Yele-za-pɛr-tib 26
26
ƖZAAKƖ
(26:1—36:43)
Ɩzaakɩ na cen Abimelɛkɩ zie a
1Kɔ̃ tɩ lo n a tẽw pʋɔ. A bɛ ɩ a ʋl na tɩ lo a Abraham daar a ɩ#26:1 Kɔ̃ na lo a Abraham daar a: Nyɛ̃ 12.10.. A Ɩzaakɩ tɩ ìr'a cen Geraar, a Filisɩtɛ̃ mɩnɛ nãà Abimelɛkɩ zie. 2A Sore tɩ ɩ na a Ɩzaakɩ nyɛ̃ ʋ, ʋʋ yel ʋ: «Taa cere a Eziptɩ ɛ, zɩ̃ a tẽw ʋl ɩ̃ na na wul fʋ a pʋɔ. 3Kpɩɛr a ʋlɩ tẽw nɛ, ɩ̃ na be n a fʋ zie, ɩ̃ɩ na maalɩ fʋ na. Bʋ̃ʋ n'ʋ vɛ̃, fʋ̃ʋ nɩ a fʋ bʋʋrɛ nɛbɛ ɩ̃ na kʋ̀ a ziir á ŋá. Ɛ́ à à ŋá n'a ɩ̃ na tu a nʋɔr ɩ̃ na ƴãw kʋ̀ a fʋ sãà Abraham a. 4Ɩ̃ na ɩ n a fʋ bʋʋrɛ bɛ yɛ̀r yãwmɛ mɛ̃ a saa ŋmar-bie a, ɩ̃ɩ na kʋ̀ bɛ nɩ a ziir á ŋá za. Ɩ̃ na maal'ɩ a nɩ-bʋʋrɛ za a bɛ zũú. 5Bʋ̃ʋ n'ʋ vɛ̃, a Abraham bɛr'a wõ m, ʋ tu n a lɛ ɩ̃ na yel a, ʋ sàw nɩ a ɩ̃ nɛ-ƴãwnɩ, a ɩ̃ tub nɩ a ɩ̃ wulu.»
6A Ɩzaakɩ tɩ zɩ̃ n a Geraar. 7A be dem tɩ tɛr'ɩ sowru a ʋ zie càar'ɩ a ʋ pɔw. Ʋ sɔw: «Ɩ̃ yeepuule n'ʋ#26:7 Nyɛ̃ 12.13 nɩ 20.2..» Ʋ bɛ mɩ́ tɩ sàw yel k'aa Erebeka ɩ n a ʋ pɔw ɛ. Bʋ̃ʋ n'ʋ vɛ̃, ʋ tɩ zɔrɛ nɩ dɛ̃bɩ̃ɛ a nɩbɛ bɛ ŋa nãà wa kʋ ʋ a ʋ ƴãw a. A Erebeka tɩ sɩrɩ na pɔl.
8A Ɩzaakɩ tɩ be n a be a tɩ cɛlɩ. Bibir kãw, a Filisɩtɛ̃ mɩnɛ nãà, Abimelɛkɩ, tɩ jɩ́r'ɩ a tokoro vʋɔr ƴãw nyɛ̃ a Ɩzaakɩ na kʋlmalɛ nɩ a ʋ pɔw Erebeka a. 9Ʋ tɩ bʋɔl'ʋ na wa yel ʋ: «A bɛ tɛr à ŋá ɩ, a fʋ pɔw n'ʋ! Bʋ̃ʋ n'ʋ so fʋ yel: “Ɩ̃ yeepuule n'ʋ?”» A Ɩzaakɩ sɔw: «Ɩ̃ yel'ɩ a lɛ, ɩ̃ na zɔrɛ dɛ̃bɩ̃ɛ bɛ nãà wa kʋ m a ʋ ƴãw a.» 10A Abimelɛkɩ lɛb yel: «Bʋ̃ʋ n'ʋ fʋ ɩ tɩ à à ŋá? Zaa pʋrɩ na cɛ, a ɩ̃ nɩr kãw nãá gã nɩ nɩ a fʋ pɔw, fʋ ɩ tɩ ɩ sãwna dem.»
11A Abimelɛkɩ tɩ kpãa nɩ a ʋ nɩbɛ à ŋá: «Nɩr wa tʋɔr a nɩr ŋa bɩɩ a ʋ pɔw a, ɩ̃ na ƴãw na bɛ kʋ ʋ.» 12A Ɩzaakɩ tɩ kɔ na bʋ̀r a tẽw pʋɔ a ʋlɩ yũon nɛ, ɛ́ cɛ̀ gb'aa kʋba (100) dɔwlɩ. A Sore tɩ maal'ʋ na. 13A ʋ bʋ̃-tɛrɩ tɩ yãwmɛ na dɔwlɛ, ʋ tɩ kpɛ naalʋ yaga za. 14Ʋ tɩ tɛr'ɩ píir nɩ bʋʋr nɩ nĩi nɩ tõ-tõ-biir yaga za.
A Ɩzaakɩ nɩ a Abimelɛkɩ maal'ɩ wõ-taa
A Filisɩtɛ̃ mɩnɛ tɩ nyuur'ɩ nɩ a Ɩzaakɩ. 15Bɛ tɩ sɩɛb'ɩ a buli za a ʋ sãà Abraham tõ-tõ-biir na tɩ tuw a Abraham na cãà vʋʋrɛ a. Bɛ tɩ sɩɛb'a na nɩ tanɛ. 16A Abimelɛkɩ tɩ yel'ɩ a Ɩzaakɩ: «Fʋ tɛr'ɩ fãw zuo tɩ ƴɛrɛŋa, ìr a tɩ zie ka!»
17A Ɩzaakɩ tɩ ìr'ɩ a be tɩ maalɩ a ʋ laɩ a Geraar fʋɔla pʋɔ, kpɩɛr a be. 18Ʋ tɩ ƴãw na bɛ lɛb yaw a buli bɛ na tuw a ʋ sãà Abraham daar, ʋʋ wa kpi baarɩ a Filisɩtɛ̃ mɩnɛ sɩɛbɩ a. Ʋ tɩ lɛb'a por a a yée a ʋ sãà na tɩ por a a. 19Bibir kãw, a Ɩzaakɩ tõ-tõ-biir tɩ tuw nɩ bule a fʋɔla pʋɔ páw kʋ̃ɔ na tɛbr yire a. 20A Geraar tẽw dʋ̃-cɩ̃ɩnbɛ tɩ bɔ n a Ɩzaakɩ dʋ̃-cɩ̃ɩnbɛ nɔhaarʋ yel bɛ: «Tɩmɛ so a kʋ̃ɔ á ŋá.» A Ɩzaakɩ tɩ por'ɩ a bule ŋa kɛ́ Esɛkɩ, a pɛr lɛ kɛ́ “Nɔhaarʋ”, bɛ na tɩ bɔ ʋ nɔhaarʋ a ƴãw. 21A Ɩzaakɩ tõ-tõ-biir tɩ tuw nɩ bul-yũo, zɛbr lɛb maal be be a ʋ ƴãw. A Ɩzaakɩ tɩ por'ɩ a bule ʋl kɛ́ Sɩtɩna, a pɛr lɛ kɛ́ “Nɔkpɛn”. 22Ʋ tɩ yi n a be cen tɩ ƴãw bɛ tuw bul-yũo na bɛ wa n zɛbr a. Ʋ tɩ por ʋ nɩ Erehovɔtɩ, a pɛr lɛ kɛ́ “Vuo-gã-na”. Bʋ̃ʋ n'ʋ vɛ̃, ʋ tɩ yere na: «Ƴɛrɛŋa a, a Sore bɛr'ɩ vuo kʋ̀ tɩ kɛ́ tɩ tɛr a a tẽw pʋɔ.»
23A Ɩzaakɩ tɩ yi n a be cen Bɛɛr-Seva. 24A Sore tɩ ɩ na ʋ nyɛ̃ ʋ a tɩ̃ɩsɔw, ʋʋ yel ʋ: «Mãa n'ɩ a fʋ sãà Abraham Naaŋmɩn. Ta zɔrɛ dɛ̃bɩ̃ɛ ɩ, ɩ̃ be n a fʋ zie. Ɩ̃ na maalɩ fʋ na, ɛ́ ɩ a fʋ bʋʋrɛ bɛ yɛ̀r yãwmɛ yaga, a ɩ̃ tõ-tõ-bie Abraham zũú.» 25A Ɩzaakɩ tɩ mɛ n bàwr-maal-kuur a be, puori a Naaŋmɩn, bʋɔl'ʋ Sore. Ʋ tɩ maal'ɩ a ʋ pɛnɛ-sɛwr a be, ɛ́ a ʋ tõ-tõ-biir tuw bul-yũo.
26A Abimelɛkɩ#26:26 Abimelɛkɩ nɩ Pikol: Nyɛ̃ 21.22. tɩ yi n a Geraar wa k'ʋʋ wa nyɛ̃ a Ɩzaakɩ, ʋlɛ nɩ a ʋ bá Ahuzatɩ nɩ a ʋ zɛbr-nɩbɛ nɩ-kpɛ̃ɛ Pikol. 27A Ɩzaakɩ tɩ sowri bɛ na: «Bʋnʋ ƴãw n'a nyɩ wa a ɩ̃ nyɛ́b, nyɩɩm na bɛ nɔnɛ mɛ̃ towtow, ɛ́ ír mɛ̃ a nyɩ tẽw pʋɔ a?» 28Bɛ tɩ sɔw ʋ na: «Tɩ nyɛ̃ na k'aa Sore be n a fʋ zie, ɛ́ tɩ́ɛrɩ k'aa fɛr'a kɛ́ wõ-taa be fʋ̃ʋ nɩ a tɩɩm cara pʋɔ, wõ-taa tɩ na na pɔ maalɩ a. 29A na ɩ à ŋá a, pɔ kɛ́ fʋ kʋ̃ ɩ a kpɛ tɩ ɛ tɩ na bɛ dɔwrɩ fʋ a ƴãw. Vla tɛwr'a tɩ tɩ maalɩ a fʋ zie bɛr fʋ fʋ cen nɩ ƴã-ɓaarʋ, fʋ̃ʋ a Sore na maalɩ dɩ̃a a.» 30A Ɩzaakɩ tɩ maal'ɩ cuw a bɛ ƴãw, bɛ dɩ kɛ́ nyũ. 31Bɛ tɩ ìr'ɩ a bio daarɩ́ biɓaar-pipi pɔ kʋ̀ taa. A Ɩzaakɩ tɩ bɛr bɛ nɩ sɔ́r, ɛ́ bɛ bɛr taa nɩ ƴã-ɓaarʋ.
32A ʋlɩ bibir nɛ tɔr za a, a Ɩzaakɩ tõ-tõ-biir tɩ wa na wa manɩ bule kãw bɛ na tuwr a yele kʋ̀ ʋ. Bɛ tɩ yel ʋ na: «Tɩ páw nɩ kʋ̃ɔ.» 33A Ɩzaakɩ tɩ por'ɩ a bule ʋl kɛ́ Siveya, a pɛr lɛ kɛ́ Pɔb. Alɛ so bɛ cãà bʋɔlɛ a tẽw a dɩ̃a kɛ́ Bɛɛr-Seva, a pɛr lɛ kɛ́ “Pɔb bule#26:33 Nyɛ̃ 21.31 nɩ a manʋ.”.
A Ezawu kul-taa
34A Ezawu tɩ tɛr'ɩ yome lɩz'a ayi a lɛn daar ʋ na tɩ kul Yehuditɩ na ɩ Hititɩ dɔɔ Beeri pɔwyaa a, nɩ Basɩmatɩ mɩ̀ na ɩ Hititɩ dɔɔ Elon pɔwyaa a. 35Bɛ tɩ ɩ na a Ɩzaakɩ nɩ a Erebeka nyɛ̃ wʋ̀ʋr yaga.
اکنون انتخاب شده:
Yele-za-pɛr-tib 26: DBDC
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
La Bible en Dagara © Alliance Biblique du Burkina Faso, 2013.