Dan 2
2
Nebukadenezɔɔrɔ a narɛɛ bibinaa
1Nebukadenezɔɔrɔ a kiibaa lɛ̀ paabaa ǹ wɔ li, á narɛɛn kɔnɔn wɔ, bɛa narɛɛn lɛn ná a yiri lɔlɔkɔn parsiini, a goã boe la á nyuù naɛ a yii-a wa. 2Kii lɛ tɔ́n pɛ mà ǹ lɛ dia kɔ́lɔnbaalin laanka wɔ-kũlin la, bòon laanka doɛ̃-wɔlen ne, màn mɛn bɛ́ toɛ ǹ na asɛ a narɛɛn lɛn pɛ asɛ nɛ. Ǹ nə́ daa, ǹ nə́ golee kii yɔrɔ-a. 3Kii lɛ tɔ́n pɛ ǹ nɛ: «Man má narɛɛ kɔn wɔ, narɛɛ lɛ ma yiri lɔlɔkɔn parsiini. Man giɛ li ma bɛa narɛɛ lɛ dɔ̃.» 4Doɛ̃-wɔlen lɛn nə́ tɔ́n pɛ kii ni ka Aramu bɔlɔ nɛ: «Lawa kii nyin toa yǎa duduu. N narɛɛ lɛ pɛ wɔsɛn manɛ, wɔ á re a binyəə koe n la.» 5Kii doɛ̃-wɔlen lɛn lɛ si á pɛ ǹ nɛ: «Ma parsii boo á ke: Bɛ̀ ka narɛɛ lɛ laanka a binyəə pɛ ma-n wa, man ka kakaɛ̃, ma kaa kionən bɔyaa ma ǹ baa ton ton bɔlɔ lɛa. 6Sɛnɛ, bɛ̀ ka narɛɛ lɛ laanka a binyəə pɛ, ma á re bǐɛ̃ biɛ ka la ka mànan nɛ, ma gugurubaa gole kɔ ka la. Ka narɛɛ lɛ laanka a binyəə pɛ ma-n kəni.»
7A paabaa ǹ wɔ doo, ǹ nə́ wusoo ǹ nə́ kii lɛ si ǹ nə́ pɛ: «Kii, n narɛɛ lɛ pɛ wɔsɛn manɛ, wɔ á re a binyəə koe.» 8Kii lɛ tɔ́n pɛ: «Nɔ̀n-diɛ din ba a-n wa, maa á doɛ̃, má kan n ka lɔlɔɔ, ń giɛ biikoo á kiɛ̃. A giala, ka dɔ̃ mà masɛ parsii boo n ka kɛ lɛ nɛ, má da ka nɛ. 9Bɛ̀ ka narɛɛ lɛ pɛ ma-n wa, dɔlɔ goon nə die n boe ka dinin tumaa ganaa. Ka n ká ga soɛ li kun, ka n die boe masɛ nɛ, masɛ bebele ne, bɛ̀ sii lɛ baa n bɔyɛɛ. Bɛ boo bie wa! Ka narɛɛ lɛ pɛ masɛ nɛ, ma á re doɛ̃ ka bɛ nɛ, má ka á re boe la ka a binyəə dɔ pɛ masɛ nɛ.» 10Doɛ̃-wɔlen lɛn nə́ tɔ́n kii lɛ si, ǹ nə́ pɛ a yii ni: «Min kɔn din banban kanaa kɛ nɛ, a boo la a kii a sii kɛ lɛ pɛ-n wa. Kii kɔn dɔ bin sii kɛ miã da kɔ́lɔnbaali hinlaa wɔ-kũli, hinlaa doɛ̃-wɔle kɔn mìi-n duduu wa. Haalɛ ta kii lɛ din nə gole lɔn, pàã ná a lon. 11Kii bɛ́ nɔ̀n diɛ ka sii mɛn nɛ, á kaka á la yii ni. Bɛa dɛnaa din banban, a boo la a kɛ pɛ kii-n wa, bɛ̀ á n bɔ lawan kɛn nɛ, ǹsɛn mɛnɛn bɛ́ ǹ ba giã-n minbuiinin bii wa.» 12Bɛa boo lɛ tumaa na á kii foo yoo, á busu a ganaa parsiini. Bɛ lɛ nɛ, á tɔ́n pɛ, mà ǹ *Baabilonii a doɛ̃-wɔlen lɛn tumaa dɛ. 13Bɛa dɔlɔ lɛ a boo soo. A na á goã, bɛ̀ maǹ die doɛ̃-wɔlen lɛn dii. Bɛ lɛ nɛ, ǹ nə́ goã giɛ Danayeli dɔ laanka ǹ miãn lɛn li, màn mɛn bɛ́ toɛ, ǹ nə ǹ dɛ.
Lawa kii a narɛɛ nyaa Danayeli ni
14Kii lɛ a minin-lɛduə̃lin goledɛnaa Ariɔki soo kəni, mà a n woe Baabilonii a doɛ̃-wɔlen lɛn dii. Danayeli tɔ́n boo da nɛ ka yiri ni, bɛ̀ á n yiri dɔ boe a din li. 15Á nɔ̀n da kii a minin-lɛduə̃lin goledɛnaa lɛ la kɛnɛn: «Wàa na á baa, kii á dɔlɔ babaraa kɛ miã diɛ minin mìi ni?» Ariɔki tɔ́n sii lɛ yɔrɔ pɛ Danayeli ni. 16Danayeli dɔ a kiɛ̃-n bɛ-n gɔrɔ, á wɔ kii li á ná a nyankɔ, mà a na asɛ duə᷉, mà asɛ á re narɛɛ lɛ a binyəə koe la.
17Danayeli bɛ́ á soo walan á dɔ piɛ, á sii lɛ laakalaa a tá-kun wolen lɛn manɛ: Anania nɛ, Mikayeli ni ka Azaria nɛ. 18Á pɛ ǹ nɛ: «Ka gòã-kũ da lon a Lawa ganaa sii-durii kɛ lɛ a lɛa, màn mɛn bɛ́ toɛ, ǹ baran masɛ Danayeli laanka maa tá-kun wolen lɛn dɛ kun ka Baabilonii a doɛ̃-wɔle gialakunun kɛn nɛ wa.» 19Lawa tɔ́n sii-durii lɛ nyaa Danayeli-n tèlò-n. Bɛ kio, Danayeli barka da lon a Lawa nɛ, 20á pɛ kɛnɛn:
Barka á Lawa ganaa yǎa duduu!
A giala, sii-doɛ̃ laanka
pàã na a din wɔ lɛa.
21A din nə biikoon
laanka siin koɛ kɔn la,
A din nə kii koɛ,
a din nə kii boe a bɔ kiibaa nɛ.
A din nə sii-doɛ̃ koe
sii doɛ̃-wɔlen la,
a din nə yiri koe
sii giala malin la.
22Siin mɛnɛn bɛ́ zuzulu,
yii bɛ́ a doe siin mɛnɛn gɔ́ɔ̃-n wa,
a din nə bɛn nyɛɛ.
Sii mɛn bɛ́ wɔlɔ tì li, a tá doɛ̃,
a din li, wɔlɔ fúlu na a tan.
23Ma digolon Lawa,
man barka diɛ n din ni,
ma n tɔ bɔ,
a giala, ń sii-doɛ̃ laanka
pàã kɔ ma la!
Wɔ nɔ̀n da n la ka sii mɛn nɛ,
ń bɛ nyaa ma nɛ,
ń kii a sii lɛ nyaa wɔ nɛ.
24Bɛ lɛ gɔ́ɔ̃ nɛ, Danayeli woo n dɔ Ariɔki li, kii lɛ min mɛn lɛ koa, mà a Baabilonii a doɛ̃-wɔlen lɛn dɛ. A bɛ́ á dɔ gɔrɔ, á pɛ nɛ: «N baran Baabilonii a doɛ̃-wɔlen lɛn dɛ wa. Wo masɛ koa kii li, má a re a narɛɛ lɛ a binyəə pii ni.» 25Ariɔki nə́ n nanaa, á woo Danayeli koa kii li, á pɛ nɛ: «Dɛnaagiĩ, ǹ Zudaa tɔrɔn mɛnɛn goa ǹ nə́ daa ǹ nɛ, masɛ giĩ goon yɛ ǹ bii, bɛ á re n narɛɛ lɛ a binyəə piin ni.»
Danayeli n narɛɛ lɛ a binyəə pii
26Danayeli lɛ, ǹ nə́ bii Bɛlsazaara, kii lɛ nɔ̀n da bɛ la kɛnɛn: «Masɛ narɛɛ mɛn wɔ, n tá boe la n bɛ pɛ ma nɛ, n na a binyəə dɔ pɛ ma nɛ sonbore?» 27Danayeli tɔ́n kii lɛ si á pɛ kɛnɛn: «Kii, n bɛ́ nɔ̀n diɛ ka sii-durii mɛn nɛ, sii-dɔ̃lin ni, bòon ne, wɔ-kũlin ni ka doɛ̃-wɔlen ne, ǹ kɔn ba boe la a kɛ yɛ apɛ n nɛ wa. 28Sɛnɛ, Lawa goon tá lon, á n sii-duriin nyɛɛ. Sii mɛn bɛ́ nyɛɛn die, bɛa Lawa lɛ na á saalɛlɛ á bɛ nyaa n nɛ. N bɛ́ waa-n tán, n narɛɛ mɛn lɛ wɔ, ń siin mɛnɛn yɛ, bɛn man ka kɛn nɛ: 29Kii, n bɛ́ ń goã waa-n tán n piì la, n nə́ ń goã n taasɛ ka nyɛɛn sii ni. Sii mɛn bɛ́ re n zɛnɛɛ, sii duriin nyaali lɛ na á bɛ nyaa n nɛ. 30Masɛ din ke, a bie ka sii-doɛ̃ n ma lon á la minbuiin kɛ tumaa wɔ nɛ, sii-durii kɛ lɛ tɔn nə n nyaa ma-n wa. Sɛnɛ, kɛ na á n zɛnaa, màn mɛn bɛ́ toɛ, n nə n narɛɛ lɛ a binyəə dɔ̃, sii mɛn lɛ bɛ́ gɔ́ɔ̃-bii diɛ n ganaa, n boo la n bɛ dɔ dɔ̃.
31Kii, n màn mɛn yɛ n narɛɛ lɛ gɔ́ɔ̃ nɛ, bɛ n ka kɛ nɛ: Màn nyín gangabiɛ nɛ, á goã n nyɛɛnɛ, gole a tɔ-a. A na á goã tɛ pii kiɛ yii ni, a yɛ n nyɛ́ɛ diɛ. 32Bɛa màn nyín lɛ mìi na á goã sana sonbore lɛa, a tìãbii laanka a gɔnɔn man nə́ goã wɔrɔ lɛa, a nɔ̀ laanka a gisin man nə́ goã zan lɛa, 33a keren man nə́ goã fɔlɔ lɛa, a gòãn kɛn, bɛn man nə́ goã fɔlɔ laanka gì-tiɛ̃ lɔlɔkɔn lɛa. 34N nə ń goã giɛ bɛa màn nyín lɛ ganaa miɛ̃, yǎa kɔlɔ goon na lon a din li á daa kũ. Màn nyín lɛ gòãn kɛn lɛn fɔlɔ laanka gì-tiɛ̃ lɛa, kɔlɔ lɛ daa bɛn dɛ, á ǹ yɔyɔrɛ. 35A din bǎã nɛ, fɔlɔ lɛ nɛ, gì-tiɛ̃ lɛ nɛ, zan lɛ nɛ, wɔrɔ lɛ laanka sana lɛ nɛ, ǹ tumaa yɔyɔrɛ kun, ǹ nə́ n baa ka wii kaã bɛ́ lɔn a duwəə biikoo li. Piɛ̃ nə́ ǹ goa á kiɛ̃ ǹ nɛ, min nə ǹ basa yɛ doo wa. Kɔlɔ lɛ sɛ, ǹ mɛn lɛ bɛ́ á màn nyín lɛ dɛ, bɛ́ kele gole baa, á kanaa gɔ́ɔ̃ tumaa pã.
36Narɛɛ lɛ n ka bɛ nɛ, wɔsɛn man die a giala pii n ni sisia. 37Kii, n din nə kiin kii lɛa. Lon a Lawa na á kiibaa kɔ n la, boo sii la nɛ, pàã nɛ, ka gugurubaa nɛ. 38Lawa lɛ minbuiinin wɔ n gɔn, don mànan nɛ ka bàanan nɛ. Haalɛ ta maǹ bǎã woo bǎã, Lawa na á n koa ǹ tumaa mìi la. Màn nyín lɛ mìi kɛ lɛ sana lɛa, n din kii ni. 39Kii kɔsɔ á re yui n kio, a pàã n kiɛɛrɛ n wɔ lɛ ganaa. Kii lɛ a sɔɔbaa ǹ wɔ á re yui, bɛ n die goɛ̃ kanaa tumaa mìi la. A sii a kɔnboe n ka zan kɛ nɛ. 40Kii lɛ a siibaa ǹ wɔ á re yui bɛ kio, kaka ka fɔlɔ bɛ́ lɔn. Fɔlɔ bɛ́ màn tumaa yui lɔn bɛ̀ a yɔyɔrɛ, a pɔpɔsɛ, a n die kɛn lɛn tumaa yui miɛ̃, a ǹ pɔpɔsɛ. 41N bɛ́ ń ná a gòãn laanka a tán a gòonən lɛn yɛ gì laanka fɔlɔ lɛa, bɛ n nyɛɛ, mà bɛa kiibaa lɛ á re n talɛɛ. Kakabaa mɛn bɛ́ fɔlɔ nɛ, bɛ á re yii a nɛ, ka a bɛ́ ke á fɔlɔ lɛ yɛ lɔloɛ-n kɔn ka gì lɛ-n lɔn. 42Sɛnɛ, a tán a gòonən lɛn, ǹ nə́ fɔlɔ lɔlɔkɔn ka gì ni ǹ nə́ zɛnaa nɛ, bɛ n nyɛɛ mà kiibaa lɛ a paǹ goon tá re goɛ̃ kaka, a paǹ goon tá re goɛ̃ kəkəĩ. 43Fɔlɔ laanka gì lɔlɔkɔn lɛ ń yɛ, bɛ n nyɛɛ dɔn, mà kiin tá re ǹ wɔ kiɛ kun kɔn-wɔ gɔ́ɔ̃ nɛ, sɛnɛ, ǹ tá-kun lɛ a re woe wa. A n die goɛ̃ ka fɔlɔ laanka gì lɔlɔkɔn bɛ́ lɔn, ǹ ba kɔn kuĩ wa. 44Bɛa kiin kɛn lɛn wasa nɛ, lon a Lawa á re kiibaa lɛ kɔn koɛ, bɛ ná a re ziziɛ̃ duduu wa. Bɛa kiibaa lɛ dɔ á re n sii a n kɔ tɔrɔ kɔsɔ la wa. Bɛ lɛ n die kiibaa gialakun kɛ tumaa yɔyɔrɛ, a ǹ ziziɛ̃ lenlen, sɛnɛ, a din nə die goɛ̃ yàa duduu. 45Kɔlɔ lɛ, á bɔ kele lɛ la a din li á daa fɔlɔ lɛ yɔyɔrɛ, zan lɛ nɛ, gì-tiɛ̃ lɛ nɛ, wɔrɔ lɛ laanka sana lɛ nɛ, bɛ n bɛ giala pii. Kii, sii mɛn bɛ́ re n zɛnɛɛ kɛ kio, Lawa gole na á bɛ nyaa n nɛ. N narɛɛ mɛn wɔ, a din taãn lɛ n ke. A binyəə lɛ dɔ, sàabaa ba la wa.»
46Bɛ kio, kii Nebukadenezɔɔrɔ na, á kaa tán a lɛ la, á Danayeli guguru kɔ. Á pɛ mà ǹ gɔn mànan kɔ la, ǹ nyɔɔgìĩ kɔɔ̃n tã a wɔ lɛa. 47Á tɔ́n boo da Danayeli ni á pɛ nɛ: – N bɛ́ n boo la n sii-durii kɛ nyaa masɛ nɛ, taãnɛ sonbore! Kaa Lawa lɛ n lawan Lawa lɛa, kiin Dɛnaa lɛa, sii duriin nyaali lɛa. 48Bɛ kio, kii lɛ golebaa kɔ Danayeli la, á gɔ ka màn sonbore gigiã nɛ. Á koa Baabilonii bǎã tumaa a gánadɛnaa lɛa, á koa doɛ̃-wɔlen kɛn tumaa dɔ a nyɛɛnaandɛnaa gole lɛa. 49A kɔnpɛ ka Danayeli a nyankɔ nɛ, kii lɛ Sadraki saa, Mesaki laanka Abɛdi-Negoo ne, á ǹ kaa Baabilonii gána lɛ a dí lɛn la. Danayeli dinmaa na á goã dí nyɛɛ kii a sumu-n.
اکنون انتخاب شده:
Dan 2: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.