Yele-za-pɛr-tib 24
24
A Ɩzaakɩ nɩ a Erebeka kul-taa
1A Abraham tɩ kor'a tɩ maal kor, ɛ́ a Sore maal'ʋ a yele za pʋɔ. 2Bibir kãw, a Abraham tɩ yel'ɩ a ʋ tõ-tõ-bi-kʋra kʋra na kaarɛ a ʋ bʋ̃-tɛrɩ za zie a: «Tõ a fʋ nũu a ɩ̃ gbɛkpɛ̃ɛ pile#24:2 Tõ a fʋ nũu a ɩ̃ gbɛkpɛ̃ɛ pile: Pɔb na bɛ tɛr dɩ̃ɛnʋ a ƴãw n'a bɛ mɩ́ tɩ tõ a nũu a nɩr gbɛkpɛ̃ɛ pile. A vɛ̃ na kɛ́ ɩ mɛ̃ a sob dɛblʋ n'a bɛ mɩ́ pɔ n a., 3ɛ́ pɔ n a Sore, a salom nɩ a tẽw Naaŋmɩn, yel mɛ̃ kɛ́ fʋ kʋ̃ ƴãw a ɩ̃ bidɛb kul a Kanãa tẽw dem sɔgɔ ɩ̃ na kpɩɛr a, powle kãw ɛ. 4Ɛcɛ yel kɛ́ fʋ na cen nɩ a ɩ̃ tẽw pʋɔ nɩ a ɩ̃ nɩbɛ pʋɔ tɩ kaa ír pɔw a ɩ̃ bidɛb Ɩzaakɩ ƴãw.» 5A tõ-tõ-bie tɩ sɔw ʋ na: «Kapaw, a pɔw kʋ̃ sàw tu m wa a ka ɩ. A lɛ pʋɔ a, a na fɛr'a k'ɩ̃ɩ tɛr a fʋ bidɛb lɛb cen nɩ a tẽw ʋl fʋ na yi kɛ́ bɛr a bɩɩ?» 6A Abraham yel ʋ: «Taa wa nanɩ tɛrɛ a ɩ̃ bidɛb lɛb cere nɩ a be ɩ. 7A Sore, a salom Naaŋmɩn, ɩ na k'ɩ̃ yi kɛ́ bɛr a ɩ̃ sãà yir nɩ a ɩ̃ tẽ-dɔwra. Ʋ ƴɛ̀r'ɩ a ɩ̃ zie, ɛ́ pɔ à ŋá: “Ɩ̃ na kʋ̀ n a tẽw ŋa a fʋ bʋʋrɛ.” Ʋ na tõ n a ʋ malkɩ ʋ de b niwn, fʋ tɩ de pɔw a be a ɩ̃ bidɛb ƴãw. 8A pɔw bɛ wa sàw tu b a, a pɔb fʋ na pɔ a ɩ̃ zie a bɛ cãà fɛrɛ fʋ ɛ. Ɛcɛ taa wa tɛrɛ a ɩ̃ bidɛb lɛb cere nɩ a be ɩ.» 9Lɛ n'a a tõ-tõ-bie tɩ tõ a ʋ nũu a ʋ nɩ-kpɛ̃ɛ Abraham gbɛkpɛ̃ɛ pile, ɛ́ pɔ a yel ŋa ƴãw a ʋ zie. 10Ʋ tɩ ír'ɩ nyɔ̃wmɩ pie a ʋ nɩ-kpɛ̃ɛ nyɔ̃wmɩ pʋɔ, nɩ a ʋ bʋ̃-vɩɛlɩ vɩɛlɩ zie lo n a sɔ́r cere a Nahɔɔr tẽ-kpɛ̃ɛ pʋɔ na be a Mezopotami tẽw saa-pɛrɩ́-gʋba-lowr a.
11Ʋ na tɩ ta a tẽ-kpɛ̃ɛ ŋa bule na be a yẽw a pɛr a, ʋ ɩ na a nyɔ̃wmɩ siw gã. Zaanʋɔra tɩ n'a, man a tɛm ʋl a pɔwbɛ na mɩ́ waar wa 'wɔ̃wnɛ a kʋ̃ɔ a. 12Ʋ tɩ puor'ɩ à ŋá: «Sore e, ɩ̃ nɩ-kpɛ̃ɛ Abraham Naaŋmɩn i, ɩ a yele tu vla a ɩ̃ zie a dɩ̃a, ɛ́ fʋ wul a fʋ nɔ̃wfʋ a ɩ̃ nɩ-kpɛ̃ɛ Abraham. 13Mãa n'ɩ ŋan a bule pɛr, ɛ́ a tẽw dem powli na wa wa 'wɔ̃w a kʋ̃ɔ. 14A pɔwsɩrale ʋl ɩ̃ na na yel k'ʋʋ cɩɩlɩ a ʋ yuor ɩ̃ nyũ a, ʋlɛ wa sɔw mɛ̃ k'ɩ̃ɩ nyũ ʋʋ mɩ̀ na ƴãw nɩ a ɩ̃ nyɔ̃wmɩ a nyũ a, ɩ̃ na bãw na kɛ́ ʋlɛ n'ʋ fʋ kʋ̀rɛ a fʋ tõ-tõ-bie Ɩzaakɩ. A lɛ pʋɔ a, ɩ̃ na bãw na kɛ́ fʋ wul'ɩ nɔ̃wfʋ a ɩ̃ nɩ-kpɛ̃ɛ.» 15A ʋ nʋɔr bɛ tɩ lo tẽw sɛr ɛ, ɛ́ Erebeka ta n a ʋ yuor a bawŋman zu. Betuwɛl pɔwyaa tɩ n'ʋ, ɛ́ a Betuwɛl mɩ̀ nɩ̃ɛ tɩ ɩ Mɩlka bidɛb, ɛ́ a Mɩlka tɩ ɩ a Abraham yɛb Nahɔɔr pɔw. 16Pɔwsɩrale na tɩ vɩɛl vɩɛl a n'ʋ, ʋ bɛ tɩ páw dɛb ɛ. Ʋ tɩ siw nɩ a bule pʋɔ, 'wɔ̃w a kʋ̃ɔ paalɩ a ʋ yuor lɛb do n.
17A Abraham tõ-tõ-bie tɩ zɔ na tuor'ʋ, yel ʋ: «Yãayãa, ɩ k'ɩ̃ fúr a fʋ yuor kʋ̃ɔ blãlɛ.» 18Ʋ sɔw: «Ɩ̃ nɩ-kpɛ̃ɛ ɛ, nyũ», ɛ́ tɩ siwri a yuor fɔ̃wlɛ dɔwlɩ a ʋ kpãkpãw zu ƴãw ʋ nyũ. 19Ʋ na wa ƴãw ʋ nyũ baar'a, ʋ yel'a: «Ɩ̃ mɩ̀ na 'wɔ̃wnɛ nɩ a kʋ̃ɔ ƴãwn a fʋ nyɔ̃wmɩ, a za tɩ nyũ tɩ baarɩ.» 20Ʋ tɩ cir'ɩ a ʋ yuor kʋ̃ɔ fɔ̃wlɛ ƴãw a dʋn balɛ̃wnɩ pʋɔ, al pùorí ʋ lɛb zɔ cen a bule pʋɔ tɩ 'wɔ̃w a kʋ̃ɔ. Ʋ tɩ 'wɔ̃w nɩ a kʋ̃ɔ a nyɔ̃wmɩ za ƴãw. 21A dɛb tɩ jɩ́rɛ ʋ nɩ gbililɛ, k'ʋʋ bãw, a Sore ɩ n a ʋ sɔ́r vɩɛl bɩɩ ʋ bɛ vɩɛl.
22A nyɔ̃wmɩ na wa nyũ baar'a, a dɛb de nɩ salm-zɩɛ nyɔ-bãw na tɩbrɛ ta gɩram#24:22 Gɩram: Ʋ ɩ n a kilogɩram na põ ziir túr a, zi-been sob. Nyɛ̃ Yzt 18.6 nɩ a manʋ. ayʋɔb a, nɩ salm-zɩɛ nuru bamɛ ayi, kãw za na tɩbrɛ zuo gɩram kʋba a (100), kʋ̀ a pɔwsɩrale, 23ɛ́ sowr'ʋ: «Ãa pɔwyaa nɛ b? Ɩ̃ zɛlɛ fʋ na, yel kʋ̀ m. Zie be n a fʋ sãà yir pʋɔ tɩ na gã a?» 24Ʋ sɔw: «Betuwɛl pɔwyaa nɛ m, ɛ́ ɩ Mɩlka nɩ Nahɔɔr yãw.» 25Ʋ tɩ cãà na lɛb yel: «Kɛkɛɛ nɩ mɔ̃-kon ʋr'ɩ a tɩ yir, ɛ́ gaa zie be be.»
26A dɛb tɩ gbĩ n dume a Sore niŋé, 27ɛ́ yel: «A Sore, a ɩ̃ nɩ-kpɛ̃ɛ Abraham Naaŋmɩn, tɛr'ɩ puoru, ʋl na sɩrɩ wul a ʋ nɔ̃wfʋ a ɩ̃ nɩ-kpɛ̃ɛ a: ʋ tɛr mɛ̃ nɩ daadaa wa n a ɩ̃ nɩ-kpɛ̃ɛ yir dem zie.»
28A pɔwsɩrale tɩ zɔ na kpɛ a ʋ mã zie tɩ yel a yel ŋa. 29A Erebeka tɩ tɛr'ɩ yɛ-dɛb ʋ dɩ kɛ́ Labã. A Labã tɩ yi na zɔ cen a dɛb zie a bule pɛr. 30Ʋ tɩ nyɛ̃ nɩ a nyɔ-bãw nɩ a bamɛ a ʋ yeepuule na ƴãw a, ɛ́ wõ ʋ manɩ a lɛ a dɛb na yel a. Ʋ tɩ cen na tɩ nyɛ̃ ʋ, ʋ àr'ɩ a ʋ nyɔ̃wmɩ a bule pɛr. 31Ʋ tɩ yel ʋ na: «Wa, fʋ̃ʋ a Sore na maalɩ a. Bʋ̃ʋ n'ʋ so fʋ àr a yẽw? Ɩ̃ maal'ɩ a yir bɛr, ɛ́ cɔbrɩ zie a nyɔ̃wmɩ ƴãw.»
32A Abraham tõ-tõ-bie tɩ kpɛ n a yir pʋɔ. Bɛ tɩ tow nɩ a nyɔ̃wmɩ tuor bɛr, ɛ́ kʋ̀ a kɛkɛɛ nɩ mɔ̃-kon. Bɛ mɩ́ tɩ wa n nɩ kʋ̃ɔ k'aa tõ-tõ-bie nɩ a nɩbɛ na bɩɛlɛ ʋ a wa pɛ́w gbɛ́ɛ. 33Bɛ tɩ wa n nɩ bʋ̃-dɩrɩ wa bin a ʋ niŋé. Ɛcɛ ʋ tɩ yel'a: «Mãa bɛ wa ƴɛ̀r a ƴɛ̀rʋ ɩ̃ na tɛr a, ɩ̃ bɛ dɩrɛ ɩ.» A Labã tɩ yel ʋ: «Ƴɛ̀r!» 34A dɛb yel: «Abraham tõ-tõ-bie nɛ m. 35A Sore maal'ɩ a ɩ̃ nɩ-kpɛ̃ɛ yaga za, ʋ ɩ nɩr. Ʋ kʋ̀ ʋ nɩ píir nɩ bʋʋr nɩ nĩi, ɛ́ kʋ̀ ʋ salm-pla nɩ salm-zɩɛ, tõ-tõ-bi-dɛbr nɩ tõ-tõ-bi-pɔwbɛ, nyɔ̃wmɩ nɩ bòn. 36A ʋ pɔw Saara dɔw nɩ bidɛb kʋ̀ ʋ a ʋ koru pʋɔ, ɛ́ a ʋ bidɛb ŋa n'ʋ ʋ de a ʋ bome za kʋ̀. 37A ɩ̃ nɩ-kpɛ̃ɛ ƴãw na ɩ̃ pɔ, k'ɩ̃ɩ kʋ̃ de a Kanãa tẽw ʋ na kpɩɛr a pɔw kʋ̀ a ʋ bidɛb ɛ. 38Ʋ yel mɛ̃ na: “Pɔ yel mɛ̃ kɛ́ fʋ na cen nɩ a ɩ̃ sãà yir pʋɔ, a ɩ̃ bʋʋrɛ pʋɔ tɩ de pɔw a be a ɩ̃ bidɛb ƴãw.” 39Lɛ n'a ɩ̃ tɩ sowr'ʋ: “Ɛ́ a pɔw bɛ wa sàw na tu m?” 40Ʋ sɔw mɛ̃: “A Sore niŋé ɩ̃ na vʋʋrɩ a na tõ n a ʋ malkɩ ʋ wa lãw nɩ fʋ, ʋ na ɩ n a fʋ sɔ́r ʋ vɩɛl, ɛ́ fʋ na tɩ tɛr'ɩ pɔw a ɩ̃ bʋʋrɛ pʋɔ nɩ a ɩ̃ sãà yir pʋɔ, wa kʋ̀ a ɩ̃ bidɛb. 41Fʋ̃ʋ wa cen a ɩ̃ bʋʋrɛ pʋɔ a, a pɔb fʋ na pɔ a kʋ̃ cãà fɛrɛ fʋ ɛ. Fʋ̃ʋ saa bɛ wa tɩ páw bom a, a ɩ̃ ŋmɛ-ƴãw bɛ páwr fʋ ɛ.” 42A dɩ̃a ɩ̃ na wa tarɛ a bule ŋa pɛr a, ɩ̃ puor'ɩ à ŋá: “Sore e, ɩ̃ nɩ-kpɛ̃ɛ Abraham Naaŋmɩn i, sàw ɩ a ɩ̃ sɔ́r ɩ̃ na lo a ʋ vɩɛl. 43Ƴɛrɛŋa ɩ̃ na àr a bule ŋa pɛr a, ɩ̃ na zɛlɩ nɩ pɔwsɩrale kãw na na wa a kʋ̃ɔ 'wɔ̃wfʋ a, k'ʋʋ ɩ ɩ̃ nyũ a ʋ yuor kʋ̃ɔ blã. 44Ʋlɛ wa sɔw mɛ̃ yel k'ɩ̃ɩ nyũ ʋʋ mɩ̀ na 'wɔ̃w na ƴãw a ɩ̃ nyɔ̃wmɩ a, ɩ̃ na bãw na kɛ́ ʋlɛ n'ɩ a pɔw fʋ na kʋ̀rɛ a ɩ̃ nɩ-kpɛ̃ɛ bidɛb a.” 45Ɩ̃ bɛ tɩ tɩɛr'ɩ a ɩ̃ pʋɔ baar ɛ, ɛ́ a Erebeka ta, a yuor dɔwlɩ a bawŋman zu. Ʋ tɩ siw nɩ a bule pʋɔ 'wɔ̃w a kʋ̃ɔ, ɩ̃ zɛlɩ ʋ: “Yãayãa, kʋ̀ m kʋ̃ɔ ɩ̃ nyũ.” 46Ʋ tɩ cɩɩl'ɩ a yuor fɔ̃wlɛ, ɛ́ yel mɛ̃: “Nyũ, ɩ̃ɩ mɩ̀ na ƴãw nɩ a fʋ nyɔ̃wmɩ a nyũ.” Ɩ̃ nyũ, ʋʋ ƴãw a nyɔ̃wmɩ a mɩ̀ nyũ. 47Ɩ̃ tɩ sowr'ʋ na: “Ãa pɔwyaa nɛ b?” Ʋ sɔw: “Betuwɛl pɔwyaa nɛ m, ɛ́ ɩ Mɩlka nɩ Nahɔɔr yãw.” Lɛ n'a ɩ̃ tɩ ƴãw ʋ a bãw a nyʋɔrɩ́, ɛ́ ƴãw ʋ a bamɛ a nurú. 48Ɩ̃ tɩ gbĩ n dume a Sore niŋé. Ɩ̃ tɩ puor'ɩ a Sore, a ɩ̃ nɩ-kpɛ̃ɛ Abraham Naaŋmɩn, yãanɩ, ʋl na tu n mɛ̃ a sɔr-vla, k'ɩ̃ɩ tɩ tɛr a ɩ̃ nɩ-kpɛ̃ɛ yɛb pɔwyaa tɩ kʋ̀ a ʋ bidɛb a. 49Ƴɛrɛŋa a, nyɩmɛ wa sàw na ɩ nɔ̃wfʋ-ɩb nɩ yel-mɩŋa-ɩb a ɩ̃ nɩ-kpɛ̃ɛ zie a, nyɩɩm yel kʋ̀ m. Alɛ bɛ ɩ lɛ, ɩ̃ na cen nɩ zi-yoru.»
50A Labã nɩ a Betuwɛl tɩ sɔw nɩ à ŋá: «A Sore zie n'a a yel ŋa yi, tɩ bɛ tɛr ƴɛ̀rʋ a pʋɔ, na yel kɛ́ ʋ̃ʋ bɩɩ ʋ̃ʋ'hʋ̃ ɛ. 51A Erebeka n'ɩ ŋan a fʋ niŋé. De ʋ cere nɩ. Ʋ lɩɛbɩ a fʋ nɩ-kpɛ̃ɛ bidɛb pɔw mɛ̃ a lɛ a Sore na yel a.» 52A Abraham tõ-tõ-bie na tɩ wõ a ƴɛ̀r-bie á ŋá a, ʋ gbĩ n dume a Sore niŋé gũu tɩ tɔ tẽw. 53Al pùorí, ʋ ír salm-pla nɩ salm-zɩɛ pɩ̃ɛmɛ nɩ kparɩ a ʋ tuor pʋɔ kʋ̀ a Erebeka. Ʋ mɩ̀ tɩ kʋ̀ n bʋ̃-vɩɛlɩ vɩɛlɩ a powle yɛ-dɛb nɩ a ʋ mã. 54A Abraham tõ-tõ-bie nɩ a ʋ taabɛ tɩ dɩ na kɛ́ nyũ ɛ́ gã.
Bɛ na wa ìr a biɓaara a, a Abraham tõ-tõ-bie tɩ yel'ɩ a Erebeka yɛ-dɛb nɩ a ʋ mã: «Nyɩ bɛr mɛ̃ ɩ̃ lɛb kul a ɩ̃ nɩ-kpɛ̃ɛ zie.» 55Bɛ tɩ sɔw ʋ na: «Bɛr a powle ʋ cãà be a tɩ zie blã, ʋ maalɩ mɛ̃ bibie pie a, al pùorí, ʋ na cen na.» 56A tõ-tõ-bie tɩ lɛb'a yel: «Nyɩ ta gbini mɛ̃ ɩ. A Sore ɩ na a ɩ̃ sɔ́r vɩɛl, nyɩ bɛr mɛ̃ ɩ̃ lɛb ta a ɩ̃ nɩ-kpɛ̃ɛ zie.» 57Bɛ tɩ lɛb'a yel: «Tɩ bʋɔlɩ a powle wa sowri a lɛ ʋ na tɩ́ɛrɛ a.»
58Lɛ n'a bɛ tɩ bʋɔlɩ a Erebeka wa sowr'ʋ: «Fʋ bɔbr'a kɛ́ fʋ páw a dɛb ŋa cen bɩɩ?» Ʋ sɔw: «Ʋ̃ʋ.» 59Bɛ tɩ bɛr ʋ na, ʋlɛ nɩ a pɔw ʋl na yáal'ʋ a, bɛ páw a Abraham tõ-tõ-bie nɩ a ʋ nɩbɛ cen. 60Bɛ tɩ ƴɛ̀r'ɩ nɔ-vla kʋ̀ a Erebeka à ŋá:
«Fʋ̃ʋ, tɩ yeepuule e, lɩɛbɩ nɩbɛ tu-tu-túr mã.
A fʋ bʋʋrɛ, bɛ mɩ́ zɛb de
a bɛlɩ dem na hɩ̃ɛn bɛ a tẽ-bɛrɛ!»
61A Erebeka tɩ ìr'a, ʋlɛ nɩ a ʋ tõ-tõ-bi-pɔwli, bɛ do zɔm a nyɔ̃wmɩ tu n a Abraham tõ-tõ-bie. À ŋá n'a bɛ za tɩ lãw cen.
62A Ɩzaakɩ tɩ ìr'ɩ a Lahaɩ-Ʋrɔɩ bulé. Negɛɛvʋ vuo pʋɔ n'a ʋ tɩ kpɩɛr. 63Zaanʋɔra kãw ʋ na tɩ yi a wɩ̀ɛ pʋɔ tɩ cɔlɛ a, ʋ wa jɩ́r'a nyɛ̃ nyɔ̃wmɩ na waar a. 64A Erebeka na wa jɩ́r nyɛ̃ a Ɩzaakɩ a, ʋ ƴaw na siw a nyɔ̃wmɛ zu, 65ɛ́ sowri a tõ-tõ-bie: «Nɩ-buor'ɩ à ŋà na cere tuore tɩ a wɩ̀ɛ pʋɔ a?» A tõ-tõ-bie sɔw: «A ɩ̃ nɩ-kpɛ̃ɛ n'ʋ.» A Erebeka tɩ de nɩ a pɛn pàw nɩ a ʋ niwn#24:65 De pɛn pàw nɩ a niwn daadaalɛ: A bɛ bʋʋrɛ ɩb tɩ n'ɩ a lɛ: kɛ́ pɔw mɩ́ pàw a ʋ niwn nɩ pɛn dɛb-sãan niŋé, baa zuo a za, ʋlɛ wa waar na ɩ a ʋ sɩr a. daadaalɛ. 66A tõ-tõ-bie tɩ man nɩ a alɩ bome nɛ za ʋ na ɩ a kʋ̀ a Ɩzaakɩ. 67Al pùorí, a Ɩzaakɩ tɩ tɛr'ɩ a Erebeka kpɛ n a pɛn-sɛw ʋl pʋɔ a ʋ mã Saara na tɩ kpɩɛr a, ʋ lɩɛbɩ a ʋ pɔw. Ʋ tɩ nɔ̃w ʋ na, ɛ́ a ɩ ʋ mɔwlʋ, a ʋ mã kũu ƴãw.
اکنون انتخاب شده:
Yele-za-pɛr-tib 24: DBDC
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
La Bible en Dagara © Alliance Biblique du Burkina Faso, 2013.