Dan 7
7
Sii-yɛ bibinaa: tɔɔ màn sii
1Baabiloniin kii Bɛltazaara a kiibaa lɛ̀ bibinaa li, Danayeli bɛ́ waa-n tán, á n narɛ, á siin kɔnɔn yɛ. Danayeli bɛa narɛɛ lɛ a boo mìi dadaran kiɛ̃, 2á pɛ: – Ma siin mɛnɛn yɛ maa narɛɛ lɛ gɔ́ɔ̃-n tèlò-n, bɛn man ka kɛn nɛ: piɛ̃ gole na á yoo kanaa a lɛ̀ gùrù sii kɛ tumaa ganaa, á n yìsi mu panapana kɛ gialaa. 3#SNS 13.1; 17.8 Tɔɔ màn gangabiɛ sii soo yìsi mu lɛ li, ǹ kɔn ná a goon ka ǹ miã-n wa. 4#SNS 13.2 A bibinaa kɛ n ka yàra bɛ́ lɔn giogialatã-a nyàan ná a lon. Ma bɛ́ giɛ, má yɛ, ǹ ná a nyàan lɛn woɛ̃ ǹ nə́ ǹ bɔ a ganaa, ǹ ná a din kũ ǹ nə́ da lon a gòã paa la, ka minbuiin nɛ bɛ́ lɔn, minbuiinin taasiɛ nə́ n kɔ la. 5Bɛ kio, bɛ̀ tɔɔ lɛ a paabaa ǹ wɔ á ke ka gòon màn gole kɔn bɛ́ lɔn. Á yoo á golee a wàã goon la, ka garasa we sɔɔ ná a lɛ-n, a sɔn nə́ ǹ ganaa. Ǹ nə́ tɔ́n pɛ nɛ, mà a yoo a golee lon duduu, a siĩ gigiã sɔ̃.
6Ma bɛ́ giɛ, bɛ̀ goon dɔ á ke ka goe bɛ́ lɔn, bàan nyàan ná a dɔ̀ɔ̃ nɛ, màn sii. Tɔɔ lɛ mìi na á goã sii, goledɛnaabaa nə́ n kɔ la. 7#SNS 12.3; 13.1 Bɛ kio doo, maa tèlò a sii-yɛn lɛn gɔ́ɔ̃ nɛ, ma bɛ́ giɛ, bɛ̀ tɔɔ lɛ a siibaa ǹ wɔ á ke. Bɛa tɔɔ lɛ na á goã nyɛ́ɛ diɛ taãn-taãnɛ, pàã ná a lon á kiɛ̃ a bǎã la. A sɔn man nə́ goã dadara, fɔlɔ lɛa. A na á goã màn soɛ̃ ka bɛn lɛn nɛ, bɛ̀ a tɔtoɛ̃, a tɔtɔrɔ a gialakun la ká a gòãn nɛ. Tɔɔn mɛnɛn tumaa goã ǹ nə́ daa a nyɛɛnɛ, a na á goã tɔtɔ ka bɛn nɛ. Bɛn fù na á goã a ganaa. 8#SNS 13.5-6 Ma bɛ́ giɛ a bɛnɛn lɛn ganaa, má yɛ bɛ̀ bɛn boɛɛn goon nə́ ke á bɔ ǹ bii, á bɛn bibinaan kɛn màn sɔɔ woɛ̃. Yii nànan man nə́ goã bɛa bɛn boɛɛn lɛ ganaa ka minbuiin nɛ yii nànan bɛ́ lɔn. Lɛ dɔ́ goã a ganaa, á goã din gole kɔ ǹ boon didiɛ nɛ.
Lawa a kiri-kurii
9 #
SNS 1.14; 20.4 Ma bɛ́ giɛ doo,
má kii dankanan yɛ
ǹ nə́ ǹ kaa tán,
giĩ zizi#7.9 Bɛa giĩ zizi kɛ lɛ n Lawa dinmaa lɛa. goon daa giã tán.
A mɔnaa na á goã
fu piepie ka koara bɛ́ lɔn.
A mìi ka na á goã
fu paɛ̃paɛ̃ ka sère ka yoreen bɛ́ lɔn.
A kii dankan kɛ na
á goã ka tɛ n kuĩ a ganaa,
a dankan lɛ gòãn man nə́ goã tɛ lɛa girigiri.
10 #
SNS 5.11; 20.12 Tɛ daa n da wɔlɔ la
ka tà mu bɛ́ lɔn,
á kũ á daa bɔ a nyɛɛnɛ.
Min gigiã na á goã dí nyɛɛ nɛ,
min duu damata na á goã
golee-n lon a nyɛɛnɛ.
Kiri-kurulin nə́ giã tán,
ǹ nə́ nya ǹ dín sɛ́wɔn lɛ bũ.
11Man má goã giɛ miɛ̃, a giala, bɛn boɛɛn lɛ na á goã din gole kɔ ǹ boon didiɛ. Sɛnɛ, ma bɛ́ giɛ, má yɛ, ǹ nə́ tɔɔ siibaa ǹ wɔ lɛ dɛ, ǹ nə́ zũ tɛ girigiri ni, á kũ walan lenlen. 12Tɔɔ lɛ a gialakunun kɛn, bɛn goledɛnaabaa nə́ n si ǹ la. Màn dɔ nə́ n da ǹ nyin a sasabaa li, bɛ̀ biikoo kɔn baa doe.
13 #
Mat 24.30; 26.64; Mar 13.26; 14.62; Luk 21.27; SNS 1.7,13; 14.14 Ma bɛ́ tɔn giɛ, ma màn mɛn yɛ maa tèlò a narɛɛ lɛ gɔ́ɔ̃-n doo, bɛ á ke:
Má min yɛ ka
min a nɛgiĩ bɛ́ lɔn,
a n lon a labaran la die.
Á daa yǎa giĩ zizi lɛ li,
ǹ nə́ kũ ǹ nə́ daa nɛ a yɔrɔ-a.
14 #
SNS 11.15
Goledɛnaabaa nə́ n kɔ la,
gugurubaa nɛ, ka kiibaa nɛ.
Tɔrɔ tumaa a minin ni,
gána tumaa wɔn nɛ,
ka bɔlɔ woo bɔlɔ a pɛlen ne,
bɛn man nə́ goã dí nyɛɛ nɛ.
A goledɛnaabaa ke,
bɛ na a tan yǎa duduu,
a re nyɛɛ wa,
a kiibaa kɛ a re ziziɛ̃ duduu wa.
Sii-yɛ bibinaa giala pɛ
15Masɛ Danayeli, ma yiri nə́ n lɔlɔkɔn, ma siin mɛnɛn yɛ, ǹ nə́ nyɛ́ɛ da ma-a. 16Min mɛnɛn lɛn nə goã golee-n walan, má tɔ́n nə n zɔ̃ má dɔ bɛn goon li, má nɔ̀n da la ka sii kɛ lɛ tumaa a giala taãn nɛ. Á n lɛ bũ, á siin lɛn giala pɛ ma nɛ kɛnɛn: 17«Tɔɔ dadaran kɛn lɛn màn sii, bɛ n nyɛɛ, mà kii màn sii á re yui tán. 18#SNS 22.5 Bɛ kio, kiibaa lɛ á re doe lon a Lawa gole a zaman ganaa, á re goɛ̃ ǹ gɔn miɛ̃ yǎa duduu.» 19Tɔɔ lɛ a siibaa ǹ wɔ ke, man má goã giɛ li, ma bɛa sii a woo ǹ bǎã yɛ foaãnɛ. Asɛ laanka gialakunun lɛn man nə́ goã tɔtɔ, á goã nyɛ́ɛ diɛ parsiini. A sɔn man nə́ goã fɔlɔ lɛa, a gòon tɔnɔn nə́ zan lɛa. A na á goã màn soɛ̃, bɛ̀ a tɔtoɛ̃, a tɔtɔrɔ a gialakun la. 20Bɛn fù ke á goã tɔɔ lɛ mìi ni, má nɔ̀n da ka bɛ dɔ a sii ni. Bɛn kɔsɔ mɛn dɔ na a giala kɔ á bɔ, á kɛn lɛn màn sɔɔ nyanaa á kaa, má nɔ̀n da la ka bɛ dɔ a sii ni. Bɛa bɛn lɛ yii nànan man nə́ goã ǹ tan, ka a lɛ nɛ, á goã din gole kɔ ǹ boon didiɛ nɛ. A n ka asɛ na á goã gole, á la ǹ miãn kɛn manɛ. 21#SNS 13.7 Ma bɛ́ giɛ, má bɛa tɔɔ bɛn lɛ yɛ zia biɛ Lawa a minin ganaa, á n die boe ǹ la. 22#SNS 20.4 Sɛnɛ, giĩ gole zizi lɛ bɛ́ á daa, á sonbore kɔ lon a Lawa gole a minin lɛn la. Biikoo bɛ́ á dɔ, Lawa a minin lɛn nə́ kiibaa lɛ si ǹ nə́ giã la.
23Ma nɔ̀n da min mɛn la, á wusoo á pɛ ma-n kɛnɛn: «Tɔɔ lɛ a siibaa ǹ wɔ kɛ n boo diɛ kiibaa siibaa ǹ wɔ paǹ li, die die kanaa, tɔtɔ ka kiibaa gialakunun kɛn tumaa nɛ. Bɛ n die kanaa tumaa wɔ̃woɛ̃ kɔn, a pɔpɔsɛ, a tɔtɔrɔ la. 24#SNS 17.12 Tɔɔ bɛn fù kɛ n nyɛɛ mà kii fù n die yui bɛa pàã lɛ gɔ́ɔ̃ nɛ. Bɛn kio, goon kɔsɔ á re yui, á n tɔtɔ ka gialakunun kɛn lɛn nɛ. Bɛ á re kii sɔɔ dii. 25#SNS 12.14; 13.5-6 Á re boo diɛ lon a Lawa gole kɛ ganaa, a bɔ a minin kɛn yii ni. Á re giɛ li dinin a dí-pɛn laanka zɔ́nɔn biikoon bɔyaa. Lawa a minin lɛn tá re goɛ̃ a gɔn yǎa lɛ̀ sɔɔ ka talɛɛ. 26Bɛ kio kəni, kiri á re n kuri, goledɛnaabaa á re n sii bɛa kii lɛ la, ǹ ziziɛ̃, a nya lenlen. 27#SNS 20.4; 22.5 Bɛa biikoo li, kiibaa mɛn tumaa á ke bǎã woo bǎã nɛ kanaa kɛ gɔ́ɔ̃ nɛ, bɛn tá re n koe lon a Lawa gole a minin lɛn la.
Ǹsɛn kiibaa lɛ na a tan
yǎa duduu,
goledɛnan tumaa á re dí nyɛɛ ǹ nɛ,
ǹ nə ǹ bɔlɔ si.»
28Boo lɛ a nya ǹ bǎã n ka kɛ nɛ. Siin lɛn nə́ masɛ Danayeli yiri lɔlɔkɔn parsiini, ma gɔ̀nɔn nə́ n si ma la. Sɛnɛ, má bɛa boon lɛn toa ma din gɔ́ɔ̃ nɛ.
اکنون انتخاب شده:
Dan 7: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.