون انتخاب شده:
Dan 8: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.