Ibrani 12
12
Enede Allah pam he’berik poluk enepe mosogo welemagoluk enesa’go werigisa wene
1Is aphwami naduk til wegesa a’ge onobok il wege ai, enebe esan logolak neneragam o’gwe wali’gogo welat enil yetnentarok oruak ai en e, sa omut oruak sa omut erlak louwogoluk di a’ge yu a’ge enebam e’gin a’ge no’gorlogo poluk lagai ai ’gela’ge, nis nenebam e’gin wiak welago a’ge emin, nenebabut wiak togu lege a’ge nenebam lo’boktak modok welago a’ge ai emin, ’berlegat no’gorlogo ukpoluk,
Allah en,
“Hwerli ai hwerli lu,” oluk mo’gulnentesi ai, nonogola en e,
“Nonorogole dokhum ’bekhit hwerli ai pamat louwok,” oluk, nenannisogo laga lomok o. 2Asogo lagalat, naduk nenede Yesus ebam he’berik pou wagoluk, at enat nenede ’gagaliselat, hwerli ologun pam ’garoksogo modok op lai louwagoluk, at enat tennentarok welat, tiso ai en e, arat nis nenilen woluk motluk laga lomok o. At ogola en e,
“Ene’gerli wusogo enebe e pam edigonoboluk waronobogwi ai ’gela’ge, an asogo watnobu ne’gerli,” oluk opo erlakma en, we,
“An pobuk nogola nagai haik,” oluk, at ebe worugukhwe epe mosogo waragarik en, pobuk elaluk agarik yogodak Allah ’gain welagoma eba eragam e’gik ’bekhit akhit ’gainat oruak o. 3His honogola ’buk emarik henanni erlak ema no oluk, is aphwami wiak togwi a’ge en at Yesus onogola en mi-miarak poluk, ebe wiagap pogukhwe hallorak onoboluk epe mosogo welaga ai, his en e,
“At no’gosogo tegei no,” oluk honogola en pobi togu lomup o. 4His nak e, wiak tu henebit en, weim enannisogo obogwi ai ’gela’ge togwiam, henemep namogo wathonobu erlak a’ge welegep o. 5-6#Ayu. 5:17; Ams. 3:11-12Enaiklak en eneiyagai enesa’go worogwi ai ’gela’ge, his Allah eiyagai a’ge, at en henesa’go weriso wene ai memerak pegeptik welegep a? At en eselat,
“Aphwami en nede hwedik a’ge nak enebe lo’bok enesa’go weriselat,
is an neiyagai a’ge oluk, ’baksogo eselegi a’ge nak enebe lo’bok ’go’bu warenebiselat,
taga legi ai en e, nomlogo yo.
Hat en e,
Naik ’gain Onuk Logo a’ge en nesa’go weregei,
oluk hogola en seramtak poluk ukpagun o.
An en, Wiak tigen, oluk mo’gulheik holuk e, hede ’bugom erlakma en wolomup o,”
oluk egeimu pelal wokho pegesa. 7Is malik wei a’ge enaiklak en enesa’go werak erlak logon welagai no? Enesa’go worogwi nak ai en e, Allah en henesa’go werisoam, his en e,
“Nis at eiyagai welege ai en nenesa’go weregei,” oluk henepe mosogo wolomup o. 8Malik wei a’ge enebe ’berlegat enesa’go worogwi ai ’gela’ge, his logon henesa’go werak erlak holuk e, his at eiyagai demat a’ge puk o. We, ap yogunat en dogo a’ge o. 9Ye, nis nenaiklak nenebe daknenebigisa a’ge en nenesa’go worogwiam, eniak hwelakpoluk sakhorak onobogu lege ai ’gela’ge, nenelaluk welemagoluk nenaik en nenede ’get daknenebiso a’ge iak hologo sakhosogo tu erlak no? At iak hwelakpoluk tuat o. 10Is en e,
“Op tu a’ge re, yuat hegi,” oluk lodu paget we weiyat enesa’go worogwi a’geat de, nenaik Allah nak e, at wiak tu erlakma en, degelak welago ai ’gela’ge, nis nenemin asogoat degelak welemagoluk nenesa’go weriso yo. 11Nenesa’go werisoam eriayat nenede op ago erlak. We, nenede wiak ago a’geat de, pobuk nenesa’go weriso ai pam en de, nenesa’go werak welege a’ge, di a’ge yu a’ge e’gen egesiso ai ’gela’ge, nenebabut op lioktak welat hegitsogo nak togu lomul ai o.
Enede eberak welat togu lemagoluk mo’gulentigisa wene
12 #
Yes. 35:3
Ai en e, hene’gik anni erlak a’ge anniap pogulat, hondogorlu anni erlak a’ge ha’bugap pogulat, tip o.
13 #
Ams. 4:26
Asogo obap poluk,
“Honoyuk edenak a’ge pobuk heneme’en hwedik erlak a’ge op emagoluk,
ebela hegitsogo yakho laga lomup o.”
14His henebe degelogo Allah akhit pogwi erlak wolorogup holuk e, at ebe henil hagup modok erlak ai en e, aphwami ’berlegat henemin opsogo la’bulogo welat, henebe at ebaget poluk wiak tu erlakma en, opsogo degelak modok wolomogoluk henannisogo togu lomup o. 15#Ula. 29:18Aphwami his a’ge logon Allah ebabut op en woknentasu a’ge ai ukpoluk libagaiam e, e’gela erle a’ge ’baktagalat oruakma, op a’ge ebam agalat erleap pasu ai ’gela’ge, at ai en aphwami ’berlegat wiagabenebisoma no oluk henil opsogo wolomup o. 16#Kej. 25:29-34At Esau so’boru nele en, disogo egei,
“Naduk dogo re, anatma, an eiye eik a’ge ai logo re, erlak o. Not eiye emak,” oluk so’boru ene’gik aiyo mesigat no’gwi paget, ot ebam o’go wesi ai ’gela’ge, his logon ’babi tenontogulat, demat a’ge logo po erlakma en honogola seramtak pogulat, togu lorogup no yo. 17#Kej. 27:30-40At Esau tegei ai, his henaluk o. At ogola en e,
“Aphwami en is logon mu’gat wusogo wogontogwi ai ’gela’ge, naik en mo’gulneselat, Allah en obaphebise lemak, oluk mo’gulnemak o,” oluk pobuk mo’gulemagoluk nge tagalat ’gonu mo’gulesi a’geat de, ot arat mo’gulesirikmu no oluk e, pobuk iak togolik lagaksogo mo’gulom e, mia aga ai o.
18 #
Kel. 19:16-22; 20:18-21; Ula. 4:11-12; 5:22-27 Naduk is aphwami Israel a’ge dom Sinai ene’gik elirat tenho a’ge pam wegesa ai ’gela’ge, his dom ai ’gela’ge pam wom erlak. Dom Sinai ai pam ebe disogo togumu wegesa. Odouk magale lok ligagalat, o homuk eriogoluk hik agalat, yasobu annisogo punhau wagalat, 19-20#Kel. 19:12-13iak ’bi’gong lok a’ge iak ’gela’ge eselat e, osokhwe Allah iak loksogo eselat, wene disogo egei,
“Aphwami emin, wam emin, dom yu ene’gik tenhau wagai holuk e,
enebe helep pam ’be’gi dungsogo modok warenebip o,”
oluk enesa’go werisoam hweligisarik, enesa’go hwelak wolom modok mia agama, is en e,
“At iak ai pobuk mesik emin mo’gulnonto mia o,” oluk eniak ningsogo egesa. 21#Ula. 9:19Modok onogorlok a’ge enil hegesarik eniak ningsogoat asogo Musa mo’gulegisema re, at en e, disogo mo’gulentesi,
“An ogo re, nogorlok en nuak erlik-erlik egeiyat o,”
oluk mo’gulentesi.
22Is ai ’gela’ge pam wegesa a’geat de, his nak e, dom Sion Allah elaluk welago a’ge owi seli o kota Yerusalem ’bogorl pam a’ge e’bek wegep ai o. Eba re, malaikat esan di logolak yu logolak emin, 23Allah eiyagai naduk dogo a’ge ononuk ’bogorl pam pelal wogo oruak a’ge odoktogulat onogola enagai hogwi a’ge emin, is aphwami op togu legesema Allah en ’garoksogo obabenebegei a’ge enarogun emin, Allah ebe, aphwami ’berlegat wene enebam pasulat, no’gorliselat, tiso a’ge ano emin, enemin oruakma e’bek wegep o. 24#Kej. 4:10Yogodak Allah en nis emin hwedik tuogoluk wene ’get a’ge wusogo woknenebegeitik, Yesus ebe woknentesimu ’burl heirakma oruak ai emin oruakma wegep o. Ai re, Habel ue yen weregeimu emep pam wene wiak aga a’ge ai wegep puk. We, Yesus ebe werigisema emep pam ’gwete hogulat wusogo op wene aga a’ge pam wegep o.
25 #
Kel. 20:22
Is aphwami Allah iak ’gwiangma mo’gulentasuam enesa’go holu enebit welegesa a’ge, enebe enelaluk ugonobo erlakma en warenebise laga ai o. Holuk e, nis yu ogo re, wene ’bogorl pam en mo’gulnentasuam nenesa’go holu nenebit wolomul holuk e, watnonobu erlakma en uknonobouwa epegep a? Erlak o. Modok watnonobua ai en e, at iak osokhwe henesa’go hwelak erlak,
“Nenebit o,” oluk ukpagupno oluk, henepe heberlogo wolomup o. 26#Hag. 2:6Ai erlige, at Allah iak egei ai pam ’gwiang o’borlogouk tegei a’geat de, yogodak, at en e,
“An pobuk disogo tik,” oluk obok egei a’ge pelal disogo wogo oruak,
“An pobuk mesik erlige ’gwiang yu nak o’borlogouk haik puk. Erlak o.
’Bogorl eminat o’borlogouk haik o,”
oluk egeimu pelal wogo oruak. 27Asogo,
“Mesik erlige o’borlogouk haik,” oluk egei ai re, o’borlogouk u puk ningtak a’ge welemagoluk ukpoluk e, ’bogorl, ’gwiang at en walhesi a’ge ’berlegat o’borlogouk haigoluk egei ai o.
28-29 #
Ula. 4:24
Asogo o’borlogouk houwa a’geat de, nis nak e, Allah eragam nenebasumu o’borlogouk ua modok erlak a’ge woknentesimu eiye egerik welege ai en e,
“Naik Allah o,” oluk hau worogu lomok o. Ye, at Allah ebe re, odouk en di a’ge yu a’ge perlengsogo nasu ai ’gela’geatma re, nis asogo wiagapnonobuano oluk, at ebe nonogorloksogo togulat, hau do’goksogo worogulat, togulat e, at iak hologo at ogola agai a’ge togulat, erliktogu lomok o.
اکنون انتخاب شده:
Ibrani 12: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید