Dan 6
6
1Dariyusu mɛn bɛ́ Mɛdi gána min lɛa, bɛ́ tɔ́n giã a bǎã-n kii lɛa, bɛ̀ a lɛ̀ pɔsɔrɔwenpaa nɛ.
Maǹ giɛ Danayeli kũ ǹ gɔn li
2Dariyusu ga a ganaa, mà á siĩni asɛ gánadɛnaa dadara paabiɛ ka fuə koa gána lɛ mìi la, màn mɛn bɛ́ toɛ, minin nə yɛ asɛ a pàã lɛ la, gána lɛ paǹ tumaa nɛ. 3Á goledɛnaa dadara sɔɔ koa ǹ mìi la, màn mɛn bɛ́ toɛ, gánadɛnaa dadaran lɛn nə ǹ dí yɔrɔ pɛ bɛn manɛ, sii kɔn dɔ baran n zɛnaa kii laadoo ziziɛ̃ ǹ sii lɛa wa. Bɛa min sɔɔ kɛ lɛ a goon nə ka Danayeli ni. 4Sɛnɛ, Danayeli sɛ la min paa kɛ lɛ laanka gánadɛnaa dadaran lɛn manɛ. A giala, yiri goã a lon á la yii ni. Bɛ lɛ nɛ, a n kii lɛ din gɔ́ɔ̃ nɛ, mà asɛ koa gána lɛ tumaa mìi la.
5Goledɛnaa dadaran lɛn laanka gánadɛnaa dadaran lɛn nə́ ga Danayeli zɛ̀rɛ baa ǹ gɔn li gána lɛ a sii yɔrɔ bɔ gɔ́ɔ̃ nɛ. Sɛnɛ, ǹ boo la ǹ nə́ sii kɔn yɛ ǹ ná a zɛ̀rɛ baa-n wa, ǹ sã kɔn yɛ wa, a giala, Danayeli na á goã bɔlɔgoondɛnaa lɛa. Min goã wɔ̀lɔ̀ yii a sii kɔn ganaa, a na a zɛ̀rɛ baa-n wa. 6Bɛa minin lɛn nə́ tɔ́n pɛ kɛnɛn: «Wɔ ba re sii kɔn yii, wɔ Danayeli kɛ lɛ zɛ̀rɛ baa-n wa. Yǎa tá bɛ̀ wɔ sii kɔn yɛ a Lawa a landa kɛ wɔ paǹ li.»
7Bɛa goledɛnaa dadaran laanka gánadɛnaa dadaran lɛn nə́ woo dɔ kii li ka baa nɛ, ǹ nə́ pɛ nɛ kɛnɛn: – Kii Dariyusu, Lawa die a n nyin toa yǎa duduu! 8Gána lɛ a goledɛnaa dadaran nɛ, a wɔrɔ sii-yɔrɔ bɔle ne, a gánadɛnaa dadaran nɛ, yiri kɔmala wolen laanka gánadɛnaa bisinin ni, ǹ tumaa kɔn yɛ, ǹ nə́ landa goon koa ka kii tɔ nɛ, ǹ nə́ kɛ pɛ ǹ nə́ laa: «A saa pelo ganaa a wo dɔ lɛawaa pɔsɔɔ, bɛ̀ min mɛn kii din toa walan, á lawa kɔsɔ hinlaa minbuiin nɛ nyankɔ, ǹ die ǹ bɛa dɛnaa kũ ǹ zũ yàran yala kɛ nɛ.» 9Sisia kəni kii, n din doamaa nɛ n bɛa landa kɛ lɛ koa n nə n gɔn bǎã da a nɛ, min ná a bɔyɛɛ wa, a ná a saa dɔ biɛ wa, a kɔnpɛ ka Mɛdi minin laanka Pɛrsi minin landa nɛ. 10A bɛ́ á n pɛ miɛ̃, kii Dariyusu nə́ n gɔn bǎã da bɛa landa sɛ́wɔ lɛ nɛ.
Danayeli kũ a zũ yàran li
11Danayeli bɛ́ á dɔ̃ mà gɔn bǎã nə́ n da bɛa landa sɛ́wɔ lɛ nɛ, á woo n dɔ a kion, sanabolo ni a fenɛtərən nə́ buĩ ni, dia-n woe Zeruzalɛmu la. A na á goã n musin doɛ tán, bɛ̀ a Lawa nyankɔ, a n loeloe gunyin sɔɔ pinin goon, ka a bɛ́ goɛ̃ bɛ̀ a zɛnaa lɔn babaraa. 12Min mɛnɛn lɛn bɛ́ kɔn ka Danayeli ni, bɛn nə́ yiɛ ǹ nə́ daa a piɛ, ǹ nə́ daa yaa Lawa nyankoe, a n gòã-kũ diɛ a ganaa. 13Ǹ nə́ wusoo ǹ nə́ woo dɔ kii li, ǹ nə́ pɛ nɛ landa lɛ wɔ paǹ li: «Kii, táa n din ni nə gɔn bǎã da landa sɛ́wɔ lɛ nɛ, ǹ mɛn lɛ á ke pii kɛnɛn: A saa pelo ganaa, a wo dɔ lɛawaa pɔsɔɔ, bɛ̀ min mɛn kii din toa walan á lawa kɔsɔ hinlaa minbuiin nɛ nyankɔ, ǹ die ǹ bɛa dɛnaa kũ ǹ zũ yàran yala kɛ nɛ. N din bie ń pɛ miɛ̃ wa?» Kii tɔ́n nə ǹ lɛ si á pɛ: «Sii lɛ n miɛ̃, a kɔnpɛ ka Mɛdi minin laanka Pɛrsi minin landa nɛ, sàabaa ná a ba la wa.» 14Bɛa minin lɛn nə́ tɔ́n pɛ kii ni kɛnɛn: «Danayeli ke ń bɔ nɛ Zudaa gána nɛ kun ka wo bɛ̀rɛbaa ǹ bǎã n wolen ne, n dinmaa lɛ a màn kɔn lɛa a yii li wa. N goã ń nə́ n gɔn bǎã da landa sɛ́wɔ mɛn dɔ nɛ, bɛ dɔ a sii lɛa a yii li wa. Á ke, a na a Lawa nyankoe gunyin sɔɔ pinin goon.»
15Kii din bɛa boon lɛn ma lɔn, a foo ziziɛ̃ parsiini. A na á goã giɛ Danayeli walan, màn mɛn bɛ́ toɛ asɛ si a da. Wasa na á woo mɛ, bɛ̀ á n tɔn nə n doɛ, mà asɛ si a da. 16Sɛnɛ, minin lɛn nə́ wusoo ǹ nə́ yiɛ ǹ nə́ woo kii li, ǹ nə́ pɛ nɛ: «Kii, táa n din tá doɛ̃ mà a kɔnpɛ ka Mɛdi minin laanka Pɛrɛsi minin landa nɛ, bɛ̀ kii din pɛ mà sii mɛn ba n zɛnɛɛ wa, bɛ̀ á landa mɛn koa, bɛ ba n bɔyɛɛ wa.» 17Kii lɛ tɔ́n zii kɔ mà ǹ Danayeli kũ, ǹ wo zũ yàran yala lɛ nɛ. Sɛnɛ, kii lɛ nə́ n lɛ bũ á pɛ Danayeli ni kɛnɛn: «N bɛ́ dí nyɛɛ n Lawa mɛn lɛ nɛ baraabaraa, bɛ lɛ á re boe a nɛ.» 18Bɛ kio, ǹ nə́ daa ka kɔlɔ gangabiɛ nɛ, ǹ nə́ kɔ yala lɛ lɛ. Kii lɛ ná a gòon ganaa ǹ kaaran laanka a kiodɛnaa dadaran wɔ bǎã da kɔlɔ lɛ ganaa, màn mɛn bɛ́ toɛ, sii kɔn baran n bɔyaa Danayeli wɔ paǹ li wa. 19Bɛ kio, kii kiɛ̃ á woo piɛ. A màn kɔ́n wɔ a lɛ-n tèlò-n wa, a nyuù naa a yii-a wa, a wo lɔ dɔ-a wa.
Danayeli a kirisibaa yàran-a
20Lɛ̀ din waa lɔn, kii yoo baayɛlɛ yiisoone, á woo yàran yala lɛ lɛ-a ka baa nɛ. 21A bɛ́ re dirii yala lɛ la, á lɛ dia Danayeli la ka koee a lɛn nə́ kokoree ne á pɛ nɛ: «Danayeli, Lawa yiikoonaa a dí-nyali! N bɛ́ dí nyɛɛ Lawa mɛn lɛ-n baraabaraa, á boo la á n si yàran lɛn la?» 22Danayeli tɔ́n pɛ kii ni: «Kii, Lawa die a n nyin toa yǎa duduu! 23Masɛ a Lawa ná a lon a dia dí-a wole dia, á daa yàran lɛn lɛ tã. Bɛ lɛ nɛ, ǹ boo la ǹ nə́ sii kɔn zɛnaa ma-n wa. A giala, Lawa lɛ zɛ̀rɛ yɛ ma ganaa wa, n din kii dɔ wɔ paǹ li, ma sii kɔn la wa.» 24Bɛa biikoo li, kii foo kɔɔ̃n kɔ parsiini, á tɔ́n pɛ mà ǹ Danayeli bɔ ǹ bɔ yala lɛ nɛ. Ǹ nə́ Danayeli bɔ ǹ nə́ bɔ yala lɛ nɛ. Ǹ màn lɛ pɔrɛɛ din yɛ a gɔ̀nɔn ganaa wa, a giala, a na á goã á n foo doa Lawa ganaa. 25Kii tɔ́n pɛ, mà min mɛnɛn lɛn nə goã ǹ nə́ Danayeli biɛ kɔ, mà ǹ bɛn kũ ǹ da ǹ nɛ. Ǹ nə́ ǹ kũ ǹ nə́ daa ǹ zũ yàran yala lɛ nɛ, ǹ lɔn laanka ǹ nɛnyaanan nɛ. Yàran lɛn nə́ ǹ kũ, ǹ nə́ ǹ pɔpɔsɛ kɔn, bɛ̀ ǹ tɔn dɔ tán yala lɛ din gɔ́ɔ̃-n wa.
26Bɛ kio kəni, kii tɔ́n sɛ́wɔ kiɛ̃ á dia kanaa paǹ tumaa nɛ, tɔrɔ tumaa a minin la, gána tumaa a minin ni, ka bɔlɔ woo bɔlɔ a pɛlen ne, á pɛ kɛnɛn: «Là nyantoro gole die a giã ka li! 27Man pii ka nɛ, máa maa gána lɛ a bǎã tumaa nɛ, min tumaa doamaa nɛ a nyɛ́ɛ baa Danayeli a Lawa kɛ-n taãn-taãnɛ.
A giala,
a din lɛ n Lawa yiikoonaa lɛa,
a din lɛ na a tan yǎa duduu.
A kiibaa kɛ a ziziɛ̃ wa,
a goledɛnaabaa
kɛ na a tan yǎa duduu.
28A din nə min boe sii ni,
a din nə min kirisibiɛ.
Sii nyaa ǹ siin laanka
kaãbaa ǹ sii dadaran kɛn,
a din nə bɛn zɛnɛɛ
lon laanka tán nɛ.
Sonbore, a din na á Danayeli si
yàran la á da.»
29Dariyusu laanka Pɛrɛsin kii Siirusu a kiibaa biikoo li, Danayeli goã dí gole lɛ la.
اکنون انتخاب شده:
Dan 6: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.