Dan 5
5
Kii a màn-bii gole zɛnaa
1Ǹ kɔn pinaa, kii Bɛltazaara màn-bii gole zɛnaa, á kɔ a kiodɛnaa dadaran la. Maǹ min duu goon. Á bɔ á mɛ duvɛ̃ la, á mi bɛa min duu goon lɛ yɔrɔ-a. 2Ǹ di Nebukadenezɔɔrɔ goã á sana laanka wɔrɔ mànan goa Lawa kion Zeruzalɛmu á daa ǹ nɛ. A bɛ́ duvɛ̃ lɛ mii, á minin dia, mà ǹ wo bɛa mànan lɛn goa, ǹ da ǹ nɛ. A na á goã giɛ li a duvɛ̃ kaa bɛn lɛn nɛ, a mi kun ka a kiodɛnaa dadaran lɛn nɛ, a gòã li ǹ lɔn nɛ, ka a lɔ kɔsɔn dɔn nɛ. 3Ǹ nə́ daa ka sana mànan lɛn nɛ, ǹ nə ǹ mɛnɛn lɛn goa Lawa kion Zeruzalɛmu. Kii laanka a kiodɛnaa dadaran nə́ duvɛ̃ kaa bɛa mànan lɛn nɛ ǹ nə́ mi, kun ka a gòã li ǹ lɔn laanka a lɔ kɔsɔn dɔn nɛ. 4Ǹ bɛ́ ǹ nə́ duvɛ̃ mi ǹ nə́ kã, ǹ dìn mɛnɛn zɛnaa ka sana nɛ, ka wɔrɔ nɛ, ka zan nɛ, ka fɔlɔ nɛ, ka gɔn nɛ, ka kɔlɔ nɛ, ǹ nə́ loe lɔ, ǹ nə́ bɛn tɔ bɔ nɛ.
5A din biikoo lɛ li ka te, minbuiin nɛ gɔn nə́ soo bii-a. A na á goã sɛ́wɔ kiɛ̃ bolon da ǹ bǎã kɛ nyɛɛnɛ, kii a kɛ gɔ̀nɔn fu kɛ ganaa. Kii bɛa gɔn lɛ yɛ sɛ́wɔ kiɛ̃. 6A din bǎã-n gɔrɔ, kii yɔrɔ ziziɛ̃, a yiri nə́ n lɔlɔkɔn. A gù yii gã a din-a, a gɔ̀nɔn nə́ bìn diɛ. 7Á tɔ́n nə n lɛ dɛ kɔsɛkɔsɛ, mà ǹ lɛ dia sii-dɔ̃lin la ǹ daa, ka kɔ́lɔnbaalin ni, doɛ̃-wɔlen laanka wɔ-kũlin ni. *Baabilonii gána a sii-dɔ̃lin lɛn bɛ́ ǹ nə́ daa, kii lɛ pɛ ǹ nɛ kɛnɛn: «Bɛ̀ min mɛn boo la á sɛ́wɔ-kiɛ̃ kɛ lɛ pɛ, a ná a giala dɔ pɛ masɛ nɛ, masɛ á re kii dɔnkɛ we a ganaa, ma sana gii da a bɔlɔ-a nyaǹ lɛa. Goledɛnaa paa mɛn bɛ́ gána lɛ a sii mìi la, bɛa dɛnaa n die goɛ̃ a sɔɔbaa ǹ wɔ lɛa.» 8Kii a sii-dɔ̃lin lɛn tumaa daa ǹ nə́ kaa kion. Sɛnɛ, ǹ kɔn boo la á sɛ́wɔ-kiɛ̃ lɛ pɛ doɛ̃ wa, ǹ kɔn na a giala yɛ á pɛ kii-n wa. 9Bɛ gɔ́ɔ̃ nɛ, kii Bɛltazaara foo biɛ na, á kiɛ̃ a bǎã la, a yɔrɔ yii ziziɛ̃. Sii lɛ ná a kiodɛnaa dadaran lɛn dɔn yiri lɔlɔkɔn.
Sɛ́wɔ-kiɛ̃ lɛ bɛ́ màn mɛn giala pii
10Kii lɛ a yɛ ǹ dan bɛ́ kii laanka a kiodɛnaa dadaran da ǹ boon lɛn miɛ, á kiɛ̃ á dɔ ǹ li màn bii ǹ bǎã lɛ nɛ, á n lɛ da ǹ boo lɛ nɛ á pɛ kɛnɛn: «Lawa kii nyin toa yǎa duduu! N nyan toa n nə yiri lɔlɔkɔn, n yɔrɔ ziziɛ̃ kɛnɛn wa. 11Giĩ goon tá n gána lɛ nɛ, lawa sonboren kɛn yiri tá a lon. N di a kiibaa biikoo li, ǹ nə́ dɔ̃ mà bɛa giĩ lɛ yii á buĩ ni, á sii giala miɛ, sii-doɛ̃ tá a lon ka lawan kɛn wɔ bɛ́ lɔn. Bɛ lɛ na á toa ǹ di Nebukadenezɔɔrɔ koa nyɛɛnaandɛnaa lɛa kɔ́lɔnbaali ni, wɔ-kũlin ni, doɛ̃-wɔlen mii la ka bòon ne. 12A giala, ǹ nə́ yɛ mà yiri tá bɛa Danayeli lɛ lon á la yii ni. Màn-doɛ̃ laanka sii giala ma tá a lon, á boe la a narɛɛn giala pɛ, a sii-duriin nyaa, a sii kakan yɔrɔ bɔ. Bɛa Danayeli kɛ lɛ, kii Bɛlsazaarabaa wɔ a ganaa, ka bɛ lɛ bíi a da sisia. Sɛ́wɔ-kiɛ̃ lɛ bɛ́ sii mɛn giala pii, á re bɛ nyɛɛ ka nɛ.»
13A din bǎã-n gɔrɔ, ǹ nə́ Danayeli kũ, ǹ nə́ woo ne kii li. Kii lɛ tɔ́n nɔ̀n da la: «N din lɛ tɔ n Danayeli, kun ka Zudaa gána minin kɛn nɛn nə́ ǹ goa, maa díi kii lɛ bɔ ǹ nɛ Zudaa gána nɛ? 14Má ma n wɔ paǹ li, máa lawan kɛn yiri tá n lon, n yii á bui ni, n ta sii giala miɛ, sii-doɛ̃ nə n lon taãn-taãnɛ. 15Á ke, ǹ nə́ ke ǹ nə́ daa ka sii-dɔ̃lin laanka wɔ-kũlin ni masɛ li sisia, màn mɛn bɛ́ toɛ, ǹ sɛ́wɔ-kiɛ̃ kɛ pɛ, ǹ na a giala dɔ pɛ ma nɛ. Sɛnɛ, á ke, ǹ boo la wa. 16Má ma, mà n tá boe la n sii-duriin giala pɛ, n sii kakan yɔrɔ bɔ. Bɛ lɛ nɛ, bɛ̀ ń boo la ń sɛ́wɔ-kiɛ̃ kɛ pɛ, ń ná a giala dɔ pɛ masɛ nɛ, kii dɔnkɛ á re n we n ganaa, sana nə n da n bɔlɔ-a nyaǹ lɛa. Goledɛnaa paa mɛn bɛ́ gána lɛ a sii mìi la, n tá re bɛn sɔɔbaa ǹ wɔ biɛ.»
17Danayeli tɔ́n pɛ kii ni kɛnɛn: «N bɛ́ li n masɛ gɔ ka mànan mɛnɛn nɛ, n din nɔmɔ ǹ ganaa. N bɛ́ li n ma guguru kɔ ka mànan mɛnɛn nɛ, ǹ kɔ min kɔsɔn la. Sɛnɛ, masɛ á re sɛ́wɔ-kiɛ̃ lɛ pii, ma a giala dɔ pɛ n nɛ. 18Kii, Lawa mɛn bɛ́ lon sɔsɔɔ, á goã á kiibaa kɔ ǹ di Nebukadenezɔɔrɔ la, golebaa nɛ, ka gugurubaa laanka zín ni. 19A golebaa mɛn lɛ kɔ la, bɛ lɛ na á toa, tɔrɔn tumaa laanka gánan tumaa a minin gɔ̀nɔn nə́ goã bìn diɛ a nyɛɛnɛ, ka bɔlɔ tumaa a pɛlen ne. Bɛ̀ a tá li a min mɛn dɛ, a n bɛ dii, bɛ̀ a tá li a min mɛn yii toa koo, a n bɛ yii toɛ koo. Bɛ̀ a tá li a min mɛn saa lon, a n bɛ siɛ lon, bɛ̀ a tá li a min mɛn gisĩ, a n bɛ gisĩ. 20Sɛnɛ, n di lɛ bɛ́ á piɛ̃ dɔ a din ni, á n too kaka kɔ yǎa á woo kaa din-koa lɛ, ǹ nə́ bɔ ǹ nə́ bɔ a kiibaa la, ǹ ná a gugurubaa kɛ si la. 21Ǹ nə́ loo ǹ nə́ bɔ minbuiinin bii. A taasiɛ nə́ n bɔyaa á n baa ka tɔɔn wɔ bɛ́ lɔn. A na á goã kun ka don dundunun ni, buu soɛ̃ ka dii wɔ bɛ́ lɔn, pele goã piɛ̃ a ganaa. A na á goã bɛ lɛ gɔ́ɔ̃-n miɛ̃, yǎa a bɛ́ á dɔ̃ ǹ mɛn pinaa, mà lon a Lawa n minbuiinin kiibaa mìi la, mà a bɛ́ li a kɔ min mɛn la, mà a n koe bɛa dɛnaa la.
22Nsɛ Bɛltazaara mɛn dɔ bɛ́ a nɛgiĩ lɛa, a laanɛ n tá bɛa siin kɛn lɛn tumaa doɛ̃, n dɔ din gisĩ ǹ sii zɛnaa wa. 23N nə́ n gòãn dii lon a Lawa ganaa: A giala, ń minin dia ǹ nə́ woo Lawa a kion mànan goa ǹ nə́ daa ǹ kɔ n la, n din laanka n kiodɛnaa dadaran nə́ duvɛ̃ kaa ǹ nɛ ka mi, kun ka ka gòã li ǹ lɔn laanka kaa lɔ kɔsɔn nɛ. Ka bɛ dɔ nɛ, dìn mɛnɛn nə́ ke ǹ nə́ ǹ zɛnaa ka wɔrɔ nɛ, ka sana nɛ, ka zan nɛ, ka fɔlɔ nɛ, ka gɔn nɛ, ka kɔlɔ nɛ, ǹ yii ná a wɔlɔ yii wa, ǹ too ná a boo miɛ wa, ǹ nə ǹ ba màn kɔn doɛ̃ wa, ń loe lɔ, ń bɛn tɔ bɔ nɛ. Sɛnɛ, Lawa mɛn lɛ á ke n fɔfoã ná a gɔn, n sii tumaa ná a gɔn, n nə́ n piã n bɛ guguru kɔ wa. 24Bɛ lɛ na á toa, Lawa gɔn kɛ lɛ dia, á daa sɛ́wɔ kɛ lɛ kiɛ̃.
25Sɛ́wɔ mɛn nə n kiɛ̃, bɛ n ka kɛ nɛ: "Məne, Məne, Tekɛli, Uparsini". 26A bɛ́ màn mɛn giala pii, bɛ á ke: Məne, bɛ giala mà "Nimii": Bɛ n nyɛɛ mà Lawa nə́ n kiibaa lɛ a lɛawaan nimi, á dan koa la. 27Tekɛli, bɛ giala mà "Zɔɔ̃": Bɛ n nyɛɛ mà Lawa nə́ n zɔɔ̃, á woo yaa gugurubaa ba n nɛ doo wa. 28Uparsini, bɛ giala mà "Gii": Bɛ n nyɛɛ mà Lawa nə́ n kiibaa lɛ gii Mɛdi minin laanka Pɛrsi minin bii.»
29A din bǎã-n gɔrɔ, Bɛltazaara pɛ mà ǹ kii dɔnkɛ wɔ Danayeli ganaa, ǹ sana da a bɔlɔ-a nyaǹ lɛa. Á pɛ mà ǹ lɛ dia ǹ pɛ minin manɛ, mà goledɛnaa paa mɛn bɛ́ gána lɛ a sii mìi la, mà Danayeli nə ǹ sɔɔbaa ǹ wɔ lɛa. 30Sɛnɛ, a din tèlò lɛ nɛ, ǹ nə́ Baabilonii gána a kii Bɛltazaara dɛ.
اکنون انتخاب شده:
Dan 5: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.