Dan 10
10
Sii-nyaa gole giala-nyɔmiɛ̃
1Pɛrɛsin kii Siirusu a kiibaa lɛ̀ sɔɔbaa ǹ wɔ li, Danayeli mɛn bɛ́ ǹ tá bíi Bɛlsazaara, sii kɔn nə́ n nyaa bɛ nɛ. Bɛa sii lɛ n taãn lɛa#10.1 Lɛ̀ 70 n bɛa siin kɛn lɛn laanka a zii goon wɔn kɛn bii. a n boo diɛ nɔmaa dadaran#10.1 Min tɛnɛn man taasɛ mà zia nɛ. wɔ paǹ li. Danayeli nə́ n taasɛ bɛa sii lɛ ganaa, a ná a giala ma sii-nya barka nɛ.
2Bɛa waáraa kɛ lɛ nɛ, masɛ Danayeli yɔrɔ-kɔsiɛ wɔ pii zii sɔɔ lɛpiɛ̃, ka gɛ̀ na á gã ma la. 3Ma màn kɔɔ̃n kɔn bii wa, siĩ ni ka duvɛ̃ nɛ, bɛ kɔn wɔ ma lɛ-n wa, ma nyɔɔ gìĩ kɔɔ̃n dɔ lɔ ma ganaa wa, yǎa pii zii sɔɔ lɛ lɛ pã ka buri.
4Mui bibinaa a lɛawaa fuəwensiibaa ǹ wɔ pinaa, man má goã golee-n tà gole kɛ lɛ-a, ǹ nə́ bíi mà Tiigrə.
5 #
SNS 1.13-15; 2.18; 19.12 Má n yii saa má ga, bɛ̀ giĩ goon nə́ ke ka mɔnaa gole ná a ganaa. Maabɛlɛ na á goã a bɔ̃sɔ, sana yoreen yoreen lɛa. 6A gɔ̀nɔn na á goã ka kɔlɔ giɔ̀mɔ kaka-a bɛ́ lɔn, a yɔrɔ n tɛ pii ka la a tɛ-pɛ bɛ́ lɔn, a yii nànan nə́ ka tɛ buə̃ bɛ́ lɔn, a gɔnɔn laanka a gòãn nə́ tɛ pii ka zan zɔnɛɛ bɛ́ lɔn. Bɛ̀ á boo diɛ, n nə n pii mà zaman lɛ n boe. 7Masɛ Danayeli dinsɔɔ̃-n má bɛa sii kɛ lɛ yɛ. Min mɛnɛn nə goã kun ma nɛ, bɛn nə yɛ wa. Sɛnɛ, ǹ gɔ̀nɔn na á bìn da, ǹ nə́ baa si ǹ nə́ n duru. 8Ǹ nə́ ma dinsɔɔ̃ toa walan kəni, má goã giɛ bɛa sii-nyaa gole lɛ ganaa. Pàã goon din goã ma lon doo wa, ma yɔrɔ dɔ nə́ n bɔyaa á ziziɛ̃. Pàã goon din goã ma lon wa. 9Bɛa biikoo li, má giĩ lɛ a boo-diɛ lɛ ma. Ma bɛ́ má a boo-diɛ lɛ ma, má kere, má bɔ má mɛnaa tán ma lɛ la. 10Ma laan bɛ̀ man doɛ̃, bɛ̀ min goon nə́ ke, á n gɔn da ma ganaa, á ma kũ á ma da ma musin laanka ma gɔnɔn la, ma gɔ̀nɔn yii n bìn diɛ. 11Giĩ lɛ tɔ́n pɛ ma nɛ: «Danayeli, n sii á kɔɔ̃n Lawa nɛ. Ma bɛ́ boon mɛnɛn pii n ni, n doa n bɛn giala ma. Yoo n golee lon n bǎã nɛ, a giala, Lawa na á ma dia n din li biikoo kɛ gɔ́ɔ̃ nɛ.» A bɛ́ a gialaa bɛa boo lɛ pii ma nɛ, má yoo má golee lon, ma gɔ̀nɔn yii n bìn diɛ. 12Á wusoo á pɛ ma-n doo: «Danayeli, n baran nyɛ́ɛ baa wa. A giala, a saa a lɛawaa bibinaa pinaa ganaa, n nə́ n din gisĩ Lawa giulun, n giɛ li mà n boon kɛn lɛn giala ma, ǹ giala nə́ n ma. N boon kɛn lɛn man nə́ daa ka masɛ nɛ. 13#SNS 12.7 Pɛrsin kii mɛn bɛ́ Pɛrsi gána kɛ tamaɛ, bɛ́ yɔ bɔ ma ganaa yǎa lɛawaa fuəwengoon. Sɛnɛ, lon a dia dí-a wolen goledɛnaa Mikayeli daa n dɔ ma lɛ. Má nɔmaa má goã Pɛrsin kiin li. 14Sii mɛn bɛ́ re n tɔrɔn lɛn yii nyɛɛnɛ, masɛ n má daa bɛ pɛ n nɛ. A giala sii-yɛ kɔsɔ á re yii bɛa biikoo lɛ wɔ lɛa.»
15A bɛ́ a gialaa bɛa boon lɛn diɛ ma nɛ, má n mìi zuməə tán, ma boo kɔn da wa. 16Bɛ kio, bɛ̀ minbuiin nɛ a kɔnboe á ke, bɛ nə́ n gɔn da ma lɛ ganaa. Má tɔ́n nə n lɛ bũ má boo da. Min mɛn lɛ bɛ́ golee-n ma nyɛɛnɛ, má pɛ bɛ nɛ: «Maa dɛnaagiĩ, ma sii mɛn yɛ, bɛ lɛ na á nyɛ́ɛ da ma ganaa, pàã din ba ma lon doo wa. 17Maa dɛnaagiĩ, masɛ miã kooro kɛ n siɛ lɔn, ma tɔn golee n yɔrɔ-a, ma boo da? A giala, pàã ba ma lon doo wa, fɔfoã dɔ din ba ma-n wa.» 18A din bǎã-n gɔrɔ, min mɛn lɛ á ke ka minbuiin nɛ bɛ́ lɔn, bɛ́ wusoo á n gɔn da ma ganaa, á ma gù kaa.
19Á tɔ́n pɛ ma nɛ: «N baran nyɛ́ɛ baa wa, n sii á kɔɔ̃n Lawa ganaa. Là nyantoro die a giã n li! N gù we yii, n nə n foo taã! A bɛ́ a gialaa boo diɛ ma nɛ, ma gù wusoo á kaa.» Má tɔ́n pɛ: «Maa dɛnaagiĩ, boo da, a giala, n ma gù kaa.»
20-21Giĩ lɛ wusoo á pɛ ma nɛ: – Sii mɛn da ka ma nɛ n li, n tá bɛ doɛ̃ ke? Màn mɛn bɛ́ kiɛ̃-n sonbore sɛ́wɔ kɛ nɛ, man má daa bɛ pɛ n nɛ. Sɛnɛ, kii mɛn nə́ ke Pɛrsi gána kɛ tamaɛ, masɛ a zia á tɔn kɔn ka bɛ nɛ. Bɛ̀ ma soo má n woe, Grɛkin kii dɔ á re die. Min kɔn dɔ banban a tá n doe ma lɛ, á n zia biɛ bɛa zɔ́ɔn lɛn ganaa wa, yǎa lon a dia dí-a wole Mikayeli ke Izirayeli minin tamaɛ.
اکنون انتخاب شده:
Dan 10: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.