Yele-za-pɛr-tib 38
38
A Zuda nɩ a Tamaar yele
1A lɛn daar, a Zuda tɩ yi n a ʋ yɛbr zie cen Adulam tẽw, nɩr kãw na dɩ Hira a zie. 2A be a, ʋ tɩ nyɛ̃ nɩ Kanãa tẽw nɩr kãw bɛ na bʋɔlɛ Suwa a, pɔwyaa. Ʋ tɩ de ʋ na ʋ ɩ a ʋ pɔw, ʋ páw ʋ, 3a pɔw tɛr pʋɔ dɔw dɛble, a Zuda por ʋ Ɛɛr. 4A pɔw lɛb tɩ tɛr'ɩ pʋɔ dɔw dɛble por ʋ Onan. 5Al pùorí, ʋ lɛb maal dɔw dɛble por ʋ Sela. Kezivʋ n'a a Zuda tɩ be a lɛn daar a pɔw na dɔw a.
6A Zuda tɩ de nɩ pɔw kʋ̀ a ʋ bidɛb-dãw Ɛɛr, a pɔw dɩ kɛ́ Tamaar#38:6 Nyɛ̃ Mat 1.3.. 7A Ɛɛr tɩ ɩ na a bɛ pɛlɩ a Sore pʋɔ ɩ, ʋ ɩ ʋ kpi. 8Lɛ n'a a Zuda tɩ yel a Onan: «Bɩɛrɩ a fʋ yɛb pɔw, dɔw nɩ bibiir kʋ̀ a fʋ yɛb#38:8 Dɔw bibiir kʋ̀ a fʋ yɛb: A nʋɔr ŋa na ƴãw a Nɛ́ɛ sɛbɛ pʋɔ a n'ʋ a Zuda bɔbr k'aa Onan tu: nɩr bɛ wa dɔw ɛ́ kpi a, a fɛr'a k'aa ʋ yɛb bɩɛrɩ a pɔw-kʋɔr dɔw nɩ bibiir kʋ̀ ʋ, a ʋ yúor ta bɔr ɛ. Nyɛ̃ Wl-ayi 25.5-6..» 9Ɛcɛ a Onan tɩ bãwnɩ a na ʋ na kʋ̃ so a bibiir a. Lɛ so ʋlɛ mɩ́ wa gã nɩ a ʋ yɛb pɔw a, ʋ mɩ́ ɩ na a ʋ yɔ-kʋ̃ɔ cir tẽw, k'ʋʋ ta dɔw bie kʋ̀ a ʋ yɛb ɛ. 10A Onan ɩb ŋa bɛ tɩ pɛlɩ a Sore pʋɔ ɩ, ʋ ɩ ʋ mɩ̀ kpi. 11Lɛ n'a a Zuda tɩ yel a ʋ bie-pɔw Tamaar: «Fʋ na faa ɩ pɔw-kʋɔr a, kul tɩ kpɩɛr a fʋ sãà yir#38:11 Kul tɩ kpɩɛr a fʋ sãà-yir: A nʋɔr ŋa n'ʋ tɩ ƴãw a pɔw-kɔbɛ na bɛ tɛr bibiir a ƴãw. Nyɛ̃ Uru 1.11-13., ɛ́ gù a ɩ̃ bidɛb Sela wa ɩ kpɛ̃ɛ baarɩ.» Bʋ̃ʋ n'ʋ vɛ̃, ʋ tɩ tɩ́ɛr'ɩ ʋ pʋɔ: «A Sela mɩ̀ ta kpi mɛ̃ a ʋ yɛbr a ɩ.» A lɛ n'a a Tamaar tɩ kul tɩ kpɩɛr a ʋ sãà yir.
12A tɩ cɛlɩ na ɛ́ a Suwa pɔwyaa na ɩ a Zuda pɔw a wa kpi. A ko-maal na wa baar'a, a Zuda ìr'a cen Tɩmɩna, ʋlɛ nɩ a ʋ bá Hira na yi a Adulam a, k'ʋʋ tɩ nyɛ̃ a nɩbɛ na ŋmarɛ a ʋ píir kɔblʋ a. 13Nɩr kãw tɩ yel'ɩ a Tamaar: «A fʋ sɩr-sãà cere nɩ Tɩmɩna k'ʋʋ tɩ ŋma a ʋ píir kɔblʋ.» 14A Tamaar tɩ yaa nɩ a ʋ pɔw-kʋɔr kparɩ bɛr, ɛ́ de pɛn páw nɩ a ʋ niwn kɛ́ bɛ ta bãw ʋ ɛ. Ʋ tɩ cen na tɩ zɩ̃ Enayim tẽw na be a Tɩmɩna sɔ́r zu a dɩ̃dɔr nʋɔr. Bʋ̃ʋ n'ʋ vɛ̃, ʋ tɩ nyɛ̃ na k'aa Sela ɩ n kpɛ̃ɛ baarɩ, ɛ́ bɛ bɛ de ʋ kʋ̀ ʋ ʋ kul ɛ. 15A Zuda tɩ nyɛ̃ nɩ a Tamaar bʋɔlɛ pɔw-yɛm, ʋ na tɩ pàw a ʋ niwn a ƴãw. 16Ʋ tɩ bɩɛ na cen a ʋ zie, a sɔ́r nʋɔr, tɩ yel ʋ: «Alɛ, sàw ɩ̃ gã nɩ fʋ!» A Tamaar sɔw: «Bʋ̃ʋ n'ʋ fʋ na kʋ̀ m a al ƴãw?» 17Ʋ sɔw: «Ɩ̃ na nyɔw nɩ bʋle a ɩ̃ dʋn pʋɔ tɩr bɛ wa kʋ̀ b.» A Tamaar lɛb yel: «A vɩɛl'a, ɛcɛ kʋ̀ m bʋ̃-kãw sɛr ɩ̃ gùre nɩ.» 18Ʋ sowr'ʋ: «Bʋ̃ʋ n'ʋ ɩ̃ na kʋ̀ b sɛr?» A Tamaar yel: «Kʋ̀ m a fʋ ŋmaarʋ-bʋ̃-ƴãwna nɩ a ʋ miwr, nɩ a dabɔl fʋ na tɛr a nũú a.» Ʋ tɩ de a kʋ̀ ʋ, ɛ́ gã nɩ ʋ, ʋ tɛr a ʋ pʋɔ. 19A Tamaar tɩ ìr'a lɛb kul a ʋ yir, tɩ ír a pɛn bɛr, ɛ́ lɛb de a ʋ pɔw-kʋɔr kparɩ.
20A Zuda tɩ ƴãw na a ʋ bá na yi a Adulam a, ʋ cen nɩ a bʋle k'ʋʋ tɩ kʋ̀ a pɔw, ɛ́ de a bome a pɔw na de bin a. Ɛcɛ a ʋ bá bɛ tɩ nyɛ̃ a pɔw ɛ, 21ɛ́ sowri a tẽw dem: «A pɔw-yɛm na tɩ be a Enayim sɔ́r nʋɔr a wa?» Bɛ tɩ sɔw na: «Pɔw-yɛm bɛ dãw be a ka towtow ɛ.» 22A Zuda bá tɩ lɛb'a wa wa yel ʋ: «Ɩ̃ bɛ nyɛ̃ ʋ ɛ, ɛ́ a tẽw dem yel kɛ́ pɔw-yɛm bɛ dãw be a be mɩ̀ ɛ.» 23A Zuda lɛb yel: «Alɛ wa ɩ lɛ a, ʋ tɛr a bome ʋ na de a. Tɩ ta ɩrɛ wa ƴãw tɩ tʋɔra vĩ ɛ. Mãa tɩr'ɩ a bʋle, ɛ́ fʋ bɛ tɩ nyɛ̃ ʋ ɛ!»
24A tɩ maal'ɩ cuwr ata, ɛ́ bɛ wa yel a Zuda: «A fʋ bie-pɔw Tamaar tõ n pɔw-yɛm tome. Mɔ̃ mɩ̀, ʋlɛ n'ɩ ŋan tɛr pʋɔ a ʋ pɔw-yɛm tome pʋɔ.» A Zuda yel: «Bɛ nyɔw ʋ yi n tɩ ƴãw ʋ dɩ vũu a mimir!»
25Bɛ na tɩ tɛr ʋ yire nɩ a, a Tamaar tɩ tõ na bɛ tɩ yel a ʋ sɩr-sãà: «Jɩ́r a bome á ŋá kaa. A nɩr ʋl na so a ŋmaarʋ-bʋ̃-ƴãwna ŋa nɩ a miwr ŋa, nɩ a dabɔl ŋa a, ʋlɛ n'ʋ ƴãw mɛ̃ a pʋɔ. Ƴãw fãw bãw ãa n'ɩ a nɩr ŋa.» 26A Zuda tɩ nyɛ̃ nɩ a bome bãw, ɛ́ yel: «A Tamaar tu n a lɛ a nʋɔr na ƴãw a vla za zuo mɛ̃. Yel-mɩŋa n'a, a tɩ fɛr'a k'ɩ̃ɩ de ʋ kʋ̀ a ɩ̃ bidɛb Sela ʋ kul, ɩ̃ɩ bɛ ɩ a lɛ ɩ.» Lɛ n'a a Zuda bɛ lɛb tɩ gã nɩ ʋ towtow ɛ.
27A ʋ dɔwfʋ daar na wa ta a, bɛ nyɛ̃ na bɛ ɩ yɩbr. 28Ʋ na tɩ dɔwr a, a bie kãw tɩ tur'ɩ a nũu, a pɔw-dɔwrɛ nyɔw, ɛ́ 'lẽ fomi-zɩɛ ƴãw a nũsuwle ƴãw ɛ́ yel: «Ŋa n'ʋ de niwn yi.» 29Ɛcɛ a bie tɩ lɛb'a taw a ʋ nũu kpɛ n, ɛ́ a ʋ yɛb de niwn yi. A pɔw-dɔwrɛ ŋmɛ cɛl: «Nyɛ̃ vʋɔr fʋ na yuo a!» Lɛ n'a a Zuda tɩ por a bie kɛ́ Perɛsɩ, a pɛr lɛ kɛ́ “Vʋɔr.” 30Al pùorí, a ʋ yɛb tɩ yi n nɩ a fomi-zɩɛ a nũsuwle ƴãw, a Zuda por ʋ kɛ́ Zera.
اکنون انتخاب شده:
Yele-za-pɛr-tib 38: DBDC
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
La Bible en Dagara © Alliance Biblique du Burkina Faso, 2013.