Ibrani 13
13
At Allah ogola opsogo togulom wene
1Narilak norokhwi. Allah eiyagai henebe mesigat a’ge ’gela’ge nede-hedesogo togu legep a’ge ai, asogo henemin hwedigat togu lomup o. 2#Kej. 18:1-8; 19:1-3Is aphwami logon en e, malaikat a’ge enebe ap ’bok ’gela’ge we yogunat wogenebigisarik seni serigisa ai en e, ap ’bok hene’bek wagai holuk e, henebakhenne ugonobo pukmu en wogonobogu lomup o. 3Is logon ene’gik herle werak oruakma, honogola en e,
“Nis ogo re, neneminat nene’gik herle werak ’gela’ge welege o,” oluk, is enebam eberogulat, is logon di wiak yu wiak tagonobogwiam, his honogola en e,
“Nis ogo re, ’gwiangma yema owan oruakma asogoat taknonobo yo,” oluk, is enebam eberogulat, togu lomup o.
4Ap et, hwami et, enebabut danian nil no’gwi a’ge emin, ap onugwami a’ge ’babi tenontogwi a’ge emin, is pobuk Allah en wene enebam poluk wiagabonobua ai en e, ap en hwami wogontogwi ai, aphwami ’berlek en logo poluk, yogunat tenonto erlakma en hweap wogo a’ge lo’bok enemin opsogo nogo ogulom o. 5#Ula. 31:6,8; Yos. 1:5Allah en nenebe lo’bok nenebaget eselat e,
“An en hat ne’gik ’goboksogo ukhebasulat,
hebe hematekma hebasulat, tik erlak o,”
oluk egei ai en e, his uang henede hwedik takpoluk wolorogup o. We, weiyat oruak ai, his henede en e,
“Yu elit oruak,” oluk opo yo. 6#Mzm. 118:6Asogo opogulat, honogola en,
Allah en e,
“Ne’gik ’goboksogo ukhebaik erlak o,” egei ai en e, nenede ha’buksogo welat disogo ogulom,
“Naik ’gain Onuk Logo a’ge re, an letniasu a’ge.
Holuk e, aphwami en an no’gosogo taknobo yo. An nogorlok erlak o,”
oluk ogulom ai.
7Honuelak naduk tenhentarok welegesa a’ge en, Allah iak mo’gulhentigisa a’ge ai, enebam eberak wolomup o. Is enede Allah ebam he’berik poluk, enebe enelaluk welat emin, waromogoluk emin, togu legesa a’ge ai pobirak poluk, his is enebabut wokho henede Allah pam he’berik pogu lomup o. 8At Yesus Kristus ebe re, o pageat en, yogodak en, otok modok welago ai ’gela’ge, pobuk asogoat otok modok welema o. 9Asogo welema ai en e, is aphwami logon en di wene yu wene mu a’ge pam lalhonobuano yo. Ye, is aphwami nadugat enemde no’gwi a’ge paget logo poluk togu legesa ai pam op om erlakma re, nenede ai pam hurle om mia o. We, Allah ebabut op en woknentasu ai pam nenede opsogo hurle om o.
10Allah owi sum a’ge werikmu is ap Allah eiye Yahudi a’ge en wam Allah paget wusogo helep delak a’ge pam pogu legesa ai ’gela’ge, nis en Allah paget pogu lege a’ge ai, is ap ai en nau wom mia o. 11#Ima. 16:27O eba is ap Allah eiye a’ge onue ’gain en is ’berlegat wiak togu legesa a’ge Allah en erlagapsogo ukpou wagoluk, wam wusogo emep woluk o ogorlirak Allah u’gwarek owi pam ’gela’ge ai ’gwise laga a’geat de, wam ebe nak e, leget o’borl akhit odouk narlik pei laga legesa. 12Asogo togu legesa ai en, at Yesus u’gwarek emep pam eiyagai wiak togwi a’ge hosogo, enebe Allah paget paiogoluk leget pakleget emde ’belak abel o’borl akhit waraga ai o. 13-14Asogo waraga ai en, nis ’gwiangma yema modok wolomul erlak o. We, nis pobuk o modok-modok wolomul a’ge palo togu lege ai en e, at Yesus aphwami en eniak elitnu ding-dungsogo yagogu legesa ai ’gela’ge, nis asogo mo’gulnontogukhwe, at e’bek leget abel o’borl akhit libomok o. 15Ai en e, at Yesus emin hwedik welat, nis en e,
“Naik Allah,” oluk wam wusogo at ebaget wogogulom ’gela’ge, nin hwedik nan hwedik nenemde pam Allah onuk loksogo erliktogwi modok wolomok o. 16Asogo togulat, aphwami logon obabonobogulat, lerontogulat, togu lomok o. Asogo togulom ai re, Allah ede opsogo uam warogulom ’gela’geatma re, memerak pagup no yo.
17Pobuk Allah en e, his honuelak disogo mo’gulontouwa,
Is enede paget no’gosogo togu legeptik, oluk mo’gulontogwiam, is onogola en e,
“Nis neneba lo’bogat o’go mo’gulomul hegi o,” oluk, opsogo tenhentarok modok welagai ai en e, is eneragam ’gonu oluk eniak hologo togu lomup o. Asogo togu lorogup holuk e, is onogola enagaisogo, his henebaget togu lema ai o. A’geat de, his en is eniak hologo togu lorogup erlak holuk e, is onogola wiak welat, his henebaget we ’burlat togulom o.
18Nis di a’ge yu a’ge opsogo nak togu lomogoluk, opogulat, nonogola en e,
“Nis wene nenebam erlak. Nonogola selak,” oluk opogu lege ai en, nis nenebaget se’ban ogu lomup o. 19Ogulat, ebe logo re, an nebe Allah en perleneat his hene’bek togolik peraknobumagoluk se’ban ogu lorogup en mo’gulhentegis ai o.
At Allah en obabonobuagoluk se’ban egesa wene
20Nenaik Allah la’bulik nenebasu a’ge ano en, nonue ’gain Onuk Logo a’ge Yesus waragarikmu en ebe elalugaptegei. At ebe emep namogo werigisa ai pam, Allah en wene modok welema a’ge wusogo woknenebegeitik, nis ’berlegat Yesus en uam domba ’gela’ge opsogo tennentarok welemagoluk ebe edikpesi ai o. 21His Allah ogola agai epasu a’ge nak opsogo togu lorogup en e, di a’ge yu a’ge op a’ge ’berlegat wokhontouwak o. Asogo wokhentasuam, nis nenemin ’berlek en Allah ogola opsogo togu lemagoluk, nenebabut at en woknontouwa ai, ebe re, Yesus Kristus en woknontouwak o. At Kristus aiat erliktogwi modok wolomok o. Demat emak u ’gela’ge,
“Amin,” egi ai o.
Wene ologun wusogo mo’gulentigisa wene
22Narilak norokhwi. Wene horoksogoat henesa’go wusogo pelal wokho hene’bek perakpou wegi ai, henebit om erlakma en henesa’go hwelak wolomup o. 23Ye, nonot Timotius ano re, ebe arat herle hebilogo lebikpegesema en henaluksogo welemagoluk mo’gulhentegis o. At ebe perleneat an niau wago holuk e, an pobuk his hentau wagalat nemin womul o. 24His en e, is ap honuelak his tenhentarok welagai a’ge ’berlegat emin, Allah eiyagai pema akhit ’berlegat emin,
“Hau wathenebegei o,” oluk mo’gulontomup o. Ye, nenarilak nonorokhwi o Italia welagai a’ge en hau wathenebigisayat o. 25Narilak norokhwi. Allah ebabut op a’ge ano en his ’berlegat tenhentarok welemak o.
اکنون انتخاب شده:
Ibrani 13: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید